𐴒𐴝𐴙𐴌 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴒𐴤𐴡𐴙𐴓𐴧𐴙𐴠𐴊𐴠 𐴰 𐴷 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴄𐴤𐴝𐴘𐴓𐴠𐴕𐴡𐴌 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝 𐴱 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴓𐴞 𐴈𐴡𐴀𐴡𐴘 𐴁𐴞𐴐𐴧𐴤𐴝𐴐𐴢 𐴒𐴡𐴌𐴥𐴝 𐴎𐴝𐴀𐴝𐴊𐴠 𐴰 𐴳 𐴎𐴡𐴕 𐴉𐴟𐴖𐴝𐴙𐴕 𐴀𐴥𐴡 𐴀𐴝𐴏𐴥𐴠𐴊𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴈𐴡𐴊𐴦𐴟𐴕 𐴔𐴝𐴙𐴕𐴐𐴤𐴡𐴌 𐴋𐴝𐴀𐴝𐴘 𐴁𐴡𐴌𐴔𐴥𐴝𐴌 𐴀𐴥𐴠 𐴑𐴟𐴓𐴃𐴟 𐴒𐴝𐴙𐴌 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴱 𐴄𐴤𐴝𐴘𐴓𐴠𐴕𐴡𐴃𐴢 𐴒𐴤𐴡𐴙𐴓𐴧𐴙𐴠𐴊𐴠 𐴰 𐴷 𐴎𐴡𐴕 𐴔𐴝𐴙𐴕𐴐𐴤𐴡𐴌𐴠 𐴄𐴤𐴝𐴘𐴓𐴠𐴕𐴡𐴌 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴱 𐴄𐴤𐴝𐴘𐴓𐴠𐴕𐴡𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴐𐴤𐴟𐴌𐴟𐴌 𐴁𐴤𐴝𐴉𐴝 𐴏𐴞𐴃𐴝 𐴀𐴝𐴌 𐴃𐴡𐴊𐴡𐴕𐴃𐴡 𐴃𐴝𐴊𐴝𐴌𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴁𐴟𐴎𐴤𐴝 𐴒𐴠𐴓𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴱 𐴎𐴞𐴃𐴝𐴌𐴥𐴝 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴱 𐴏𐴟𐴑𐴤𐴠 𐴎𐴞𐴣𐴀𐴞𐴑𐴧𐴤𐴙𐴝 𐴊𐴠𐴑𐴤𐴠 𐴀𐴝𐴌 𐴀𐴞𐴕𐴋𐴟𐴕𐴞𐴆𐴤𐴙𐴝 𐴀𐴝𐴌 𐴔𐴡𐴓𐴠𐴆𐴤𐴙𐴝 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴁𐴡𐴓𐴞 𐴱 𐴂𐴠𐴕 𐴚𐴥𐴝 𐴋𐴞𐴐𐴄𐴤𐴞𐴑𐴡𐴌 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴤𐴝𐴘𐴓𐴠𐴕𐴡𐴌 𐴊𐴡𐴀𐴡𐴙𐴕 𐴀𐴥𐴞𐴏𐴧𐴝𐴌 𐴋𐴞𐴘𐴝 𐴀𐴟𐴒𐴧𐴤𐴗𐴝𐴌 𐴈𐴝𐴣𐴏𐴝𐴃𐴢 𐴱 𐴔𐴝𐴃𐴤𐴝𐴃𐴢 𐴌𐴟𐴔𐴝𐴓𐴢 𐴉𐴞𐴕𐴊𐴤𐴝 𐴁𐴠𐴍𐴞𐴀𐴥𐴝𐴙𐴕 𐴀𐴥𐴟𐴊𐴧𐴝 𐴀𐴝𐴏𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴔𐴝𐴕𐴥𐴟𐴙𐴐𐴢 𐴈𐴡𐴊𐴦𐴟𐴕𐴡𐴌 𐴉𐴡𐴄𐴤𐴟 𐴌𐴗𐴠𐴄𐴝𐴌 𐴈𐴥𐴡𐴁𐴡𐴌 𐴀𐴠𐴅𐴤𐴠𐴕𐴏𐴞 𐴘𐴠 𐴊𐴠𐴙𐴑𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴊𐴡𐴙𐴅𐴧𐴙𐴝 𐴄𐴤𐴝𐴕𐴋𐴝 𐴃𐴤𐴞𐴔 𐴃𐴤𐴝𐴑𐴤𐴠𐴊𐴠 𐴔𐴟𐴀𐴟𐴏𐴡𐴔 𐴱 𐴀𐴡𐴑𐴄𐴟𐴁𐴡𐴌 𐴔𐴝𐴐𐴢 𐴀𐴥𐴡𐴘𐴃𐴠 𐴀𐴠𐴂𐴌𐴞𐴓 𐴉𐴡𐴙𐴅𐴧𐴡𐴕𐴃𐴡 𐴀𐴡𐴑𐴃𐴡 𐴘𐴝𐴀𐴝𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴠𐴐𐴤𐴞 𐴑𐴤𐴞𐴕𐴝 𐴀𐴝𐴌 𐴕𐴞𐴌𐴡𐴙𐴃𐴧𐴤𐴝 𐴇𐴥𐴝𐴓𐴡𐴃𐴡𐴃𐴢 𐴱 𐴒𐴝𐴏𐴥𐴡𐴌 𐴁𐴝𐴕𐴝 𐴁𐴟𐴄𐴢 𐴀𐴥𐴡𐴑𐴧𐴡𐴓 𐴓𐴡𐴘 𐴁𐴡𐴌𐴔𐴥𐴝𐴌 𐴒𐴤𐴡𐴌𐴈𐴝𐴛𐴏𐴧𐴝 𐴊𐴠𐴐𐴢 𐴄𐴤𐴝𐴘𐴓𐴠𐴕 𐴀𐴝𐴌 𐴁𐴝𐴚𐴓𐴝𐴊𐴠𐴐𐴢 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕 𐴁𐴠𐴐𐴤𐴞 𐴀𐴝𐴏𐴥𐴠𐴊𐴠 𐴊𐴠𐴐𐴢 𐴱 𐴀𐴞𐴕𐴋𐴟𐴕𐴥𐴞𐴆𐴤𐴙𐴝 𐴀𐴝𐴌 𐴔𐴡𐴓𐴠𐴆𐴤𐴙𐴝𐴌 𐴀𐴥𐴞𐴑𐴧𐴤𐴙𐴝 𐴎𐴝𐴀𐴝𐴃𐴢 𐴃𐴤𐴝𐴑𐴤𐴠 𐴁𐴡𐴓𐴞 𐴇𐴥𐴝𐴓𐴡𐴃𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴱 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟𐴉𐴝𐴓𐴡𐴚 𐴲 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴔𐴡𐴌 𐴔𐴞𐴑𐴝𐴀𐴞𐴓𐴢 𐴑𐴡𐴌𐴝𐴅𐴝 𐴔𐴡𐴊𐴌𐴡𐴏𐴥𐴝𐴌 𐴊𐴡𐴏𐴃𐴦𐴝𐴌 𐴁𐴡𐴕𐴊𐴞 𐴱𐴱

𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟𐴉𐴝𐴓𐴡𐴚 𐴲 𐴓𐴡𐴔𐴁𐴤𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴔𐴞𐴑𐴝𐴀𐴞𐴓 𐴑𐴡𐴌𐴝𐴅𐴝 𐴔𐴡𐴊𐴌𐴡𐴏𐴥𐴝 𐴱 𐴎𐴞𐴘𐴥𐴝𐴕𐴡𐴃𐴢 𐴅𐴡𐴔𐴦𐴝𐴃𐴠 𐴕𐴡𐴇𐴥𐴟𐴔 𐴀𐴥𐴡𐴘𐴃𐴠 𐴊𐴡𐴖𐴌𐴝 𐴐𐴤𐴡𐴌𐴞𐴉𐴢 𐴉𐴡𐴙𐴅𐴧𐴡𐴕𐴃𐴡 𐴁𐴠𐴐𐴤𐴞 𐴁𐴤𐴝𐴓𐴝 𐴁𐴤𐴝𐴓𐴝 𐴀𐴟𐴏𐴃𐴝𐴊𐴢 𐴀𐴥𐴡𐴑𐴧𐴡𐴓𐴡𐴌 𐴎𐴞𐴔𐴧𐴝𐴊𐴝𐴌𐴞𐴃𐴢 𐴁𐴠𐴐𐴤𐴞 𐴀𐴠𐴕𐴃𐴠𐴎𐴦𐴝𐴔𐴡𐴌 𐴏𐴥𐴝𐴣𐴀𐴝𐴃𐴠 𐴀𐴟𐴉𐴡𐴎𐴟𐴑𐴃𐴡 𐴁𐴤𐴝𐴉𐴠 𐴃𐴦𐴝𐴓𐴞𐴔 𐴊𐴞𐴘𐴧𐴝 𐴎𐴝𐴀𐴝𐴌 𐴱𐴱

𐴎𐴞𐴘𐴥𐴝𐴕𐴡𐴃 𐴱 / 𐴹 / 𐴶 𐴳 𐴲 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴕𐴲 𐴱 / 𐴵/ 𐴶 𐴴 𐴴 𐴱 𐴇𐴥𐴞𐴅𐴞𐴌𐴞 𐴵 𐴱 / 𐴱 𐴱/ 𐴴 𐴲 𐴰 𐴲 𐴀𐴞𐴚𐴌𐴝𐴎𐴞 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴁𐴡𐴏𐴥𐴡𐴌𐴞 𐴅𐴡𐴓𐴏𐴝 𐴀𐴥𐴡𐴘𐴧𐴠 𐴱 𐴎𐴠 𐴅𐴡𐴓𐴏𐴝𐴃𐴢 𐴊𐴡𐴖𐴌𐴝 𐴐𐴤𐴡𐴌𐴞𐴉𐴢 𐴉𐴡𐴌𐴥𐴞 𐴔𐴡𐴖𐴓𐴝𐴕𐴝 𐴋𐴞𐴒𐴞𐴌𐴞 𐴓𐴡𐴘 𐴉𐴦𐴝𐴌𐴠𐴒𐴢 𐴀𐴥𐴡𐴘𐴧𐴠𐴊𐴠 𐴳 𐴲 𐴎𐴡𐴕 𐴉𐴟𐴖𐴝𐴙𐴕𐴊𐴤𐴡𐴌𐴥𐴠 𐴊𐴡𐴏𐴃𐴦𐴝𐴌 𐴁𐴡𐴕𐴊𐴞 𐴒𐴡𐴌𐴥𐴝 𐴀𐴝𐴌 𐴏𐴥𐴝𐴓𐴄𐴞𐴑𐴤𐴡𐴄𐴢 𐴊𐴞𐴘𐴧𐴝𐴌 𐴔𐴡𐴅𐴓𐴞𐴏𐴢 𐴒𐴡𐴙𐴅𐴧𐴤𐴙𐴠 𐴱 𐴀𐴥𐴠 𐴳 𐴲 𐴎𐴡𐴕 𐴔𐴡𐴖𐴓𐴝𐴕𐴝 𐴏𐴦𐴝𐴁𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴌 𐴁𐴞𐴐𐴤𐴠𐴕 𐴄𐴞𐴀𐴞𐴔𐴡𐴌 𐴔𐴞𐴔𐴁𐴤𐴡𐴌 𐴀𐴝𐴌 𐴌𐴟𐴇𐴝𐴙𐴝𐴚𐴒𐴙𐴝 𐴎𐴟𐴁𐴝𐴕 𐴑𐴡𐴗𐴕𐴏𐴥𐴞𐴓𐴡𐴌 𐴔𐴞𐴔𐴁𐴤𐴡𐴌 𐴱 𐴀𐴝𐴌 𐴎𐴝𐴕𐴠 𐴊𐴞𐴓𐴠 𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕 𐴉𐴡𐴌𐴥𐴝 𐴉𐴡𐴌𐴥𐴞𐴌 𐴑𐴤𐴠𐴌𐴔𐴡𐴏𐴢 𐴒𐴡𐴌𐴥𐴠𐴌𐴊𐴧𐴠 𐴔𐴡𐴖𐴓𐴝𐴕𐴝 𐴇𐴥𐴟𐴏𐴝𐴙𐴕 𐴀𐴥𐴝𐴇𐴔𐴡𐴊𐴢 𐴀𐴥𐴡 𐴀𐴝𐴏𐴥𐴠 𐴱𐴱

𐴔𐴡𐴖𐴓𐴝𐴕𐴝 𐴇𐴥𐴟𐴏𐴝𐴙𐴕 𐴀𐴥𐴝𐴇𐴔𐴡𐴊𐴢 𐴀𐴞𐴁𐴤𐴝 𐴘𐴠 𐴲 𐴱 𐴰 𐴲 𐴐𐴤𐴡𐴕 𐴓𐴡𐴃𐴞 𐴁𐴠𐴐𐴤𐴞 𐴀𐴞𐴔𐴝𐴕𐴊𐴝𐴌𐴞 𐴀𐴝𐴌 𐴀𐴝𐴔𐴝𐴕𐴡𐴃𐴊𐴝𐴌𐴞𐴌 𐴏𐴥𐴝𐴣𐴀𐴝𐴃𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕 𐴑𐴡𐴔𐴞𐴄𐴤𐴞𐴌 𐴉𐴥𐴟𐴣𐴖𐴥𐴝𐴣𐴃𐴞 𐴌𐴝𐴙𐴃𐴢 𐴊𐴞𐴕 𐴀𐴠𐴑 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕𐴡𐴌 𐴑𐴤𐴠𐴌𐴔𐴡𐴏𐴢 𐴒𐴡𐴌𐴥𐴞 𐴀𐴝𐴘𐴧𐴥𐴠𐴌𐴊𐴧𐴠 𐴀𐴥𐴠𐴍𐴥𐴠 𐴁𐴤𐴟𐴃𐴤𐴡𐴌𐴠 𐴱 𐴀𐴝𐴌 𐴀𐴠𐴈𐴥𐴡𐴕 𐴌𐴟𐴇𐴝𐴙𐴚𐴒𐴙𐴝 𐴎𐴟𐴁𐴝𐴕 𐴑𐴡𐴗𐴕𐴏𐴥𐴞𐴓𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴑𐴠𐴀𐴠𐴔𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴉𐴡𐴕𐴧𐴥𐴝 𐴉𐴡𐴌𐴥𐴝𐴉𐴡𐴌𐴥𐴞𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘𐴢 𐴒𐴡𐴌𐴥𐴠𐴌 𐴱 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝 𐴀𐴥𐴞𐴁𐴤𐴝𐴌 𐴑𐴤𐴠𐴌𐴔𐴡𐴏𐴡𐴌𐴥𐴠 𐴑𐴡𐴁𐴟𐴓 𐴒𐴡𐴌𐴥𐴞 𐴓𐴡𐴀𐴡𐴑 𐴱𐴱