𐴎𐴝𐴔𐴃𐴡𐴓𐴞 𐴵 𐴱 𐴓𐴡𐴔𐴁𐴤𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴦𐴡𐴙𐴕 𐴎𐴡𐴓𐴝𐴌 𐴒𐴤𐴡𐴄𐴡𐴕𐴝 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴱 𐴳 𐴃𐴝𐴌𐴥𐴞𐴑 𐴌𐴝𐴙𐴃𐴡𐴌 𐴕𐴞𐴐𐴤𐴞𐴃𐴢 𐴓𐴡𐴒𐴢 𐴁𐴤𐴡𐴒𐴢 𐴵 𐴴 : 𐴲 𐴁𐴝𐴎𐴠 𐴱 𐴎𐴝𐴔𐴃𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴵 𐴱 𐴁𐴡𐴓𐴡𐴑 𐴓𐴡𐴔𐴁𐴤𐴡𐴌 𐴏𐴞 𐴴 𐴀𐴡𐴃𐴢 𐴀𐴦𐴡𐴙𐴕 𐴎𐴡𐴓𐴝𐴌 𐴒𐴤𐴡𐴄𐴡𐴕𐴝 𐴀𐴥𐴡𐴘𐴧𐴠 𐴱 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕𐴡𐴃𐴢 𐴁𐴡𐴀𐴡𐴃𐴢 𐴒𐴤𐴡𐴌 𐴀𐴥𐴡𐴑𐴧𐴡𐴓 𐴓𐴟𐴏𐴧𐴝𐴕 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴑𐴠𐴀𐴠𐴔𐴡𐴃𐴢 𐴌𐴡𐴎𐴝𐴑𐴝𐴌𐴝𐴕𐴝 𐴃𐴡𐴖𐴌𐴠 𐴈𐴥𐴠𐴊𐴔𐴡𐴃𐴢 𐴒𐴡𐴌𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴄𐴞𐴀𐴞𐴔𐴠 𐴈𐴥𐴡𐴁𐴡𐴌 𐴉𐴝𐴘𐴢 𐴱𐴱

𐴁𐴠𐴐𐴤𐴞 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴦𐴡𐴙𐴕 𐴑𐴡𐴕𐴄𐴡𐴌𐴟𐴓𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴕𐴥𐴞 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴒𐴤𐴡𐴌 𐴎𐴡𐴓𐴞 𐴎𐴝𐴘 𐴀𐴡𐴐𐴤𐴝𐴕𐴃𐴞𐴃𐴢 𐴉𐴡𐴌𐴞 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴀𐴠𐴔𐴝𐴌𐴅𐴠𐴕𐴏𐴥𐴞 𐴃𐴡𐴖𐴌𐴠 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴃𐴦𐴡𐴙𐴃𐴧𐴝 𐴃𐴤𐴡𐴌 𐴁𐴝𐴕𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴄𐴝𐴁𐴟 𐴀𐴝𐴌 𐴈𐴥𐴝𐴕𐴥𐴝 𐴀𐴝𐴌 𐴈𐴦𐴡𐴌 𐴏𐴟𐴖𐴡𐴌 𐴀𐴥𐴡𐴑𐴧𐴡𐴓 𐴊𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 𐴀𐴦𐴡𐴙𐴕 𐴎𐴡𐴓𐴝𐴌 𐴏𐴥𐴡𐴁𐴡𐴁𐴡𐴌 𐴁𐴦𐴝𐴁𐴡𐴃𐴠 𐴃𐴡𐴊𐴝𐴌𐴑𐴞 𐴈𐴝𐴔 𐴏𐴡𐴓𐴠𐴌 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴏𐴡𐴄𐴡𐴒𐴠𐴌𐴝𐴔 𐴋𐴞𐴐𐴄𐴤𐴞𐴑𐴡𐴌 𐴀𐴝𐴕𐴖𐴝𐴌𐴝 𐴃𐴤𐴝𐴕𐴝𐴌 𐴀𐴠𐴓𐴝𐴑𐴝𐴃𐴧𐴤𐴟 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴰 𐴱 𐴁𐴝𐴎𐴠 𐴱 𐴂𐴝𐴌𐴞𐴑 𐴀𐴟𐴉𐴡𐴎𐴞𐴓𐴥𐴝𐴌 𐴱 𐴂𐴝𐴍𐴟𐴖𐴝 𐴉𐴝𐴌𐴝 𐴀𐴠𐴓𐴝𐴑𐴝𐴌 𐴉𐴝𐴙𐴅𐴧𐴙𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴱 𐴊𐴡𐴙𐴅𐴧𐴙𐴝𐴌 𐴏𐴡𐴌𐴡𐴃𐴧𐴤𐴟 𐴰 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌 𐴁𐴝𐴣𐴊𐴤𐴞 𐴀𐴝𐴕𐴖𐴝𐴌𐴝 𐴃𐴤𐴝𐴕𐴝𐴌 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃𐴢 𐴒𐴡𐴏𐴥𐴝𐴘 𐴊𐴞𐴘𐴧𐴥𐴠 𐴁𐴡𐴓𐴞 𐴱𐴱

𐴀𐴝𐴕𐴖𐴝𐴌 𐴃𐴤𐴝𐴕𐴝𐴌 𐴀𐴡 𐴏𐴞 / 𐴔𐴟𐴇𐴝𐴔𐴧𐴡𐴊𐴢 𐴔𐴟𐴕𐴞𐴌 𐴇𐴥𐴟𐴏𐴝𐴙𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴸 𐴎𐴡𐴕 𐴉𐴟𐴖𐴝𐴙𐴕 𐴶 𐴎𐴡𐴕 𐴁𐴠𐴍𐴝𐴀𐴝𐴙𐴕 𐴶 𐴎𐴡𐴕 𐴁𐴠𐴍𐴞𐴀𐴝𐴙𐴕 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱 𐴘𐴝𐴌 𐴀𐴝𐴒𐴠 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴁𐴤𐴝𐴐𐴡𐴕 𐴏𐴡𐴌𐴡𐴃𐴧𐴤𐴟 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝 𐴑𐴟𐴃𐴤𐴟 𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴝𐴘𐴧𐴥𐴠𐴌𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴵 𐴲 𐴎𐴡𐴕𐴡𐴌𐴥𐴠 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴞 𐴱 𐴊𐴡𐴙𐴅𐴧𐴙𐴝 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃𐴢 𐴒𐴡𐴏𐴥𐴝𐴘 𐴊𐴞𐴘𐴧𐴥𐴠𐴊𐴠 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor