𐴁𐴤𐴟𐴏𐴞𐴊𐴤𐴡𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴔𐴝𐴐𐴄𐴡𐴌 𐴀𐴠𐴑 𐴎𐴡𐴕 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴱𐴱

𐴔𐴝𐴐𐴄𐴡𐴌 𐴓𐴥𐴝 𐴀𐴡𐴗𐴚 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴑𐴡𐴗𐴔𐴠 𐴀𐴥𐴟𐴊𐴧𐴤𐴝 𐴀𐴝𐴊𐴡𐴌 𐴀𐴞𐴎𐴧𐴡𐴃𐴢 𐴒𐴡𐴌𐴥𐴠𐴊𐴠 𐴀𐴠𐴑 𐴎𐴡𐴕 𐴀𐴞𐴐𐴑𐴟𐴓𐴡𐴌 𐴔𐴝𐴐𐴄𐴡𐴌 𐴱 𐴎𐴞𐴁𐴤𐴝 𐴘𐴠 𐴑𐴡𐴗𐴔 𐴉𐴡𐴌𐴥𐴡𐴑 𐴊𐴤𐴡𐴌𐴔𐴡 𐴉𐴡𐴌𐴥𐴡𐴑 𐴕𐴡 𐴒𐴡𐴌𐴥𐴞 𐴀𐴝𐴌 𐴒𐴡𐴌𐴞𐴁𐴢 𐴃𐴟𐴖𐴝𐴚𐴒𐴡𐴌 𐴉𐴡𐴌𐴥𐴡𐴑 𐴕𐴡 𐴒𐴡𐴌𐴥𐴞 𐴁𐴠𐴒𐴧𐴤𐴟𐴕𐴡𐴌𐴥𐴠 𐴀𐴠𐴑 𐴕𐴡𐴎𐴡𐴌𐴠 𐴏𐴝𐴀𐴝𐴘 𐴱 𐴉𐴡𐴕𐴧𐴥𐴝 𐴉𐴡𐴌𐴥𐴝𐴊𐴠 𐴔𐴝𐴐𐴄𐴡𐴌 𐴎𐴞𐴁𐴤𐴝𐴌𐴥𐴠 𐴊𐴠𐴐𐴤𐴡𐴌 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴥𐴠 𐴏𐴞𐴕𐴥𐴠𐴱𐴱

𐴀𐴥𐴞𐴁𐴤𐴝 𐴈𐴡𐴕𐴥𐴡 𐴀𐴟𐴒𐴧𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴓𐴡𐴘 𐴃𐴦𐴝𐴓𐴧𐴟𐴑𐴢 𐴕𐴥𐴝𐴘 𐴱 𐴘𐴥𐴝𐴀𐴝𐴕𐴡𐴌𐴓𐴧𐴥𐴝 𐴁𐴡𐴓𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓 𐴐𐴤𐴡𐴣𐴀𐴡 𐴁𐴡𐴀𐴡𐴃𐴢 𐴎𐴡𐴕𐴠 𐴀𐴥𐴞𐴁𐴤𐴝𐴌 𐴓𐴡𐴘 𐴊𐴟𐴐𐴧𐴡𐴕𐴞 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴊𐴧𐴤𐴝 𐴀𐴝𐴏𐴥𐴠 𐴱 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴘𐴥𐴡 𐴕𐴞𐴊𐴝𐴒𐴞 𐴀𐴝𐴐𐴧𐴤𐴞𐴀𐴞𐴓𐴊𐴠 𐴔𐴝𐴕𐴥𐴟𐴙𐴐𐴢 𐴱 𐴀𐴥𐴞𐴁𐴤𐴝𐴌 𐴐𐴤𐴝𐴒𐴞𐴌𐴞𐴊𐴢 𐴌𐴟𐴇𐴝𐴙𐴚𐴒𐴙𐴝𐴌 𐴃𐴟 𐴁𐴤𐴝𐴌𐴥𐴡 𐴔𐴡𐴒𐴢 𐴁𐴠𐴐𐴤𐴞 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴕𐴥𐴡 𐴀𐴠𐴑𐴧𐴤𐴝𐴕 𐴈𐴡𐴏𐴥𐴟𐴌𐴞 𐴕𐴡 𐴊𐴠𐴈𐴥𐴝𐴘 𐴱 𐴀𐴝𐴌 𐴈𐴡𐴕𐴥𐴡 𐴈𐴡𐴃𐴤𐴝 𐴏𐴥𐴝𐴌𐴥𐴝 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴱 𐴒𐴤𐴡𐴌𐴡𐴃𐴧𐴤𐴟 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴎𐴟𐴑𐴝𐴎𐴟𐴑 𐴀𐴝𐴌 𐴈𐴥𐴡𐴁𐴡𐴌𐴝 𐴈𐴥𐴡𐴁𐴡𐴌𐴞 𐴕𐴥𐴝𐴘𐴢 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴢 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴠 𐴎𐴝𐴘 𐴔𐴝𐴐𐴄𐴡𐴌 𐴓𐴡𐴘 𐴊𐴡𐴓𐴝 𐴀𐴥𐴡𐴘𐴁𐴤𐴡𐴓𐴧𐴝 𐴁𐴠𐴐𐴤𐴞 𐴑𐴟𐴐𐴤𐴞𐴐𐴢 𐴒𐴡𐴙𐴅𐴧𐴤𐴙𐴠 𐴔𐴡𐴕𐴃𐴡𐴌 𐴑𐴝𐴔𐴞𐴘𐴝𐴁𐴢 𐴕𐴥𐴡 𐴀𐴥𐴡𐴀𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴠 𐴔𐴝𐴐𐴄𐴡𐴌𐴡𐴌𐴥𐴠 𐴑𐴞𐴘𐴥𐴡𐴓𐴧𐴝 𐴁𐴡𐴕 𐴒𐴡𐴙𐴅𐴧𐴤𐴙𐴡𐴊𐴠 𐴱 𐴀𐴝𐴌 𐴀𐴥𐴞𐴁𐴤𐴝𐴌 𐴈𐴡𐴏𐴥𐴟𐴌𐴞 𐴑𐴞𐴊𐴠 𐴁𐴡𐴓𐴞 𐴈𐴡𐴀𐴡𐴘 𐴁𐴝𐴌 𐴁𐴝𐴌 𐴒𐴡𐴌𐴥𐴞 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 𐴔𐴡𐴕𐴃𐴡𐴌 𐴒𐴤𐴠𐴄𐴢 𐴒𐴤𐴠𐴍𐴥𐴝𐴘𐴢 𐴊𐴤𐴡𐴔𐴑𐴞 𐴊𐴞𐴀𐴞 𐴓𐴡𐴌𐴝𐴘𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴝𐴌 𐴐𐴤𐴝𐴊𐴤𐴝 𐴂𐴝𐴂𐴓𐴥𐴞𐴑𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴉𐴡𐴌𐴥𐴡𐴑 𐴒𐴡𐴌𐴥𐴡𐴕 𐴏𐴝𐴀𐴝 𐴱 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴂𐴝𐴂𐴓𐴥𐴞𐴑𐴡𐴌𐴥𐴠 𐴇𐴥𐴠𐴉𐴝𐴎𐴡𐴃𐴢 𐴒𐴡𐴌𐴥𐴡𐴕 𐴏𐴝𐴀𐴝 𐴱 𐴔𐴡𐴚𐴋𐴤𐴟𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴔𐴡𐴖𐴓𐴝𐴕𐴝 𐴇𐴥𐴝𐴔𐴞𐴊𐴢 𐴀𐴝𐴌 𐴔𐴝𐴐𐴄𐴡𐴌 𐴓𐴥𐴝 𐴀𐴡𐴗𐴚 𐴱 𐴀𐴠 𐴊𐴟𐴕𐴥𐴞 𐴎𐴡𐴕𐴡𐴌𐴓𐴧𐴝 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴁𐴝𐴀𐴝𐴌𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕𐴠 𐴏𐴞𐴕𐴃𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN