𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴡𐴃𐴢 𐴒𐴤𐴡𐴓𐴥𐴝𐴘𐴁𐴡𐴓𐴧𐴝 𐴈𐴡𐴙𐴆𐴧𐴙𐴝 𐴉𐴟𐴖𐴝𐴙𐴕𐴊𐴤𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴢 𐴁𐴡𐴓𐴞 𐴊𐴠𐴐𐴤𐴡𐴙𐴃𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃𐴢 𐴁𐴝𐴚𐴓𐴝𐴊𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴱 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃𐴢 𐴱 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴥𐴝 𐴀𐴠𐴃𐴧𐴠𐴉𐴝𐴑𐴡𐴌 𐴏𐴥𐴝𐴣𐴀𐴝𐴃𐴠 𐴇𐴥𐴡𐴌𐴃𐴝𐴓𐴢 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴀𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴝𐴕𐴞 𐴁𐴦𐴝𐴊𐴠 𐴱 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴰 𐴳 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴊𐴠𐴐𐴤𐴡𐴙𐴃𐴧𐴝 𐴈𐴡𐴙𐴆𐴧𐴙𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴥𐴡𐴗𐴏𐴡𐴃𐴢 𐴒𐴤𐴡𐴓𐴥𐴝𐴘 𐴓𐴝𐴌𐴥𐴝𐴘 𐴒𐴡𐴌𐴥𐴝𐴘 𐴁𐴤𐴡𐴓𐴧𐴝 𐴱 𐴊𐴤𐴡𐴌𐴥𐴞 𐴊𐴤𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴎𐴝𐴀𐴝𐴌 𐴒𐴤𐴡𐴘𐴢 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴞𐴓𐴞 𐴀𐴠𐴃𐴧𐴠𐴉𐴝𐴑𐴡𐴌 𐴀𐴠𐴑𐴧𐴤𐴝𐴕 𐴆𐴤𐴡𐴄𐴑𐴝 𐴊𐴠𐴈𐴥𐴝𐴘𐴧𐴠𐴊𐴠 𐴀𐴥𐴠𐴊𐴧𐴟𐴌𐴡𐴃 𐴱 𐴔𐴡𐴒𐴢 𐴁𐴝𐴒𐴞𐴘𐴠 𐴈𐴡𐴀𐴡𐴌𐴊𐴧𐴠 𐴔𐴟𐴏𐴥𐴡𐴓𐴔𐴝𐴕 𐴁𐴠𐴒𐴧𐴤𐴟𐴕 𐴀𐴠𐴑 𐴀𐴥𐴡𐴘𐴢 𐴒𐴞𐴘𐴧𐴥𐴡𐴘𐴢 𐴱 𐴀𐴠𐴈𐴥𐴡𐴕 𐴃𐴟𐴣𐴖𐴥𐴝𐴣𐴌𐴥𐴝𐴌 𐴊𐴠𐴐𐴤𐴡𐴌𐴥𐴠 𐴏𐴥𐴡𐴣𐴀𐴡𐴓𐴞𐴁𐴤𐴡𐴓𐴧𐴝 𐴱 𐴔𐴡𐴒𐴢 𐴱 𐴔𐴟𐴌𐴟𐴚 𐴱 𐴏𐴦𐴝𐴑 𐴱 𐴔𐴝𐴌𐴥𐴝 𐴔𐴥𐴝 𐴒𐴞𐴌𐴥𐴞 𐴱 𐴏𐴝𐴔𐴧𐴥𐴗𐴝 𐴀𐴝𐴌 𐴑𐴤𐴟𐴀𐴟𐴛 𐴁𐴠𐴒𐴧𐴤𐴟𐴕𐴡𐴃𐴧𐴟 𐴁𐴟𐴣𐴊𐴝 𐴀𐴥𐴟𐴀𐴝 𐴉𐴡𐴌𐴞𐴁𐴤𐴡 𐴱 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴟𐴣𐴖𐴥𐴝𐴣𐴃𐴞 𐴉𐴥𐴡𐴗𐴏𐴡𐴃𐴢 𐴒𐴤𐴡𐴓𐴥𐴞 𐴊𐴠𐴐𐴢 𐴏𐴥𐴡𐴣𐴀𐴡𐴓𐴝 𐴉𐴡𐴌𐴞𐴁𐴤𐴡 𐴱𐴱

𐴏𐴥𐴟𐴓𐴟𐴒𐴤𐴝𐴕 𐴀𐴞𐴁𐴝 𐴊𐴞𐴀𐴞 𐴀𐴡𐴗𐴚 𐴔𐴝𐴚𐴓𐴝 𐴱 𐴏𐴡𐴌𐴥𐴝 𐴀𐴥𐴟𐴑 𐴱 𐴂𐴥𐴝𐴖𐴥𐴠𐴔 𐴆𐴤𐴙𐴡𐴚 𐴱 𐴌𐴥𐴡𐴙𐴚𐴒𐴙𐴝 𐴊𐴤𐴡𐴚 𐴱 𐴑𐴠𐴌𐴠𐴕 𐴂𐴡𐴌𐴝𐴚 𐴱 𐴏𐴡𐴁𐴧𐴠 𐴂𐴝𐴚𐴌𐴥𐴝𐴚 𐴱 𐴑𐴡𐴂𐴧𐴥𐴝 𐴑𐴤𐴡𐴚 𐴱 𐴚𐴝𐴑𐴧𐴤𐴟 𐴌𐴥𐴝 𐴱 𐴁𐴡𐴃𐴟𐴓𐴝 𐴱 𐴀𐴝𐴚𐴃𐴟𐴓𐴝 𐴃𐴡𐴚𐴁𐴟𐴌𐴟 𐴱 𐴉𐴝𐴌𐴝 𐴀𐴞𐴀𐴞𐴕𐴡𐴃𐴧𐴤𐴟 𐴰 𐴳 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴔𐴝𐴘𐴧𐴝 𐴔𐴡𐴌𐴡𐴊𐴢 𐴁𐴠𐴒𐴧𐴤𐴟𐴕 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 𐴱 𐴊𐴤𐴝𐴘 𐴁𐴦𐴝𐴊𐴠 𐴓𐴟𐴖𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴦𐴡 𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴁𐴤𐴝𐴘𐴀𐴝𐴙𐴕 𐴎𐴡𐴊𐴞 𐴀𐴝𐴣𐴀𐴝𐴌𐴝 𐴇𐴥𐴝𐴑𐴞𐴑𐴡𐴃𐴡𐴃𐴢 𐴀𐴠𐴑 𐴀𐴥𐴡𐴘 𐴒𐴞𐴘𐴧𐴥𐴞 𐴒𐴤𐴡𐴘𐴊𐴠 𐴀𐴥𐴡𐴘𐴓𐴠 𐴱 𐴀𐴝𐴒𐴠 𐴀𐴝𐴓𐴧𐴝𐴇 𐴀𐴝𐴣𐴀𐴝𐴌𐴝𐴌 𐴇𐴥𐴡𐴑 𐴀𐴝𐴣𐴀𐴝𐴌𐴝 𐴈𐴥𐴝𐴔𐴝𐴈𐴥𐴝 𐴉𐴝𐴘 𐴎𐴝𐴘𐴧𐴟𐴔 𐴁𐴤𐴡𐴘 𐴱𐴱

𐴉𐴡𐴙𐴃𐴧𐴡 𐴊𐴞𐴕 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴎𐴝𐴘 𐴁𐴞𐴏𐴑𐴤𐴝𐴘 𐴃𐴟𐴖𐴝𐴌 𐴱 𐴁𐴝𐴎𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴢 𐴊𐴞𐴕𐴠 𐴊𐴟𐴘 𐴃𐴞𐴕 𐴁𐴝𐴌 𐴀𐴥𐴟𐴊𐴧𐴤𐴝 𐴎𐴝𐴀𐴝𐴌 𐴱 𐴊𐴠𐴐𐴤𐴡𐴙𐴃𐴧𐴝 𐴔𐴡𐴒𐴢 𐴱 𐴔𐴟𐴌𐴟𐴚 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴑𐴡𐴗𐴔 𐴀𐴥𐴡𐴑𐴧𐴡𐴓 𐴊𐴤𐴝𐴘 𐴔𐴟𐴌𐴥𐴝 𐴒𐴤𐴡𐴙𐴓𐴧𐴙𐴠 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴠𐴆𐴧𐴝𐴙𐴄𐴧𐴤𐴝 𐴊𐴤𐴡𐴌𐴞 𐴓𐴡𐴘𐴢 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴱 𐴁𐴡𐴐𐴢 𐴕𐴥𐴡 𐴉𐴟𐴌𐴝𐴊𐴠 𐴀𐴝𐴏𐴥𐴠 𐴱 𐴁𐴞𐴘𐴝𐴌𐴙𐴔𐴧𐴝 𐴀𐴝𐴏𐴥𐴠 𐴱 𐴇𐴦𐴝𐴔𐴠𐴓 𐴁𐴠𐴍𐴞𐴀𐴝𐴙𐴕 𐴀𐴥𐴟𐴊𐴧𐴤𐴝 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱

Sources : MDN