𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴌𐴟𐴇𐴝𐴙𐴚𐴒𐴙𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴟 𐴒𐴤𐴞𐴌𐴥𐴞 𐴊𐴤𐴡𐴌𐴥𐴞 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴡𐴌𐴥𐴞 𐴏𐴠𐴑 𐴒𐴡𐴌𐴥𐴠𐴌 𐴱 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴌𐴥𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴘𐴠 𐴀𐴝𐴌𐴑𐴝𐴕𐴡𐴃𐴢 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝 𐴑𐴠𐴙𐴏𐴧𐴥𐴟𐴌𐴥𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴟 𐴒𐴤𐴞𐴌𐴥𐴞 𐴊𐴤𐴡𐴌𐴥𐴞 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴏𐴠𐴑 𐴒𐴡𐴌𐴥𐴠𐴌 𐴱 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴓𐴡𐴃𐴞 𐴊𐴞𐴕𐴠 𐴌𐴝𐴙𐴃𐴠 𐴉𐴡𐴙𐴃𐴧𐴡 𐴒𐴤𐴡𐴌𐴡𐴃𐴢 𐴒𐴤𐴡𐴓𐴞 𐴒𐴤𐴡𐴓𐴞 𐴏𐴠𐴑 𐴒𐴡𐴌𐴥𐴠𐴌 𐴱 𐴑𐴠𐴙𐴏𐴧𐴥𐴟 𐴁𐴠𐴈𐴡𐴏𐴥𐴟𐴌 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴕𐴠 𐴔𐴠 𐴌𐴠 𐴶 𐴀𐴥𐴡𐴌 𐴒𐴤𐴝𐴣𐴄𐴞𐴃𐴢 𐴓𐴡𐴘 𐴎𐴝𐴘 𐴱 𐴒𐴝𐴙𐴌 𐴀𐴞𐴕𐴏𐴦𐴝𐴕𐴞 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴌𐴝𐴙𐴃𐴡𐴌 𐴸 𐴁𐴝𐴎𐴠 𐴕𐴠 𐴔𐴠 𐴌𐴠 𐴶 𐴀𐴡𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴰 𐴳 𐴎𐴡𐴕 𐴓𐴡𐴃𐴞 𐴀𐴝𐴀𐴝𐴘 𐴱 𐴑𐴤𐴙𐴡𐴑 𐴓𐴠𐴒𐴤𐴝 𐴒𐴤𐴗𐴝𐴚𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴒𐴤𐴞𐴌𐴥𐴞 𐴊𐴤𐴡𐴌𐴥𐴞 𐴁𐴦𐴝𐴊𐴠 𐴉𐴡𐴙𐴃𐴧𐴡 𐴒𐴤𐴡𐴌𐴥𐴠 𐴒𐴤𐴡𐴌𐴥𐴠 𐴒𐴤𐴡𐴓𐴞 𐴁𐴤𐴟𐴃𐴤𐴡𐴌𐴥𐴠 𐴑𐴟𐴕𐴠 𐴈𐴝𐴕𐴠 𐴀𐴥𐴟𐴊𐴧𐴝 𐴁𐴞𐴏𐴢 𐴈𐴥𐴝𐴘 𐴏𐴠𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴁𐴠𐴈𐴡𐴏𐴥𐴟𐴌 𐴌𐴟𐴇𐴝𐴙𐴚𐴒𐴙𐴝 𐴷 𐴎𐴡𐴕 𐴁𐴡𐴕 𐴒𐴡𐴌𐴥𐴞 𐴕𐴠 𐴔𐴠 𐴌𐴠 𐴶 𐴀𐴡𐴌 𐴒𐴤𐴝𐴣𐴄𐴞𐴃𐴢 𐴓𐴡𐴘 𐴎𐴝𐴘 𐴒𐴝𐴙𐴌 𐴀𐴞𐴕𐴏𐴦𐴝𐴕𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴝𐴚𐴓𐴝 𐴅𐴤𐴞 𐴒𐴤𐴗𐴝𐴚𐴡𐴌 𐴱 𐴔𐴝𐴚𐴓𐴝 𐴅𐴤𐴞 𐴉𐴝𐴌𐴝 𐴀𐴝𐴌 𐴏𐴝𐴏𐴞 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴈𐴡𐴊𐴤𐴟𐴕 𐴀𐴝𐴀𐴝𐴘𐴢 𐴱 𐴀𐴝𐴀𐴝 𐴎𐴝𐴀𐴝 𐴀𐴥𐴝𐴣𐴍𐴝 𐴀𐴥𐴟𐴣𐴍𐴝 𐴒𐴡𐴌𐴥𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴏𐴠𐴑 𐴒𐴡𐴌𐴥𐴠𐴌 𐴱 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴀𐴥𐴝𐴃𐴢 𐴉𐴥𐴟𐴕 𐴀𐴥𐴡𐴑𐴧𐴡𐴓𐴢 𐴏𐴠𐴑 𐴒𐴡𐴌𐴥𐴠𐴌 𐴀𐴝𐴌 𐴀𐴥𐴞𐴃𐴤𐴝𐴌𐴝𐴌𐴃𐴧𐴟 𐴐𐴤𐴡𐴕𐴊𐴡 𐴓𐴝𐴒𐴠𐴊𐴠 𐴒𐴤𐴡𐴌 𐴘𐴥𐴝𐴀𐴝𐴕𐴡𐴃𐴢 𐴒𐴤𐴡𐴓𐴞 𐴑𐴟𐴕𐴠 𐴈𐴝𐴕𐴠 𐴀𐴥𐴟𐴊𐴧𐴝 𐴏𐴠𐴑 𐴒𐴡𐴌𐴥𐴠𐴌 𐴱𐴱

𐴔𐴝𐴚𐴓𐴝 𐴅𐴤𐴞 𐴉𐴝𐴌𐴝𐴌 / 𐴈𐴝𐴓𐴝 𐴁𐴡𐴊𐴝𐴌 𐴉𐴟𐴖𐴝 / 𐴑𐴡𐴌𐴞𐴔𐴟𐴓𐴧𐴝𐴇𐴢 𐴌𐴥𐴠 𐴊𐴤𐴡𐴌𐴥𐴞 𐴁𐴦𐴝𐴊𐴠 𐴀𐴥𐴞𐴃𐴤𐴝𐴌 𐴉𐴥𐴟𐴕𐴥𐴡𐴌 𐴒𐴟𐴉𐴃𐴡 𐴑𐴟𐴋 𐴓𐴡𐴔𐴁𐴤𐴡𐴌 𐴑𐴤𐴟𐴙𐴓𐴃𐴡 𐴈𐴡𐴘𐴧𐴥𐴠 𐴱 𐴁𐴦𐴝𐴊𐴠 𐴑𐴤𐴟𐴙𐴓𐴃𐴠 𐴊𐴠𐴌𐴞 𐴀𐴥𐴡𐴀𐴡𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 𐴔𐴝𐴙𐴕𐴐𐴤𐴡𐴌 𐴔𐴟𐴀𐴟𐴕𐴃𐴟 𐴒𐴝𐴙𐴌 𐴀𐴞𐴕𐴏𐴦𐴝𐴕𐴞 𐴃𐴡𐴖𐴌𐴠 𐴔𐴝𐴌𐴝 𐴊𐴤𐴡𐴌𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴱 𐴁𐴦𐴝𐴊𐴠 𐴁𐴡𐴕 𐴒𐴡𐴌𐴥𐴞 𐴕𐴠 𐴔𐴠 𐴌𐴠 𐴶 𐴓𐴡𐴔𐴁𐴤𐴡𐴌 𐴒𐴤𐴝𐴣𐴄𐴞𐴃𐴢 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴊𐴦𐴟𐴛𐴅𐴧𐴙𐴝 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴉𐴠𐴌𐴝𐴔𐴉𐴟𐴌𐴟 𐴱 𐴂𐴥𐴡𐴗𐴚 𐴎𐴤𐴝 𐴱 𐴓𐴥𐴝𐴁𐴦𐴡 𐴎𐴤𐴝 𐴀𐴝𐴌 𐴏𐴡𐴌𐴝 𐴀𐴥𐴟𐴑 𐴉𐴝𐴌𐴝 𐴀𐴞𐴀𐴞𐴕𐴡𐴌𐴥𐴠 𐴘𐴥𐴡 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴟 𐴒𐴤𐴞𐴌𐴥𐴞 𐴊𐴤𐴡𐴌𐴥𐴞 𐴒𐴤𐴡𐴌 𐴒𐴤𐴡𐴌 𐴒𐴤𐴡𐴓𐴞 𐴏𐴠𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴤𐴟𐴕 𐴁𐴡𐴕 𐴒𐴡𐴌𐴥𐴞 𐴕𐴠 𐴔𐴠 𐴌𐴠 𐴶 𐴀𐴥𐴡𐴌 𐴒𐴤𐴝𐴣𐴄𐴞𐴃𐴢 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴱 𐴀𐴝𐴌 𐴑𐴤𐴙𐴡𐴑 𐴓𐴠𐴒𐴤𐴝 𐴉𐴝𐴌𐴝𐴌 𐴃𐴞𐴕 𐴔𐴟𐴖𐴥𐴝 𐴉𐴡𐴣𐴃𐴤𐴡𐴃 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴐𐴤𐴞 𐴎𐴝𐴓𐴝𐴌 𐴱 𐴐𐴟𐴁𐴤𐴝 𐴓𐴝𐴒𐴞𐴓𐴥𐴠 𐴁𐴡𐴕 𐴒𐴡𐴌𐴥𐴞 𐴒𐴤𐴝𐴣𐴄𐴞𐴃𐴢 𐴓𐴡𐴘 𐴎𐴝𐴘 𐴁𐴠𐴐𐴤𐴞 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN