𐴁𐴝𐴓𐴟 𐴈𐴥𐴝𐴓𐴞 𐴹 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴔𐴝𐴌𐴑𐴤𐴠𐴄𐴡𐴃𐴢 𐴀𐴦𐴡𐴙𐴕 𐴱𐴱

𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴲 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴓𐴡𐴒𐴢 𐴁𐴤𐴡𐴒𐴢 𐴌𐴝𐴃𐴞𐴘𐴝 𐴵 𐴴 : 𐴷 𐴁𐴝𐴎𐴠 𐴱 𐴁𐴝𐴓𐴟 𐴈𐴥𐴝𐴓𐴞 𐴹 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴝𐴏𐴥𐴠𐴊𐴠 𐴔𐴝𐴌𐴑𐴤𐴠𐴄𐴡𐴃𐴢 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴀𐴦𐴡𐴙𐴕 𐴊𐴤𐴡𐴙𐴅𐴧𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴌𐴠𐴂𐴟𐴄 𐴔𐴡𐴎𐴞𐴕 𐴏𐴟𐴓𐴝 𐴂𐴦𐴝𐴖𐴝𐴌𐴡𐴌 𐴁𐴠𐴄𐴝𐴌𐴞 𐴐𐴦𐴡𐴄 𐴒𐴡𐴌𐴥𐴞 𐴊𐴤𐴡𐴙𐴅𐴧𐴙𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴈𐴥𐴡𐴁𐴡𐴌 𐴉𐴝𐴘 𐴔𐴡𐴕𐴃𐴡𐴌 𐴎𐴝𐴒𐴝 𐴘𐴥𐴝𐴀𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴡𐴌 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴀𐴝𐴀𐴝𐴘 𐴱 𐴀𐴦𐴡𐴙𐴕 𐴁𐴦𐴠𐴐𐴢 𐴕𐴥𐴡 𐴏𐴥𐴡𐴌𐴥𐴘𐴃𐴠 𐴕𐴞𐴉𐴥𐴝𐴘 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 𐴔𐴝𐴌𐴑𐴤𐴠𐴄𐴢 𐴀𐴡𐴓𐴝 𐴊𐴟𐴖𐴝𐴕𐴊𐴝𐴌 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴡𐴌 𐴁𐴠𐴐𐴤𐴞 𐴐𐴤𐴟𐴑𐴟𐴌𐴞𐴘𐴝 𐴎𐴝𐴕𐴝𐴘𐴧𐴠 𐴱 𐴐𐴤𐴟𐴊𐴠 𐴀𐴠𐴑𐴧𐴤𐴝𐴕 𐴊𐴟𐴖𐴝𐴕 𐴑𐴠𐴙𐴏𐴧𐴥𐴟 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠𐴊𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴈𐴡𐴕𐴥𐴡 𐴅𐴝𐴕𐴞 𐴓𐴟𐴏𐴧𐴝𐴕 𐴀𐴝𐴌 𐴒𐴤𐴝𐴙𐴓 𐴕𐴥𐴡 𐴀𐴥𐴡𐴀𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴁𐴠𐴐𐴤𐴞 𐴒𐴤𐴡𐴕𐴥𐴡 𐴀𐴝𐴁𐴝𐴊𐴞 𐴀𐴡𐴓𐴝 𐴑𐴠𐴀𐴠𐴔𐴡𐴃𐴢 𐴁𐴠𐴐𐴤𐴞 𐴋𐴡𐴣𐴀𐴡𐴌 𐴓𐴟𐴏𐴧𐴝𐴕 𐴕𐴥𐴡 𐴀𐴥𐴡𐴘𐴃𐴠 𐴱 𐴑𐴠𐴀𐴠𐴔 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴠 𐴃𐴡𐴌𐴝 𐴃𐴡𐴌𐴞 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞 𐴁𐴝𐴏𐴝𐴘𐴢 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴑𐴠𐴀𐴠𐴔 𐴐𐴤𐴝𐴐𐴡𐴕 𐴇𐴥𐴡𐴑𐴤𐴟𐴔𐴡𐴃𐴠 𐴑𐴠𐴀𐴠𐴔𐴡𐴃 𐴏𐴟𐴓𐴝𐴌 𐴂𐴦𐴝𐴖𐴝𐴌𐴡𐴌 𐴔𐴞𐴐𐴤𐴞𐴕 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴀𐴥𐴠𐴇𐴃𐴞𐴘𐴝𐴃𐴞 𐴕𐴞𐴘𐴡𐴔 𐴀𐴥𐴡𐴑𐴧𐴡𐴓𐴡𐴌 𐴄𐴠𐴕𐴧𐴞𐴕 𐴊𐴞𐴀𐴞𐴁𐴡𐴓𐴧𐴥𐴝 𐴁𐴠𐴐𐴤𐴞 𐴎𐴟𐴌 𐴊𐴞𐴀𐴞 𐴈𐴡𐴀𐴡𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴀𐴠𐴕𐴋𐴞𐴓𐴧𐴝 𐴒𐴤𐴡𐴄𐴡𐴕𐴝 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴁𐴝𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴱 𐴇𐴥𐴝𐴔𐴞𐴐𐴤𐴝 𐴏𐴟𐴓𐴝𐴌 𐴔𐴞𐴐𐴤𐴞𐴕 𐴏𐴠𐴑 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴀𐴝𐴌 𐴑𐴠𐴀𐴠𐴔𐴡𐴃𐴢 𐴇𐴥𐴠𐴉𐴝𐴎𐴡𐴃𐴞 𐴕𐴞𐴘𐴧𐴡𐴔 𐴑𐴝𐴕𐴟𐴕𐴡𐴌𐴥𐴠 𐴘𐴥𐴡 𐴁𐴠𐴐𐴤𐴞 𐴒𐴡𐴌𐴥𐴞 𐴊𐴤𐴞𐴘𐴧𐴝𐴕𐴡𐴃𐴢 𐴌𐴝𐴑𐴤𐴞𐴁𐴤𐴡𐴓𐴧𐴝 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴟𐴀𐴟𐴔 𐴔𐴞𐴑𐴧𐴤𐴙𐴝 𐴀𐴠𐴕𐴋𐴞𐴓𐴧𐴝 𐴒𐴤𐴡𐴄𐴡𐴕𐴝 𐴀𐴥𐴡𐴑𐴧𐴡𐴓 𐴈𐴡𐴔 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴃𐴡𐴊𐴝𐴌𐴟𐴑𐴞 𐴑𐴝𐴌𐴖𐴝𐴘 𐴀𐴥𐴡𐴑𐴧𐴡𐴓 𐴏𐴡𐴓𐴠𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor