𐴄𐴠𐴑𐴕𐴝𐴉𐴢 𐴔𐴦𐴠𐴌𐴥𐴞𐴕 𐴋𐴠𐴌𐴥𐴝𐴙𐴁𐴡𐴌 𐴋𐴤𐴝𐴑𐴤𐴠 𐴊𐴡𐴉𐴥𐴡𐴕 𐴒𐴡𐴌𐴥𐴝𐴘𐴧𐴝 𐴁𐴟𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴄𐴠𐴑𐴕𐴝𐴉𐴡𐴌 𐴁𐴝𐴀𐴝𐴌 𐴏𐴥𐴡𐴌𐴥𐴝𐴌 𐴕𐴟𐴖𐴝𐴈𐴥𐴝𐴓𐴥𐴞 𐴉𐴡𐴏𐴥𐴞𐴔 𐴉𐴝𐴌𐴝𐴃𐴢 𐴱 𐴔𐴦𐴠𐴌𐴥𐴞𐴕 𐴋𐴠𐴌𐴥𐴝𐴙𐴁𐴡𐴌 𐴋𐴤𐴝𐴑𐴤𐴠 𐴊𐴤𐴟𐴊𐴤𐴟 𐴔𐴡𐴘𐴊𐴝𐴕𐴡𐴃𐴢 𐴱 𐴀𐴡𐴕𐴟𐴔𐴝𐴕𐴞𐴑 𐴰 𐴹 𐴁𐴡𐴏𐴥𐴡𐴌 𐴓𐴡𐴃𐴞 𐴁𐴡𐴐𐴢 𐴀𐴥𐴡𐴘𐴁𐴡𐴊𐴠 𐴁𐴟𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴓𐴝𐴐𐴢𐴱 𐴐𐴤𐴡𐴔 𐴁𐴝𐴌𐴠 𐴌𐴝𐴃𐴞𐴘𐴝 𐴰 𐴳 : 𐴱 𐴱 𐴁𐴝𐴎𐴠 𐴉𐴝𐴀𐴝 𐴒𐴞𐴘𐴧𐴥𐴠 𐴱 𐴔𐴡𐴕𐴃𐴡𐴌 𐴀𐴝𐴘𐴅𐴤𐴡 𐴔𐴝𐴘𐴧𐴝 𐴀𐴥𐴞𐴁𐴤𐴝𐴌 𐴁𐴝𐴁𐴡𐴃𐴠 𐴁𐴞𐴏𐴃𐴝𐴌𐴞𐴃𐴡 𐴁𐴤𐴝𐴉𐴠 𐴃𐴡𐴉𐴏𐴞𐴓𐴞 𐴏𐴞𐴕𐴧𐴡 𐴉𐴝𐴀𐴝 𐴕𐴥𐴡 𐴎𐴝𐴀𐴝 𐴁𐴡𐴓𐴞 𐴉𐴟𐴓𐴞𐴐𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴠 𐴎𐴝𐴒𐴝𐴌 𐴇𐴥𐴡𐴑𐴟𐴔𐴡𐴃𐴠 𐴀𐴠𐴑𐴀𐴡𐴔 𐴃𐴡𐴊𐴝𐴌𐴟𐴑 𐴀𐴥𐴞𐴏𐴝𐴉𐴠 ! 𐴄𐴠𐴑𐴕𐴝𐴉𐴢 𐴀𐴠𐴓𐴝𐴑𐴝𐴌 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴁𐴠𐴐𐴤𐴞 𐴒𐴡𐴌𐴥𐴞 𐴄𐴞𐴛𐴝 𐴓𐴡𐴘 𐴱 𐴔𐴡𐴚𐴋𐴤𐴟𐴃𐴢 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴘𐴧𐴥𐴡𐴙𐴕𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴝𐴌 𐴒𐴡𐴌𐴥𐴝𐴌 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴅𐴁𐴟𐴌𐴞 𐴃𐴧𐴤𐴟 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴉𐴥𐴝𐴘𐴊𐴝 𐴃𐴟𐴓𐴥𐴞 𐴱 𐴀𐴠𐴃𐴧𐴠𐴉𐴝𐴑 𐴒𐴡𐴙𐴅𐴧𐴤𐴙𐴝 𐴄𐴞𐴛𐴝 𐴁𐴦𐴝𐴊𐴠 𐴀𐴥𐴞𐴃𐴤𐴝𐴌𐴝𐴌 𐴈𐴝𐴣𐴏𐴥𐴠 𐴀𐴝𐴌 𐴀𐴥𐴡 𐴎𐴦𐴝𐴣 𐴀𐴝𐴏𐴥𐴠 𐴐𐴤𐴟𐴕𐴝 𐴌𐴟𐴉𐴝 𐴄𐴞𐴛𐴝 𐴉𐴡𐴘𐴐𐴤𐴝 𐴁𐴠𐴒𐴧𐴤𐴞𐴕 𐴓𐴟𐴄𐴢 𐴒𐴡𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴁𐴟𐴎𐴤𐴠𐴌 𐴱𐴱

