𐴔𐴡𐴚𐴋𐴤𐴟𐴃𐴢 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴕𐴟𐴖𐴥𐴝𐴏𐴢 𐴉𐴡𐴌𐴥𐴠𐴌𐴊𐴧𐴠 𐴐𐴤𐴡𐴣𐴀𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 𐴁𐴝𐴏𐴞𐴁𐴤𐴝𐴌 𐴀𐴝𐴐𐴤𐴝 𐴈𐴡𐴔 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌𐴡𐴌 𐴓𐴥𐴝𐴏𐴝 𐴌𐴥𐴠𐴑𐴧𐴤𐴗𐴝 𐴒𐴤𐴟𐴕𐴥𐴝 𐴉𐴝𐴌𐴝𐴌𐴝𐴃𐴢 𐴔𐴝𐴏𐴢 𐴏𐴝𐴀𐴝𐴘𐴢 𐴉𐴟𐴃𐴢 𐴎𐴤𐴞𐴘𐴢 𐴉𐴝𐴓𐴞 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴃𐴤𐴝 𐴏𐴝𐴀𐴝𐴘𐴢 𐴄𐴤𐴞𐴑𐴤𐴞 𐴒𐴟𐴓𐴞 𐴔𐴝𐴌𐴞 𐴔𐴝𐴃𐴤𐴝𐴌 𐴄𐴟𐴖𐴡𐴓𐴢 𐴃𐴟𐴓𐴥𐴞 𐴉𐴥𐴝𐴓𐴥𐴝𐴘𐴧𐴠 𐴱 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴁𐴝𐴏𐴞𐴁𐴤𐴡𐴊𐴠 𐴀𐴝𐴐𐴤𐴝 𐴁𐴠𐴐𐴤𐴞 𐴈𐴡𐴔 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴔𐴡𐴚𐴋𐴤𐴟 𐴐𐴤𐴡𐴀𐴡𐴌𐴡𐴌 𐴓𐴥𐴝𐴏𐴝 𐴉𐴝𐴌𐴝 𐴒𐴤𐴗𐴝𐴚𐴡𐴌 𐴑𐴟𐴕𐴝 𐴉𐴝𐴌𐴝𐴌 / 𐴀𐴥𐴟 𐴅𐴡𐴓𐴞𐴓𐴡𐴌 𐴉𐴟𐴖𐴝 𐴒𐴟𐴌𐴝𐴘𐴧𐴝 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌 𐴱 𐴒𐴡𐴃𐴡 𐴀𐴡𐴒𐴤𐴡𐴏𐴄𐴢 𐴔𐴝𐴐𐴢 𐴀𐴥𐴡𐴘𐴃𐴠 𐴒𐴤𐴡𐴌𐴒𐴟𐴐𐴧𐴞 𐴓𐴡𐴘 𐴇𐴥𐴝𐴁𐴞 𐴉𐴝𐴌𐴝𐴃𐴢 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴌𐴞𐴉𐴟𐴎𐴞 𐴀𐴥𐴞𐴏𐴝𐴉𐴠 𐴃𐴤𐴝𐴑𐴤𐴠𐴌 𐴱 𐴀𐴥𐴞𐴃𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑 𐴌𐴦𐴡𐴘𐴢 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴴 𐴁𐴝𐴎𐴠 𐴱 𐴇𐴥𐴝𐴁𐴞 𐴉𐴝𐴌𐴝 𐴀𐴝𐴌 𐴑𐴟𐴕𐴝 𐴉𐴝𐴌𐴝𐴌 𐴔𐴝𐴎𐴤𐴠 𐴀𐴝𐴏𐴥𐴠𐴊𐴠 𐴈𐴥𐴝𐴓𐴡𐴃𐴢 𐴔𐴝𐴏𐴢 𐴏𐴝𐴀𐴝𐴘 𐴁𐴦𐴝𐴊𐴠 𐴀𐴝𐴏𐴥𐴡𐴌𐴡𐴌 𐴕𐴟𐴖𐴥𐴝𐴏𐴢 𐴉𐴡𐴌𐴥𐴠𐴌𐴊𐴧𐴠 𐴐𐴤𐴡𐴣𐴀𐴡𐴃𐴢 𐴱𐴱

𐴒𐴤𐴟𐴕𐴝 𐴉𐴝𐴌𐴝𐴃𐴢 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴱 𐴈𐴡𐴕𐴥𐴡 𐴏𐴥𐴡𐴁𐴡𐴁𐴢 𐴏𐴥𐴝𐴌𐴥𐴝 𐴔𐴝𐴃𐴤𐴝 𐴏𐴝𐴀𐴝𐴘 𐴄𐴤𐴞𐴑𐴤𐴞 𐴒𐴟𐴓𐴞 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴔𐴝𐴃𐴤𐴝𐴌 𐴄𐴟𐴖𐴡𐴓𐴢 𐴀𐴟𐴍𐴥𐴞 𐴒𐴞𐴘𐴧𐴥𐴡𐴘𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴉𐴡𐴃𐴧𐴞 𐴁𐴝𐴌𐴡𐴃𐴢 𐴀𐴥𐴞𐴃𐴤𐴝𐴌 𐴀𐴥𐴝𐴃𐴝 𐴔𐴡𐴌𐴞𐴏𐴡𐴌 𐴒𐴟𐴌𐴞 𐴀𐴝𐴕𐴥𐴝𐴘𐴃𐴤𐴡 𐴱 𐴒𐴟𐴓𐴞 𐴔𐴝𐴌𐴞 𐴁𐴦𐴝𐴊𐴠 𐴀𐴥𐴞𐴃𐴠 𐴕𐴞𐴎𐴝𐴀𐴝𐴙𐴓𐴊𐴠 𐴔𐴡𐴌𐴞𐴏𐴡𐴌 𐴒𐴟𐴌𐴞 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴏𐴥𐴝 𐴏𐴝𐴔𐴝𐴕 𐴁𐴠𐴒𐴧𐴤𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴡𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴀𐴠𐴈𐴥𐴡𐴕 𐴋𐴝𐴑𐴄𐴡𐴌 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴤𐴟𐴃𐴡𐴌 𐴈𐴡𐴔𐴞𐴌 𐴏𐴥𐴡𐴁𐴡𐴁𐴠 𐴁𐴝𐴏𐴞𐴁𐴤𐴡𐴊𐴠 𐴀𐴝𐴐𐴤𐴝 𐴈𐴡𐴔 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴇𐴥𐴝𐴁𐴞 𐴉𐴝𐴌𐴝𐴌 𐴀𐴞𐴐𐴑𐴟𐴓𐴡𐴃𐴢 𐴒𐴤𐴝𐴣𐴄𐴞 𐴁𐴝𐴕𐴝𐴘𐴢 𐴃𐴤𐴝𐴙𐴑𐴧𐴤𐴙𐴠𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴊𐴝𐴁𐴝𐴘𐴢 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘𐴢 𐴆𐴤𐴙𐴡𐴑 𐴓𐴠𐴒𐴤𐴝𐴌 𐴀𐴥𐴞𐴑𐴧𐴙𐴝 𐴓𐴡𐴘𐴢 𐴒𐴞𐴘𐴧𐴥𐴡𐴘𐴢 𐴱 𐴀𐴦𐴡 𐴌𐴟𐴇𐴝𐴙𐴚𐴒𐴙𐴝 𐴁𐴝𐴂𐴢 𐴁𐴤𐴝𐴘𐴢 𐴀𐴥𐴡𐴑𐴧𐴡𐴓𐴢 : 𐴏𐴡𐴀𐴡 𐴔𐴝𐴙𐴅𐴧𐴤𐴙𐴠𐴊𐴠 𐴘𐴥𐴡 𐴀𐴥𐴞𐴃𐴤𐴝𐴌𐴝 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴔𐴡𐴊𐴡𐴊𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴁𐴤𐴠𐴐𐴢 𐴊𐴤𐴡𐴌𐴥𐴞 𐴊𐴠𐴈𐴥𐴝𐴌𐴊𐴧𐴠 𐴘𐴥𐴡 𐴀𐴥𐴞𐴃𐴤𐴝𐴌𐴝 𐴱 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝𐴌𐴃𐴧𐴟 𐴉𐴟𐴃𐴢 𐴎𐴤𐴞𐴘𐴢 𐴉𐴝𐴣𐴐𐴢 𐴎𐴡𐴕 𐴀𐴝𐴏𐴥𐴠 𐴀𐴠𐴈𐴥𐴡𐴕 𐴀𐴥𐴞𐴃𐴤𐴝𐴌𐴥𐴝𐴌 𐴈𐴡𐴕 𐴇𐴥𐴝𐴓𐴡𐴃𐴢 𐴀𐴥𐴡𐴘𐴁𐴡 𐴱𐴱

𐴇𐴥𐴝𐴓𐴡𐴃𐴢 𐴀𐴞𐴀𐴞𐴕 𐴓𐴡𐴘 𐴁𐴟𐴎𐴤𐴝 𐴎𐴝𐴀𐴝𐴌𐴊𐴧𐴠 𐴌𐴠𐴕𐴒𐴟𐴕 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴓𐴝𐴓𐴥𐴡𐴏𐴢 𐴊𐴠𐴈𐴥𐴝𐴘𐴢 𐴉𐴝𐴌𐴡 𐴘𐴦𐴝𐴃𐴤𐴡 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴔𐴝𐴌𐴝 𐴊𐴤𐴡𐴌𐴥𐴝 𐴒𐴡𐴌𐴥𐴞 𐴉𐴝𐴌𐴡 𐴱 𐴀𐴝𐴌𐴑𐴝𐴕𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘𐴢 𐴉𐴥𐴠𐴓𐴥𐴡 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞𐴌 𐴏𐴥𐴞𐴘𐴝𐴏𐴞 𐴉𐴝𐴄𐴞 𐴀𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴊𐴟𐴕𐴥𐴟𐴖𐴧𐴥𐴝𐴌 𐴁𐴡𐴌𐴡 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴇𐴥𐴡𐴑𐴟𐴔 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴁𐴟𐴎𐴤𐴝 𐴒𐴞𐴘𐴧𐴥𐴠 𐴱 𐴀𐴥𐴠𐴃𐴡𐴓𐴧𐴝 𐴀𐴝𐴌𐴑𐴝𐴕 𐴏𐴥𐴝𐴌𐴥𐴞 𐴈𐴡𐴕𐴥𐴡 𐴔𐴞𐴑𐴧𐴤𐴙𐴝 𐴕𐴡 𐴎𐴝𐴘𐴁𐴤𐴡𐴓𐴧𐴝 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴁𐴟𐴎𐴤𐴡𐴘𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴀𐴡𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN