𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴐𐴦𐴟𐴌 𐴀𐴟𐴏𐴃𐴝𐴊𐴢 𐴊𐴟𐴘 𐴎𐴡𐴕𐴌𐴥𐴠 𐴇𐴥𐴝𐴘𐴅𐴤𐴠𐴑 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴊𐴟𐴘 𐴎𐴝𐴒𐴝𐴃𐴧𐴤𐴟 𐴊𐴟𐴘 𐴎𐴡𐴕 𐴱 𐴈𐴡𐴕𐴥𐴡 𐴏𐴥𐴡𐴁𐴡𐴁𐴢 𐴏𐴥𐴝𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 𐴔𐴡𐴐𐴦𐴟𐴌 𐴀𐴟𐴏𐴃𐴝𐴊 𐴇𐴥𐴝𐴘𐴅𐴤𐴠𐴑 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴥𐴝𐴙𐴌 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴒𐴤𐴡𐴌𐴡𐴃𐴧𐴟 𐴁𐴡𐴓𐴝𐴎𐴟𐴌𐴞 𐴕𐴦𐴠𐴓𐴝𐴘 𐴱 𐴄𐴠𐴌𐴝𐴑 𐴒𐴝𐴌𐴥𐴞 𐴁𐴤𐴡𐴌𐴞 𐴓𐴝𐴁𐴟 𐴒𐴡𐴚 𐴑𐴠𐴀𐴠𐴔𐴡𐴃 𐴓𐴡𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴱𐴱

𐴔𐴝𐴐𐴄𐴡𐴌 𐴑𐴡𐴔𐴝𐴓 𐴀𐴥𐴞𐴁𐴤𐴝𐴌 𐴁𐴤𐴡𐴙𐴕 𐴎𐴝𐴔𐴝𐴘 / 𐴔𐴝𐴐𐴄𐴡𐴞 𐴉𐴥𐴡𐴘𐴝𐴏𐴢 𐴱 𐴀𐴝𐴌 𐴀𐴥𐴡 𐴊𐴟𐴘 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴒𐴤𐴡𐴌𐴒𐴟𐴐𐴧𐴞𐴃𐴧𐴟𐴕 𐴏𐴥𐴞𐴌𐴥𐴝 𐴀𐴥𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘 𐴱 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴀𐴥𐴞𐴃𐴤𐴝𐴌𐴥𐴝𐴌 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴱 𐴀𐴥𐴞𐴃𐴤𐴝𐴌𐴝 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴝𐴃𐴡𐴃 𐴑𐴞 𐴎𐴞𐴕𐴊𐴝 𐴀𐴝𐴏𐴥𐴠 𐴕𐴥𐴝𐴑𐴤𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴑𐴠𐴙𐴏𐴧𐴥𐴟 𐴎𐴝𐴕𐴝 𐴕𐴥𐴝𐴘/ 𐴔𐴝𐴐𐴄𐴡𐴌 𐴉𐴥𐴡𐴘𐴝𐴏𐴡𐴌 𐴁𐴡𐴖 𐴏𐴝𐴙𐴌 𐴎𐴡𐴕 𐴉𐴟𐴖𐴝𐴙𐴕 𐴓𐴡𐴘 𐴑𐴤𐴟𐴓𐴥𐴝𐴌 𐴁𐴞𐴓𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴐𐴤𐴝𐴘𐴌𐴝 𐴉𐴝𐴌𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴐𐴄𐴡𐴌 𐴀𐴠𐴕𐴝𐴔𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴀𐴝𐴌 𐴀𐴥𐴡 𐴁𐴡𐴀𐴡𐴃𐴢 𐴔𐴝𐴕𐴥𐴟𐴙𐴐𐴢 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴘𐴥𐴡 𐴔𐴡𐴚𐴋𐴤𐴟𐴃𐴧𐴟 𐴈𐴥𐴡𐴁𐴡𐴌 𐴈𐴡𐴘𐴧𐴥𐴠 𐴱 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴔𐴡𐴌𐴝 𐴘𐴦𐴝𐴃𐴤𐴡 𐴎𐴞𐴛𐴝𐴃𐴝 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴤𐴡𐴕 𐴲 𐴱 𐴰 𐴲 𐴓𐴡𐴃𐴞 𐴁𐴡𐴌𐴔𐴥𐴝𐴌 𐴇𐴥𐴡𐴑𐴟𐴔𐴡𐴃𐴠 𐴀𐴝𐴌𐴡𐴁𐴞 𐴔𐴡𐴊𐴡𐴌𐴥𐴡𐴏𐴥𐴝 𐴀𐴥𐴡𐴑𐴧𐴡𐴓 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴧𐴥𐴠𐴊𐴠 𐴱 𐴘𐴥𐴝𐴀𐴝𐴌 𐴁𐴦𐴝𐴊𐴠 𐴓𐴡𐴃𐴞 𐴱 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴁𐴡𐴓𐴞𐴁𐴝𐴎𐴝𐴌 𐴁𐴤𐴝𐴐𐴞 𐴔𐴝𐴐𐴄𐴡𐴌 𐴔𐴡𐴓𐴡𐴘 𐴑𐴡𐴔𐴝𐴓𐴢 𐴎𐴞𐴁𐴤𐴝 ( 𐴀𐴠 𐴀𐴠𐴙𐴆 ) 𐴑𐴡𐴔𐴝𐴓𐴢 𐴈𐴡𐴀𐴡𐴘 𐴔𐴡𐴐𐴦𐴟𐴌 𐴱 𐴀𐴥𐴞𐴁𐴤𐴝 𐴘𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴂𐴠𐴌𐴝𐴁𐴤𐴞𐴄𐴢 𐴀𐴥𐴞𐴏𐴝𐴉𐴠 𐴉𐴟𐴖𐴝𐴙𐴕𐴊𐴤𐴡𐴌𐴠 𐴀𐴝𐴌𐴡𐴁𐴞 𐴀𐴞𐴚𐴌𐴝𐴎𐴞 𐴁𐴡𐴌𐴔𐴥𐴞𐴏𐴢 𐴀𐴟𐴌𐴊𐴟 𐴉𐴡𐴌𐴥𐴝𐴘𐴃𐴤𐴡 𐴱 𐴀𐴝𐴌 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴤𐴝𐴘𐴌𐴝 𐴉𐴝𐴌𐴝𐴌 𐴔𐴝𐴐𐴄𐴡𐴌 𐴀𐴠𐴕𐴝𐴔𐴱 𐴀𐴞𐴃𐴝𐴌𐴥𐴝 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴡𐴃𐴡 𐴔𐴝𐴐𐴤𐴡𐴃 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴡𐴘 𐴱 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴔𐴡𐴚𐴋𐴤𐴟𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : FRT