𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝𐴃𐴢 𐴔𐴡𐴐𐴦𐴟𐴌 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴱 𐴁𐴤𐴟𐴏𐴞𐴊𐴤𐴡𐴚 𐴄𐴡𐴀𐴡𐴕𐴡𐴌 𐴊𐴡𐴀𐴡𐴙𐴕 𐴀𐴠𐴓𐴝𐴑𐴝𐴌 𐴀𐴝𐴄𐴧𐴤𐴗𐴥𐴝𐴚 𐴚𐴥𐴝𐴏𐴠𐴃 ( 𐴑𐴞𐴘𐴝 𐴎𐴡𐴙𐴚𐴒𐴙𐴝 𐴉𐴝𐴌𐴝𐴃𐴢) 𐴃𐴤𐴝𐴑𐴤𐴠𐴊𐴠 𐴔𐴡𐴐𐴦𐴟𐴌 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴕𐴝𐴔 𐴀𐴥𐴞𐴏𐴝𐴉𐴠 / 𐴋𐴝𐴑𐴄𐴡𐴌 𐴅𐴟𐴕𐴝𐴙𐴊𐴢 𐴱 𐴀𐴥𐴞𐴁𐴤𐴝 𐴘𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴁𐴝𐴎𐴝𐴌𐴡𐴃𐴧𐴤𐴟 𐴒𐴤𐴡𐴌𐴡𐴌 𐴓𐴧𐴝 𐴑𐴠𐴙𐴏𐴧𐴥𐴟 𐴎𐴡𐴌𐴟𐴌𐴞 𐴏𐴞𐴏𐴢 𐴁𐴝𐴎𐴝𐴌 𐴑𐴞𐴕𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃𐴢 𐴱 𐴀𐴝𐴏𐴞𐴔𐴁𐴞𐴃𐴢 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴈𐴡𐴊𐴦𐴟𐴕 𐴀𐴝𐴀𐴝𐴘 𐴊𐴤𐴡𐴌𐴞 𐴁𐴡𐴕 𐴒𐴡𐴌𐴥𐴞 𐴑𐴤𐴟𐴓𐴝 𐴁𐴝𐴎𐴝𐴌𐴡𐴃 𐴀𐴝𐴏𐴥𐴠𐴊𐴠 𐴔𐴝𐴙𐴕𐴐𐴤𐴡𐴌 𐴔𐴟𐴀𐴟𐴕𐴃𐴟 𐴀𐴡𐴔𐴝𐴕𐴥𐴟𐴐𐴤𐴞 𐴔𐴝𐴌𐴝 𐴔𐴝𐴌𐴝𐴌 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴦𐴝𐴊𐴠 𐴌𐴡𐴏𐴥𐴞 𐴀𐴠𐴑𐴧𐴤𐴝𐴕 𐴓𐴡𐴘 𐴎𐴝𐴕𐴖𐴝𐴌 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴝𐴣𐴊𐴤𐴠 𐴊𐴠 𐴀𐴥𐴠𐴕𐴒𐴡𐴌𐴥𐴞 𐴒𐴡𐴓𐴝𐴃𐴢 𐴁𐴝𐴣𐴊𐴤𐴞 𐴊𐴤𐴝𐴑𐴧𐴝 𐴔𐴝𐴌𐴞 𐴔𐴠𐴍𐴞𐴃𐴢 𐴉𐴥𐴠𐴓𐴥𐴝𐴘 𐴏𐴠𐴣𐴏𐴝𐴘 𐴏𐴠𐴣𐴏𐴝𐴘 𐴁𐴝𐴎𐴡𐴌𐴡 𐴁𐴝𐴀𐴝𐴌𐴠 𐴱 𐴔𐴝𐴙𐴕𐴐𐴤𐴡𐴌 𐴏𐴟𐴑𐴤𐴡𐴌 𐴀𐴝𐴓𐴒𐴗𐴝𐴓𐴡𐴃 𐴔𐴞𐴑𐴧𐴤𐴙𐴝 𐴒𐴡𐴌𐴥𐴞 𐴓𐴡𐴘 𐴎𐴝𐴘 𐴱 𐴔𐴡𐴒𐴢 𐴁𐴝𐴒𐴞𐴌 𐴔𐴡𐴕 𐴎𐴟𐴌𐴝 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴉𐴞𐴍𐴞 𐴁𐴝𐴙𐴅𐴧𐴝𐴘𐴢 𐴁𐴦𐴝𐴊𐴠 𐴱 𐴐𐴤𐴠𐴐𐴠 𐴒𐴟𐴓𐴞 𐴔𐴝𐴌𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴦𐴝𐴊𐴠 𐴓𐴡𐴒𐴢 𐴁𐴤𐴡𐴒𐴢 𐴀𐴥𐴝𐴣𐴎𐴡𐴙𐴕𐴧𐴝 𐴰 𐴳 : 𐴷 𐴇𐴥𐴝𐴣𐴃 𐴁𐴝𐴎𐴠 𐴃𐴞𐴌𐴥𐴞𐴐𐴢 𐴔𐴞𐴓𐴥𐴡𐴄𐴡𐴃 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴋𐴝𐴑𐴄𐴡𐴌 𐴅𐴟𐴕𐴝𐴙𐴊𐴡𐴌 𐴔𐴡𐴌𐴝 𐴓𐴝𐴐𐴢 𐴱 𐴀𐴥𐴞𐴁𐴤𐴝𐴌 𐴒𐴤𐴡𐴌𐴒𐴟𐴐𐴧𐴞𐴌𐴥𐴠 𐴒𐴡𐴏𐴥𐴝𐴘 𐴊𐴞𐴘𐴧𐴠 𐴔𐴡𐴕𐴃𐴡𐴌 𐴀𐴥𐴞𐴁𐴤𐴝𐴌 𐴁𐴡𐴖 𐴉𐴟𐴖𐴝𐴙𐴕 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴈𐴡𐴕𐴥𐴞𐴑𐴧𐴤𐴙𐴝 𐴌𐴥𐴠 𐴀𐴝𐴓𐴡𐴑 𐴒𐴡𐴌𐴥𐴞 𐴏𐴝𐴘𐴃𐴤𐴡 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴔𐴟𐴀𐴟𐴕𐴃𐴟 𐴒𐴟𐴏𐴥𐴡𐴓 𐴊𐴞𐴘𐴧𐴝𐴌 𐴱 𐴀𐴥𐴠 𐴀𐴡𐴑𐴃𐴤𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴈𐴝𐴁𐴡𐴏𐴢 𐴀𐴥𐴑𐴧𐴤𐴝𐴕 𐴓𐴠𐴑𐴤𐴞 𐴀𐴥𐴞𐴁𐴤𐴝𐴌 𐴁𐴡𐴖𐴧𐴡𐴌 𐴈𐴝𐴣𐴏𐴥𐴠 𐴏𐴥𐴝𐴀𐴝𐴙𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴉𐴡𐴣𐴀𐴡𐴏𐴝𐴘 𐴊𐴞𐴘𐴧𐴥𐴠 𐴱𐴱

𐴈𐴝𐴁𐴡𐴏𐴢 𐴘𐴥𐴝𐴀𐴝𐴕𐴡𐴃 𐴓𐴠𐴙𐴑𐴧𐴤𐴙𐴠𐴊𐴠 𐴀𐴝𐴣𐴀𐴝𐴌 𐴎𐴝𐴔𐴝𐴘𐴢 𐴋𐴝𐴑𐴄𐴡𐴌 𐴅𐴟𐴕𐴝𐴙𐴊𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴝𐴙𐴅𐴧𐴤𐴙𐴠𐴊𐴠 𐴕𐴡𐴀𐴡 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴉𐴠 𐴔𐴝𐴙𐴅𐴧𐴤𐴙𐴠𐴊𐴠 𐴱 𐴉𐴡𐴄𐴤𐴟 𐴃𐴟𐴓𐴥𐴞 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴀𐴝𐴌 𐴁𐴞𐴋𐴞𐴘𐴟 𐴁𐴝𐴕𐴝𐴘 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴉𐴥𐴟𐴣𐴖𐴥𐴝𐴣𐴃𐴞 𐴉𐴥𐴟𐴣𐴖𐴥𐴝𐴣𐴝𐴃𐴞 𐴓𐴝𐴒𐴞 𐴃𐴤𐴝𐴙𐴑𐴧𐴤𐴙𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠 𐴱 𐴁𐴦𐴝𐴊𐴠 𐴈𐴝𐴁𐴡𐴏𐴡𐴃 𐴁𐴡𐴖𐴧𐴥𐴡𐴌 𐴀𐴥𐴝𐴃𐴝 𐴏𐴥𐴝𐴀𐴝𐴙𐴕 𐴒𐴡𐴌𐴥𐴝𐴘𐴢 𐴓𐴡𐴘𐴢 𐴔𐴡𐴒𐴢 𐴁𐴝𐴒𐴞 𐴉𐴥𐴟𐴣𐴖𐴥𐴝𐴣𐴃𐴞 𐴃𐴤𐴝𐴑𐴤𐴞 𐴅𐴡𐴕𐴝𐴎𐴝 𐴉𐴡𐴌𐴥𐴝𐴘𐴢 𐴊𐴡𐴉𐴥𐴡𐴕 𐴒𐴡𐴌𐴥𐴝𐴘𐴢 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴱 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴡𐴌 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : FRT