𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴗𐴃𐴢 𐴱𐴱

𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴃𐴤𐴠𐴑𐴤𐴠𐴌 𐴊𐴧𐴠 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴀𐴟𐴑𐴤𐴞𐴘𐴝 𐴴 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴇𐴥𐴝𐴑𐴞𐴔 𐴉𐴝𐴌𐴝𐴃𐴢 𐴱 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴱 𐴱 𐴃𐴝𐴌𐴥𐴞𐴑 𐴓𐴡𐴒𐴢 𐴁𐴤𐴡𐴒𐴢 𐴌𐴝𐴙𐴃𐴡𐴌 𐴰 𐴰 : 𐴴 𐴁𐴝𐴎𐴠 𐴱 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞𐴃𐴢 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴒𐴝𐴀𐴝𐴃𐴢 𐴒𐴟𐴓𐴞 𐴉𐴡𐴌𐴞 𐴔𐴡𐴌𐴞 𐴒𐴞𐴘𐴧𐴥𐴠 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴌𐴞 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 / 𐴕𐴟𐴌𐴟𐴓 𐴇𐴥𐴡𐴑 𐴁𐴝𐴉𐴢 𐴀𐴞𐴔𐴝𐴕 𐴇𐴥𐴟𐴏𐴠𐴙𐴕 𐴀𐴝𐴌 / 𐴔𐴟𐴐𐴃𐴝𐴑 𐴀𐴥𐴝𐴇𐴔𐴡𐴊𐴢 𐴁𐴝𐴉𐴢 𐴔𐴟𐴇𐴝𐴔𐴧𐴡𐴊𐴢 𐴀𐴞𐴏𐴔𐴝𐴀𐴞𐴓 𐴱 𐴌𐴠𐴂𐴟𐴄 𐴔𐴡𐴎𐴞𐴕 𐴕𐴟𐴌𐴟𐴓 𐴇𐴥𐴡𐴑 𐴕𐴞𐴎𐴡𐴌 𐴒𐴤𐴡𐴌𐴡𐴃𐴢 𐴒𐴤𐴟𐴔𐴡𐴌 𐴇𐴥𐴝𐴓𐴡𐴃𐴡𐴃𐴢 𐴀𐴡𐴏𐴞𐴕𐴧𐴡 𐴈𐴡𐴊𐴤𐴟𐴕 𐴔𐴝𐴕𐴥𐴟𐴙𐴐𐴢 𐴱 𐴒𐴤𐴡𐴌𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴞 𐴕𐴟𐴌𐴟𐴓 𐴇𐴥𐴑𐴡𐴌𐴥𐴠 𐴒𐴤𐴟𐴔𐴡𐴌 𐴀𐴝𐴁𐴡𐴏𐴃𐴤𐴝𐴃𐴢 𐴒𐴟𐴓𐴞 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴟𐴐𐴃𐴝𐴑 𐴀𐴥𐴝𐴇𐴔𐴡𐴊𐴡𐴌𐴥𐴠 𐴘𐴥𐴡 𐴌𐴠𐴂𐴟𐴄 𐴔𐴡𐴎𐴞𐴕 𐴀𐴥𐴠𐴕𐴋𐴞𐴓𐴧𐴝 𐴈𐴡𐴊𐴤𐴟𐴕 𐴀𐴡𐴏𐴞𐴕𐴧𐴡 𐴔𐴝𐴙𐴕𐴐𐴤𐴙𐴠 𐴀𐴥𐴝𐴣𐴃𐴞𐴘𐴝𐴌 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴈𐴡𐴘𐴧𐴠 𐴱 𐴑𐴠𐴀𐴠𐴔𐴡𐴌 𐴎𐴞𐴔𐴧𐴝𐴊𐴝𐴌 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴱 𐴑𐴠𐴀𐴠𐴔𐴡𐴃𐴢 𐴀𐴡𐴉𐴥𐴡𐴌𐴝𐴊𐴞 𐴒𐴤𐴡𐴄𐴡𐴕𐴝 𐴀𐴥𐴡𐴑𐴧𐴡𐴓 𐴁𐴦𐴠𐴐𐴢 𐴀𐴥𐴡𐴘𐴢 𐴀𐴝𐴘𐴧𐴥𐴠𐴌 𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴱 𐴁𐴠𐴐𐴤𐴞 𐴏𐴞𐴕𐴃𐴝𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃𐴢 𐴀𐴞 𐴑𐴤𐴟𐴕 𐴒𐴡𐴌𐴥𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 𐴇𐴥𐴡𐴌𐴡𐴕 𐴑𐴝𐴌𐴞 𐴀𐴝𐴌 𐴕𐴞𐴐𐴤𐴝 𐴐𐴤𐴡𐴊𐴡𐴌𐴞 𐴀𐴝𐴌 𐴋𐴝𐴣𐴈𐴝𐴃𐴞 𐴀𐴥𐴡𐴑𐴧𐴡𐴓 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴁𐴝𐴚𐴓𐴝 𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴱 𐴇𐴥𐴠𐴉𐴝𐴎𐴡𐴃𐴢 𐴀𐴝𐴌 𐴕𐴞𐴌𐴝𐴉𐴡𐴃𐴧𐴝 𐴃𐴤𐴝𐴑𐴤𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴊𐴞𐴀𐴞𐴁𐴡𐴓𐴧𐴥𐴝 𐴀𐴝𐴌𐴡𐴎𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RSN