𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴊𐴟𐴕𐴞𐴘𐴝𐴘𐴌𐴥𐴠 𐴊𐴤𐴞𐴘𐴧𐴝𐴕 𐴊𐴞𐴀𐴞𐴃𐴡 𐴈𐴡𐴘𐴧𐴥𐴠 𐴀𐴝𐴌 𐴃𐴞𐴕𐴧𐴥𐴝𐴕 𐴉𐴡𐴌𐴡𐴏𐴃𐴝𐴁𐴢 𐴐𐴤𐴞𐴘𐴝𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴀𐴝𐴌 𐴀𐴡𐴃𐴧𐴞𐴏𐴝𐴌𐴡𐴃𐴧𐴤𐴟 𐴱 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴕𐴞𐴎𐴡𐴌 𐴊𐴠𐴐𐴤𐴡𐴃𐴢 𐴱 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴁𐴝𐴁𐴡𐴃𐴠 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴃𐴦𐴡𐴙𐴃𐴧𐴝 𐴏𐴥𐴡𐴊𐴡𐴌 𐴋𐴝𐴑𐴄𐴡𐴌 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴠 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴀𐴝𐴔𐴠𐴌𐴞𐴑𐴝𐴌 𐴕𐴞𐴘𐴥𐴟 𐴘𐴥𐴡𐴑 𐴐𐴤𐴡𐴀𐴡𐴌𐴡𐴃𐴢

𐴀𐴥𐴡𐴘𐴧𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡 𐴒𐴤𐴝𐴌 𐴅𐴡𐴕𐴡𐴌𐴥𐴡𐴓 𐴀𐴠𐴏𐴠𐴔𐴁𐴞𐴓𐴥𐴞𐴌 𐴹 𐴷 𐴀𐴡𐴔 𐴁𐴡𐴘𐴍𐴥𐴡𐴑𐴡𐴃 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴀𐴥𐴞𐴑𐴧𐴙𐴝 𐴱𐴱

𐴓𐴝𐴒𐴝𐴃𐴝𐴌 𐴊𐴤𐴞𐴘𐴧𐴝𐴕 𐴌𐴝𐴑𐴤𐴞𐴁𐴤𐴡𐴓𐴧𐴝 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱 𐴀𐴝𐴌 𐴀𐴥𐴡 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴡𐴌𐴥𐴞 𐴏𐴠𐴃𐴡𐴕𐴝 𐴀𐴝𐴌 𐴀𐴞𐴐𐴤𐴝𐴌𐴥𐴝 𐴊𐴞𐴘𐴧𐴥𐴠𐴊𐴠 𐴱 𐴊𐴤𐴞𐴘𐴧𐴝𐴕 𐴕𐴡 𐴊𐴡𐴀𐴡𐴕𐴡𐴌 𐴏𐴦𐴟𐴌𐴡𐴃𐴡𐴃𐴢 𐴏𐴥𐴡𐴚𐴑𐴡𐴄𐴢 𐴘𐴝𐴀𐴝𐴕 𐴐𐴤𐴟𐴊𐴠 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴕𐴡 𐴃𐴤𐴝𐴑𐴤𐴞𐴁𐴤𐴡 𐴱 𐴀𐴥𐴡𐴙𐴃𐴢 𐴉𐴝𐴌𐴠 𐴉𐴟𐴌𐴝 𐴀𐴠𐴓𐴝𐴑𐴝 𐴏𐴥𐴡𐴚𐴑𐴡𐴄𐴡𐴌 𐴀𐴦𐴝𐴣𐴎𐴝𐴃𐴢 𐴀𐴝𐴀𐴝𐴘 𐴎𐴝𐴘𐴁𐴡 𐴒𐴤𐴡𐴘 𐴱𐴱

𐴀𐴠𐴑𐴀𐴡𐴔 𐴉𐴡𐴌𐴡𐴏𐴃𐴝𐴁𐴢 𐴀𐴥𐴞𐴏𐴝𐴉𐴠 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴁𐴝𐴁𐴡𐴃𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴃𐴧𐴟 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴀𐴟𐴒𐴧𐴤𐴗𐴝 𐴔𐴞𐴄𐴤𐴞𐴚𐴡𐴌 𐴁𐴡𐴕𐴊𐴡𐴁𐴡𐴏𐴢 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱 𐴎𐴠 𐴔𐴞𐴄𐴤𐴞𐴚𐴡𐴃 𐴀𐴠𐴈𐴥𐴡𐴕 𐴏𐴡𐴓𐴠𐴌 𐴊𐴧𐴠 𐴑𐴟𐴓𐴠 𐴇𐴥𐴝𐴓𐴡𐴃𐴡𐴌 𐴔𐴟𐴌𐴡𐴃 𐴒𐴤𐴡𐴓𐴞

