𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴀𐴟𐴉𐴥𐴝𐴘𐴢 𐴃𐴟𐴖𐴝𐴘𐴢 𐴁𐴤𐴡𐴓𐴧𐴝 𐴶 𐴊𐴠𐴐𐴤𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴞𐴄𐴤𐴞𐴚 𐴱𐴱

𐴀𐴠𐴈𐴥𐴡𐴕 𐴁𐴡𐴌𐴔𐴥𐴝𐴃𐴢 𐴏𐴡𐴓𐴠𐴌𐴊𐴧𐴠 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴄𐴤𐴝𐴘𐴓𐴠𐴕 𐴇𐴥𐴡𐴑𐴤𐴟𐴔𐴡𐴃𐴠 𐴏𐴥𐴡 𐴊𐴠𐴐𐴤𐴡𐴌 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌 𐴀𐴥𐴡𐴑𐴧𐴡𐴓𐴡𐴌 𐴔𐴞𐴄𐴤𐴞𐴚 𐴔𐴝𐴃𐴝𐴘𐴧𐴥𐴢 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴃𐴦𐴡𐴙𐴃𐴧𐴝 𐴇𐴥𐴡𐴑𐴤𐴟𐴔𐴡𐴃𐴡𐴌 𐴁𐴡𐴘𐴊𐴠𐴐𐴤𐴞 𐴔𐴦𐴝𐴔𐴠𐴓𐴝𐴌 𐴔𐴡𐴐𐴖𐴝𐴌𐴝 𐴊𐴡𐴀𐴡𐴙𐴕𐴧𐴝 𐴔𐴟𐴇𐴝𐴔𐴧𐴡𐴊𐴢 𐴃𐴡𐴖𐴇𐴞𐴊𐴢 𐴇𐴥𐴟𐴏𐴝𐴙𐴕 𐴀𐴥𐴡 𐴱 𐴔𐴞𐴄𐴤𐴞𐴚 𐴀𐴥𐴞𐴁𐴤𐴝𐴃𐴢 𐴇𐴥𐴝𐴎𐴞𐴌 𐴀𐴥𐴡𐴘𐴁𐴡𐴓𐴧𐴝 𐴁𐴟𐴙𐴃𐴢 𐴁𐴝𐴌𐴠 𐴄𐴤𐴝𐴘𐴓𐴠𐴕𐴡𐴌 𐴏𐴥𐴡𐴉𐴡𐴌𐴡𐴃𐴢 𐴕𐴦𐴠𐴙𐴓𐴧𐴥𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴝𐴙𐴔𐴄𐴞𐴁𐴤𐴡𐴓 𐴔𐴡𐴎𐴞𐴕 𐴏𐴥𐴝𐴔𐴧𐴡𐴌 𐴁𐴞𐴐𐴤𐴞𐴁𐴧𐴝𐴌𐴠 𐴀𐴥𐴡𐴘𐴁𐴡𐴊𐴠 𐴔𐴞𐴄𐴤𐴞𐴚𐴡𐴃 𐴱 𐴀𐴝𐴐𐴤𐴝 𐴒𐴡𐴌𐴥𐴝 𐴎𐴝𐴀𐴝𐴌 𐴊𐴧𐴠 𐴀𐴥𐴡𐴑𐴧𐴡𐴓𐴡𐴌 𐴀𐴝𐴒𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴦𐴝𐴁𐴡𐴃𐴠 𐴈𐴟𐴀𐴝 𐴈𐴡𐴀𐴡𐴘 𐴀𐴥𐴡𐴘𐴁𐴤𐴡 𐴁𐴡𐴓𐴞 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴄𐴤𐴝𐴘𐴓𐴠𐴕𐴡𐴌 𐴐𐴤𐴞𐴔𐴥𐴝 𐴁𐴝𐴎𐴤𐴝𐴘𐴧𐴝 𐴁𐴡𐴌𐴔𐴥𐴝 𐴊𐴠𐴐𐴤𐴡𐴃𐴢 𐴁𐴤𐴝𐴌𐴞 𐴀𐴝𐴘𐴧𐴥𐴠𐴌𐴊𐴧𐴠 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴱 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 𐴄𐴤𐴝𐴘𐴓𐴠𐴕𐴠 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴀𐴠𐴔𐴝𐴌𐴅𐴠𐴕𐴏𐴥𐴞 𐴔𐴞𐴄𐴤𐴞𐴚 𐴔𐴝𐴃𐴝𐴘𐴧𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴞𐴄𐴤𐴞𐴚 𐴀𐴥𐴞𐴁𐴤𐴝𐴃𐴢 𐴁𐴝𐴚𐴓𐴝 𐴊𐴠𐴐𐴢 𐴏𐴥𐴝𐴌𐴥𐴝 𐴱 𐴁𐴡𐴌𐴔𐴥𐴝 𐴱 𐴀𐴞𐴕𐴋𐴤𐴞𐴘𐴝 𐴱 𐴆𐴞𐴕𐴝 𐴱 𐴓𐴝𐴀𐴟𐴏𐴢 𐴀𐴝𐴌 𐴑𐴡𐴔𐴁𐴤𐴡𐴋𐴞𐴘𐴝 𐴱 𐴊𐴠𐴐𐴢 𐴀𐴞𐴀𐴞𐴕 𐴁𐴤𐴠 𐴇𐴥𐴝𐴎𐴠𐴌 𐴀𐴥𐴡𐴘𐴁𐴡𐴊𐴠 𐴱 𐴀𐴝𐴌 𐴁𐴡𐴌𐴔𐴥𐴝𐴌 𐴑𐴟𐴓𐴠 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴀𐴝𐴌 𐴈𐴟𐴀𐴝 𐴈𐴡𐴀𐴡𐴘 𐴀𐴥𐴡𐴘𐴁𐴡 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴞𐴄𐴤𐴞𐴚 𐴀𐴥𐴞𐴁𐴤𐴝𐴌 𐴁𐴦𐴝𐴁𐴡𐴃𐴠 𐴁𐴝𐴚𐴓𐴝𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴔𐴦𐴝𐴔𐴠𐴓𐴝𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 𐴔𐴟𐴇𐴝𐴔𐴧𐴡𐴊 𐴃𐴡𐴖𐴇𐴥𐴞𐴊𐴠 𐴔𐴡𐴚𐴒𐴡𐴓 𐴁𐴝𐴌𐴠 𐴈𐴡𐴘𐴧𐴥𐴠𐴊𐴠 𐴱 𐴄𐴤𐴝𐴘𐴓𐴠𐴕𐴡𐴃𐴢 𐴁𐴡𐴌𐴔𐴥𐴝𐴌 𐴁𐴦𐴝𐴁𐴡𐴃𐴠 𐴁𐴟𐴎𐴤𐴝 𐴁𐴟𐴎𐴤𐴞 𐴈𐴟𐴀𐴝 𐴈𐴡𐴀𐴡𐴘 𐴀𐴥𐴡𐴘𐴁𐴡𐴊𐴠 𐴀𐴥𐴞𐴀𐴞𐴕𐴡𐴃𐴢 𐴱 𐴀𐴝𐴣𐴀𐴝𐴌𐴝𐴌 𐴔𐴟𐴓𐴢 𐴔𐴡𐴑𐴏𐴥𐴡𐴊𐴢 𐴀𐴝𐴌 𐴀𐴠𐴅𐴠𐴕𐴋𐴝 𐴀𐴥𐴡𐴘𐴁𐴡𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴇𐴥𐴡𐴑 𐴓𐴡𐴘𐴢 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴊𐴠𐴐𐴤𐴡𐴃𐴢 𐴖𐴝𐴉𐴠𐴏𐴢 𐴎𐴝𐴘𐴢 𐴉𐴝𐴌𐴝 𐴱𐴱

𐴃𐴡𐴖𐴇𐴥𐴞𐴊𐴢 𐴇𐴥𐴟𐴏𐴝𐴙𐴕𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴀𐴠𐴈𐴥𐴡𐴕 𐴁𐴡𐴌𐴔𐴥𐴝𐴃𐴢 𐴓𐴝𐴌𐴥𐴝𐴘𐴌 𐴇𐴥𐴝𐴓𐴡𐴃𐴢 𐴱 𐴎𐴠 𐴈𐴡𐴕𐴥𐴡 𐴎𐴝𐴒𐴝𐴃𐴢 𐴀𐴠𐴕𐴋𐴞𐴓𐴧𐴝 𐴓𐴝𐴌𐴥𐴝𐴘 𐴏𐴡𐴓𐴠𐴊𐴠 𐴇𐴥𐴝𐴓𐴡𐴃𐴡𐴃𐴢 𐴁𐴡𐴀𐴡𐴃𐴢 𐴈𐴝𐴔 𐴁𐴠𐴐𐴤𐴞 𐴁𐴤𐴝𐴉𐴞 𐴏𐴞𐴕𐴃𐴞 𐴒𐴡𐴌𐴥𐴝 𐴉𐴡𐴌𐴠 𐴱 𐴔𐴡𐴕𐴃𐴡𐴌 𐴓𐴝𐴌𐴥𐴝𐴘𐴌 𐴇𐴥𐴝𐴓𐴡𐴃 𐴓𐴝𐴒𐴝𐴃𐴝𐴌 𐴕𐴡 𐴃𐴤𐴝𐴑𐴤𐴠 𐴱 𐴀𐴥𐴠𐴃𐴡𐴓𐴧𐴝 𐴈𐴡𐴕𐴥𐴡 𐴌𐴥𐴞𐴏𐴑 𐴕𐴡 𐴓𐴡𐴘 𐴕𐴦𐴡𐴌𐴔𐴥𐴠𐴓 𐴃𐴡𐴌𐴞𐴑𐴝 𐴓𐴡𐴘 𐴈𐴝𐴔 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱 𐴀𐴝𐴌 𐴁𐴝𐴚𐴓𐴝𐴊𐴠𐴐𐴤𐴡𐴃𐴢 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴃𐴞𐴕 𐴓𐴝𐴑 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴱 𐴈𐴥𐴝𐴔𐴝𐴈𐴥𐴝 𐴀𐴥𐴞𐴃𐴝𐴌𐴥𐴝𐴌 𐴑𐴟𐴓𐴠 𐴇𐴥𐴡𐴑 𐴓𐴡𐴘 𐴇𐴥𐴠𐴉𐴝𐴎𐴡𐴃𐴡𐴌 𐴏𐴥𐴝𐴣𐴀𐴝𐴊𐴠 𐴖𐴝𐴉𐴠𐴏𐴢 𐴎𐴝𐴘𐴢 𐴉𐴝𐴌𐴝 𐴉𐴡𐴌𐴞𐴁𐴤𐴡 𐴱 𐴔𐴡𐴕𐴃𐴡𐴌 𐴓𐴝𐴌𐴥𐴝𐴘 𐴏𐴡𐴓𐴠𐴌𐴊𐴧𐴠 𐴇𐴥𐴝𐴓𐴡𐴃𐴡𐴃𐴢 𐴕𐴡𐴀𐴡 𐴁𐴡𐴓𐴞 𐴘𐴥𐴡 𐴔𐴟𐴇𐴝𐴔𐴧𐴡𐴊𐴢 𐴃𐴡𐴖𐴇𐴥𐴞𐴊 𐴇𐴥𐴟𐴏𐴝𐴙𐴕𐴠 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

.

Sources : Ukhiyanews.com