𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴊𐴠𐴐𐴢 𐴏𐴥𐴝𐴌𐴥𐴞 𐴕𐴦𐴠𐴓𐴞 𐴊𐴤𐴝𐴘 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴋𐴝𐴓𐴝𐴓𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴔𐴡𐴒𐴢 𐴁𐴝𐴒𐴞 𐴘𐴥𐴡 𐴔𐴞𐴓𐴝𐴘𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴁𐴝𐴚𐴓𐴝 𐴊𐴠𐴐𐴤𐴠 𐴈𐴡𐴘𐴧𐴥𐴠 𐴱𐴱

𐴡𐴌𐴔𐴥𐴝𐴃𐴢 𐴏𐴡𐴓𐴠𐴌𐴊𐴧𐴠 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴡𐴌𐴔𐴥𐴝 𐴁𐴝𐴚𐴓𐴝 𐴊𐴠𐴐𐴢 𐴊𐴟𐴘 𐴊𐴠𐴐𐴤𐴡𐴌 𐴰 𐴷 𐴲 𐴑𐴞𐴓𐴟𐴔𐴞𐴄𐴝𐴌 𐴓𐴝𐴔𐴁𐴝 𐴁𐴡𐴖𐴋𐴝𐴌 𐴘𐴥𐴝𐴀𐴝𐴕𐴡𐴃𐴧𐴟 𐴱 𐴎𐴠𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴉𐴝𐴌𐴠 𐴀𐴝𐴌 𐴎𐴠𐴈𐴡𐴕𐴥𐴡 𐴎𐴝𐴒𐴝𐴃𐴧𐴤𐴟 𐴉𐴝𐴌𐴠 𐴱 𐴉𐴝𐴌𐴥𐴝𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴣𐴀𐴡𐴏𐴠𐴌𐴊𐴠 𐴁𐴡𐴓𐴞 𐴱 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴱 𐴊𐴞 𐴋𐴠𐴓𐴥𐴞 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴈𐴡𐴊𐴦𐴟𐴕𐴠 𐴋𐴝𐴓𐴝𐴓𐴡𐴌 𐴁𐴤𐴠𐴐𐴢 𐴊𐴤𐴡𐴌𐴥𐴞 𐴔𐴡𐴒𐴢 𐴑𐴡𐴗𐴔𐴡𐴌𐴥𐴠 𐴈𐴥𐴡𐴌𐴝𐴁𐴢 𐴈𐴡𐴀𐴡𐴘 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴠𐴐𐴤𐴞 𐴁𐴤𐴝𐴓𐴝𐴘𐴢 𐴏𐴡𐴀𐴡𐴙𐴕𐴧𐴝 𐴀𐴝𐴌 𐴊𐴡𐴌𐴡𐴊𐴞 𐴑𐴟𐴖𐴥𐴝𐴓𐴥𐴝𐴘𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴓𐴡𐴘 𐴉𐴥𐴟𐴐𐴤𐴝 𐴉𐴥𐴟𐴐𐴤𐴞 𐴒𐴡𐴌𐴥𐴞 𐴎𐴡𐴕 𐴉𐴡𐴃𐴞 𐴰 𐴰 𐴰 𐴰 𐴲 𐴃𐴟 𐴰 𐴰 𐴰 𐴰 𐴳 𐴀𐴥𐴞𐴏𐴥𐴝𐴉𐴠 𐴄𐴞𐴛𐴧𐴝 𐴓𐴡𐴘 𐴱 𐴔𐴡𐴒𐴢 𐴋𐴝𐴓𐴝𐴓𐴢 𐴀𐴥𐴟𐴀𐴟𐴕𐴠 𐴒𐴟𐴣𐴍𐴝 𐴀𐴝𐴌𐴑𐴝𐴕𐴡𐴃𐴧𐴤𐴟 𐴔𐴡𐴚𐴋𐴤𐴟 𐴀𐴝𐴕𐴥𐴞 𐴁𐴡𐴖𐴋𐴝𐴌𐴡𐴃𐴢 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃𐴢 𐴀𐴠𐴌𐴞 𐴎𐴝𐴀𐴝 𐴒𐴤𐴡𐴘 𐴱𐴱

𐴃𐴡𐴀𐴡𐴘 𐴉𐴥𐴞𐴃𐴤𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴡𐴕 𐴉𐴡𐴃𐴞 𐴰 𐴰 𐴰 𐴰 𐴴 𐴃𐴟 𐴰 𐴰 𐴰 𐴰 𐴵 𐴀𐴥𐴞𐴏𐴥𐴝𐴉𐴠 𐴄𐴞𐴛𐴧𐴝 𐴓𐴡𐴘 𐴎𐴠 𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴝𐴌 𐴒𐴡𐴌𐴥𐴝𐴘 𐴊𐴠𐴀𐴠 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝𐴌 𐴀𐴠𐴑𐴄𐴞 𐴁𐴤𐴞𐴏𐴄 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴡𐴌𐴔𐴥𐴝 𐴇𐴥𐴡𐴑𐴟𐴔𐴡𐴃𐴢 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴁𐴡𐴀𐴡𐴃𐴢 𐴎𐴡𐴁𐴝𐴕𐴝 𐴀𐴝𐴒𐴠 𐴀𐴥𐴡𐴘𐴃𐴠 𐴉𐴡𐴓𐴡𐴏𐴥𐴞 𐴀𐴥𐴡𐴙𐴓𐴊𐴠 𐴎𐴠𐴀𐴠𐴕𐴠 𐴉𐴝𐴌𐴠 𐴀𐴝𐴌𐴑𐴝𐴕𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴦𐴠𐴓𐴝𐴘 𐴉𐴥𐴠𐴓𐴥𐴡𐴕 𐴱𐴱

𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴡𐴎𐴟𐴒𐴞𐴃𐴝 𐴀𐴝𐴌 𐴔𐴡𐴊𐴡𐴊𐴢 𐴒𐴡𐴌𐴥𐴞 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴝𐴌 𐴒𐴡𐴌𐴥𐴝𐴘 𐴊𐴠𐴀𐴠𐴌 𐴊𐴧𐴠 𐴀𐴡𐴉𐴥𐴡𐴌𐴝𐴊𐴢 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴱 𐴒𐴡𐴃𐴡 𐴌𐴦𐴡𐴘𐴢 𐴁𐴝𐴌𐴠 𐴋𐴤𐴝𐴑𐴤𐴝𐴃 𐴔𐴝𐴎𐴤𐴠 𐴒𐴡𐴙𐴅𐴧𐴤𐴙𐴠𐴊𐴠 𐴂𐴠𐴌𐴠𐴏𐴢 𐴑𐴝𐴕𐴉𐴠𐴌𐴥𐴠𐴣𐴏𐴡𐴃𐴢 𐴱 𐴁𐴝𐴚𐴓𐴝𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 𐴃𐴡𐴖𐴇𐴥𐴞𐴊𐴢 𐴇𐴥𐴟𐴏𐴝𐴙𐴕 𐴀𐴝𐴌 𐴒𐴤𐴡𐴌 𐴀𐴟𐴎𐴞𐴌𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 𐴅𐴤𐴝𐴇𐴝𐴚𐴒𐴞𐴌 𐴀𐴝𐴓𐴡𐴔 𐴏𐴡𐴘𐴊𐴤𐴡𐴌𐴥𐴞 𐴊𐴟𐴕𐴥𐴞 𐴎𐴡𐴕𐴠 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴀𐴝𐴉𐴏𐴦𐴟𐴏𐴢 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : A E N