𐴀𐴠 𐴁𐴟𐴌𐴥𐴝 𐴔𐴝𐴘𐴧𐴝 𐴀𐴞𐴁𐴤𐴝 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴥𐴟𐴔 𐴀𐴝𐴌 𐴋𐴝𐴣𐴈𐴝𐴃𐴞 𐴒𐴡𐴌𐴥𐴝𐴌 𐴏𐴥𐴡𐴊𐴔𐴝 𐴘𐴠 𐴎𐴠𐴈𐴥𐴡𐴕 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴱 𐴔𐴟𐴀𐴟𐴔 𐴔𐴞𐴑𐴧𐴤𐴙𐴝 𐴈𐴡𐴃𐴤𐴝 𐴕𐴡 𐴁𐴝𐴌𐴥𐴞 𐴌𐴝𐴏𐴧𐴝 𐴏𐴥𐴝𐴉𐴢 𐴃𐴤𐴝𐴑𐴤𐴠 𐴉𐴥𐴝𐴀𐴝𐴕 𐴁𐴟𐴌𐴥𐴝 𐴔𐴝𐴘𐴧𐴝𐴌 𐴓𐴝𐴐𐴢 𐴀𐴥𐴞𐴁𐴤𐴝 𐴔𐴡𐴘𐴊𐴝𐴕𐴡𐴃𐴢 𐴊𐴡𐴉𐴥𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴥𐴠𐴊𐴠 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴄𐴠𐴑𐴕𐴝𐴉𐴢 𐴔𐴡𐴋𐴠𐴓 𐴃𐴤𐴝𐴕𐴝𐴌 𐴉𐴟𐴓𐴞𐴐𐴢 𐴀𐴡𐴉𐴥𐴞𐴏𐴥𐴝𐴌 ( 𐴀𐴡 𐴏𐴞 ) / 𐴔𐴟𐴇𐴝𐴔𐴧𐴡𐴊𐴢 𐴒𐴞𐴘𐴝𐴏𐴟𐴊𐴢 𐴊𐴞𐴕𐴠 𐴱 𐴁𐴡𐴌𐴔𐴥𐴝𐴃𐴧𐴟 𐴉𐴝𐴌 𐴒𐴡𐴌𐴥𐴝𐴘 𐴀𐴝𐴕𐴡𐴀𐴡𐴙𐴕𐴧𐴝 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴒𐴡𐴙𐴅𐴧𐴤𐴙𐴠𐴊𐴠𐴘𐴥𐴝𐴀𐴝𐴕 𐴏𐴥𐴡𐴀𐴞 𐴈𐴥𐴝𐴄𐴞 𐴁𐴡𐴓𐴞 𐴐𐴤𐴝𐴑𐴧𐴞 𐴉𐴡𐴌𐴔𐴝𐴕𐴠 𐴁𐴟𐴎𐴤𐴝 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴔𐴝𐴘𐴧𐴝 𐴀𐴥𐴞𐴁𐴤𐴝𐴌 𐴓𐴝𐴐𐴢 𐴑𐴡𐴑𐴏𐴡 𐴁𐴝𐴎𐴝𐴌 𐴉𐴡𐴣𐴀𐴡𐴏𐴝𐴘𐴁𐴤𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱 𐴓𐴟𐴑𐴤𐴠𐴓 𐴘𐴟𐴕𐴞𐴀𐴥𐴡𐴕 𐴉𐴡𐴌𐴞𐴐𐴤𐴡𐴊𐴤𐴡𐴌 𐴔𐴞𐴔𐴁𐴤𐴡𐴌 / 𐴀𐴝𐴁𐴊𐴟𐴓 𐴒𐴡𐴉𐴥𐴟𐴌𐴠 𐴈𐴡𐴘𐴧𐴥𐴠𐴊𐴠 𐴱 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴁𐴡𐴌𐴔𐴥𐴝𐴃𐴧𐴟 𐴒𐴤𐴡𐴕𐴡 𐴒𐴤𐴡𐴕𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴉𐴝𐴌 𐴒𐴡𐴌𐴥𐴝𐴌 𐴱 𐴀𐴝𐴌 𐴀𐴦𐴝𐴛 𐴉𐴥𐴟𐴕𐴧𐴥𐴞𐴊𐴠 𐴒𐴡𐴃𐴡 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝 𐴀𐴝𐴙𐴕𐴧𐴥𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴟𐴌𐴥𐴝 𐴔𐴝𐴘𐴧𐴝 𐴀𐴞𐴁𐴤𐴝 𐴔𐴡𐴌𐴞 𐴒𐴞𐴘𐴧𐴥𐴡𐴘𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Ukhiyanews.com