𐴕𐴝𐴉𐴢 𐴊𐴡𐴙𐴅𐴧𐴙𐴝𐴃𐴢 𐴁𐴟𐴄𐴢 𐴋𐴟𐴉𐴥𐴞 𐴰 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴡𐴌 𐴏𐴡𐴌𐴥𐴝 𐴀𐴥𐴟𐴑 𐴉𐴝𐴌𐴝𐴃𐴧𐴤𐴟𐴕 𐴱 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑 𐴌𐴝𐴃𐴞𐴘𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕 𐴓𐴡𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴊𐴤𐴝𐴘 𐴀𐴝𐴘𐴧𐴥𐴠𐴌 𐴊𐴧𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴸 𐴱 𐴎𐴡𐴕 𐴁𐴤𐴡𐴌𐴥𐴝 𐴁𐴟𐴄𐴢 𐴘𐴥𐴝𐴀𐴝𐴕 𐴕𐴝𐴉𐴢 𐴊𐴡𐴙𐴅𐴧𐴙𐴝𐴃𐴢 𐴋𐴟𐴉𐴥𐴞 𐴎𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴊𐴡𐴙𐴅𐴧𐴙𐴝𐴌 𐴔𐴟𐴌𐴡𐴃𐴢 𐴰 𐴱 𐴎𐴡𐴕 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴱 𐴁𐴝𐴚𐴓𐴝 𐴊𐴠𐴐𐴢 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴟𐴄𐴢 𐴘𐴥𐴝𐴀𐴝𐴕𐴡𐴃 𐴀𐴝𐴐𐴧𐴤𐴞𐴓𐴊𐴠 𐴸 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴁𐴤𐴟𐴃𐴤𐴡𐴌𐴃𐴧𐴟 𐴸 𐴎𐴡𐴕 𐴇𐴥𐴡𐴘𐴝𐴃𐴡𐴌 𐴎𐴟𐴌𐴠 𐴀𐴝𐴓𐴧𐴝𐴇𐴌 𐴇𐴥𐴡𐴑𐴟𐴔𐴠 𐴇𐴥𐴝𐴃 𐴄𐴤𐴠𐴚 𐴁𐴝𐴙𐴅𐴧𐴝𐴘 𐴎𐴞𐴛𐴝𐴃𐴝 𐴑𐴟𐴓𐴡𐴃𐴢 𐴉𐴡𐴣𐴀𐴡𐴏𐴞 𐴉𐴝𐴙𐴅𐴧𐴤𐴙𐴠 𐴱 𐴀𐴝𐴣𐴐𐴄𐴡 𐴎𐴡𐴕 𐴀𐴥𐴟𐴀𐴟𐴕 𐴀𐴠𐴈𐴥𐴡𐴕 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴶 𐴲 𐴓𐴡𐴔𐴁𐴤𐴡𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴝𐴑𐴞 𐴊𐴡𐴐𐴢 𐴎𐴡𐴕 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴕𐴥𐴠 𐴱 𐴕𐴥𐴝𐴑𐴤𐴞 𐴀𐴥𐴝𐴣𐴎𐴞 𐴒𐴞𐴘𐴧𐴥𐴡𐴘 𐴱 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴎𐴞𐴛𐴝𐴃𐴝 𐴀𐴝𐴏𐴥𐴠𐴊𐴠 𐴀𐴥𐴞𐴃𐴤𐴝𐴌𐴥𐴝 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 𐴁𐴟𐴄𐴢 𐴘𐴥𐴝𐴀𐴝𐴕𐴡𐴃 𐴈𐴡𐴎𐴡𐴕 𐴔𐴝𐴘𐴧𐴝 𐴀𐴝𐴌 𐴈𐴡𐴎𐴡𐴕 𐴔𐴡𐴌𐴡𐴊𐴢 𐴀𐴝𐴐𐴧𐴤𐴞𐴓𐴊𐴠 𐴱 𐴈𐴥𐴝𐴄𐴞 𐴁𐴤𐴝𐴉𐴠 𐴎𐴝𐴕𐴝 𐴕𐴥𐴝𐴘 𐴁𐴡𐴓𐴞 𐴘𐴥𐴡 𐴀𐴥𐴞𐴃𐴤𐴝𐴌𐴥𐴝 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴝𐴚𐴓𐴝 𐴊𐴠𐴐𐴤𐴡𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 ( 𐴁𐴞 𐴅𐴞 𐴁𐴞 ) 𐴘𐴠 𐴁𐴠𐴐𐴤𐴞 𐴈𐴡𐴌𐴝 𐴁𐴤𐴝𐴉𐴠 𐴉𐴝𐴀𐴝𐴌𐴝 𐴊𐴤𐴝𐴌𐴞 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴘𐴥𐴡 𐴱 𐴔𐴡𐴚𐴋𐴤𐴟𐴃 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴉𐴡𐴙𐴃𐴧𐴡 𐴊𐴞𐴕 𐴁𐴞𐴁𐴤𐴞𐴕𐴧𐴡 𐴌𐴝𐴏𐴧𐴝 𐴁𐴝𐴀𐴝𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴘𐴧𐴥𐴠𐴌 𐴁𐴡𐴓𐴞 𐴱 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴀𐴥𐴞𐴃𐴤𐴝𐴌𐴥𐴝 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RFAbarmese