𐴇𐴥𐴝𐴖𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴔𐴡𐴚𐴋𐴤𐴟𐴃𐴢 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴎𐴝𐴒𐴝 𐴓𐴝𐴌𐴞 𐴓𐴝𐴌𐴞 𐴃𐴤𐴝𐴑𐴤𐴝 𐴉𐴡𐴌𐴠𐴌 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴢 𐴓𐴝𐴑 𐴓𐴡𐴃𐴞 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴃𐴤𐴝𐴑𐴤𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴢 𐴱 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴓𐴝𐴌𐴥𐴝𐴘𐴌 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴀𐴝𐴌 𐴉𐴝𐴕𐴥𐴞𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴱 𐴁𐴟𐴔 𐴁𐴝𐴌𐴞 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴀𐴠𐴑 𐴎𐴝𐴒𐴝𐴃𐴢 𐴄𐴞𐴑𐴞 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴥𐴠𐴌 𐴱 𐴀𐴠 𐴉𐴝𐴌𐴝𐴃𐴧𐴤𐴟 𐴀𐴡 𐴉𐴝𐴌𐴝𐴃𐴢 𐴎𐴝𐴒𐴝 𐴓𐴝𐴌𐴞 𐴓𐴝𐴌𐴞 𐴱 𐴃𐴤𐴝𐴑𐴤𐴝 𐴉𐴝𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴃𐴟 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴱 𐴲 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓 𐴃𐴤𐴝𐴑𐴤𐴠𐴊𐴠 𐴉𐴥𐴡𐴀𐴡 𐴈𐴥𐴝𐴓𐴞𐴃𐴢 𐴱 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴓𐴝𐴌𐴥𐴝𐴘𐴌 𐴇𐴥𐴝𐴁𐴝𐴌 𐴎𐴝𐴣𐴀𐴝𐴏𐴢 𐴓𐴡𐴘 𐴁𐴟𐴔𐴁𐴝𐴌𐴞 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴉𐴝𐴣𐴏𐴢 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴀𐴝𐴌 𐴊𐴡𐴐𐴢 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓 𐴀𐴠𐴑 𐴎𐴝𐴒𐴝𐴃𐴢 𐴄𐴞𐴑𐴞 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴞𐴀𐴞𐴕 𐴁𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓𐴠 𐴀𐴝𐴌𐴡𐴎𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴕𐴋𐴞𐴓𐴧𐴝 𐴎𐴝𐴒𐴝 𐴓𐴝𐴌𐴞 𐴓𐴝𐴌𐴞 𐴃𐴤𐴡𐴑𐴤𐴡𐴕𐴡𐴃𐴢 𐴁𐴠𐴐𐴤𐴞 𐴊𐴟𐴑 𐴀𐴥𐴡𐴘𐴧𐴠 𐴱 𐴒𐴡𐴌𐴡𐴔𐴡𐴃𐴧𐴤𐴟 𐴀𐴝𐴌 𐴎𐴤𐴡𐴌𐴡𐴃𐴧𐴟 𐴁𐴝𐴏𐴞 𐴃𐴦𐴡𐴙𐴃𐴧𐴝 𐴐𐴤𐴝𐴕𐴃𐴞 𐴉𐴝𐴘𐴁𐴤𐴡𐴓𐴧𐴝 𐴱 𐴀𐴝𐴙𐴅𐴧𐴙𐴝 𐴈𐴡𐴕𐴥𐴡 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞𐴓𐴥𐴠 𐴈𐴝𐴙𐴓𐴧𐴝 𐴘𐴥𐴝𐴀𐴝𐴕𐴡𐴌𐴥𐴠 𐴁𐴡𐴍𐴞 𐴏𐴡𐴍𐴞 𐴓𐴡𐴘 𐴀𐴝𐴌 𐴀𐴠𐴑 𐴎𐴝𐴒𐴝𐴃𐴢 𐴎𐴝𐴀𐴝 𐴒𐴤𐴡𐴘 𐴉𐴡𐴌𐴠 𐴱 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴘𐴥𐴡 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴃𐴤𐴝𐴙𐴑𐴧𐴤𐴙𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓 𐴄𐴤𐴞𐴑𐴤𐴞 𐴄𐴤𐴞𐴑𐴤𐴞 𐴁𐴟𐴔 𐴔𐴝𐴌𐴠 𐴀𐴝𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴔𐴝𐴌𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴈𐴥𐴝𐴕𐴥𐴝 𐴑𐴤𐴟𐴌𐴝𐴉𐴢 𐴱 𐴊𐴝𐴁𐴝𐴘 𐴀𐴡𐴐𐴤𐴟𐴃𐴢 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴁𐴠𐴐𐴤𐴞 𐴊𐴡𐴌𐴈𐴝𐴌 𐴀𐴥𐴡𐴘𐴧𐴠𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓𐴠 𐴊𐴠𐴐𐴤𐴡𐴌 𐴀𐴝𐴌 𐴁𐴡𐴘𐴊𐴠𐴐𐴤𐴡𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴔𐴡𐴊𐴡𐴊𐴡𐴌𐴓𐴧𐴥𐴝 𐴀𐴝𐴌𐴡𐴎𐴢 𐴒𐴡𐴌𐴥𐴠𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : DMG