𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴉𐴝𐴌𐴝𐴃𐴢 𐴖𐴝𐴉𐴠𐴏𐴢 𐴀𐴝𐴘𐴃𐴤𐴡 𐴕𐴡 𐴊𐴠𐴀𐴠𐴌 𐴱𐴱

𐴴 𐴲 𐴰 𐴲 𐴐𐴤𐴡𐴕 𐴔𐴠 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴤𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴱 𐴕𐴦𐴠𐴓𐴝𐴘 𐴊𐴞𐴀𐴞 𐴄𐴡𐴀𐴡𐴕𐴡𐴌 𐴁𐴝𐴀𐴝𐴌𐴠 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴢 𐴓𐴡𐴘 𐴎𐴝𐴘 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴞𐴏𐴝𐴉𐴠 𐴌𐴝𐴑𐴧𐴤𐴞𐴀𐴞𐴓 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴖𐴝𐴉𐴠𐴏𐴢 𐴕𐴞𐴎𐴡𐴌 𐴉𐴝𐴌𐴝 𐴀𐴝𐴌 𐴁𐴤𐴞𐴍𐴥𐴝𐴃𐴢 𐴀𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃𐴢 𐴕𐴡 𐴊𐴠𐴀𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴠 𐴏𐴥𐴞𐴓𐴏𐴥𐴞𐴓𐴝𐴃𐴢 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴀𐴥𐴡𐴘𐴃𐴠 𐴇𐴥𐴝𐴣𐴃𐴢 𐴓𐴡𐴔𐴁𐴤𐴡𐴌 𐴉𐴡𐴙𐴅𐴧𐴡𐴕𐴃𐴡 𐴌𐴥𐴠𐴑𐴧𐴤𐴗𐴝 𐴀𐴟𐴀𐴟𐴕𐴡𐴃𐴢 𐴃𐴤𐴝𐴑𐴤𐴞𐴃𐴤𐴡𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴈𐴡𐴕𐴥𐴞𐴑𐴧𐴤𐴙𐴝𐴌𐴥𐴠 𐴕𐴞𐴎𐴡𐴌 𐴁𐴤𐴞𐴍𐴥𐴝𐴃𐴢 𐴀𐴝𐴘𐴃𐴤𐴡 𐴕𐴡 𐴊𐴠𐴀𐴠𐴌 𐴱 𐴔𐴡𐴕𐴃𐴡𐴌 𐴉𐴝𐴣𐴏𐴢 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃𐴢 𐴃𐴤𐴝𐴑𐴤𐴞𐴃𐴤𐴡𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴐𐴤𐴟𐴊𐴠 𐴐𐴤𐴡𐴃𐴑𐴝𐴌𐴝 𐴑𐴟𐴌𐴞 𐴎𐴡𐴕𐴡𐴌𐴥𐴠 𐴀𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃𐴢 𐴊𐴠𐴀𐴠𐴌 𐴱 𐴁𐴝𐴑𐴞 𐴐𐴤𐴡𐴃𐴑𐴝𐴌𐴝 𐴰 𐴸 𐴎𐴡𐴕 𐴀𐴝𐴌 𐴀𐴡𐴙𐴕𐴧𐴡 𐴌𐴥𐴠𐴑𐴧𐴤𐴗𐴝 𐴁𐴠𐴒𐴧𐴤𐴟𐴕𐴡𐴃𐴢 𐴐𐴤𐴡𐴃𐴠 𐴐𐴤𐴡𐴃𐴢 𐴕𐴟𐴖𐴝 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴀𐴝𐴕𐴥𐴞 𐴌𐴝𐴑𐴤𐴠𐴌 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴄𐴡𐴀𐴡𐴕 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙 𐴀𐴥𐴟𐴀𐴟𐴕 𐴕𐴞𐴎𐴡𐴌 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴀𐴝𐴌 𐴏𐴞𐴕 𐴉𐴡𐴌𐴞𐴏𐴡 𐴀𐴝𐴌 𐴊𐴟𐴏𐴃𐴤𐴡 𐴉𐴥𐴟𐴣𐴖𐴥𐴝𐴛𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴞𐴌𐴝𐴌 𐴁𐴤𐴟𐴃𐴤𐴡𐴌 𐴀𐴟𐴍𐴥𐴝𐴕𐴡𐴃 𐴏𐴥𐴝𐴕𐴞 𐴏𐴥𐴝𐴌𐴥𐴝 𐴁𐴠𐴌𐴥𐴝 𐴏𐴥𐴝𐴌𐴥𐴝 𐴁𐴝𐴣𐴐𐴤𐴝 𐴁𐴝𐴕𐴝𐴘 𐴃𐴤𐴝𐴑𐴤𐴠𐴌 𐴱 𐴈𐴥𐴝𐴕𐴥𐴝𐴌 𐴌𐴡𐴐𐴤𐴡𐴃𐴢 𐴀𐴥𐴡 𐴕𐴥𐴝𐴘 𐴁𐴞𐴘𐴝𐴌𐴝𐴔𐴡𐴌 𐴇𐴥𐴝𐴓𐴡𐴃𐴡𐴃𐴢 𐴀𐴟𐴉𐴡𐴎𐴟𐴑𐴃𐴡 𐴊𐴝𐴁𐴝𐴘 𐴀𐴡𐴐𐴤𐴟𐴃𐴢 𐴒𐴡𐴌𐴥𐴞𐴁𐴤𐴝𐴌 𐴈𐴡𐴕𐴥𐴡 𐴀𐴟𐴉𐴥𐴝𐴘 𐴘𐴥𐴡 𐴕𐴥𐴝𐴘 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴇𐴥𐴝𐴃𐴠 𐴃𐴟𐴓𐴥𐴝 𐴑𐴠𐴙𐴏𐴧𐴥𐴟 𐴊𐴞𐴀𐴞𐴓𐴥𐴠 𐴘𐴥𐴡 𐴏𐴥𐴠𐴂𐴢 𐴒𐴞𐴓𐴞𐴓𐴥𐴠 𐴉𐴝𐴕𐴥𐴞𐴌 𐴃𐴞𐴌𐴥𐴝𐴐𐴢 𐴕𐴡 𐴔𐴡𐴌𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱𐴱

𐴀𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴈𐴡𐴕𐴥𐴡 𐴉𐴝𐴄𐴞 𐴀𐴝𐴌 𐴃𐴡𐴕𐴎𐴞𐴔 𐴓𐴡𐴘 𐴃𐴦𐴝𐴓𐴧𐴟𐴑 𐴕𐴥𐴝𐴘𐴊𐴠 𐴥 𐴀𐴥𐴠𐴕𐴋𐴞𐴓𐴧𐴝 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝𐴙𐴕 𐴀𐴝𐴌 𐴔𐴝𐴐𐴄𐴡𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴡𐴏𐴥𐴟𐴌𐴥𐴞 𐴏𐴥𐴝𐴌𐴥𐴝 𐴔𐴡𐴕𐴎𐴡𐴑𐴧𐴤𐴝 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱
𐴀𐴝𐴌 𐴀𐴥𐴞𐴃𐴤𐴝𐴌𐴝𐴌 𐴔𐴝𐴣 𐴁𐴝𐴉𐴢 𐴀𐴝𐴌 𐴁𐴡𐴖𐴢 𐴉𐴟𐴖𐴝𐴙𐴕 𐴓𐴡𐴘 𐴎𐴟𐴑𐴝 𐴎𐴟𐴑 𐴀𐴝𐴌 𐴈𐴥𐴡𐴁𐴡𐴌𐴝 𐴈𐴥𐴡𐴁𐴡𐴌𐴥𐴞 𐴓𐴟𐴀𐴝 𐴊𐴞𐴘𐴧𐴝 𐴒𐴡𐴙𐴃𐴧𐴤𐴡 𐴕𐴡 𐴊𐴠𐴀𐴠 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : VAN