𐴀𐴝𐴕𐴃𐴝𐴎 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴀𐴝𐴌 𐴕𐴡𐴃𐴞𐴅𐴝 𐴕𐴦𐴠𐴓𐴠 𐴉𐴥𐴝𐴀𐴝𐴕 𐴀𐴝𐴌 𐴈𐴝𐴔 𐴀𐴥𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴃𐴡𐴌𐴞𐴑𐴝 𐴓𐴡𐴘 𐴀𐴥𐴟𐴀𐴝 𐴉𐴡𐴌𐴞𐴁𐴤𐴡 𐴱𐴱 𐴊𐴟𐴘𐴀𐴡𐴔 𐴀𐴥𐴡𐴙𐴓𐴊𐴠 𐴘𐴟 𐴀𐴠𐴕 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴢 𐴔𐴞𐴓𐴞 𐴅𐴟𐴖𐴝𐴁𐴞 𐴂𐴠𐴓𐴝𐴕 𐴀𐴟𐴒𐴧𐴤𐴗𐴝 𐴁𐴝𐴕𐴝 𐴉𐴡𐴌𐴞𐴁𐴤𐴡 𐴱 𐴀𐴝𐴌 𐴉𐴥𐴝𐴕𐴋 𐴈𐴡𐴔𐴞

𐴎𐴝𐴀𐴝𐴌𐴊𐴧𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴏𐴥𐴞𐴘𐴝𐴏𐴞 𐴑𐴝𐴌𐴖𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱 𐴃𐴞𐴕𐴀𐴡𐴔 𐴉𐴡𐴌𐴡𐴏𐴃𐴝𐴁𐴢 𐴀𐴥𐴡𐴙𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴅𐴠𐴕𐴟𐴏𐴥𐴝𐴙𐴋 𐴀𐴡𐴉𐴥𐴡𐴌𐴝𐴊𐴢 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴇𐴥𐴡𐴓𐴢 𐴕𐴦𐴠𐴓𐴝𐴘 𐴁𐴤𐴡𐴓𐴧𐴝 𐴀𐴝𐴌 𐴀𐴞𐴕𐴏𐴦𐴝𐴉𐴢 𐴉𐴝𐴘𐴁𐴡𐴓𐴧𐴥𐴝 𐴀𐴝𐴌 𐴀𐴡𐴉𐴥𐴡𐴌𐴝𐴊𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴝𐴎𐴝 𐴊𐴞𐴀𐴞 𐴁𐴡𐴓𐴧𐴥𐴝 𐴱 𐴉𐴟𐴌𐴝 𐴊𐴟𐴕𐴞𐴘𐴝𐴘𐴃𐴧𐴤𐴟 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴡𐴌𐴥𐴞 𐴃𐴝𐴙𐴊𐴢 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱𐴱

𐴀𐴥𐴞𐴁𐴤𐴝 𐴘𐴠 𐴕𐴝𐴀𐴞𐴕𐴏𐴦𐴝𐴉𐴞𐴌 𐴁𐴝𐴁𐴡𐴃𐴠 𐴀𐴝𐴌 𐴀𐴥𐴡 𐴈𐴡𐴘𐴧𐴥𐴠𐴊𐴠 𐴁𐴡𐴌𐴔𐴥𐴝𐴌 𐴎𐴦𐴝𐴓𐴠𐴔 𐴔𐴠𐴓𐴠𐴄𐴠𐴌𐴞 𐴀𐴥𐴡𐴙𐴓𐴊𐴠 𐴱 𐴓𐴝𐴔𐴁𐴝 𐴄𐴝𐴙𐴔 𐴐𐴤𐴝𐴕𐴃𐴞 𐴀𐴝𐴌 𐴕𐴞𐴌𐴝𐴉𐴡𐴃𐴧𐴝 𐴃𐴤𐴝𐴑𐴤𐴡𐴕𐴡𐴌 𐴏𐴝𐴁𐴤𐴞 𐴱 𐴔𐴞𐴄𐴤𐴞𐴚𐴡𐴃 𐴀𐴟𐴙𐴄𐴧𐴤𐴙𐴠𐴊𐴠 𐴊𐴠𐴐𐴤𐴡𐴌 𐴕𐴡𐴔𐴝𐴙𐴕𐴊𐴝 𐴀𐴝𐴌 𐴀𐴦𐴝𐴓𐴡𐴔𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴕𐴡𐴔𐴝𐴙𐴕𐴊𐴝 𐴀𐴥𐴡𐴑𐴧𐴡𐴓𐴠 𐴋𐴝𐴑𐴄𐴡𐴌 𐴘𐴟𐴕𐴟𐴏𐴡𐴌 𐴉𐴡𐴌𐴡𐴏𐴃𐴝𐴁 𐴃𐴞𐴕𐴥𐴞 𐴘𐴥𐴝𐴕𐴡𐴌𐴥𐴠 𐴊𐴞𐴓𐴡𐴌 𐴏𐴥𐴝𐴣𐴀𐴝𐴃𐴠 𐴑𐴡𐴁𐴟𐴓 𐴒𐴡𐴌𐴥𐴞 𐴐𐴝𐴁𐴦𐴝𐴐𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Dhakatribune