𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴝𐴏𐴝𐴘 𐴓𐴡𐴘𐴁𐴡𐴓𐴧𐴥𐴝 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴅𐴝𐴕 𐴁𐴝𐴏𐴝𐴘 𐴓𐴡𐴀𐴡𐴕𐴡𐴌𐴥𐴠 𐴀𐴠𐴑𐴀𐴡𐴔𐴞𐴑𐴃𐴝 𐴊𐴞𐴀𐴞𐴁𐴡𐴓𐴧𐴥𐴝 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑 𐴔𐴡𐴇𐴝 𐴌𐴝𐴎𐴝𐴌 𐴀𐴡𐴉𐴥𐴞𐴏𐴥𐴠 𐴱 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴕𐴟𐴖𐴝 𐴁𐴡𐴏𐴥𐴡𐴌 𐴒𐴤𐴡𐴙𐴓𐴧𐴙𐴠𐴊𐴠 𐴐𐴤𐴡𐴔𐴡 𐴘𐴝𐴀𐴝𐴕𐴡𐴌 𐴉𐴝𐴣𐴏𐴢 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴐𐴤𐴡𐴃𐴢 𐴐𐴤𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴱 𐴀𐴠𐴓𐴝𐴑𐴝𐴌 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴃𐴢 𐴏𐴥𐴝𐴀𐴝𐴌𐴝 𐴓𐴡𐴘𐴁𐴡𐴓𐴧𐴥𐴝 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴡𐴌𐴝𐴕 𐴁𐴝𐴏𐴝𐴘 𐴓𐴡𐴀𐴡𐴕𐴧𐴥𐴝𐴕 𐴀𐴠𐴑𐴀𐴡𐴔𐴞𐴑𐴃𐴝 𐴊𐴡𐴀𐴡𐴕𐴡𐴌 𐴀𐴟𐴉𐴡𐴎𐴟𐴑𐴃𐴡 𐴁𐴡𐴓𐴞 𐴱 𐴀𐴞𐴐𐴤𐴞𐴘𐴧𐴥𐴝 𐴉𐴠𐴏𐴞𐴂𐴥𐴞𐴑 𐴊𐴠𐴐𐴢 𐴀𐴥𐴡𐴑𐴧𐴡𐴓𐴡𐴌 𐴀𐴡𐴉𐴥𐴞𐴏𐴥𐴡𐴌 𐴎𐴞𐴔𐴧𐴝𐴊𐴝𐴌 𐴔𐴠𐴕𐴥𐴞𐴅𐴤𐴝𐴌 / 𐴇𐴝𐴘 𐴑𐴙𐴟𐴕 𐴅𐴟𐴕𐴠 𐴀𐴠𐴓𐴝𐴕 𐴕𐴝𐴔𐴝𐴃𐴢 𐴓𐴠𐴑𐴤𐴞𐴘𐴧𐴡𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑𐴡𐴃𐴢 𐴶 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴟𐴄𐴢 𐴓𐴡𐴘 𐴔𐴡𐴓𐴠𐴆𐴤𐴙𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴝𐴏𐴥𐴠 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴉𐴝𐴣𐴏𐴢 𐴃𐴝𐴌𐴥𐴞𐴑𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴴 𐴶 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴀𐴠 𐴊𐴟𐴕𐴥𐴞 𐴁𐴟𐴍𐴡𐴌 𐴌𐴟𐴇𐴝𐴙𐴚𐴒𐴙𐴝 𐴰 𐴶 𐴴 𐴎𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴟 𐴊𐴡𐴐𐴢 𐴎𐴡𐴕 𐴀𐴝𐴊𐴤𐴝 𐴌𐴝𐴏𐴧𐴝𐴃𐴢 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴀𐴠𐴓𐴝𐴕 𐴕𐴝𐴔𐴝𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴃𐴞𐴕 𐴇𐴥𐴝𐴉𐴃𐴝 𐴀𐴝𐴒𐴠 𐴘𐴥𐴡 𐴵 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴏𐴞𐴌𐴞𐴓𐴡𐴚𐴑𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠 𐴔𐴡𐴕𐴃𐴡𐴌 𐴀𐴝𐴊𐴤𐴝 𐴉𐴡𐴣𐴃𐴤𐴡𐴃𐴢 𐴁𐴟𐴍𐴡𐴌 𐴁𐴤𐴟𐴃𐴤𐴡𐴌𐴠 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴈𐴡𐴘𐴧𐴥𐴠 𐴱𐴱

𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴉𐴝𐴣𐴏𐴢 𐴃𐴝𐴌𐴥𐴞𐴑𐴡𐴃𐴢 𐴌𐴗𐴠𐴄𐴝𐴌 𐴈𐴥𐴡𐴁𐴡𐴌 𐴀𐴠𐴑𐴧𐴤𐴝𐴕𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴔𐴡𐴓𐴠𐴆𐴤𐴙𐴝𐴌 𐴓𐴡𐴚𐴑𐴝𐴖𐴞 𐴋𐴞𐴘𐴝𐴌 𐴈𐴝𐴣𐴏𐴥𐴠 𐴈𐴝𐴣𐴏𐴥𐴠 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴱 𐴃𐴞𐴕 𐴐𐴤𐴡𐴃𐴢 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴉𐴟𐴌𐴝𐴘𐴧𐴝 𐴁𐴟𐴄 𐴊𐴟𐴘𐴧𐴥𐴝𐴕𐴡𐴌𐴥𐴠 𐴑𐴟𐴓𐴡𐴃𐴢 𐴁𐴤𐴞𐴌𐴝𐴘𐴃𐴡 𐴕𐴡 𐴊𐴞𐴀𐴞 𐴊𐴡𐴙𐴅𐴧𐴙𐴝𐴌 𐴀𐴥𐴞𐴑𐴧𐴤𐴙𐴝 𐴄𐴤𐴠𐴓𐴞 𐴊𐴞𐴘𐴧𐴥𐴠𐴊𐴠 𐴀𐴝𐴏𐴥𐴠 𐴱 𐴁𐴡𐴓𐴞 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴈𐴡𐴘𐴧𐴥𐴠 𐴱 𐴏𐴥𐴝𐴁𐴟𐴃𐴢 𐴏𐴥𐴝𐴌𐴥𐴝 𐴁𐴡𐴌𐴔𐴥𐴝𐴃𐴧𐴤𐴟 𐴔𐴝𐴕𐴥𐴟𐴙𐴐𐴢 𐴁𐴤𐴡𐴌𐴥𐴞 𐴀𐴝𐴘𐴧𐴥𐴠𐴊𐴠 𐴁𐴟𐴄𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴊𐴡𐴌𐴥𐴡 𐴔𐴡𐴌𐴥𐴡 𐴏𐴠𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴓𐴠𐴆𐴤𐴙𐴝𐴌 𐴇𐴥𐴡𐴑𐴤𐴟𐴔𐴡𐴃𐴠 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴀𐴡𐴘 𐴊𐴞𐴘𐴧𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RFAburmese