𐴔𐴡𐴚𐴋𐴤𐴟𐴃 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕 𐴀𐴠𐴓𐴝𐴑𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴡𐴔𐴝𐴕𐴥𐴟𐴐𐴤𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴱𐴱

𐴔𐴡𐴚𐴋𐴤𐴟𐴃𐴢 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴔𐴝𐴎𐴤𐴠 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘 𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴱 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴎𐴝𐴔𐴁𐴡𐴙𐴕𐴧𐴝 𐴉𐴝𐴌𐴝𐴃 𐴀𐴝𐴀𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴀𐴡𐴔𐴝𐴕𐴥𐴟𐴐𐴤𐴞 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴊𐴟𐴘𐴢 𐴎𐴡𐴕𐴡𐴌𐴥𐴠 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴘𐴢 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴀𐴡𐴔𐴝𐴕𐴥𐴟𐴐𐴞 𐴔𐴝𐴌𐴝 𐴔𐴝𐴙𐴅𐴧𐴤𐴙𐴠 𐴱 𐴎𐴠 𐴔𐴝𐴙𐴌𐴡𐴌 𐴎𐴡𐴌𐴞𐴘𐴝 𐴀𐴥𐴞𐴃𐴤𐴝𐴌𐴥𐴝𐴌 𐴇𐴥𐴝𐴓𐴡𐴃 𐴔𐴡𐴌𐴠𐴕𐴠 𐴁𐴝𐴏𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴠 𐴊𐴟𐴕𐴥𐴞 𐴎𐴡𐴕 𐴀𐴥𐴡𐴙𐴓𐴊𐴠 𐴐𐴗𐴠 𐴎𐴤𐴝 𐴇𐴝𐴘𐴧𐴡𐴚 𐴈𐴥𐴝𐴓𐴞 𐴉𐴝𐴌𐴝𐴌 𐴁𐴤𐴝𐴐𐴤𐴞 𐴱 𐴀𐴠𐴑 𐴎𐴡𐴕𐴡𐴌 𐴕𐴝𐴔 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴀𐴥𐴞𐴁𐴤𐴝 𐴀𐴥𐴡𐴙𐴓𐴊𐴠
𐴔𐴟𐴇𐴝𐴔𐴧𐴡𐴊𐴢 𐴎𐴟𐴁𐴝𐴙𐴌 𐴁𐴝𐴉𐴢 𐴐𐴤𐴡𐴔𐴏𐴟𐴓𐴢 𐴇𐴥𐴡𐴑 𐴱 𐴀𐴡𐴙𐴕𐴧𐴡 𐴉𐴝𐴌𐴝𐴃𐴧𐴤𐴟 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴈𐴥𐴝𐴕𐴥𐴝 𐴉𐴞𐴕𐴝 𐴓𐴡𐴘 𐴁𐴠𐴐𐴤𐴞 𐴊𐴟𐴑𐴧𐴤𐴡𐴃 𐴀𐴝𐴏𐴥𐴠𐴊𐴠 𐴀𐴥𐴞𐴏𐴝𐴉𐴠 𐴱 𐴉𐴟𐴃𐴢 𐴎𐴤𐴞𐴘𐴧𐴝𐴙𐴕𐴊𐴤𐴡𐴌 𐴓𐴧𐴝 𐴑𐴠𐴏𐴧𐴥𐴟 𐴈𐴥𐴝𐴕𐴥𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴊𐴟𐴕𐴥𐴞 𐴎𐴡𐴕 𐴔𐴞𐴓𐴞 𐴎𐴝𐴔𐴁𐴡𐴙𐴕𐴧𐴝𐴌 𐴋𐴤𐴝𐴑𐴤𐴠 𐴀𐴝𐴏𐴥𐴠𐴊𐴠 𐴏𐴠𐴕 𐴓𐴗𐴝𐴚 𐴈𐴥𐴝𐴓𐴡𐴃 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴧𐴥𐴠𐴊𐴠 𐴇𐴥𐴠𐴕𐴃𐴟 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴈𐴥𐴝𐴓𐴡𐴌 𐴔𐴟𐴌𐴡𐴃𐴧𐴤𐴟 𐴓𐴡𐴃𐴞 𐴎𐴞𐴘𐴥𐴝𐴕 𐴉𐴝𐴘𐴧𐴥𐴠 𐴘𐴥𐴝𐴀𐴝𐴕 𐴓𐴡𐴘 𐴔𐴝𐴌𐴞 𐴔𐴝𐴌𐴞 𐴑𐴟𐴓𐴡𐴃 𐴃𐴟𐴙𐴓𐴧𐴥𐴙𐴠 𐴱 𐴁𐴦𐴝𐴊𐴠 𐴈𐴦𐴡𐴌 𐴏𐴟𐴖𐴡𐴌 𐴑𐴤𐴟𐴣𐴖𐴝𐴛 𐴉𐴥𐴠𐴓𐴥𐴝𐴘 𐴁𐴡𐴕𐴋𐴟𐴑𐴡𐴌 𐴁𐴝𐴀𐴝𐴄 𐴓𐴡𐴘 𐴀𐴝𐴌 𐴓𐴝𐴃𐴤𐴞 𐴒𐴤𐴟𐴐𐴤𐴝 𐴎𐴠𐴀𐴠𐴕 𐴔𐴝𐴌𐴞 𐴉𐴝𐴙𐴅𐴧𐴤𐴙𐴠 𐴱 𐴐𐴤𐴠𐴐𐴠 𐴊𐴦𐴡 𐴓𐴡𐴘 𐴑𐴟𐴉𐴝𐴘𐴧𐴥𐴠 𐴁𐴡𐴓𐴞 𐴘𐴥𐴡 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴊𐴟𐴕𐴥𐴞 𐴎𐴡𐴕𐴡𐴌 𐴊𐴝𐴃𐴢 𐴀𐴝𐴌 𐴇𐴥𐴝𐴃𐴢 𐴀𐴝𐴌 𐴄𐴤𐴠𐴚𐴢 𐴀𐴝𐴌 𐴉𐴞𐴍𐴥𐴡𐴌 𐴊𐴝𐴣𐴌𐴝 𐴁𐴤𐴝𐴚𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱𐴱

𐴀𐴠𐴈𐴥𐴡𐴕 𐴔𐴡𐴚𐴋𐴤𐴟𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴈𐴥𐴝𐴏𐴢 𐴒𐴡𐴌𐴥𐴞 𐴉𐴡𐴌𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴈𐴥𐴡𐴌𐴝𐴁𐴢 𐴁𐴡𐴓𐴞 𐴔𐴡𐴚𐴋𐴤𐴟𐴃𐴧𐴢 𐴉𐴡𐴌𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱 𐴉𐴡𐴌𐴁𐴤𐴝𐴐𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴕𐴞𐴎𐴡𐴌 𐴒𐴤𐴡𐴌𐴡𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴦𐴠𐴓𐴝𐴘 𐴀𐴝𐴕𐴥𐴞𐴁𐴤𐴝𐴌 𐴐𐴤𐴡𐴣𐴀𐴡𐴃 𐴒𐴦𐴝𐴃 𐴀𐴝𐴏𐴥𐴠𐴊𐴠 𐴈𐴦𐴡𐴌 𐴒𐴤𐴞𐴕 𐴁𐴦𐴝𐴊𐴠 𐴀𐴝𐴌 𐴑𐴠𐴙𐴏𐴧𐴥𐴟 𐴓𐴡𐴘𐴃𐴡 𐴕𐴥𐴡 𐴊𐴠𐴀𐴠 𐴱 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴤𐴡𐴚𐴡𐴌 𐴓𐴝𐴌𐴥𐴝𐴘𐴌 𐴔𐴡𐴘𐴊𐴝𐴕𐴡𐴃𐴧𐴤𐴟 𐴱 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴁𐴝𐴀𐴝𐴌𐴠 𐴀𐴝𐴏𐴥𐴠𐴊𐴠 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴱 𐴈𐴥𐴝𐴏𐴢 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴁𐴝𐴉𐴢 𐴁𐴤𐴝𐴘𐴢 𐴀𐴝𐴌 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴱 𐴔𐴡𐴏𐴞𐴁𐴡𐴃𐴡𐴌 𐴃𐴧𐴤𐴟𐴕 𐴁𐴝𐴏𐴝𐴘 𐴓𐴡𐴘𐴁𐴡𐴓𐴧𐴥𐴝 𐴀𐴝𐴌𐴡𐴎 𐴒𐴡𐴌𐴥𐴠𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : KMD Vlog 1