𐴕𐴡𐴘𐴧𐴝 𐴀𐴝𐴙𐴐𐴧𐴤𐴙𐴠𐴊𐴠 𐴰 𐴵 𐴎𐴡𐴕𐴡𐴌𐴠 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴁𐴞 𐴅𐴞 𐴁𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴖𐴝𐴉𐴠𐴏𐴢 𐴔𐴡𐴚𐴋𐴤𐴟 𐴉𐴡𐴣𐴀𐴡𐴏𐴝𐴘 𐴊𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴕𐴦𐴠𐴓𐴝𐴘 𐴊𐴡𐴀𐴡𐴙𐴕𐴧𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴧𐴤𐴟 𐴎𐴡𐴕 𐴉𐴡𐴃𐴞 𐴶 𐴓𐴝𐴑 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴓𐴡𐴘 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴝𐴌𐴝𐴒𐴝𐴌𐴥𐴝𐴘 𐴊𐴞𐴘𐴧𐴥𐴠𐴊𐴠 𐴰 𐴵 𐴎𐴡𐴕𐴡𐴌 𐴃𐴧𐴟 𐴀𐴥𐴝𐴌𐴥𐴡 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴁𐴞 𐴅𐴞 𐴁𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴱 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴌𐴝𐴙𐴃𐴡𐴌 𐴀𐴝𐴣𐴐𐴄𐴡 𐴁𐴝𐴎𐴠 𐴱 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴌 𐴀𐴥𐴠𐴑𐴟𐴓𐴠 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴕𐴦𐴠𐴓𐴝𐴘𐴢 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠𐴊𐴠 𐴂𐴠𐴓𐴝𐴕 𐴔𐴡𐴎𐴞𐴕 𐴈𐴟𐴊𐴦𐴟𐴕 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴡𐴌𐴥𐴠 𐴄𐴤𐴞𐴑 𐴒𐴡𐴌𐴥𐴞 𐴎𐴞𐴔𐴧𐴝𐴊𐴝𐴌𐴞 𐴊𐴞𐴘𐴧𐴥𐴠 𐴱 𐴇𐴥𐴞𐴃𐴝𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴁𐴠𐴌𐴟𐴊𐴧𐴤𐴞 𐴑𐴟𐴖𐴥𐴝𐴓𐴥𐴝𐴘𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃𐴡𐴌 𐴖𐴡𐴌𐴠 𐴁𐴠𐴐𐴤𐴞 𐴀𐴝𐴉𐴏𐴥𐴟𐴏𐴢 𐴒𐴡𐴌𐴥𐴞 𐴇𐴥𐴝𐴔𐴊𐴡𐴌𐴡𐴊𐴞 𐴊𐴠𐴈𐴥𐴝𐴘𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴝𐴌𐴑𐴝𐴕𐴡𐴃𐴧𐴤𐴟 𐴕𐴦𐴠𐴓𐴝𐴘 𐴉𐴥𐴠𐴓𐴥𐴝𐴘𐴁𐴤𐴝𐴌 𐴑𐴟𐴐𐴤𐴡𐴓 𐴀𐴥𐴡𐴑𐴧𐴡𐴓 𐴒𐴡𐴌𐴥𐴠 𐴱𐴱

𐴃𐴡𐴀𐴡𐴘 𐴀𐴥𐴠 𐴏𐴥𐴞𐴓𐴏𐴞𐴓𐴝𐴃𐴢 𐴋𐴝𐴀𐴝𐴘 𐴀𐴥𐴞𐴁𐴤𐴝 𐴘𐴠 𐴇𐴥𐴝𐴣𐴃𐴢 𐴉𐴝𐴣𐴏𐴢 𐴏𐴡𐴙𐴊𐴧𐴤𐴡 𐴈𐴡𐴀𐴡𐴘 𐴒𐴡𐴃𐴡 𐴇𐴥𐴝𐴉𐴃𐴝 𐴀𐴥𐴡𐴑𐴧𐴡𐴓𐴡𐴃𐴢 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃𐴧𐴤𐴟 𐴎𐴡𐴕 𐴉𐴞𐴏𐴥𐴠 𐴑𐴟𐴌𐴞 𐴓𐴝𐴑 𐴄𐴞𐴛𐴝 𐴓𐴡𐴘 𐴰 𐴰 𐴳 𐴃𐴞𐴕 𐴐𐴤𐴡𐴃𐴢 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴒𐴝𐴌𐴥𐴞 𐴁𐴤𐴡𐴌𐴞 𐴔𐴡𐴚𐴋𐴤𐴟 𐴀𐴝𐴙𐴕𐴧𐴥𐴙𐴠 𐴉𐴥𐴞𐴃𐴤𐴞𐴕 𐴘𐴥𐴝𐴀𐴝𐴕𐴃𐴟 𐴋𐴝𐴀𐴝𐴘 𐴀𐴝𐴌 𐴀𐴟𐴒𐴧𐴤𐴗𐴝 𐴘𐴠 𐴎𐴡𐴕 𐴉𐴡𐴃𐴞 𐴏𐴥𐴡 𐴓𐴝𐴑 𐴄𐴞𐴛𐴝 𐴓𐴡𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴃𐴟 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴞 𐴅𐴞 𐴁𐴞 𐴘𐴠 𐴰 𐴵 𐴎𐴡𐴕𐴡𐴌 𐴖𐴡𐴌𐴠 𐴊𐴤𐴡𐴌𐴥𐴞 𐴖𐴝𐴉𐴠𐴏𐴢 𐴔𐴡𐴚𐴋𐴤𐴟𐴌 𐴔𐴝𐴚𐴓𐴝 𐴅𐴤𐴞 𐴉𐴡𐴣𐴀𐴡𐴏𐴝𐴘𐴢 𐴊𐴞𐴘𐴧𐴥𐴠 𐴱 𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴔𐴥𐴝 𐴏𐴦𐴡𐴛 𐴀𐴥𐴡𐴑𐴧𐴡𐴓𐴠 𐴌𐴝𐴙𐴃𐴢 𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴏𐴥𐴝𐴌𐴥𐴝 𐴉𐴠𐴌𐴝𐴌 𐴈𐴝𐴣𐴏𐴝𐴃𐴢 𐴕𐴦𐴡 𐴓𐴡𐴘 𐴁𐴤𐴝𐴐𐴤𐴝𐴃𐴢 𐴌𐴝𐴑𐴤𐴞 𐴊𐴞𐴀𐴞 𐴷 𐴱 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴹 𐴁𐴝𐴎𐴠 𐴑𐴟𐴓𐴡𐴃𐴢 𐴀𐴟𐴍𐴥𐴞𐴁𐴤𐴡𐴓𐴧𐴝 𐴀𐴠𐴅𐴝𐴎𐴡𐴃𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MPV