𐴁𐴤𐴟𐴏𐴞𐴊𐴤𐴡𐴚𐴡𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴲 𐴎𐴡𐴕 𐴇𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱𐴱

𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴱 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴌 𐴑𐴝𐴛𐴡𐴚 𐴂𐴥𐴡𐴑 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘 𐴎𐴡𐴕𐴡𐴌𐴥𐴠 𐴇𐴥𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘 𐴱 𐴀𐴥𐴞𐴃𐴤𐴝𐴌𐴥𐴝 𐴀𐴥𐴡𐴙𐴓𐴊𐴠 𐴔𐴟𐴇𐴝𐴔𐴧𐴡𐴊𐴢 𐴑𐴡𐴌𐴞𐴔 𐴀𐴝𐴌 𐴅𐴝𐴕𐴞 𐴀𐴝𐴓𐴡𐴔 𐴱 𐴊𐴟𐴕𐴥𐴞 𐴎𐴡𐴕 𐴑𐴝𐴛𐴡𐴚 𐴂𐴥𐴡𐴑 𐴉𐴝𐴌𐴝𐴌 𐴁𐴤𐴝𐴐𐴞 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴕𐴃𐴡𐴌 𐴀𐴟𐴌𐴡𐴔𐴁𐴡 𐴈𐴥𐴡𐴁𐴡𐴁𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠𐴊𐴠 𐴀𐴝𐴒𐴠 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴵 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴊𐴟𐴘 𐴇𐴥𐴝𐴉𐴃𐴤𐴝 𐴉𐴥𐴡𐴗𐴏𐴡𐴌 𐴄𐴠𐴕𐴧𐴞𐴕 𐴊𐴞𐴘𐴝𐴘 𐴁𐴦𐴝𐴊𐴠 𐴱 𐴓𐴝𐴌𐴥𐴝𐴘𐴃𐴢 𐴔𐴝𐴎𐴤𐴠 𐴔𐴝𐴕𐴥𐴟𐴙𐴐𐴢 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴔𐴟𐴀𐴟𐴔 𐴓𐴝𐴙𐴕𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴝𐴋𐴝 𐴒𐴝 𐴉𐴝𐴌𐴝 𐴀𐴝𐴌 𐴑𐴝𐴛𐴡𐴚 𐴂𐴥𐴡𐴑 𐴉𐴝𐴌𐴝𐴌 𐴋𐴤𐴑𐴤𐴠 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴈𐴥𐴝𐴕𐴥𐴝 𐴊𐴞𐴘𐴧𐴝 𐴉𐴡𐴌𐴠 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴘𐴝𐴀𐴝𐴌 𐴀𐴝𐴒𐴠 𐴘𐴥𐴡 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃𐴢 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴀𐴟𐴃𐴧𐴡𐴌𐴠 𐴀𐴝𐴏𐴥𐴠𐴊𐴠 𐴁𐴝𐴋𐴝 𐴒𐴝 𐴉𐴝𐴌𐴝𐴌 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴵 𐴱 𐴎𐴡𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴌𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘 𐴁𐴡𐴓𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴝𐴋𐴝 𐴒𐴝 𐴉𐴝𐴌𐴝 𐴀𐴝𐴌 𐴑𐴝𐴛𐴝𐴚 𐴂𐴥𐴡𐴑 𐴉𐴝𐴌𐴝 𐴔𐴞𐴓𐴝𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴝𐴘𐴅𐴤𐴠𐴑 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴷 𐴱 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴈𐴡𐴕 𐴎𐴝𐴒𐴝𐴃𐴢 𐴌𐴝𐴙𐴑𐴧𐴤𐴙𐴊𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴊𐴡 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴀𐴝𐴌 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴔𐴝𐴎𐴤𐴠 𐴔𐴝𐴎𐴤𐴠 𐴒𐴤𐴡𐴌 𐴉𐴞𐴏𐴥𐴠 𐴰 𐴰 𐴰 𐴰 𐴱 𐴊𐴡𐴐𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴔𐴡𐴒𐴢 𐴁𐴝𐴒𐴞𐴌𐴥𐴠 𐴊𐴞𐴘𐴧𐴝 𐴉𐴡𐴌𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴁𐴤𐴟𐴏𐴞𐴊𐴤𐴡𐴚 𐴀𐴝𐴓𐴝𐴑𐴝𐴌 𐴀𐴟𐴃𐴧𐴡𐴌𐴡𐴌 𐴀𐴝𐴌 𐴊𐴡𐴀𐴡𐴙𐴕𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴁𐴝𐴏𐴥𐴞 𐴁𐴝𐴏𐴥𐴞 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴊𐴤𐴡𐴌𐴞 𐴓𐴡𐴘 𐴎𐴝𐴘 𐴱 𐴇𐴥𐴝𐴉𐴃𐴤𐴝 𐴊𐴟𐴘 𐴇𐴥𐴝𐴉𐴃𐴤𐴝 𐴄𐴠𐴕𐴧𐴞𐴕 𐴊𐴞𐴘𐴧𐴝𐴘 𐴓𐴝𐴌𐴥𐴝𐴘𐴃 𐴔𐴝𐴎𐴤𐴠 𐴔𐴟𐴀𐴟𐴔 𐴓𐴝𐴙𐴕𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴠𐴍𐴠 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘 𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴎𐴝𐴀𐴝𐴌 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝 𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : FRT