𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴀𐴞𐴕𐴏𐴦𐴝𐴉𐴢 𐴓𐴡𐴘 𐴀𐴝𐴌 𐴕𐴞𐴌𐴝𐴉𐴡𐴃𐴧𐴝 𐴀𐴝𐴌 𐴀𐴠𐴃𐴔𐴞𐴕𐴝𐴕𐴡𐴌 𐴏𐴥𐴝𐴣𐴀𐴝𐴃𐴠 𐴊𐴠𐴐𐴤𐴡𐴃𐴢 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴡𐴕𐴡𐴃 𐴔𐴡𐴊𐴡𐴊𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴝𐴚𐴓𐴝 𐴊𐴠𐴐𐴤𐴠 𐴀𐴝𐴌𐴡𐴎𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴃𐴢 𐴁𐴡𐴀𐴡𐴃𐴢 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴏𐴡𐴓𐴠𐴌 𐴊𐴧𐴠 𐴏𐴥𐴡𐴚𐴑𐴡𐴄𐴡𐴌 𐴎𐴡𐴌𐴞𐴘𐴝 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴕𐴞𐴌𐴝𐴉𐴡𐴃𐴧𐴝 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴔𐴟𐴃𐴦𐴝𐴓𐴧𐴠𐴑 𐴐𐴙𐴠𐴓𐴥𐴠𐴙𐴣𐴅 𐴀𐴥𐴡𐴑𐴧𐴡𐴓 𐴁𐴝𐴌𐴥𐴠𐴌 𐴁𐴡𐴓𐴞 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴃𐴦𐴡𐴙𐴃𐴧𐴝 𐴏𐴥𐴡𐴊𐴡𐴌 / 𐴋𐴝𐴑𐴄𐴡𐴌 𐴔𐴟𐴇𐴝𐴔𐴧𐴡𐴊𐴢 𐴘𐴟𐴕𐴟𐴏𐴠 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑𐴡𐴃 𐴀𐴥𐴡𐴘𐴧𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴅𐴡𐴕𐴡𐴌𐴥𐴡𐴓 𐴔𐴞𐴄𐴤𐴞𐴚𐴡𐴃𐴢 𐴱 𐴒𐴡𐴙𐴅𐴧𐴤𐴙𐴠𐴊𐴠 𐴃𐴡𐴑𐴌𐴞𐴌𐴡𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴞𐴁𐴤𐴝 𐴘𐴠 𐴃𐴡𐴑𐴌𐴞𐴌𐴡𐴃 𐴀𐴝𐴌 𐴀𐴥𐴡 𐴈𐴡𐴘𐴧𐴥𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌𐴑𐴝𐴕𐴡𐴃𐴢 𐴀𐴞𐴕𐴏𐴦𐴝𐴉𐴢 𐴀𐴝𐴌 𐴇𐴥𐴠𐴉𐴝𐴎𐴡𐴃𐴢 𐴀𐴝𐴌 𐴀𐴠𐴃𐴔𐴞𐴕𐴝𐴕𐴡𐴌 𐴏𐴥𐴝𐴣𐴀𐴝𐴃𐴠 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴔𐴟𐴊𐴝 𐴃𐴟𐴖𐴝𐴘 𐴁𐴝𐴀𐴞𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴘𐴥𐴡 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴊𐴠𐴐𐴤𐴡𐴃𐴢 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴝 𐴀𐴝𐴏𐴦𐴝𐴕 𐴀𐴥𐴡𐴘 𐴉𐴝𐴌𐴞 𐴁𐴤𐴡𐴓𐴧𐴝 𐴉𐴟𐴌𐴝 𐴊𐴟𐴕𐴞𐴘𐴝𐴘𐴃𐴧𐴤𐴟 𐴱 𐴔𐴞𐴓𐴞 𐴑𐴝𐴌𐴖𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴉𐴥𐴞𐴃𐴤𐴞𐴕 𐴀𐴥𐴡 𐴖𐴝𐴊𐴝𐴌 𐴏𐴥𐴝𐴣𐴀𐴝𐴃𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴒𐴡𐴃𐴡 𐴇𐴥𐴝𐴣𐴃𐴢 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴁𐴝𐴚𐴓𐴝 𐴊𐴠𐴐𐴤𐴠 𐴀𐴠𐴑 𐴔𐴡𐴓𐴞𐴘𐴥𐴟𐴕 𐴊𐴟𐴘 𐴓𐴝𐴑𐴢 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴊𐴠𐴐𐴤𐴡𐴃𐴢 𐴌𐴝𐴑𐴤𐴞 𐴔𐴡𐴊𐴡𐴊𐴢 𐴒𐴡𐴌𐴥𐴡𐴕 𐴱 𐴀𐴥𐴞𐴃𐴤𐴝𐴌𐴝𐴌 𐴓𐴧𐴝 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊𐴡𐴌 𐴈𐴝𐴔 𐴀𐴥𐴡𐴑𐴧𐴡𐴓 𐴀𐴝𐴌 𐴊𐴠𐴌𐴞 𐴉𐴡𐴙𐴅𐴧𐴡𐴕𐴃𐴡 𐴄𐴞𐴑𐴠 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴱 𐴊𐴠𐴐𐴤𐴡𐴃𐴢 𐴖𐴝𐴉𐴠𐴏𐴢 𐴎𐴝𐴘𐴁𐴝𐴌 𐴁𐴝𐴁𐴡𐴃𐴠 𐴁𐴡𐴕𐴊𐴡𐴁𐴡𐴏𐴢 𐴀𐴥𐴡𐴘𐴁𐴡𐴓𐴧𐴝 𐴱 𐴊𐴟𐴕𐴞𐴘𐴝𐴘𐴃𐴧𐴤𐴟 𐴓𐴝𐴒𐴝𐴃𐴝𐴌 𐴔𐴡𐴊𐴡𐴊𐴢 𐴒𐴡𐴌𐴥𐴡𐴕 𐴎𐴡𐴌𐴟𐴌𐴞 𐴀𐴥𐴡𐴘𐴁𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴇𐴥𐴡𐴑𐴢 𐴔𐴝𐴍𐴞 𐴀𐴥𐴟𐴀𐴝 𐴀𐴝𐴌 𐴀𐴡𐴉𐴥𐴡𐴌𐴥𐴝𐴊𐴡𐴌 𐴱 𐴁𐴡𐴌𐴝𐴁𐴡𐴌 𐴀𐴞𐴕𐴏𐴦𐴝𐴉𐴢 𐴉𐴝𐴘𐴢 𐴁𐴡𐴓𐴧𐴥𐴝 ( 𐴀𐴝𐴘 𐴏𐴞 𐴅𐴠 ) 𐴀𐴝𐴌 ( 𐴀𐴝𐴘 𐴏𐴞 𐴏𐴞 ) 𐴱 𐴀𐴞𐴀𐴞𐴕𐴡𐴌 𐴋𐴦𐴡𐴙𐴓𐴧𐴝 𐴀𐴝𐴌 𐴀𐴥𐴡 𐴀𐴡𐴙𐴕𐴧𐴡 𐴊𐴠𐴐𐴁𐴡𐴘𐴊𐴠𐴐𐴤𐴞 𐴀𐴡𐴉𐴥𐴡𐴌𐴝𐴊𐴡𐴌 𐴔𐴟𐴃𐴦𐴝𐴓𐴧𐴠𐴑𐴝 𐴀𐴝𐴊𐴝𐴓𐴡𐴃𐴢 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴘𐴠 𐴘𐴥𐴡 𐴀𐴞𐴕𐴏𐴦𐴝𐴉𐴢 𐴉𐴝𐴀𐴝 𐴉𐴥𐴝𐴀𐴝𐴕 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞 𐴎𐴡𐴀𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴘𐴥𐴡 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RFAburmese