𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴋𐴝𐴓𐴝𐴓 𐴐𐴤𐴡𐴣𐴀𐴡 𐴔𐴝𐴘𐴧𐴝 𐴔𐴡𐴌𐴡𐴊𐴢 𐴔𐴞𐴓𐴝𐴘𐴢 𐴳 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴱𐴱

𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴓𐴡𐴒𐴢 𐴁𐴤𐴡𐴒𐴢 𐴊𐴞𐴕𐴡𐴌 𐴐𐴤𐴟𐴖𐴝 𐴲 𐴱 𐴁𐴝𐴎𐴠 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴢 𐴏𐴥𐴡𐴊𐴡𐴌 𐴘𐴟𐴕𐴞 𐴀𐴥𐴡𐴕𐴡𐴌 𐴊𐴡𐴀𐴡𐴙𐴕𐴠 𐴔𐴥𐴠𐴌𐴥𐴞𐴕 𐴋𐴠𐴌𐴝𐴙𐴁𐴢 𐴌𐴝𐴏𐴧𐴝𐴌 𐴋𐴤𐴝𐴑𐴤𐴠 𐴱 𐴀𐴠𐴑𐴧𐴤𐴝𐴕 𐴒𐴤𐴡𐴌𐴡𐴃𐴧𐴤𐴟 𐴐𐴤𐴝𐴘𐴒𐴡𐴌 𐴉𐴡𐴣𐴃𐴠 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴝𐴌 𐴃𐴡𐴘𐴧𐴝𐴌𐴞𐴌 𐴀𐴡𐴑𐴃𐴤𐴡𐴃𐴢 𐴱 𐴋𐴝𐴓𐴝𐴓 𐴐𐴤𐴡𐴣𐴀𐴡 𐴔𐴝𐴘𐴧𐴝 𐴔𐴡𐴌𐴡𐴊𐴢 𐴔𐴞𐴓𐴝𐴘𐴢 𐴳 𐴲 𐴎𐴡𐴕 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟 𐴉𐴝𐴓𐴡𐴚 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃𐴢 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴠𐴑𐴕𐴝𐴉𐴢 𐴔𐴡𐴋𐴠𐴓𐴢 𐴃𐴤𐴝𐴕𐴥𐴝𐴌 𐴀𐴡 𐴏𐴞 / 𐴔𐴟𐴇𐴝𐴔𐴧𐴡𐴊𐴢 𐴒𐴞𐴘𐴝𐴏𐴟𐴊𐴧𐴞𐴕𐴠 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴉𐴝𐴑𐴧𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴈𐴡𐴘𐴧𐴥𐴠𐴊𐴠 𐴱 𐴁𐴟𐴙𐴃𐴢 𐴁𐴝𐴌𐴠 𐴊𐴞𐴕𐴡𐴃𐴢 𐴋𐴝𐴓𐴝𐴓𐴡𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴘𐴠 𐴱 𐴄𐴠𐴑𐴕𐴝𐴉𐴢 𐴏𐴥𐴡𐴊𐴡𐴌 𐴘𐴟𐴕𐴞 𐴀𐴥𐴡𐴕𐴡𐴌 𐴊𐴡𐴀𐴡𐴙𐴕 𐴓𐴡𐴔𐴁𐴡𐴌𐴞 𐴀𐴠𐴓𐴝𐴑𐴝𐴃𐴢 𐴱 𐴔𐴡𐴓𐴠𐴆𐴤𐴙𐴝𐴌 𐴏𐴡𐴑𐴧𐴡𐴌𐴡𐴃𐴢 𐴉𐴥𐴠𐴓𐴥𐴝𐴘𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴉𐴝𐴘𐴢 𐴁𐴦𐴝𐴊𐴠 𐴱 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴑𐴝𐴌𐴖𐴝𐴘𐴢 𐴐𐴤𐴟𐴌𐴥𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴑𐴝𐴌𐴖𐴝𐴘𐴌 𐴏𐴝𐴓𐴝𐴘𐴢 𐴊𐴡𐴀𐴡𐴙𐴕 𐴓𐴡𐴔𐴁𐴡𐴌𐴞 𐴀𐴠𐴓𐴝𐴑𐴝𐴌 𐴒𐴤𐴡𐴌 𐴀𐴠𐴑𐴧𐴤𐴝𐴕𐴡𐴃𐴧𐴤𐴟 𐴋𐴝𐴓𐴝𐴓𐴢 𐴐𐴤𐴡𐴣𐴀𐴡 𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕 𐴳 𐴲 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴒𐴠𐴌𐴠𐴉𐴃𐴝𐴌 𐴒𐴡𐴙𐴅𐴧𐴤𐴙𐴠 𐴱 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴷 𐴱 𐴎𐴡𐴕 𐴔𐴡𐴌𐴡𐴊𐴢 𐴵 𐴎𐴡𐴕 𐴔𐴝𐴘𐴧𐴝 𐴀𐴝𐴌 𐴀𐴠𐴑 𐴎𐴡𐴕 𐴉𐴟𐴖𐴝 𐴱 𐴁𐴠𐴒𐴧𐴤𐴟𐴕𐴡𐴌 𐴁𐴠𐴌𐴟𐴊𐴧𐴤𐴠 𐴔𐴦𐴝𐴔𐴠𐴓𐴝 𐴏𐴝𐴓𐴝𐴘𐴁𐴤𐴡 𐴁𐴡𐴓𐴞 𐴘𐴥𐴡 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴋𐴝𐴓𐴝𐴓𐴢 𐴀𐴥𐴡𐴑𐴧𐴡𐴓𐴢 𐴀𐴥𐴡𐴙𐴓𐴊𐴠 𐴄𐴠𐴑𐴕𐴝𐴉𐴢 𐴏𐴥𐴡𐴊𐴡𐴌 𐴘𐴟𐴕𐴞 𐴀𐴥𐴡𐴕 𐴊𐴡𐴀𐴡𐴙𐴕 𐴓𐴡𐴔𐴁𐴡𐴌𐴞𐴌 / 𐴓𐴟𐴕𐴥𐴝 𐴁𐴠𐴒𐴡𐴔 𐴵 𐴳 𐴁𐴡𐴏𐴥𐴡𐴌 𐴱 𐴏𐴥𐴝𐴉𐴝𐴌𐴝𐴚 𐴕𐴡𐴘𐴧𐴝 𐴉𐴝𐴌𐴝𐴌 𐴀𐴝𐴁𐴊𐴟𐴓𐴧𐴝𐴇𐴢 𐴰 𐴳 𐴁𐴡𐴏𐴥𐴡𐴌 𐴱 𐴐𐴤𐴝𐴉𐴡𐴌 𐴋𐴞𐴘𐴝 𐴔𐴡𐴒𐴢 𐴉𐴟𐴌𐴝𐴌 / 𐴌𐴠𐴎𐴟𐴖𐴝𐴕 𐴶 𐴲 𐴁𐴡𐴏𐴥𐴡𐴌 𐴱𐴱 /

𐴔𐴡𐴓𐴠𐴆𐴤𐴙𐴝 𐴎𐴡𐴀𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴟𐴔𐴧𐴠 𐴇𐴥𐴝𐴁𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴱 𐴀𐴦𐴝𐴛 𐴴 𐴓𐴝𐴑 𐴰 𐴴 𐴇𐴥𐴝𐴎𐴝𐴌 𐴁𐴝𐴚𐴓𐴝 𐴄𐴞𐴛𐴝 𐴓𐴡𐴘 𐴋𐴝𐴓𐴝𐴓𐴡𐴌 𐴏𐴥𐴝𐴣𐴀𐴝𐴃𐴠 𐴏𐴟𐴑𐴃𐴞 𐴒𐴡𐴌𐴥𐴞 𐴱 𐴀𐴝𐴣𐴀𐴝𐴌 𐴐𐴤𐴡𐴣𐴍𐴡 𐴁𐴤𐴡𐴙𐴕𐴡𐴌𐴥𐴠 𐴓𐴡𐴘 𐴔𐴡𐴓𐴠𐴆𐴤𐴙𐴝 𐴎𐴝𐴀𐴞𐴌𐴊𐴧𐴠 𐴱 𐴏𐴟𐴑𐴃𐴞 𐴒𐴡𐴙𐴅𐴧𐴤𐴙𐴝 𐴄𐴞𐴛𐴝𐴌 𐴁𐴤𐴟𐴃𐴡𐴌𐴃𐴧𐴤𐴟 𐴀𐴠𐴑 𐴓𐴝𐴑 𐴰 𐴴 𐴇𐴥𐴝𐴎𐴝𐴌 𐴄𐴞𐴛𐴝 𐴋𐴝𐴓𐴝𐴓𐴡𐴌𐴥𐴠 𐴊𐴞𐴀𐴞 𐴉𐴥𐴝𐴓𐴥𐴝𐴘𐴧𐴞 𐴱 𐴁𐴝𐴑𐴞𐴳 𐴓𐴝𐴑 𐴄𐴞𐴛𐴝 𐴔𐴡𐴓𐴠𐴆𐴤𐴙𐴝 𐴉𐴡𐴣𐴀𐴡𐴏𐴞 𐴁𐴦𐴝𐴊𐴠 𐴊𐴡𐴀𐴡𐴕𐴡𐴌 𐴏𐴟𐴑𐴃𐴞 𐴱𐴱

Sources : Ukhiyanews.com