𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴟 𐴀𐴝𐴙𐴑𐴧𐴙𐴝𐴝𐴁𐴢 𐴀𐴝𐴙𐴐𐴧𐴤𐴙𐴠𐴊𐴠 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴁𐴟𐴄 𐴊𐴟𐴘𐴧𐴝𐴕 𐴔𐴠𐴓𐴠𐴄𐴌𐴠 𐴘𐴠 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴠𐴌𐴞 𐴊𐴞𐴘𐴧𐴥𐴠𐴊𐴠 𐴵 𐴇𐴥𐴝𐴉𐴃𐴝 𐴁𐴤𐴝𐴌𐴥𐴝𐴘𐴧𐴠 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴱𐴱

𐴀𐴝𐴌𐴑𐴝𐴕 𐴱 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝𐴃𐴧𐴤𐴟 𐴱 𐴒𐴡𐴃𐴡 𐴔𐴠 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑 𐴌𐴝𐴃𐴞𐴘𐴝 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 𐴱 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴞𐴏𐴥𐴝𐴉𐴠 𐴱 𐴁𐴤𐴟𐴏𐴞𐴊𐴤𐴡𐴚𐴌 𐴊𐴡𐴀𐴡𐴙𐴕𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴞𐴀𐴞𐴓 𐴱 𐴁𐴦𐴝𐴊𐴠 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴌𐴟𐴇𐴝𐴙𐴚𐴒𐴙𐴝 𐴑𐴠𐴙𐴏𐴧𐴥𐴟 𐴀𐴝𐴌 𐴁𐴤𐴟𐴏𐴞𐴊𐴡𐴚𐴡𐴌 𐴊𐴡𐴀𐴡𐴙𐴕𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴑𐴠𐴙𐴏𐴧𐴥𐴟 𐴉𐴝𐴙𐴅𐴧𐴙𐴝 𐴌𐴟𐴇𐴝𐴙𐴚𐴒𐴙𐴝 𐴔𐴞𐴓𐴞 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴊𐴟𐴘𐴀𐴡𐴔 𐴇𐴥𐴝𐴉𐴃𐴝𐴃𐴢 𐴱𐴱

𐴁𐴟𐴄𐴢 𐴊𐴟𐴘𐴧𐴝𐴕 𐴓𐴡𐴘 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴞𐴏𐴝𐴉𐴠 𐴱 𐴀𐴝𐴑𐴧𐴙𐴝𐴁𐴡𐴌 𐴒𐴤𐴝𐴣𐴍𐴡𐴃 𐴁𐴤𐴞𐴌𐴞𐴁𐴤𐴝𐴌 𐴓𐴡𐴒𐴠 𐴓𐴡𐴒𐴠 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴝𐴓𐴥𐴝𐴀𐴝𐴙𐴓 𐴱 𐴁𐴦𐴝𐴊𐴠 𐴁𐴤𐴟𐴏𐴞𐴊𐴤𐴡𐴚 𐴖𐴝𐴉𐴠 𐴀𐴝𐴀𐴝𐴘 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴠𐴌𐴞 𐴊𐴞𐴘𐴧𐴥𐴠𐴊𐴠 𐴵 𐴇𐴥𐴝𐴉𐴃𐴝 𐴁𐴤𐴝𐴌𐴥𐴝𐴘𐴧𐴠 𐴱 𐴔𐴡𐴕𐴃𐴡𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴱 𐴈𐴡𐴍𐴥𐴠 𐴀𐴥𐴝𐴣𐴎𐴞 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴀𐴥𐴞𐴃𐴤𐴝𐴌𐴥𐴝𐴌 𐴒𐴤𐴡𐴌𐴒𐴟𐴐𐴧𐴞𐴌 𐴁𐴤𐴟𐴃𐴤𐴡𐴌𐴃𐴟 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴕𐴥𐴝𐴑𐴤𐴞 𐴉𐴥𐴞𐴃𐴤𐴞𐴕 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱 𐴕𐴥𐴝𐴑𐴤𐴞 𐴁𐴤𐴟𐴏𐴞𐴊𐴤𐴡𐴚 𐴀𐴝𐴘𐴧𐴥𐴠𐴌 𐴊𐴧𐴠 𐴉𐴡𐴣𐴃𐴤𐴡𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴈𐴥𐴝𐴄𐴞 𐴈𐴥𐴡𐴁𐴡𐴌 𐴕𐴡 𐴎𐴝𐴕𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴎𐴠 𐴉𐴝𐴄𐴞 𐴘𐴠 𐴁𐴡𐴕 𐴒𐴡𐴌𐴥𐴞𐴁𐴤𐴡 𐴒𐴡𐴌𐴥𐴡𐴑 𐴱 𐴃𐴡𐴌𐴝 𐴃𐴡𐴌𐴞 𐴀𐴠𐴌𐴞 𐴊𐴞𐴀𐴞𐴁𐴡𐴓𐴧𐴥𐴝 𐴀𐴥𐴞𐴃𐴝𐴌𐴥𐴝𐴌 𐴈𐴝𐴣𐴏𐴥𐴠 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌𐴡𐴎 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝 𐴒𐴟𐴣𐴍𐴝 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴝𐴌𐴑𐴝𐴕𐴡𐴌 𐴔𐴟𐴓 𐴁𐴡𐴌𐴡 𐴐𐴤𐴡𐴀𐴡𐴌 𐴀𐴝𐴙𐴑𐴧𐴙𐴝𐴁𐴡𐴌𐴥𐴠 𐴘𐴥𐴡 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴃𐴡𐴘𐴧𐴝𐴌𐴞 𐴒𐴡𐴌𐴥𐴠𐴌 𐴱 𐴀𐴝𐴙𐴑𐴧𐴙𐴝𐴁 𐴓𐴡𐴘 𐴁𐴤𐴟𐴏𐴞𐴊𐴤𐴡𐴚 𐴀𐴝𐴌 𐴀𐴝𐴙𐴑𐴧𐴙𐴝𐴁𐴢 𐴓𐴡𐴘 𐴔𐴡𐴚𐴋𐴤𐴟 𐴱 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞𐴁𐴤𐴝𐴌 𐴑𐴟𐴓𐴡𐴌 𐴌𐴝𐴏𐴧𐴝 𐴀𐴝𐴌 𐴉𐴝𐴕𐴥𐴞𐴌 𐴌𐴝𐴏𐴧𐴝 𐴁𐴠𐴒𐴧𐴤𐴞𐴕 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴀𐴠𐴑 𐴔𐴝𐴐𐴢 𐴓𐴡𐴃𐴞 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 𐴀𐴥𐴠𐴕𐴋𐴞𐴓𐴧𐴝 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴡𐴓 𐴀𐴥𐴡 𐴓𐴡𐴌𐴝 𐴏𐴡𐴌𐴝 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 𐴁𐴡𐴓𐴞 𐴱 𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴤𐴡𐴚𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN