𐴰 𐴱 𐴱 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴠𐴊𐴠 𐴁𐴟𐴄𐴢 𐴀𐴠𐴑𐴧𐴤𐴝𐴕𐴡𐴌𐴥𐴠 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴁𐴝𐴏𐴝𐴘𐴢 𐴓𐴡𐴘𐴧𐴥𐴠 𐴱𐴱

𐴁𐴝𐴚𐴓𐴝 𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴤𐴟 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴕𐴦𐴠𐴓𐴞 𐴀𐴝𐴘𐴧𐴥𐴠𐴌𐴊𐴠 𐴶 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕𐴡𐴌𐴥𐴠 𐴱 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴀𐴝𐴆𐴤𐴙𐴠 𐴋𐴞𐴐𐴄𐴤𐴞𐴑𐴡𐴌 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴁𐴝𐴏𐴝𐴘𐴢 𐴓𐴡𐴘𐴧𐴥𐴠 𐴁𐴡𐴓𐴞 𐴀𐴠 𐴂𐴞 𐴈𐴥𐴡𐴁𐴡𐴌𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴝𐴕𐴝 𐴔𐴡𐴓𐴠𐴆𐴤𐴙𐴝 𐴁𐴡𐴓𐴞 𐴕𐴡𐴀𐴡 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃𐴢 𐴔𐴝𐴎𐴤𐴠 𐴎𐴡𐴀𐴡𐴙𐴕𐴧𐴝 𐴘𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴱 𐴎𐴝𐴒𐴝 𐴘𐴥𐴝𐴀𐴝𐴕𐴡𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴘𐴠 𐴀𐴠 𐴂𐴞 𐴈𐴥𐴡𐴁𐴡𐴌 𐴀𐴡𐴓𐴝𐴌𐴥𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴟𐴄𐴢 𐴘𐴥𐴝𐴀𐴝𐴕𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴉𐴟𐴖𐴝𐴙𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴒𐴡𐴃𐴡 𐴔𐴝𐴐𐴤𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴀𐴝𐴆𐴤𐴙𐴠 𐴀𐴝𐴌 𐴀𐴟𐴃𐴧𐴡𐴌 𐴏𐴟𐴔𐴥𐴝 𐴃𐴝𐴌𐴝 𐴋𐴞𐴐𐴄𐴤𐴞𐴑𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴱 𐴁𐴟𐴄𐴢 𐴓𐴡𐴘 𐴰 𐴰 𐴴 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴝𐴏𐴥𐴠 𐴱 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴔𐴡𐴇𐴝 𐴌𐴝𐴎𐴝𐴌( 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌) 𐴀𐴡𐴉𐴥𐴞𐴏𐴡𐴌 𐴎𐴞𐴔𐴧𐴝 𐴀𐴝𐴏𐴥𐴠𐴊𐴠 / 𐴉𐴥𐴝𐴘𐴏𐴡𐴓 𐴌𐴥𐴝𐴇𐴔𐴦𐴝𐴕𐴠 𐴱 𐴀𐴝𐴆𐴤𐴙𐴠 𐴋𐴞𐴐𐴄𐴤𐴞𐴑𐴡𐴌 𐴉𐴟𐴑 𐴀𐴥𐴞𐴏𐴧𐴝𐴃𐴢 𐴶 𐴱 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴈𐴥𐴝𐴄𐴞 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴢 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴱 𐴈𐴡𐴕𐴥𐴡 𐴈𐴝𐴔 𐴕𐴡 𐴃𐴤𐴝𐴑𐴤𐴡𐴕𐴠 𐴀𐴝𐴌 𐴀𐴠𐴈𐴥𐴡𐴕 𐴀𐴝𐴌𐴑𐴝𐴕𐴡𐴃𐴢 𐴏𐴡𐴓𐴠𐴌𐴊𐴧𐴠 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴀𐴝𐴌 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴃𐴡𐴑𐴓𐴞𐴉𐴢 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴀𐴞𐴕𐴋𐴟𐴕𐴥𐴞𐴆𐴤𐴙𐴝 𐴔𐴡𐴓𐴠𐴆𐴤𐴙𐴝𐴌 𐴀𐴥𐴞𐴑𐴧𐴤𐴙𐴝 𐴁𐴟𐴄𐴢 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴁𐴡𐴓𐴞 𐴁𐴟𐴎𐴤𐴡𐴘𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠 𐴱𐴱

𐴒𐴡𐴃𐴡 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴊𐴟𐴘 𐴇𐴥𐴝𐴎𐴝𐴌𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴱 𐴒𐴡𐴕𐴝 𐴀𐴥𐴞𐴁𐴤𐴝 𐴒𐴡𐴃𐴡 𐴏𐴝𐴙𐴌 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴡𐴕𐴝𐴌𐴃𐴤𐴟 𐴀𐴥𐴝𐴌𐴥𐴡 𐴁𐴦𐴠𐴐𐴢 𐴁𐴡𐴓𐴞 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴌𐴠𐴂𐴟𐴄𐴢 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃𐴢 𐴀𐴝𐴘𐴧𐴥𐴠𐴌𐴊𐴧𐴠 𐴘𐴥𐴝𐴀𐴝𐴕 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴕𐴝𐴉𐴡𐴏𐴥𐴡𐴕 𐴒𐴡𐴙𐴓𐴧𐴥𐴙𐴠 𐴘𐴥𐴡 𐴀𐴝𐴌 𐴊𐴠𐴐𐴤𐴡𐴃𐴧𐴟 𐴊𐴦𐴟𐴣𐴌𐴝𐴘𐴢 𐴊𐴞𐴀𐴞𐴃𐴡 𐴈𐴡𐴘𐴓𐴥𐴠 𐴘𐴥𐴡 𐴱 𐴔𐴡𐴕𐴃𐴡𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴐𐴤𐴡𐴣𐴀𐴡 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴋𐴝𐴀𐴝𐴘 𐴀𐴥𐴡𐴑𐴧𐴡𐴓𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴒𐴡𐴏𐴥𐴞 𐴓𐴡𐴘𐴢 𐴔𐴡𐴊𐴡𐴊𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴌𐴡𐴏𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RFAburmese