𐴄𐴠𐴑𐴕𐴝𐴉𐴡𐴃𐴧𐴤𐴟 𐴶 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴏𐴝𐴘𐴢 𐴓𐴡𐴘𐴧𐴥𐴠 𐴀𐴝𐴌 𐴉𐴝𐴣𐴏𐴢 𐴎𐴡𐴕 𐴋𐴝𐴓𐴝𐴓 𐴒𐴠𐴌𐴠𐴉𐴃𐴝𐴌 𐴱𐴱

𐴋𐴞𐴏𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴌𐴦𐴡𐴘𐴢 𐴁𐴝𐴌𐴠 𐴁𐴞𐴀𐴞𐴕𐴝 𐴱 𐴀𐴟𐴉𐴡𐴎𐴞𐴓𐴥𐴝𐴌 𐴉𐴝𐴀𐴝𐴌 𐴏𐴥𐴡𐴌𐴥𐴝 𐴘𐴟𐴕𐴞𐴀𐴥𐴡𐴕𐴡𐴌 𐴈𐴡𐴏𐴧𐴡𐴉𐴞𐴘𐴝 𐴈𐴡𐴁𐴡𐴌𐴡𐴏𐴃𐴤𐴝𐴕 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴱 𐴉𐴝𐴀𐴝𐴌𐴡𐴌𐴡 𐴀𐴟𐴖𐴡𐴌𐴠 𐴀𐴝𐴁𐴊𐴟𐴓 𐴀𐴝𐴔𐴞𐴕𐴡𐴌 𐴀𐴠𐴑𐴧𐴤𐴝𐴕 𐴃𐴦𐴡𐴙𐴃𐴧𐴝 𐴄𐴝𐴔𐴁𐴟𐴌 𐴒𐴤𐴡𐴌𐴡𐴃𐴧𐴟 𐴱 𐴐𐴤𐴝𐴘𐴒𐴡𐴌 𐴉𐴡𐴣𐴃𐴤𐴠 𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴶 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴄𐴠𐴑𐴕𐴝𐴉𐴢 𐴃𐴤𐴝𐴕𐴝𐴌 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴋𐴝𐴓𐴝𐴓𐴡𐴌 𐴑𐴡𐴁𐴎𐴝𐴌𐴃𐴧𐴤𐴟 𐴁𐴝𐴏𐴝𐴘 𐴓𐴡𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴑𐴝𐴌𐴖𐴝𐴘 𐴏𐴝𐴓𐴝𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴴 𐴌𐴝𐴀𐴡𐴕𐴋 𐴌𐴝𐴘𐴉𐴥𐴡𐴓𐴡𐴌 𐴒𐴟𐴓𐴞 𐴀𐴠𐴑𐴧𐴤𐴝𐴕 𐴒𐴤𐴟𐴉𐴥𐴝 𐴊𐴦𐴡 𐴀𐴝𐴌 𐴀𐴠𐴑𐴧𐴤𐴝𐴕 𐴑𐴞𐴌𐴞𐴏𐴢 𐴐𐴤𐴡𐴣𐴀𐴡 𐴱 𐴋𐴝𐴓𐴝𐴓𐴞𐴌 𐴓𐴡𐴘 𐴔𐴞𐴓𐴝𐴘𐴧𐴝 𐴀𐴝𐴏𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴉𐴝𐴣𐴏𐴢 𐴎𐴡𐴕 𐴋𐴝𐴓𐴝𐴓 𐴀𐴥𐴡 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴉𐴟𐴓𐴞𐴐𐴠 𐴁𐴝𐴏𐴝𐴘 𐴓𐴡𐴘𐴧𐴥𐴠𐴊𐴠 𐴶 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴸 𐴱 𐴎𐴡𐴕 𐴔𐴡𐴌𐴡𐴊𐴢 𐴱 𐴱 𐴎𐴡𐴕 𐴔𐴝𐴘𐴧𐴝 𐴀𐴝𐴌 𐴷 𐴳 𐴎𐴡𐴕 𐴉𐴟𐴖𐴝𐴙𐴕 𐴁𐴡𐴓𐴞 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴄𐴠𐴑𐴕𐴝𐴉𐴢 𐴀𐴝𐴌 𐴀𐴟𐴑𐴤𐴞𐴘𐴝𐴌 𐴁𐴞𐴁𐴤𐴞𐴕𐴧𐴡 𐴑𐴠𐴀𐴠𐴔𐴡𐴃𐴧𐴟 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴔𐴡𐴓𐴠𐴆𐴤𐴙𐴝𐴌 𐴓𐴟𐴁𐴢 𐴓𐴝𐴓𐴡𐴏𐴢 𐴊𐴞𐴀𐴞 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠𐴊𐴠 𐴱 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴀𐴥𐴡𐴙𐴓𐴊𐴠 𐴌𐴝𐴐𐴤𐴠𐴊𐴢 𐴁𐴝𐴉𐴢 𐴀𐴝𐴁𐴊𐴟𐴐𐴧𐴟𐴑𐴟𐴌 𐴁𐴡𐴐𐴢 𐴵 𐴲 𐴁𐴡𐴏𐴥𐴡𐴌 𐴱 𐴏𐴦𐴝𐴓𐴠𐴇𐴢 𐴀𐴝𐴇𐴔𐴡𐴊𐴢 𐴁𐴝𐴉𐴢 𐴏𐴥𐴟𐴓𐴃𐴝𐴕 𐴀𐴝𐴇𐴔𐴡𐴊𐴢 𐴵 𐴳 𐴁𐴡𐴏𐴥𐴡𐴌 𐴱 𐴕𐴟𐴌𐴟𐴓 𐴑𐴡𐴁𐴞𐴌 𐴁𐴝𐴉𐴢 𐴏𐴥𐴟𐴓𐴃𐴝𐴕 𐴀𐴝𐴇𐴔𐴡𐴊𐴢 𐴷 𐴲 𐴁𐴡𐴏𐴥𐴡𐴌 𐴱 𐴏𐴥𐴡𐴘𐴧𐴡𐴊𐴢 𐴀𐴝𐴓𐴡𐴔 𐴁𐴝𐴉𐴢 𐴌𐴡𐴐𐴤𐴞𐴊𐴢 𐴀𐴝𐴇𐴔𐴡𐴊𐴢 𐴴 𐴲 𐴁𐴡𐴏𐴥𐴡𐴌 𐴱 𐴀𐴠 𐴏𐴝𐴙𐴌𐴀𐴥𐴡 𐴎𐴡𐴕 𐴄𐴠𐴑𐴕𐴝𐴉𐴢 𐴀𐴠𐴓𐴝𐴑𐴝𐴌 𐴁𐴤𐴝𐴐𐴞𐴕𐴊𐴝 𐴱 𐴏𐴥𐴝𐴀𐴝 𐴉𐴝𐴌𐴝𐴚𐴡𐴌 𐴑𐴡𐴔𐴌𐴟𐴓 𐴀𐴞𐴏𐴓𐴥𐴝𐴔 𐴀𐴟𐴌𐴉𐴥𐴠 𐴔𐴟𐴇𐴝𐴔𐴧𐴡𐴊𐴢 𐴐𐴞𐴉𐴡𐴕 𐴁𐴝𐴉𐴢 𐴀𐴝𐴁𐴊𐴟𐴓 𐴒𐴡𐴉𐴦𐴟𐴌 𐴲 𐴳 𐴁𐴡𐴏𐴥𐴡𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴠𐴑𐴕𐴝𐴉𐴢 𐴔𐴡𐴋𐴠𐴓 𐴃𐴤𐴝𐴕𐴝𐴌 𐴎𐴞𐴔𐴧𐴝𐴊𐴝𐴌 𐴀𐴡 𐴏𐴞 𐴔𐴟𐴇𐴝𐴔𐴧𐴡𐴊𐴢 𐴒𐴞𐴘𐴝𐴏𐴟𐴊𐴧𐴞𐴕𐴠 𐴱 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 𐴱 𐴈𐴡𐴏𐴧𐴡𐴉𐴞𐴘𐴝 𐴈𐴡𐴁𐴡𐴌𐴡𐴏𐴃𐴤𐴝𐴕 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴉𐴝𐴀𐴝𐴌𐴡𐴌 𐴀𐴟𐴖𐴡𐴌𐴠 𐴀𐴝𐴏𐴥𐴠𐴊𐴠 𐴀𐴝𐴁𐴊𐴟𐴓 𐴀𐴝𐴔𐴞𐴕𐴡𐴌 𐴃𐴦𐴡𐴙𐴃𐴧𐴝 𐴄𐴝𐴔𐴁𐴟𐴌 𐴒𐴤𐴡𐴌𐴥𐴡𐴃 𐴱 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴉𐴝𐴘 𐴁𐴦𐴝𐴊𐴠 𐴱 𐴑𐴝𐴌𐴖𐴝𐴘 𐴏𐴝𐴓𐴝𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴋𐴝𐴓𐴝𐴓𐴡𐴌 𐴉𐴥𐴝𐴣𐴊𐴡𐴃𐴧𐴤𐴟 𐴁𐴝𐴏𐴝𐴘 𐴓𐴟𐴀𐴝 𐴒𐴞𐴘𐴧𐴥𐴠 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴞 𐴋𐴝𐴓𐴝𐴓 𐴀𐴥𐴡 𐴉𐴝𐴣𐴏𐴢 𐴎𐴡𐴕 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴠𐴊𐴠 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Ukhiyanews.com