𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴸 𐴱 𐴁𐴡𐴏𐴥𐴡𐴌𐴡𐴃𐴧𐴟 𐴵 𐴴 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝𐴌 𐴏𐴠𐴌𐴥𐴝𐴚 𐴀𐴝𐴌 𐴰 𐴰 𐴱 𐴑𐴟𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴝𐴘𐴢 𐴊𐴞𐴀𐴞𐴁𐴝𐴌 𐴇𐴥𐴡𐴑𐴤𐴟𐴔 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴠 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴱 𐴌𐴗𐴥𐴝 𐴛𐴟 𐴊𐴤𐴡𐴗𐴚 𐴱 𐴑𐴠𐴕 𐴂𐴡𐴌𐴝𐴚 𐴱 𐴂𐴥𐴝𐴖𐴡 𐴆𐴤𐴙𐴡𐴚 𐴱 𐴂𐴗𐴥𐴝𐴚 𐴂𐴟𐴌𐴟 𐴆𐴤𐴙𐴡𐴚 𐴱 𐴑𐴠𐴌𐴥𐴝 𐴌𐴥𐴟 𐴂𐴡𐴌𐴝𐴚 𐴀𐴝𐴌 𐴀𐴥𐴟 𐴆𐴙𐴠𐴕 𐴆𐴤𐴙𐴝 𐴱 𐴉𐴝𐴌𐴝 𐴀𐴞𐴀𐴞𐴕𐴡𐴃𐴢 𐴃𐴤𐴝𐴑𐴤𐴠𐴊𐴠 𐴸 𐴱 𐴁𐴡𐴏𐴥𐴡𐴌𐴡𐴃𐴧𐴟 𐴵 𐴴 𐴁𐴡𐴏𐴥𐴡𐴌 𐴉𐴡𐴙𐴅𐴧𐴡𐴕𐴃𐴡 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊𐴢 𐴀𐴥𐴡𐴑𐴧𐴡𐴓𐴡𐴌 𐴏𐴠𐴌𐴥𐴝𐴚𐴱 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴔𐴝𐴒𐴠𐴌𐴊𐴧𐴠 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴱 𐴉𐴡𐴃𐴧𐴞 𐴉𐴝𐴌𐴝𐴃𐴧𐴤𐴟 𐴰 𐴰 𐴱 𐴃𐴤𐴗𐴝 𐴀𐴥𐴞𐴏𐴝𐴉𐴠 𐴑𐴟𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞𐴃𐴢 𐴉𐴡𐴣𐴀𐴡𐴏𐴥𐴝𐴘𐴢 𐴊𐴞𐴀𐴞𐴁𐴡𐴓𐴧𐴥𐴝 𐴏𐴥𐴡𐴑𐴃𐴞 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴓𐴝𐴌𐴥𐴝𐴘𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴒𐴡𐴌𐴥𐴞 𐴔𐴡𐴌𐴡𐴕𐴠 𐴀𐴝𐴌 𐴒𐴤𐴝𐴙𐴓𐴢 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴁𐴡𐴓𐴢 𐴈𐴡𐴔𐴞 𐴒𐴞𐴘𐴧𐴥𐴡𐴘𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴡𐴚𐴋𐴤𐴟𐴌 𐴕𐴥𐴝 𐴑𐴤𐴝 𐴑𐴤𐴝 𐴵 𐴀𐴡𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴁𐴡𐴓𐴢 𐴁𐴝𐴌𐴥𐴝𐴘𐴁𐴤𐴝𐴌 𐴎𐴡𐴌𐴟𐴌𐴡𐴃𐴢 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴔𐴠𐴓𐴠𐴄𐴠𐴌𐴞𐴌 𐴓𐴧𐴡𐴘 𐴓𐴝𐴌𐴥𐴝𐴘𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝𐴃𐴧𐴤𐴟 𐴕𐴟𐴖𐴝 𐴉𐴥𐴡𐴗𐴏𐴢 𐴀𐴥𐴞𐴏𐴥𐴝𐴉𐴠 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌 𐴏𐴠𐴌𐴥𐴝𐴚 𐴊𐴞𐴀𐴞𐴁𐴡𐴓𐴧𐴥𐴝 𐴀𐴠 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃𐴧𐴟 𐴓𐴡𐴃𐴞 𐴱 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴘𐴧𐴥𐴠𐴊𐴠 𐴁𐴡𐴓𐴞 𐴱 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕𐴡𐴌 𐴈𐴝𐴣𐴏𐴥𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴒𐴡𐴃𐴡 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴀𐴝𐴈𐴥𐴠𐴌𐴥𐴞 𐴇𐴥𐴝𐴉𐴃𐴝 𐴀𐴥𐴡𐴘𐴃𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴑𐴟𐴌𐴥𐴝𐴌 𐴉𐴥𐴝𐴌𐴡𐴔 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴀𐴝𐴒𐴠 𐴈𐴟𐴀𐴥𐴝 𐴒𐴞𐴘𐴧𐴥𐴠𐴊𐴠 𐴉𐴝𐴌𐴝 𐴀𐴥𐴞𐴀𐴞𐴕𐴡𐴃𐴧𐴟 𐴱 𐴉𐴡𐴃𐴧𐴞 𐴉𐴝𐴌𐴝 𐴘𐴠 𐴰 𐴰 𐴱 𐴃𐴤𐴗𐴝 𐴀𐴥𐴞𐴏𐴥𐴝𐴉𐴠 𐴑𐴟𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴠 𐴉𐴡𐴣𐴀𐴡𐴏𐴥𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 𐴁𐴠𐴐𐴤𐴞 𐴎𐴟𐴓𐴥𐴟𐴔𐴡𐴌 𐴏𐴥𐴝𐴣𐴀𐴝𐴃𐴠 𐴏𐴝𐴂𐴢 𐴊𐴠𐴀𐴠𐴌 𐴱 𐴀𐴠𐴈𐴥𐴡𐴕 𐴀𐴟𐴒𐴧𐴤𐴗𐴝 𐴑𐴟𐴌𐴥𐴝𐴌 𐴊𐴝𐴔 𐴰 𐴰 𐴰 𐴰 𐴵 𐴇𐴥𐴝𐴎𐴝𐴌 𐴄𐴞𐴛𐴧𐴝 𐴱 𐴃𐴡𐴀𐴡𐴘 𐴑𐴠𐴀𐴠𐴕 𐴒𐴡𐴌𐴥𐴞 𐴊𐴞𐴀𐴞 𐴉𐴝𐴌𐴞𐴁𐴤𐴡 𐴁𐴡𐴓𐴞 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴑𐴤𐴙𐴡𐴑 𐴓𐴠𐴒𐴤𐴝 𐴀𐴝𐴌 𐴔𐴝𐴚𐴓𐴝 𐴅𐴤𐴞 𐴉𐴝𐴌𐴝𐴃𐴧𐴤𐴟 𐴱 𐴕𐴠 𐴔𐴠 𐴌𐴠 𐴶 𐴀𐴡𐴌 𐴒𐴤𐴝𐴣𐴄𐴞𐴃𐴢 𐴀𐴝𐴌 𐴕𐴥𐴝 𐴑𐴤𐴝 𐴑𐴤𐴝 𐴵 𐴀𐴡𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴈𐴥𐴡𐴕𐴊𐴡𐴑𐴢 𐴀𐴥𐴡𐴑𐴧𐴡𐴓 𐴑𐴟𐴣𐴌𐴥𐴞𐴁𐴤𐴡𐴓𐴧𐴝 𐴰 𐴵 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴌𐴡𐴊𐴢 𐴀𐴥𐴡𐴑𐴧𐴡𐴓𐴢 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴔𐴝𐴃𐴝𐴘𐴢 𐴓𐴡𐴘𐴢 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN