𐴑𐴡𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴠𐴑 𐴎𐴡𐴕𐴡𐴌 𐴔𐴡𐴗𐴃𐴢 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓 𐴱𐴱

𐴁𐴝𐴚𐴓𐴝 𐴊𐴠𐴐𐴢 𐴱 𐴑𐴡𐴑𐴏𐴡 𐴁𐴝𐴎𐴝𐴌 𐴀𐴟𐴑𐴤𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴴 𐴱 𐴇𐴥𐴝𐴑𐴞𐴔 𐴉𐴝𐴌𐴝 𐴀𐴝𐴌 𐴉𐴥𐴝𐴓𐴡𐴚 𐴈𐴥𐴝𐴓𐴞 𐴎𐴝𐴔𐴃𐴡𐴓𐴞 𐴵 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴱 𐴀𐴠 𐴊𐴟𐴕𐴥𐴞 𐴎𐴝𐴒𐴝𐴌 𐴔𐴝𐴎𐴤𐴠 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴓𐴡𐴒𐴢 𐴁𐴤𐴡𐴒𐴢 𐴀𐴥𐴝𐴣𐴎𐴡𐴙𐴕𐴧𐴝 𐴰 𐴳 : 𐴳 𐴁𐴝𐴎𐴠 𐴱 𐴏𐴡𐴙𐴓𐴧𐴥𐴙𐴠𐴊𐴠 𐴀𐴡 𐴎𐴝𐴕𐴝 𐴒𐴟𐴓𐴞 𐴔𐴝𐴌𐴝 𐴒𐴤𐴡𐴄𐴡𐴕𐴝𐴃𐴢 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴀𐴝𐴌 𐴉𐴝𐴣𐴏𐴢 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴸 𐴓𐴡𐴔𐴁𐴤𐴡𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴀𐴥𐴝𐴣𐴃𐴞𐴘𐴝𐴌𐴞 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴋𐴞 𐴀𐴝𐴘 𐴅𐴞 / 𐴔𐴟𐴇𐴝𐴔𐴧𐴡𐴊𐴢 𐴀𐴝𐴔𐴞𐴌 𐴅𐴝𐴉𐴥𐴡𐴌𐴥𐴠 𐴱 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕 𐴏𐴥𐴡𐴀𐴞 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌 𐴀𐴥𐴡 𐴈𐴡𐴘𐴧𐴥𐴠𐴊𐴠 𐴀𐴟𐴑𐴤𐴞𐴘𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴴 𐴱 𐴓𐴡𐴔𐴁𐴤𐴡𐴌 𐴀𐴝𐴌 𐴵 𐴱 𐴓𐴡𐴔𐴁𐴤𐴡𐴌𐴡𐴌 𐴔𐴝𐴎𐴤𐴠 𐴎𐴝𐴒𐴝 𐴘𐴥𐴝𐴀𐴝𐴕𐴡𐴃 𐴒𐴟𐴓𐴞𐴌 𐴀𐴝𐴁𐴝𐴏𐴢 𐴉𐴥𐴟𐴕𐴥𐴞 𐴔𐴡𐴕𐴃𐴡𐴌 𐴓𐴡𐴒𐴠 𐴓𐴡𐴒𐴠 𐴸 𐴓𐴡𐴔𐴁𐴤𐴡𐴌 ( 𐴀𐴠 𐴂𐴞 𐴁𐴞 𐴀𐴠𐴕 ) 𐴉𐴟𐴓𐴞𐴐𐴡𐴌 𐴄𐴞𐴀𐴞𐴔 𐴒𐴤𐴡𐴄𐴡𐴕𐴡𐴝𐴌 𐴎𐴝𐴒𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠 𐴱𐴱

𐴀𐴠 𐴂𐴞 𐴁𐴞 𐴀𐴠𐴕 𐴉𐴟𐴓𐴞𐴐𐴢 𐴉𐴡𐴣𐴀𐴡𐴏𐴞 𐴁𐴦𐴝𐴊𐴠 𐴊𐴠𐴑𐴤𐴠𐴌 𐴊𐴧𐴠 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴀𐴝𐴊𐴤𐴝 𐴔𐴡𐴌𐴝 𐴓𐴝𐴐𐴢 𐴁𐴠𐴐𐴤𐴞 𐴎𐴡𐴈𐴥𐴡𐴔 𐴉𐴝𐴘𐴧𐴝 𐴇𐴥𐴝𐴓𐴡𐴃𐴡𐴃𐴢 𐴱 𐴒𐴤𐴡𐴄𐴡𐴕𐴝 𐴀𐴥𐴡𐴘𐴧𐴠𐴊𐴠 𐴀𐴝𐴃𐴌𐴝𐴉𐴡𐴌 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴐𐴤𐴡𐴎𐴟𐴒𐴞𐴃𐴝 𐴀𐴝𐴌 𐴊𐴤𐴡𐴌𐴥𐴝 𐴊𐴤𐴡𐴌𐴥𐴞 𐴒𐴡𐴌𐴥𐴞 𐴱 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕𐴡𐴌𐴥𐴠 𐴎𐴝𐴔𐴃𐴡𐴓𐴞𐴌 𐴀𐴠𐴔 𐴀𐴠𐴏𐴢 𐴀𐴠𐴉𐴡𐴌 𐴋𐴝𐴑𐴄𐴡𐴌 𐴈𐴥𐴝𐴕𐴝𐴃𐴢 𐴒𐴤𐴡𐴓𐴝𐴘 𐴊𐴞𐴘𐴧𐴥𐴠 𐴱 𐴃𐴡𐴀𐴡𐴘 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴔𐴟𐴀𐴝𐴘𐴕𐴝 𐴒𐴡𐴌𐴥𐴞 𐴏𐴝𐴀𐴝𐴘 𐴁𐴦𐴝𐴊𐴠 𐴱 𐴀𐴝𐴁𐴊𐴟𐴌 𐴌𐴝𐴇𐴔𐴝𐴕 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴀𐴝𐴁𐴊𐴟𐴌 𐴌𐴝𐴇𐴔𐴝𐴕 𐴁𐴝𐴉𐴢 𐴔𐴟𐴇𐴝𐴔𐴧𐴡𐴊𐴢 𐴀𐴝𐴁𐴊𐴟𐴓𐴧𐴝𐴇𐴢 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 𐴱 𐴇𐴥𐴝𐴑𐴞𐴔 𐴉𐴝𐴌𐴝 𐴴 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴀𐴞 𐴲 𐴁𐴡𐴓𐴡𐴑𐴡𐴌 𐴁𐴤𐴝𐴐𐴤𐴞 𐴱 𐴀𐴥𐴞𐴁𐴤𐴝𐴌 𐴓𐴝𐴐𐴢 𐴑𐴡𐴑𐴏𐴡 𐴁𐴝𐴎𐴝𐴌 𐴏𐴥𐴡𐴊𐴡𐴌 𐴇𐴥𐴝𐴐𐴉𐴝𐴃𐴝𐴓𐴡𐴃𐴢 𐴉𐴡𐴣𐴀𐴡𐴏𐴝𐴘 𐴊𐴞𐴘𐴧𐴥𐴠 𐴱 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴀𐴥𐴞𐴃𐴤𐴝𐴌𐴝 𐴀𐴥𐴡𐴙𐴓𐴊𐴠 𐴕𐴟𐴌 𐴔𐴟𐴇𐴝𐴔𐴧𐴡𐴊𐴢 𐴁𐴝𐴉𐴢 𐴏𐴥𐴞𐴊𐴧𐴞𐴑 𐴀𐴥𐴝𐴇𐴔𐴡𐴊𐴢 𐴁𐴡𐴐𐴢 𐴲 𐴳 𐴁𐴡𐴏𐴥𐴡𐴌 𐴱 𐴔𐴟𐴇𐴝𐴔𐴧𐴡𐴊𐴢 𐴎𐴟𐴁𐴝𐴙𐴌 𐴁𐴝𐴉𐴢 𐴏𐴥𐴟𐴓𐴃𐴝𐴕 𐴀𐴥𐴝𐴇𐴔𐴡𐴊𐴢 𐴁𐴡𐴐𐴢 𐴷 𐴳 𐴁𐴡𐴏𐴥𐴡𐴌 𐴱 𐴔𐴟𐴇𐴝𐴔𐴧𐴡𐴊𐴢 𐴐𐴡𐴉𐴝𐴘𐴡𐴃𐴢 𐴁𐴝𐴉𐴢 𐴌𐴡𐴐𐴤𐴞𐴊𐴟𐴓𐴧𐴤𐴝𐴇𐴢 𐴱 𐴕𐴟𐴌 𐴀𐴝𐴓𐴡𐴔 𐴁𐴝𐴉𐴢 𐴊𐴞𐴓 𐴔𐴟𐴇𐴝𐴔𐴧𐴡𐴊 𐴱 𐴀𐴞𐴃𐴝𐴌𐴥𐴝 𐴇𐴥𐴝𐴑𐴞𐴔 𐴉𐴝𐴌𐴝 𐴴 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴀𐴞 𐴲 𐴁𐴡𐴓𐴡𐴑𐴡𐴌 𐴁𐴤𐴝𐴐𐴤𐴞 𐴱 𐴀𐴝𐴌 𐴎𐴝𐴔𐴃𐴡𐴓𐴞 𐴵 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴁𐴤𐴝𐴐𐴞 𐴓𐴝𐴓 𐴔𐴞𐴛𐴝𐴌 𐴁𐴡𐴖𐴢 𐴕𐴞𐴏𐴝𐴌𐴝 𐴁𐴡𐴐𐴢 𐴵 𐴵 𐴁𐴡𐴏𐴥𐴡𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor