𐴎𐴝𐴃𐴞 𐴏𐴞𐴕𐴧𐴡 𐴁𐴝𐴕𐴝𐴘𐴃𐴤𐴡 𐴎𐴝𐴘 𐴋𐴝𐴓𐴝𐴓 𐴐𐴤𐴡𐴣𐴀𐴡 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴱𐴱

𐴏𐴡𐴓𐴠𐴌 𐴊𐴧𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴐𐴤𐴡𐴔𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴱 𐴐𐴤𐴡𐴌𐴞𐴘𐴡𐴃𐴢 𐴉𐴟𐴌 𐴎𐴞𐴓𐴥𐴝𐴌 𐴒𐴟𐴐𐴝𐴀𐴞𐴌 𐴇𐴥𐴝𐴣𐴄𐴢 𐴀𐴠𐴓𐴝𐴑𐴝𐴌 𐴀𐴟𐴉𐴡𐴎𐴞𐴓𐴥𐴝𐴌 𐴁𐴤𐴟𐴄𐴢 𐴀𐴡𐴉𐴥𐴞𐴏𐴡𐴃𐴢 𐴱 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝 𐴊𐴠𐴐𐴤𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴉𐴡𐴃𐴧𐴡𐴌𐴡 𐴏𐴥𐴝𐴁𐴟𐴃𐴢 𐴁𐴝𐴕𐴝𐴘𐴁𐴤𐴡𐴓𐴧𐴝 𐴒𐴞𐴘𐴧𐴥𐴠 𐴱 𐴀𐴟𐴉𐴡𐴎𐴟𐴑𐴃𐴡 𐴃𐴡𐴊𐴡𐴕𐴃𐴡 𐴃𐴡𐴊𐴝𐴌𐴟𐴑 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠𐴱 𐴀𐴥𐴞𐴃𐴤𐴝𐴌𐴥𐴝𐴌 𐴊𐴡𐴌𐴔𐴞𐴘𐴝𐴕𐴡𐴃 𐴈𐴡𐴃𐴤𐴝 𐴁𐴠𐴐𐴤𐴞 𐴁𐴝𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱𐴱

𐴁𐴤𐴟𐴄𐴢 𐴀𐴡𐴉𐴥𐴞𐴏𐴡𐴌 𐴐𐴤𐴝𐴉𐴠 𐴀𐴥𐴞𐴃𐴤𐴝𐴌𐴝𐴌𐴥𐴝𐴌 𐴓𐴡𐴘 𐴆𐴠𐴓𐴥𐴠𐴛𐴅 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴥𐴠𐴈𐴡𐴕 𐴉𐴟𐴓𐴞𐴐𐴢 𐴔𐴝𐴃𐴝𐴘𐴧𐴥𐴠 𐴱 𐴃𐴡𐴀𐴡𐴘 𐴉𐴟𐴓𐴞𐴐𐴢 𐴀𐴝𐴀𐴝𐴘 𐴀𐴥𐴞𐴃𐴤𐴝𐴌𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴝𐴓𐴥𐴝𐴘𐴧𐴠 𐴱 𐴀𐴥𐴠 𐴀𐴡𐴑𐴃𐴤𐴡𐴃𐴢 𐴀𐴥𐴞𐴃𐴤𐴝𐴌𐴝𐴌𐴥𐴠 𐴐𐴤𐴡𐴎𐴟𐴒𐴞𐴃𐴝 𐴔𐴡𐴊𐴡𐴊 𐴒𐴡𐴙𐴃𐴧𐴤𐴡 𐴀𐴝𐴙𐴐𐴧𐴤𐴙𐴠𐴊𐴠 𐴁𐴝𐴚𐴓𐴝 𐴊𐴠𐴐𐴤𐴞 𐴋𐴝𐴓𐴝𐴓 𐴀𐴥𐴞𐴁𐴤𐴝𐴌𐴥𐴠 𐴘𐴥𐴡 𐴀𐴟𐴘𐴃𐴝𐴌𐴥𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞 𐴎𐴡𐴕𐴡𐴌 𐴕𐴝𐴔 𐴀𐴥𐴡𐴙𐴓𐴊𐴠 𐴔𐴟𐴇𐴝𐴔𐴧𐴡𐴊𐴢 𐴕𐴟𐴌 𐴇𐴟𐴏𐴝𐴙𐴕 𐴀𐴝𐴌 𐴔𐴟𐴇𐴝𐴔𐴧𐴡𐴊𐴢 𐴀𐴝𐴘𐴧𐴟𐴁𐴢 𐴀𐴝𐴓𐴞 𐴀𐴝𐴌 𐴋𐴝𐴓𐴝𐴓𐴡𐴌 𐴕𐴝𐴔 𐴀𐴥𐴡𐴙𐴓𐴊𐴠 𐴱 𐴒𐴟𐴐𐴝𐴀𐴞𐴌 𐴇𐴥𐴝𐴣𐴄𐴢 𐴀𐴟𐴉𐴡𐴎𐴞𐴓𐴥𐴝𐴌 𐴑𐴟𐴊𐴝𐴓 𐴉𐴟𐴌 𐴀𐴠𐴓𐴝𐴑𐴝𐴌 𐴁𐴤𐴝𐴐𐴞 𐴀𐴥𐴝𐴇𐴏𐴡𐴕 𐴀𐴟𐴓𐴧𐴝𐴇𐴢 𐴱 𐴀𐴥𐴞𐴃𐴤𐴝𐴌𐴥𐴝 𐴃𐴞𐴕𐴥𐴞 𐴎𐴡𐴕𐴡𐴌𐴥𐴠 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴌𐴥𐴞 𐴒𐴟𐴐𐴝𐴀𐴞𐴌 𐴇𐴥𐴝𐴣𐴄𐴢 𐴃𐴤𐴝𐴕𐴝𐴃𐴢 𐴓𐴡𐴘𐴢 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴃𐴡𐴀𐴡𐴘 𐴀𐴠𐴔𐴞𐴒𐴞𐴌𐴞𐴐𐴤𐴠𐴕𐴡𐴌 𐴁𐴡𐴘𐴊𐴠𐴐𐴤𐴡𐴙𐴃𐴧𐴝 𐴑𐴝𐴕𐴟𐴕𐴡𐴌 𐴊𐴤𐴝𐴌𐴝 𐴓𐴡𐴘 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴒𐴟𐴐𐴝𐴀𐴞𐴌 𐴇𐴥𐴝𐴣𐴄𐴢 𐴃𐴤𐴝𐴕𐴝𐴌 𐴁𐴡𐴌𐴡 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴤𐴟𐴄𐴢 𐴀𐴡𐴉𐴥𐴞𐴏𐴡𐴌 𐴁𐴡𐴌𐴡 𐴀𐴝𐴁𐴟 𐴊𐴝𐴀𐴟𐴊𐴡𐴌 𐴔𐴟𐴑𐴎𐴟𐴁𐴝𐴕𐴞 𐴀𐴥𐴡𐴙𐴓𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴊𐴟𐴕𐴥𐴞 𐴎𐴡𐴕𐴠 𐴀𐴡𐴉𐴥𐴞𐴏𐴡𐴃𐴢 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠𐴊𐴠 𐴈𐴝𐴁𐴡𐴏𐴢 𐴉𐴡𐴕𐴧𐴝 𐴏𐴝𐴀𐴝𐴘 𐴁𐴦𐴝𐴊𐴠 𐴐𐴟𐴁𐴤𐴝 𐴓𐴝𐴒𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴁𐴠𐴐𐴤𐴞 𐴏𐴡𐴑𐴃𐴤𐴡 𐴒𐴡𐴌𐴥𐴞 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴝 𐴒𐴞𐴘𐴧𐴥𐴠 𐴱 𐴐𐴤𐴠𐴐𐴠 𐴁𐴡𐴌𐴠 𐴕𐴡 𐴀𐴝𐴀𐴝𐴘 𐴃𐴝𐴌𐴥𐴝 𐴕𐴞𐴎𐴠 𐴐𐴤𐴞𐴑𐴝𐴌 𐴒𐴡𐴙𐴓𐴧𐴥𐴡𐴊𐴠 𐴱 𐴀𐴝𐴣𐴀𐴝𐴌𐴝 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴱 𐴃𐴡𐴀𐴡𐴘 𐴀𐴥𐴞𐴃𐴤𐴝𐴌𐴝𐴌𐴥𐴠 𐴃𐴤𐴝𐴕𐴝𐴌 𐴇𐴥𐴝𐴖𐴝𐴓𐴝 𐴒𐴡𐴌𐴥𐴞 𐴊𐴞𐴘𐴧𐴝 𐴒𐴞𐴘𐴧𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

Sources : Ukhiyanews.com