𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴰 𐴸 𐴎𐴡𐴕𐴡𐴌 𐴇𐴥𐴝𐴓𐴡𐴃𐴢 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴧𐴤𐴟 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴤𐴗𐴝 𐴈𐴡𐴊𐴤𐴟𐴕 𐴌𐴟𐴇𐴝𐴙𐴚𐴒𐴙𐴝 𐴁𐴟𐴄𐴢 𐴓𐴡𐴘 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴈𐴝𐴣𐴌𐴝𐴃𐴢 𐴀𐴝𐴀𐴝𐴘 𐴁𐴦𐴝𐴊𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴁𐴟𐴄𐴢 𐴑𐴟𐴓𐴡𐴃𐴢 𐴁𐴤𐴞𐴌𐴝𐴘𐴃𐴡 𐴕𐴡 𐴊𐴞𐴀𐴞 𐴖𐴝𐴉𐴠𐴏𐴢 𐴀𐴝𐴌𐴑𐴝𐴕𐴡𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴀𐴞𐴓𐴢 𐴊𐴠 𐴳 𐴸 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴱 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴀𐴞𐴓𐴊𐴠 𐴀𐴥𐴟𐴀𐴟𐴕𐴡𐴌𐴥𐴠 𐴱 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴀𐴠𐴌𐴞 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴳 𐴸 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴔𐴝𐴚𐴓𐴝 𐴅𐴤𐴞 𐴉𐴠𐴌𐴝𐴔𐴉𐴟𐴌𐴟𐴌 𐴒𐴤𐴝𐴣𐴄𐴞 𐴀𐴝𐴌 𐴂𐴥𐴡𐴚 𐴎𐴤𐴝 𐴒𐴤𐴝𐴣𐴄𐴞 𐴱 𐴀𐴠 𐴊𐴟𐴕𐴥𐴞 𐴒𐴤𐴝𐴣𐴄𐴞𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴠𐴐𐴤𐴞 𐴔𐴝𐴙𐴕𐴐𐴤𐴙𐴠 𐴏𐴞𐴕𐴥𐴠𐴊𐴠 𐴔𐴡𐴖𐴓𐴝𐴕𐴝 𐴇𐴥𐴝𐴔𐴞𐴊𐴢 𐴁𐴡𐴐𐴢 𐴰 𐴷 𐴁𐴡𐴏𐴥𐴡𐴌 𐴱 𐴀𐴞𐴁𐴤𐴝 𐴘𐴥𐴡 𐴀𐴥𐴞𐴃𐴤𐴝𐴌𐴥𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴁𐴡𐴕 𐴀𐴝𐴏𐴥𐴠 𐴱 𐴀𐴞𐴁𐴤𐴝 𐴁𐴠𐴐𐴤𐴞 𐴁𐴞𐴘𐴝𐴌𐴝𐴙𐴔𐴧𐴝 𐴔𐴝𐴕𐴥𐴟𐴙𐴐𐴢 𐴉𐴡𐴙𐴃𐴧𐴡 𐴊𐴞𐴕 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴚𐴋𐴤𐴟𐴃𐴢 𐴊𐴝𐴁𐴝𐴘𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴊𐴝𐴁𐴝𐴘𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴒𐴞𐴀𐴞𐴓𐴊𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴠 𐴕𐴡 𐴒𐴡𐴏𐴥𐴞 𐴉𐴥𐴞𐴌𐴥𐴝𐴘𐴢 𐴊𐴞𐴘𐴧𐴥𐴠𐴊𐴠 𐴳 𐴸 𐴎𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴞𐴁𐴤𐴝 𐴘𐴥𐴡 𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴃𐴡𐴃𐴢 𐴁𐴡𐴕 𐴀𐴥𐴡𐴘 𐴒𐴞𐴘𐴧𐴥𐴡𐴘𐴢 𐴱𐴱

𐴁𐴞𐴘𐴝𐴌𐴝𐴙𐴔𐴧𐴝 𐴔𐴡𐴖𐴓𐴝𐴕𐴝 𐴏𐴦𐴝𐴁𐴢 𐴀𐴥𐴞𐴁𐴤𐴝𐴌𐴥𐴠 𐴔𐴠𐴀𐴠𐴌𐴁𐴝𐴕𐴞 𐴒𐴡𐴌𐴥𐴞 𐴀𐴠𐴌𐴞 𐴊𐴞𐴀𐴞𐴁𐴡𐴓𐴧𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴏𐴥𐴟𐴖𐴝𐴌𐴥𐴞𐴐𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴒𐴞𐴀𐴞𐴓𐴊𐴠 𐴘𐴥𐴡 𐴀𐴠𐴌𐴞 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴳 𐴸 𐴎𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴔𐴝𐴚𐴓𐴝 𐴅𐴤𐴞 𐴉𐴠𐴌𐴝𐴔𐴉𐴟𐴌𐴟 𐴒𐴤𐴝𐴣𐴄𐴞𐴃𐴢 𐴁𐴡𐴕 𐴀𐴝𐴏𐴥𐴠𐴊𐴠 𐴳 𐴴 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴀𐴝𐴌 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴘𐴥𐴡 𐴕𐴡 𐴊𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴉𐴡𐴙𐴃𐴧𐴡 𐴊𐴞𐴕 𐴓𐴝𐴒𐴝𐴃𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴟𐴔 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴔𐴝𐴌𐴠𐴌𐴊𐴧𐴠 𐴎𐴝𐴒𐴝 𐴀𐴥𐴞𐴀𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴱 𐴔𐴠𐴓𐴠𐴄𐴠𐴌𐴞𐴌 𐴉𐴟𐴌𐴝𐴕 𐴒𐴤𐴣𐴝𐴄𐴞 𐴀𐴥𐴞𐴀𐴞𐴕 𐴀𐴥𐴡 𐴀𐴝𐴏𐴥𐴠 𐴀𐴥𐴠𐴃𐴡𐴓𐴧𐴝 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕 𐴏𐴞𐴕𐴃𐴝𐴃𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴓𐴝𐴌𐴥𐴝𐴘𐴌 𐴀𐴝𐴌 𐴏𐴥𐴞𐴘𐴝𐴏𐴞 𐴉𐴝𐴄𐴞 ( 𐴀𐴠 𐴀𐴠 / 𐴘𐴟 𐴀𐴠𐴓 𐴀𐴠 ) 𐴊𐴟𐴕𐴥𐴞 𐴋𐴝𐴀𐴝𐴘 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴞𐴃𐴞 𐴀𐴥𐴡𐴑𐴧𐴡𐴓 𐴓𐴡𐴘 𐴁𐴠𐴐𐴤𐴞 𐴁𐴤𐴝𐴓𐴥𐴝 𐴔𐴡𐴃𐴠 𐴃𐴦𐴝𐴓𐴧𐴟𐴑 𐴒𐴡𐴌𐴥𐴠 𐴁𐴡𐴓𐴞 𐴈𐴡𐴀𐴡𐴘𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴠𐴔𐴝𐴘𐴡𐴃𐴞 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴠 𐴔𐴞𐴏𐴥𐴝 𐴂𐴡𐴌𐴡𐴂𐴠𐴒𐴠𐴕𐴋𐴝 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴤𐴡𐴚 𐴑𐴡𐴁𐴎𐴝 𐴒𐴡𐴌𐴥𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴒𐴤𐴡𐴌𐴡𐴃𐴧𐴟 𐴕𐴦𐴠𐴓𐴝𐴘𐴢 𐴊𐴞𐴀𐴞 𐴱 𐴈𐴝𐴍𐴝 𐴔𐴝𐴌𐴝 𐴁𐴡𐴕 𐴒𐴡𐴌𐴥𐴝 𐴐𐴤𐴡𐴣𐴀𐴡 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴉𐴝𐴌𐴠 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴇𐴥𐴝𐴓𐴡𐴃𐴢 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴱 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 𐴀𐴞𐴕𐴄𐴝𐴌𐴕𐴥𐴠𐴆𐴕𐴥𐴠𐴓𐴢 𐴀𐴠𐴔𐴕𐴥𐴠𐴏𐴄𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN