𐴄𐴠𐴑𐴕𐴝𐴉𐴢 𐴎𐴝𐴊𐴞 𐴔𐴟𐴌𐴥𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴈𐴝𐴔 𐴒𐴡𐴌𐴥𐴞 𐴀𐴝𐴘𐴁𐴤𐴝𐴌 𐴐𐴤𐴡𐴣𐴀𐴡𐴃𐴢 𐴋𐴝𐴣𐴈𐴝𐴙𐴃𐴠 𐴊𐴤𐴡𐴌𐴥𐴞 𐴀𐴠𐴑 𐴓𐴝𐴑 𐴄𐴞𐴛𐴧𐴝𐴌 𐴊𐴡𐴌𐴠 𐴔𐴝𐴒𐴠𐴌 𐴱𐴱

𐴁𐴝𐴚𐴓𐴝 𐴊𐴠𐴐𐴢 𐴄𐴠𐴑𐴕𐴝𐴉𐴡𐴌 𐴎𐴝𐴊𐴞 𐴔𐴟𐴌𐴥𐴝𐴃𐴢 𐴀𐴝𐴏𐴥𐴠𐴊𐴠 𐴷 𐴲 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴱 𐴈𐴝𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 𐴒𐴞𐴘𐴧𐴥𐴠𐴊𐴠 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴈𐴝𐴔 𐴒𐴡𐴌𐴥𐴞 𐴖𐴝𐴉𐴠𐴏𐴢 𐴑𐴠𐴀𐴠𐴔𐴡𐴃𐴢 𐴀𐴝𐴘𐴧𐴥𐴠𐴌𐴊𐴧𐴠 𐴐𐴤𐴡𐴣𐴀𐴡𐴃𐴢 𐴱 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴡𐴓𐴠 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴀𐴥𐴝𐴣𐴎𐴡𐴙𐴕𐴧𐴝 𐴊𐴤𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴱 𐴀𐴥𐴡𐴊𐴡𐴌 𐴁𐴝𐴀𐴝𐴌𐴥𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴎𐴡𐴕 𐴉𐴞𐴏𐴥𐴠 𐴌𐴠𐴇𐴥𐴝𐴀𐴞 𐴄𐴞𐴛𐴧𐴝 𐴀𐴠𐴑 𐴓𐴝𐴑𐴡𐴌 𐴊𐴡𐴌𐴠 𐴊𐴞𐴀𐴞𐴓𐴥𐴠 𐴀𐴠𐴌𐴞 𐴊𐴞𐴘𐴧𐴟𐴔𐴊𐴠 𐴱 𐴕𐴡 𐴊𐴞𐴀𐴞𐴓𐴥𐴠 𐴎𐴦𐴡𐴌 𐴒𐴡𐴌𐴥𐴝𐴘 𐴊𐴞𐴘𐴧𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞𐴌 𐴏𐴥𐴝𐴣𐴀𐴝𐴃𐴠 𐴒𐴤𐴡𐴌𐴒𐴟𐴐𐴧𐴞𐴌 𐴈𐴝𐴣𐴏𐴥𐴠 𐴉𐴥𐴟𐴕 𐴒𐴡𐴌𐴥𐴞 𐴈𐴡𐴘𐴧𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓 𐴒𐴡𐴌𐴞𐴁𐴢 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴡𐴓𐴠 𐴔𐴝𐴒𐴠𐴌𐴊𐴧𐴠 𐴀𐴥𐴠𐴊𐴦𐴟𐴕 𐴌𐴠𐴇𐴥𐴝𐴀𐴞 𐴄𐴞𐴛𐴧𐴝 𐴊𐴞𐴀𐴞 𐴕𐴡 𐴉𐴝𐴌𐴥𐴡𐴕𐴡𐴌 𐴇𐴥𐴝𐴓𐴡𐴃𐴢 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴏𐴞𐴕𐴃𐴝 𐴀𐴡𐴐𐴤𐴝𐴕𐴃𐴞𐴃𐴢 𐴁𐴡𐴓𐴞 𐴱 𐴁𐴞𐴋𐴞𐴘𐴟 𐴀𐴟𐴒𐴧𐴤𐴗𐴝𐴃𐴢 𐴉𐴥𐴟𐴕𐴥𐴝 𐴒𐴞𐴘𐴧𐴥𐴠𐴊𐴠 𐴔𐴟𐴑𐴎𐴟𐴁𐴝𐴕𐴞 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴑𐴟𐴃𐴤𐴟𐴉𐴝𐴓𐴡𐴚 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴳 𐴁𐴡𐴓𐴡𐴑 𐴓𐴡𐴔𐴁𐴤𐴡𐴌 𐴏𐴞 𐴸 𐴳 𐴀𐴡𐴃𐴢 𐴃𐴤𐴝𐴑𐴤𐴠𐴊𐴠 𐴱𐴱

𐴊𐴞𐴕 𐴔𐴡𐴎𐴟𐴌𐴞 𐴈𐴝𐴔 𐴒𐴡𐴌𐴥𐴞 𐴈𐴥𐴝𐴀𐴝𐴊𐴠 𐴏𐴝𐴙𐴌 𐴎𐴡𐴕 𐴉𐴟𐴖𐴝𐴌 𐴁𐴝𐴂𐴢 𐴀𐴝𐴌𐴠𐴉𐴢 𐴁𐴡𐴐𐴢 𐴴 𐴳 𐴁𐴡𐴏𐴥𐴡𐴌 𐴱 𐴈𐴝𐴔𐴡𐴃𐴢 𐴒𐴞𐴘𐴧𐴥𐴠𐴊𐴠 𐴀𐴥𐴠𐴕𐴃𐴟 𐴐𐴤𐴝𐴔𐴓𐴝𐴉𐴟𐴌 𐴁𐴤𐴝𐴐𐴤𐴞 𐴊𐴠𐴐𐴤𐴡𐴙𐴃𐴧𐴝 𐴋𐴝𐴣𐴈𐴝𐴙𐴃𐴢 𐴈𐴡𐴊𐴦𐴟𐴕𐴠 𐴊𐴤𐴡𐴌𐴥𐴞 𐴁𐴝𐴣𐴊𐴤𐴞 𐴌𐴝𐴑𐴤𐴞 𐴱 𐴀𐴝𐴣𐴐𐴄𐴡 𐴓𐴝𐴑 𐴁𐴝𐴚𐴓𐴝 𐴌𐴠𐴇𐴥𐴝𐴀𐴞 𐴄𐴞𐴛𐴧𐴝 𐴔𐴝𐴒𐴠𐴌 𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌𐴠𐴉𐴡𐴌 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴄𐴞𐴛𐴧𐴝 𐴊𐴞𐴀𐴞 𐴕𐴡𐴉𐴝𐴌𐴥𐴠𐴌 𐴊𐴠 𐴀𐴥𐴠𐴃𐴡𐴓𐴧𐴝 𐴀𐴥𐴞𐴃𐴤𐴝𐴌𐴥𐴠 𐴏𐴥𐴞𐴘𐴧𐴡𐴓 𐴊𐴞𐴀𐴞 𐴀𐴥𐴝𐴃𐴢 𐴄𐴤𐴠𐴚 𐴒𐴡𐴓𐴝 𐴁𐴠𐴌𐴥𐴝𐴘𐴢 𐴁𐴝𐴣𐴊𐴤𐴞 𐴔𐴝𐴌𐴠𐴌𐴊𐴧𐴠 𐴁𐴞𐴋𐴞𐴘𐴟 𐴒𐴤𐴡𐴌𐴒𐴟𐴐𐴧𐴞𐴌 𐴈𐴝𐴣𐴏𐴥𐴠 𐴊𐴞𐴉𐴠𐴍𐴥𐴝𐴘𐴧𐴠 𐴱𐴱

𐴐𐴤𐴠𐴐𐴠 𐴀𐴝𐴌𐴠𐴉𐴡𐴌 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴎𐴠𐴈𐴥𐴡𐴕 𐴀𐴥𐴞𐴃𐴤𐴝𐴌𐴥𐴝 𐴔𐴝𐴒𐴠𐴌𐴊𐴠 𐴀𐴥𐴠𐴊𐴦𐴟𐴕 𐴌𐴠𐴇𐴥𐴝𐴀𐴝 𐴄𐴞𐴛𐴧𐴝 𐴊𐴞𐴀𐴞 𐴕𐴥𐴡 𐴉𐴝𐴌𐴠 𐴱 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴞𐴃𐴧𐴟 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱 𐴎𐴡𐴊𐴞 𐴀𐴠 𐴁𐴤𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴋𐴝𐴓𐴝𐴓𐴢 𐴀𐴥𐴡𐴑𐴧𐴡𐴓𐴢 𐴀𐴝𐴌 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴡𐴓𐴡𐴌 𐴀𐴥𐴝𐴃𐴡𐴃𐴢 𐴉𐴡𐴌𐴞 𐴊𐴤𐴡𐴚𐴐𐴡 𐴀𐴥𐴡𐴘 𐴎𐴝𐴘𐴓𐴥𐴠 𐴱 𐴃𐴡𐴀𐴡𐴘 𐴀𐴥𐴞𐴃𐴝𐴌𐴥𐴝𐴌 𐴔𐴟𐴀𐴟𐴔 𐴈𐴝𐴓 𐴃𐴡 𐴁𐴠𐴐𐴤𐴞 𐴋𐴡𐴌𐴡𐴃𐴢 𐴱 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴞𐴕𐴏𐴦𐴝𐴉𐴢 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴁𐴠𐴁𐴡𐴏𐴃𐴤𐴝 𐴀𐴥𐴡𐴘 𐴉𐴝𐴌𐴠 𐴉𐴥𐴝𐴀𐴝𐴕 𐴱 𐴁𐴝𐴚𐴓𐴝 𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴢 𐴀𐴝𐴌 𐴊𐴠𐴐𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴌𐴥𐴠𐴌𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN