𐴉𐴡𐴙𐴃𐴧𐴡 𐴁𐴡𐴏𐴥𐴡𐴌 𐴑𐴟𐴌𐴞 𐴇𐴥𐴝𐴎𐴝𐴌 𐴎𐴡𐴕 𐴀𐴥𐴞𐴏𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴝𐴔𐴠𐴌𐴞𐴑𐴝𐴃𐴢 𐴉𐴡𐴣𐴀𐴡𐴏𐴝𐴘𐴁𐴤𐴝𐴌 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴑𐴟𐴐𐴤𐴞𐴐𐴢 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴢 𐴇𐴥𐴝𐴛𐴐𐴤𐴝 𐴃𐴤𐴝𐴑𐴤𐴞 𐴉𐴝𐴌𐴞𐴁𐴤𐴝𐴌 𐴂𐴡𐴌𐴟𐴒𐴠𐴌𐴝𐴔 𐴀𐴥𐴞𐴏𐴝𐴉𐴠 𐴱 𐴉𐴡𐴙𐴃𐴧𐴡 𐴁𐴡𐴏𐴥𐴡𐴌 𐴰 𐴰 𐴰 𐴰 𐴲 𐴑𐴟𐴌𐴞 𐴇𐴥𐴝𐴎𐴝𐴌 𐴎𐴡𐴕 𐴀𐴥𐴞𐴏𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴱 𐴀𐴝𐴔𐴠𐴌𐴞𐴑𐴝𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴀𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴁𐴝𐴚𐴓𐴝 𐴊𐴠𐴐𐴤𐴠 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴁𐴡𐴓𐴞 𐴱 𐴁𐴝𐴚𐴓𐴝 𐴊𐴠𐴐𐴤𐴞 𐴁𐴡𐴘𐴊𐴠𐴐𐴢 𐴀𐴟𐴎𐴞𐴌𐴞 𐴀𐴡𐴉𐴥𐴞𐴏𐴡𐴌 𐴔𐴡𐴐𐴖𐴝𐴌𐴝 𐴊𐴝𐴃𐴝 / 𐴃𐴟𐴇𐴥𐴝 𐴇𐴟𐴏𐴝𐴙𐴕𐴠 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠 𐴀𐴝𐴕𐴃𐴝𐴎 𐴔𐴡𐴎𐴞𐴕 𐴁𐴠𐴐𐴤𐴞 𐴈𐴡𐴔 𐴀𐴝𐴊𐴡𐴊𐴢 𐴐𐴤𐴡𐴙𐴚𐴑𐴙𐴝 𐴱 𐴀𐴥𐴠𐴃𐴡𐴓𐴧𐴝 𐴐𐴤𐴟𐴊𐴠 𐴀𐴝𐴔𐴠𐴌𐴞𐴑𐴝 𐴘𐴠 𐴁𐴡𐴏𐴥𐴡𐴌𐴥𐴠 𐴰 𐴰 𐴰 𐴰 𐴲 𐴑𐴟𐴌𐴞 𐴇𐴥𐴝𐴎𐴝𐴌 𐴎𐴡𐴕 𐴀𐴥𐴞𐴏𐴝𐴉𐴠 𐴓𐴡𐴘 𐴎𐴝𐴘𐴓𐴥𐴠 𐴱 𐴊𐴡𐴐𐴢 𐴁𐴡𐴏𐴥𐴡𐴌𐴡𐴃 𐴰 𐴰 𐴰 𐴰 𐴰 𐴲 𐴊𐴟𐴘 𐴓𐴝𐴑 𐴀𐴥𐴡𐴘𐴁𐴡 𐴁𐴡𐴓𐴞 𐴀𐴝𐴣𐴀𐴝𐴌𐴝 𐴀𐴝𐴐𐴤𐴝 𐴒𐴡𐴌𐴥𐴞𐴌 𐴱 𐴀𐴝𐴌 𐴀𐴠𐴕𐴋𐴞𐴓𐴧𐴝 𐴁𐴤𐴝𐴉𐴠 𐴏𐴡𐴓𐴞 𐴒𐴞𐴓𐴥𐴠 𐴱 𐴀𐴝𐴣𐴀𐴝𐴌𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴞 𐴉𐴝𐴙𐴅𐴧𐴟𐴔 𐴊𐴠 𐴁𐴡𐴓𐴞 𐴃𐴟𐴇𐴥𐴝 𐴘𐴠 𐴈𐴡𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘 𐴉𐴝𐴌𐴞𐴁𐴤𐴝𐴌 𐴀𐴝𐴐𐴤𐴝 𐴃𐴤𐴝𐴑𐴤𐴞𐴓𐴥𐴠 𐴘𐴥𐴡 𐴲 𐴲 𐴰 𐴲 𐴐𐴤𐴡𐴕 𐴀𐴥𐴡𐴘𐴃𐴠 𐴀𐴝𐴔𐴠𐴌𐴞𐴑𐴝𐴌 𐴇𐴥𐴡𐴑𐴟𐴔𐴡𐴃𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴢 𐴇𐴥𐴝𐴔𐴞𐴐𐴤𐴝 𐴃𐴤𐴝𐴑𐴤𐴞 𐴉𐴝𐴌𐴞𐴁𐴤𐴝𐴌 𐴁𐴝𐴁𐴡𐴃𐴠 𐴁𐴡𐴌𐴝𐴁𐴡𐴌 𐴕𐴞𐴃𐴞 𐴓𐴡𐴘 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴎𐴝𐴀𐴝𐴌 𐴊𐴧𐴠 𐴀𐴝𐴏𐴥𐴠 𐴱 𐴀𐴝𐴔𐴠𐴌𐴞𐴑𐴝 𐴘𐴠 𐴁𐴝𐴏𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴓𐴧𐴝 𐴊𐴡𐴌𐴈𐴝𐴌 𐴀𐴥𐴡𐴘𐴁𐴡𐴊𐴠 𐴏𐴞𐴏𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴏𐴥𐴝𐴌𐴔𐴠 𐴀𐴡𐴓𐴉𐴡 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴇𐴥𐴡𐴑𐴟𐴔𐴡𐴃𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴘𐴥𐴡 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴁𐴝𐴏𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴁𐴠𐴐𐴤𐴞 𐴈𐴡𐴔 𐴱 𐴐𐴤𐴟𐴊𐴠 𐴰 𐴰 𐴵 𐴲 𐴎𐴡𐴕 𐴱 𐴀𐴡𐴓𐴉𐴡 𐴔𐴝𐴕𐴥𐴟𐴙𐴐𐴢 𐴀𐴟𐴀𐴟𐴕𐴡𐴌 𐴓𐴧𐴝 𐴈𐴝𐴔 𐴀𐴝𐴣𐴀𐴝𐴌𐴝 𐴃𐴡𐴌𐴝𐴃𐴡𐴌𐴞 𐴕𐴝𐴓𐴢 𐴒𐴡𐴌𐴥𐴞 𐴊𐴞𐴀𐴞 𐴉𐴝𐴌𐴞𐴘𐴥𐴟𐴔 𐴁𐴡𐴓𐴞 𐴘𐴥𐴡 𐴃𐴟𐴇𐴥𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 𐴀𐴝𐴔𐴠𐴌𐴞𐴑𐴝 𐴘𐴠 𐴀𐴝𐴒𐴠 𐴓𐴡𐴘 𐴒𐴞𐴘𐴧𐴥𐴠𐴊𐴠 𐴌𐴞𐴉𐴟𐴎𐴞 𐴀𐴥𐴟𐴀𐴟𐴕𐴡𐴌 𐴒𐴡𐴕𐴝 𐴘𐴥𐴡 𐴐𐴤𐴟𐴊𐴠 𐴰 𐴰 𐴵 𐴲 𐴎𐴡𐴕 𐴁𐴡𐴓𐴞 𐴘𐴥𐴡 / 𐴃𐴟𐴇𐴥𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : DMG