𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴠𐴕 𐴅𐴞 𐴀𐴡𐴌 𐴑𐴝𐴌𐴑𐴟𐴕 𐴀𐴠𐴑 𐴎𐴡𐴕 𐴄𐴠𐴌𐴝𐴑𐴡𐴌 𐴏𐴞𐴁𐴠 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴱𐴱

𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴰 : 𐴵 𐴁𐴝𐴎𐴠 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴓𐴝𐴔𐴁𐴝 𐴐𐴤𐴞𐴘𐴧𐴝𐴌 𐴱 𐴀𐴦𐴞𐴏𐴄 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴵 𐴱 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑 𐴱 𐴉𐴡𐴓𐴞𐴘𐴝 𐴉𐴝𐴌𐴝𐴌 𐴌𐴝𐴏𐴃𐴝𐴌 𐴔𐴝𐴃𐴤𐴝 𐴀𐴝𐴌 𐴓𐴝𐴔𐴁𐴝 𐴐𐴤𐴘𐴧𐴝 𐴱 𐴖𐴥𐴞𐴏𐴄𐴢 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴵 𐴱 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑𐴡𐴌 𐴔𐴝𐴎𐴤𐴠 𐴔𐴝𐴙𐴅𐴧𐴤𐴙𐴝 𐴱 𐴄𐴠𐴌𐴝𐴑 𐴒𐴝𐴌𐴥𐴞 𐴀𐴠𐴑𐴧𐴤𐴝𐴕𐴡𐴌 𐴏𐴞𐴁𐴠 𐴁𐴠𐴐𐴤𐴡𐴌𐴑𐴝𐴌𐴞 𐴀𐴠𐴕 𐴅𐴞 𐴀𐴡𐴌 𐴑𐴝𐴌𐴑𐴟𐴕 𐴀𐴝𐴑 𐴎𐴡𐴌 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴴 𐴱 𐴓𐴡𐴔𐴁𐴤𐴡𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 𐴐𐴤𐴝𐴀𐴝𐴂𐴢 𐴔𐴟𐴇𐴝𐴔𐴧𐴡𐴊𐴢 𐴏𐴞𐴌𐴝𐴅 𐴀𐴝𐴔𐴞𐴕𐴠 𐴈𐴡𐴘𐴧𐴥𐴠 𐴱𐴱

𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴊𐴠 𐴀𐴥𐴞𐴁𐴤𐴝 𐴀𐴥𐴡𐴙𐴓𐴊𐴠 𐴀𐴟𐴑𐴤𐴞𐴘𐴝 𐴀𐴟𐴉𐴡𐴎𐴞𐴓𐴥𐴝𐴌 𐴎𐴝𐴙𐴓𐴧𐴝 𐴉𐴝𐴓𐴡𐴚 𐴘𐴟𐴕𐴞 𐴀𐴥𐴡𐴕𐴡𐴌 𐴉𐴝𐴙𐴕𐴧𐴥𐴝 𐴐𐴤𐴞𐴘𐴧𐴝 𐴀𐴠𐴓𐴝𐴑𐴝𐴌 𐴇𐴥𐴠𐴓𐴝𐴓𐴟𐴊𐴢 𐴊𐴞𐴕𐴡𐴌 𐴁𐴡𐴖𐴢 𐴱 𐴎𐴞𐴁𐴤𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴌 𐴁𐴠𐴐𐴤𐴡𐴌𐴑𐴝𐴌𐴞 𐴀𐴠𐴕 𐴅𐴞 𐴀𐴡𐴌 𐴀𐴞𐴐𐴑𐴟𐴓𐴡𐴌 𐴔𐴝𐴐𐴄𐴡𐴌 𐴌𐴝𐴁𐴞𐴀𐴝 𐴀𐴝𐴈𐴃𐴡𐴌 𐴁𐴡𐴐𐴢 𐴲 𐴲 𐴁𐴡𐴏𐴥𐴡𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴢 𐴴 𐴱 𐴓𐴡𐴔𐴁𐴤𐴡𐴌 𐴁𐴠𐴄𐴤𐴠𐴓𐴞𐴘𐴧𐴠𐴕𐴡𐴌 𐴁𐴡𐴌𐴡 𐴏𐴞𐴌𐴝𐴅 𐴀𐴝𐴔𐴞𐴕𐴠 𐴱 𐴒𐴤𐴡𐴄𐴡𐴕𐴝 𐴒𐴤𐴡𐴙𐴄𐴧𐴤𐴙𐴠𐴊𐴠 𐴎𐴝𐴒𐴝 𐴘𐴥𐴝𐴀𐴝𐴕𐴡𐴌 𐴁𐴤𐴝𐴐𐴞𐴕𐴊𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴖𐴝𐴓𐴝 𐴊𐴞𐴀𐴞 𐴱 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴈𐴥𐴝𐴄𐴤𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴘𐴝𐴀𐴝𐴕𐴡𐴌 𐴉𐴡𐴌 𐴀𐴡𐴙𐴕𐴧𐴡 𐴀𐴠𐴑𐴧𐴤𐴝𐴕 𐴒𐴤𐴡𐴄𐴡𐴕𐴝 𐴀𐴥𐴡𐴙𐴓𐴊𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴢 𐴀𐴠𐴓𐴝𐴑𐴝𐴌 𐴉𐴝𐴀𐴝𐴌𐴡𐴃𐴧𐴟 𐴱 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴡𐴕𐴟𐴔𐴝𐴕𐴞𐴑 𐴌𐴝𐴙𐴃𐴡𐴌 𐴰 𐴰 𐴸 𐴁𐴝𐴎𐴠 𐴱 𐴄𐴠𐴑𐴕𐴝𐴉𐴡𐴌 𐴕𐴥𐴞𐴓𐴥𐴝 𐴘𐴟𐴕𐴞 𐴀𐴥𐴡𐴕𐴡𐴌 𐴔𐴥𐴟𐴇𐴏𐴠𐴕𐴞 𐴌𐴟𐴇𐴝𐴙𐴚𐴒𐴙𐴝 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴌 𐴉𐴡𐴏𐴥𐴞𐴔𐴡𐴌 𐴉𐴝𐴀𐴝𐴌𐴡𐴃𐴧𐴟 𐴱 𐴐𐴤𐴡𐴌𐴞𐴉𐴢 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴔𐴡𐴌𐴝 𐴓𐴝𐴐𐴢 𐴁𐴝𐴀𐴞𐴌 𐴒𐴡𐴙𐴅𐴧𐴤𐴙𐴠 𐴱 𐴐𐴤𐴡𐴌𐴞𐴉𐴢 𐴀𐴥𐴡𐴙𐴓𐴊𐴠 𐴔𐴥𐴟𐴇𐴏𐴠𐴕𐴞 𐴌𐴟𐴇𐴝𐴙𐴚𐴒𐴙 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔 𐴁𐴞 𐴁𐴡𐴓𐴡𐴑𐴡𐴌 𐴁𐴤𐴝𐴐𐴞𐴕𐴊𐴝 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴠𐴑𐴕𐴝𐴉𐴢 𐴔𐴡𐴋𐴠𐴓𐴢 𐴃𐴤𐴝𐴕𐴝𐴌 𐴀𐴡 𐴏𐴞 𐴔𐴟𐴇𐴝𐴔𐴧𐴡𐴊𐴢 𐴒𐴞𐴘𐴝𐴏𐴟𐴊𐴧𐴞𐴕𐴡𐴌 𐴌𐴠𐴂𐴟𐴄𐴢 𐴔𐴡𐴎𐴞𐴕 𐴱 𐴉𐴝𐴀𐴝𐴌𐴡𐴌 𐴁𐴤𐴟𐴃𐴤𐴡𐴌𐴠 𐴏𐴝𐴌𐴝 𐴔𐴞𐴑𐴧𐴤𐴙𐴝 𐴎𐴦𐴡𐴣𐴓𐴡𐴌 𐴈𐴝𐴣𐴏𐴝𐴃𐴢 𐴐𐴤𐴡𐴌𐴞𐴉𐴡𐴌 𐴓𐴝𐴐𐴢 𐴑𐴠𐴙𐴏𐴧𐴥𐴟 𐴔𐴠𐴍𐴠 𐴎𐴤𐴝𐴉𐴝𐴘𐴧𐴝 𐴀𐴝𐴏𐴥𐴠 𐴱 𐴉𐴝𐴀𐴝𐴌𐴡𐴃 𐴒𐴝𐴏𐴢 𐴈𐴝𐴍𐴞 𐴁𐴤𐴡𐴓𐴧𐴝 𐴎𐴝𐴀𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴊𐴠𐴑𐴤𐴞 𐴱 𐴉𐴟𐴓𐴞𐴐𐴤𐴡𐴌𐴠 𐴈𐴥𐴡𐴁𐴡𐴌 𐴎𐴝𐴕𐴝𐴀𐴡𐴕𐴡𐴌 𐴁𐴦𐴝𐴊𐴠 𐴱 𐴉𐴟𐴓𐴞𐴐𐴢 𐴀𐴝𐴀𐴝𐴘 𐴔𐴡𐴌𐴝 𐴓𐴝𐴐𐴢 𐴃𐴟𐴓𐴥𐴞 𐴀𐴝𐴙𐴕𐴧𐴥𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Ukhiyanews.com