𐴐𐴤𐴞𐴔𐴝𐴃𐴢 𐴁𐴠𐴍𐴞𐴀𐴝𐴙𐴕 𐴐𐴤𐴡𐴣𐴀𐴡 𐴷 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴒𐴠𐴌𐴠𐴉𐴃𐴝𐴌 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴌 𐴊𐴡𐴀𐴡𐴙𐴕𐴠 𐴉𐴡𐴏𐴥𐴞𐴔𐴠 𐴑𐴤𐴟𐴓𐴕𐴝 𐴀𐴠𐴙𐴏𐴄𐴠𐴀𐴞𐴄𐴡𐴌 𐴅𐴞𐴕𐴝𐴘𐴊𐴤𐴞𐴘𐴝 𐴋𐴞𐴐𐴄𐴤𐴞𐴑𐴡𐴌 𐴔𐴡𐴇𐴠𐴐𐴢 𐴉𐴟𐴌 𐴀𐴠𐴓𐴝𐴑𐴝𐴃𐴧𐴤𐴟 𐴱 𐴁𐴠𐴀𐴝𐴙𐴕𐴞 𐴁𐴤𐴝𐴉𐴠 𐴐𐴤𐴞𐴔𐴝 𐴉𐴝𐴌𐴥𐴝𐴘 𐴀𐴞𐴕𐴋𐴤𐴞𐴘𐴝𐴃𐴢 𐴒𐴤𐴡𐴓𐴠𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃𐴢 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 ( 𐴁𐴞 𐴅𐴞 𐴁𐴞) 𐴘𐴠 𐴃𐴞𐴕 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴀𐴝𐴙𐴕 𐴐𐴤𐴡𐴣𐴀𐴡 𐴷 𐴱 𐴎𐴡𐴕 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴞𐴃𐴤𐴝𐴌𐴝𐴌𐴥𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴊𐴞𐴕 𐴒𐴡𐴃𐴡 𐴌𐴝𐴙𐴃𐴡𐴌 𐴄𐴝𐴙𐴔𐴡𐴃 𐴱 𐴀𐴟𐴉𐴡 𐴎𐴞𐴓𐴥𐴝𐴌 𐴐𐴤𐴝𐴔𐴝𐴕𐴃𐴝 𐴱 𐴁𐴝𐴒𐴝 𐴋𐴝𐴚𐴒𐴝 𐴀𐴝𐴌 𐴑𐴟𐴐𐴤𐴡𐴓 𐴉𐴟𐴌 𐴐𐴤𐴞𐴔𐴝𐴃𐴧𐴤𐴟 𐴊𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴱 𐴲 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴊𐴦𐴟𐴛𐴅𐴧𐴙𐴝 𐴱 𐴔𐴡𐴇𐴠𐴐𐴢 𐴉𐴟𐴌𐴡𐴌 𐴸 𐴵 𐴓𐴡𐴔𐴁𐴤𐴡𐴌 ( 𐴁𐴞 𐴅𐴞 𐴁𐴞 ) 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴁𐴡𐴌𐴡 𐴱𐴱

𐴓𐴠𐴉𐴄𐴤𐴠𐴕 𐴑𐴡𐴕𐴧𐴝𐴓𐴢 / 𐴐𐴤𐴝 𐴔𐴟𐴇𐴝𐴔𐴧𐴡𐴃 𐴀𐴝𐴎𐴞𐴎𐴟𐴐𐴢 𐴐𐴤𐴡𐴇𐴞𐴊𐴠 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌𐴞 𐴔𐴡𐴅𐴓𐴥𐴞𐴏𐴡𐴃𐴢 𐴱 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴔𐴡𐴇𐴠𐴐𐴢 𐴉𐴟𐴌 𐴁𐴡𐴖𐴋𐴝𐴌 𐴁𐴝𐴀𐴝𐴘 𐴉𐴝𐴌𐴥𐴝𐴘 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴀𐴞𐴕𐴋𐴤𐴞𐴘𐴝𐴃𐴢 𐴒𐴤𐴡𐴓𐴞𐴁𐴤𐴡𐴓𐴧𐴝 𐴏𐴠𐴐𐴃𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴒𐴟𐴉𐴡𐴕

𐴈𐴥𐴡𐴁𐴡𐴌 𐴉𐴝𐴘 𐴱 𐴁𐴡𐴖𐴋𐴝𐴌 𐴀𐴠𐴓𐴝𐴑𐴝𐴃𐴢 𐴑𐴤𐴟𐴁𐴢 𐴁𐴠𐴐𐴤𐴞 𐴒𐴡𐴌𐴥𐴞 ( 𐴁𐴞 𐴅𐴞 𐴁𐴞 ) 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴔𐴟𐴃𐴦𐴝𐴙𐴕 𐴒𐴡𐴌𐴥𐴞 𐴊𐴞𐴘𐴝 𐴒𐴞𐴘𐴧𐴥𐴠 𐴱𐴱

𐴃𐴡𐴀𐴡𐴘 𐴀𐴥𐴠 𐴀𐴡𐴑𐴃𐴤𐴡𐴃 𐴐𐴤𐴝𐴔𐴝𐴕𐴃𐴝 𐴱 𐴁𐴝𐴒𐴝 𐴋𐴝𐴚𐴒𐴝 𐴀𐴝𐴌 𐴑𐴟𐴐𐴤𐴡𐴓 𐴉𐴟𐴌 𐴱 𐴀𐴠 𐴃𐴞𐴕 𐴎𐴝𐴒𐴝𐴌 𐴐𐴤𐴞𐴔𐴝𐴃𐴧𐴤𐴟 𐴀𐴞𐴕𐴋𐴤𐴞𐴘𐴝𐴃𐴢 𐴒𐴤𐴡𐴓𐴠𐴌 𐴒𐴤𐴡𐴘𐴊𐴠 𐴃𐴞𐴕 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴋𐴝𐴓𐴝𐴓 𐴀𐴝𐴌 𐴱 𐴀𐴥𐴞𐴃𐴝𐴌𐴥𐴝𐴌𐴥𐴠 𐴔𐴡𐴊𐴡𐴊𐴢 𐴒𐴡𐴌𐴥𐴡𐴙𐴕𐴧𐴝 𐴔𐴝𐴘𐴑𐴟𐴌𐴟 𐴁𐴦𐴝𐴏𐴡𐴌 𐴋𐴠𐴌𐴥𐴝𐴘𐴁𐴤𐴝𐴌 𐴐𐴤𐴡𐴣𐴀𐴡 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴷 𐴱 𐴎𐴡𐴕 ( 𐴁𐴞 𐴅𐴞 𐴁𐴞 ) 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 ( 𐴁𐴞 𐴅𐴞 𐴁𐴞 ) 𐴘𐴠 𐴑𐴠𐴙𐴏𐴢 𐴑𐴤𐴟𐴓𐴞 𐴁𐴦𐴝𐴊𐴠 𐴁𐴠𐴒𐴧𐴤𐴟𐴕𐴡𐴌𐴥𐴠 𐴔𐴡𐴇𐴠𐴐𐴢 𐴉𐴟𐴌 𐴃𐴤𐴝𐴕𐴝𐴃𐴢 𐴒𐴡𐴏𐴥𐴝𐴘 𐴊𐴞𐴘𐴧𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Ukhiyanews.com