𐴀𐴠𐴑 𐴐𐴤𐴡𐴃𐴢 𐴎𐴡𐴕𐴡𐴌𐴃𐴤𐴟 𐴀𐴥𐴝𐴌𐴥𐴡 𐴁𐴠𐴐𐴤𐴞 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴁𐴟𐴄𐴢 𐴀𐴠𐴑𐴧𐴤𐴝𐴕𐴡𐴌𐴥𐴠 𐴏𐴥𐴞𐴌𐴞𐴓𐴡𐴚𐴑𐴝 𐴘𐴠 𐴔𐴡𐴊𐴡𐴊𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴁𐴠𐴙𐴓 𐴀𐴟𐴍𐴥𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃𐴢 𐴱 𐴏𐴥𐴞𐴌𐴥𐴞 𐴓𐴡𐴚𐴑𐴝𐴌 𐴀𐴟𐴃𐴧𐴡𐴌 𐴋𐴤𐴝𐴑𐴤𐴠 𐴐𐴤𐴝𐴘𐴒𐴡𐴌𐴡𐴃𐴢 𐴁𐴤𐴝𐴐𐴤𐴠𐴌𐴊𐴧𐴠 𐴱 𐴓𐴝𐴌𐴥𐴝𐴘𐴢 𐴐𐴤𐴞𐴑𐴤𐴝𐴌 𐴰 𐴰 𐴱 𐴎𐴡𐴕𐴡𐴌𐴃𐴤𐴟 𐴀𐴥𐴝𐴌𐴥𐴡 𐴁𐴦𐴠𐴐𐴢𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴥𐴝𐴘𐴧𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕 𐴀𐴞𐴕𐴋𐴤𐴞𐴘𐴝 𐴐𐴤𐴝𐴘𐴒𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴁𐴤𐴝𐴐𐴤𐴠𐴌 𐴊𐴧𐴠 𐴱 𐴘𐴥𐴝𐴀𐴝𐴕𐴡𐴌𐴥𐴠 𐴏𐴥𐴞𐴌𐴥𐴞 𐴓𐴡𐴚𐴑𐴝𐴌 𐴉𐴝𐴕𐴥𐴞𐴌 𐴉𐴥𐴡𐴗𐴏𐴠 𐴔𐴡𐴊𐴡𐴊𐴢 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴀𐴠 𐴀𐴥𐴠𐴉𐴢 𐴂𐴞 𐴈𐴥𐴡𐴁𐴡𐴌𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴎𐴞𐴃𐴝𐴌𐴥𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴁𐴡𐴌𐴔𐴥𐴝𐴃𐴧𐴟 𐴕𐴦𐴠𐴓𐴞 𐴏𐴟𐴒𐴤𐴠 𐴎𐴞𐴀𐴞𐴑𐴧𐴤𐴙𐴝 𐴊𐴠𐴑𐴤𐴠 𐴊𐴤𐴝𐴘𐴢 𐴎𐴝𐴀𐴝𐴌 𐴒𐴤𐴡𐴘𐴢 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴟𐴄𐴢 𐴘𐴥𐴝𐴀𐴝𐴕𐴡𐴌𐴥𐴠 𐴱 𐴏𐴥𐴞𐴌𐴥𐴞 𐴓𐴡𐴚𐴑𐴝𐴌 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴓𐴦𐴡𐴊𐴢 𐴉𐴝𐴘𐴢 𐴁𐴦𐴝𐴊𐴠 𐴱 𐴏𐴥𐴞𐴌𐴥𐴞 𐴓𐴡𐴚𐴑𐴝𐴌 𐴉𐴥𐴝𐴕𐴥𐴞𐴌 𐴉𐴥𐴡𐴗𐴏𐴡𐴌𐴥𐴠 𐴈𐴥𐴡𐴁𐴡𐴌 𐴉𐴡𐴣𐴀𐴡𐴏𐴥𐴝𐴘 𐴊𐴞𐴘𐴧𐴥𐴠𐴊𐴠 𐴁𐴡𐴓𐴞 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴓𐴝𐴌𐴥𐴝𐴘𐴢 𐴐𐴤𐴞𐴑𐴤𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴁𐴡𐴌𐴔𐴥𐴝𐴃𐴧𐴟 𐴕𐴦𐴠𐴓𐴞 𐴱 𐴀𐴞𐴕𐴋𐴤𐴞𐴘𐴝 𐴐𐴤𐴝𐴘𐴒𐴡𐴌𐴡𐴃𐴧𐴤𐴟 𐴊𐴟𐴌𐴥𐴠 𐴕𐴡𐴀𐴡𐴊𐴠 𐴋𐴞𐴘𐴝𐴃𐴢 𐴉𐴡𐴣𐴀𐴡𐴙𐴏𐴧𐴙𐴠𐴊𐴠 𐴘𐴥𐴝𐴀𐴝𐴕 𐴃𐴦𐴝𐴅𐴧𐴟𐴙𐴂𐴧𐴙𐴝 𐴀𐴥𐴡𐴘𐴓𐴠 𐴘𐴥𐴡 𐴱 𐴁𐴡𐴌𐴔𐴥𐴝𐴌 𐴉𐴡𐴏𐴥𐴞𐴔𐴠 𐴊𐴡𐴀𐴡𐴙𐴕𐴠 𐴐𐴤𐴝𐴘𐴒𐴡𐴌 𐴉𐴥𐴝𐴍𐴥𐴞 𐴁𐴦𐴝𐴊𐴠 𐴰 𐴵 𐴷 𐴱 𐴑𐴞𐴓𐴟𐴔𐴞𐴄𐴝𐴌 𐴃𐴡𐴁𐴦𐴡𐴃𐴡𐴃𐴢 𐴱 𐴏𐴥𐴞𐴌𐴥𐴞 𐴓𐴡𐴚𐴑𐴝𐴌 𐴔𐴞𐴑𐴧𐴤𐴙𐴝 𐴔𐴟𐴑 𐴊𐴞𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴀𐴠𐴑𐴀𐴡𐴔 𐴁𐴝𐴌 𐴕𐴡𐴀𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴡𐴌𐴔𐴥𐴝𐴃𐴢 𐴁𐴡𐴀𐴡𐴃𐴢 𐴎𐴡𐴁𐴝𐴕𐴝 𐴀𐴥𐴡𐴘𐴃𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴡𐴌 𐴐𐴤𐴞𐴑𐴤𐴝𐴌 𐴀𐴥𐴡𐴘 𐴀𐴝𐴘𐴧𐴥𐴠𐴌𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱 𐴔𐴟𐴏𐴥𐴡𐴓𐴔𐴝𐴕 𐴁𐴦𐴠𐴐𐴢 𐴀𐴝𐴏𐴥𐴠𐴊𐴠 𐴊𐴠𐴐𐴢 𐴱 𐴁𐴝𐴚𐴓𐴝 𐴃𐴠𐴐𐴢 𐴱 𐴔𐴡𐴓𐴥𐴠𐴆𐴤𐴙𐴝 𐴱 𐴀𐴞𐴕𐴋𐴟𐴕𐴞𐴆𐴤𐴙𐴝 𐴀𐴝𐴌 𐴁𐴡𐴌𐴔𐴥𐴝 𐴓𐴡𐴘𐴢 𐴁𐴝𐴎𐴤𐴝𐴘𐴧𐴝 𐴒𐴤𐴡𐴌𐴈𐴝𐴛𐴏𐴧𐴝 𐴊𐴠𐴐𐴢 𐴄𐴤𐴝𐴘𐴓𐴠𐴕𐴡𐴃𐴱 𐴁𐴠𐴐𐴤𐴞 𐴁𐴞𐴘𐴥𐴟𐴓𐴥𐴝 𐴀𐴝𐴌 𐴁𐴠𐴀𐴥𐴞𐴓𐴧𐴝 𐴇𐴥𐴝𐴓𐴡𐴃𐴡𐴃𐴢 𐴁𐴠𐴐𐴤𐴞 𐴉𐴟𐴌𐴝𐴕 𐴁𐴟𐴄𐴢 𐴀𐴥𐴡𐴑𐴧𐴡𐴓𐴢 𐴓𐴡𐴘 𐴱 𐴁𐴡𐴌𐴔𐴥𐴝𐴃𐴧𐴟 𐴕𐴦𐴠𐴓𐴞 𐴊𐴤𐴝𐴘𐴢 𐴎𐴝𐴀𐴝 𐴒𐴤𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

Sources : Voice of Arakan News