𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴀𐴝𐴙𐴑𐴧𐴙𐴝𐴁𐴡𐴌 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞 𐴓𐴝𐴌𐴥𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴌𐴥𐴠𐴌 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴀𐴝𐴙𐴑𐴧𐴙𐴝𐴁𐴢 𐴄𐴡𐴀𐴡𐴕 𐴐𐴤𐴡𐴣𐴀𐴡 𐴀𐴝𐴃𐴌𐴝𐴉𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞 𐴓𐴝𐴌𐴥𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴅𐴁𐴟𐴌 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴝𐴙𐴑𐴧𐴙𐴝𐴁 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴙𐴑𐴧𐴙𐴝𐴁𐴡𐴌 𐴁𐴝𐴀𐴝𐴌 𐴋𐴤𐴝𐴑𐴤𐴡𐴌 𐴃𐴧𐴟 𐴎𐴠𐴈𐴥𐴡𐴕 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱 𐴃𐴡𐴀𐴡𐴘 𐴁𐴤𐴟𐴏𐴞𐴊𐴤𐴡𐴚 𐴀𐴝𐴌 𐴔𐴡𐴚𐴋𐴤𐴟𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴊𐴟𐴕𐴥𐴞 𐴋𐴝𐴀𐴝𐴘 𐴔𐴞𐴓𐴞 𐴉𐴥𐴟𐴌𐴥𐴝𐴘 𐴁𐴦𐴝𐴊𐴠 𐴱 𐴀𐴝𐴙𐴑𐴧𐴙𐴝𐴁𐴢 𐴄𐴡𐴀𐴡𐴕 𐴀𐴝𐴌 𐴀𐴝𐴃𐴌𐴝𐴉𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴘𐴥𐴡 𐴉𐴥𐴟𐴌𐴥𐴝𐴘 𐴉𐴥𐴠𐴓𐴥𐴝𐴘𐴁𐴤𐴝𐴌 𐴑𐴝𐴌𐴖𐴝𐴘 𐴐𐴤𐴟𐴌𐴟 𐴒𐴡𐴌𐴥𐴠𐴌 𐴊𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴡𐴒𐴤𐴡𐴏𐴄𐴢 𐴔𐴝𐴐𐴤𐴡𐴌 𐴱 𐴳 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴰 𐴱 𐴁𐴝𐴎𐴠 𐴀𐴝𐴙𐴑𐴧𐴙𐴝𐴁𐴡𐴃 𐴀𐴝𐴏𐴥𐴠𐴊𐴠 𐴔𐴠𐴓𐴠𐴄𐴠𐴌𐴞𐴌 𐴒𐴤𐴝𐴣𐴄𐴞 𐴔𐴠𐴕𐴏𐴞 𐴏𐴡𐴔𐴡𐴀𐴡𐴕𐴞 𐴱 𐴑𐴤𐴝 𐴓𐴥𐴝 𐴌𐴥𐴝 𐴰 𐴷 𐴲 𐴀𐴝𐴌 𐴋𐴤𐴝 𐴑𐴤𐴝 𐴏𐴥𐴝 𐴀𐴝𐴌 𐴔𐴦𐴡 𐴏𐴞 𐴛𐴝 𐴏𐴝𐴙𐴌 𐴎𐴝𐴒𐴝 𐴀𐴞𐴀𐴞𐴕𐴡𐴃 𐴱 𐴔𐴟𐴏𐴥𐴡𐴓𐴔𐴝𐴕 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴌 𐴎𐴞𐴔𐴧𐴝𐴊𐴝𐴌 𐴱 𐴌𐴝𐴀𐴞𐴔 𐴔𐴥𐴟 𐴀𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴞𐴄𐴤𐴞𐴚𐴡𐴃 𐴔𐴝𐴃𐴝𐴘 𐴱 𐴈𐴥𐴝𐴔𐴝 𐴈𐴥𐴝 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃 𐴀𐴟𐴉𐴡𐴎𐴟𐴑𐴃𐴡 𐴅𐴟𐴖𐴝𐴕 𐴀𐴥𐴡𐴑𐴧𐴡𐴓 𐴒𐴤𐴝𐴣𐴄𐴞𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴀𐴥𐴞𐴃𐴤𐴝𐴌𐴥𐴝 𐴌𐴥𐴠 𐴀𐴥𐴝𐴣𐴃𐴞𐴘𐴝𐴌 𐴊𐴞𐴘𐴧𐴝 𐴎𐴝𐴘𐴁𐴡 𐴱 𐴃𐴡𐴕𐴈𐴥𐴝 𐴊𐴞𐴘𐴧𐴝 𐴎𐴝𐴘𐴁𐴡 𐴱 𐴓𐴝𐴌𐴥𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴊𐴠 𐴘𐴥𐴝𐴀𐴝𐴕 𐴁𐴦𐴝𐴊𐴠 𐴱 𐴀𐴝𐴙𐴑𐴧𐴙𐴝𐴁 𐴐𐴤𐴡𐴀𐴡𐴌 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃 𐴀𐴥𐴡𐴘𐴁𐴡𐴊𐴠 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴓𐴝𐴌𐴥𐴝𐴘 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡𐴊𐴠 𐴁𐴡𐴓𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕 𐴀𐴥𐴟𐴀𐴟𐴕𐴡𐴌 𐴃𐴡𐴑𐴧𐴝 𐴁𐴝𐴌𐴥𐴝𐴘 𐴊𐴞𐴘𐴧𐴝 𐴎𐴝𐴁𐴡 𐴉𐴞𐴏𐴃𐴡𐴓 𐴀𐴥𐴡𐴑𐴧𐴡𐴓 𐴊𐴞𐴘𐴧𐴝 𐴎𐴝𐴘𐴁𐴡 𐴱 𐴀𐴝𐴌 𐴓𐴝𐴌𐴥𐴝𐴘𐴃𐴢 𐴔𐴡𐴌𐴞 𐴎𐴝𐴘𐴁𐴡 𐴒𐴤𐴡𐴘𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴈𐴡𐴕𐴥𐴡 𐴎𐴞𐴔𐴧𐴝 𐴀𐴝𐴣𐴀𐴝𐴌𐴝 𐴓𐴡𐴘 𐴕𐴡 𐴉𐴝𐴌𐴥𐴞𐴘𐴟𐴔 𐴁𐴡𐴓𐴞 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴀𐴝𐴙𐴑𐴧𐴙𐴝𐴁𐴢 𐴐𐴤𐴡𐴀𐴡𐴌 𐴐𐴤𐴡𐴣𐴀𐴡 𐴀𐴝𐴃𐴌𐴝𐴉𐴡𐴃 𐴉𐴥𐴝𐴛𐴏𐴧𐴝 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴑𐴤𐴟𐴌𐴝𐴉𐴠 𐴕𐴡 𐴑𐴟𐴓𐴡𐴕𐴡𐴌 𐴎𐴡𐴌𐴞𐴘𐴝 𐴖𐴦𐴝𐴙𐴆𐴧𐴙𐴝 𐴃𐴤𐴝𐴑𐴤𐴝 𐴉𐴡𐴌𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴔𐴠𐴓𐴠𐴄𐴌𐴞 𐴑𐴡𐴗𐴕𐴏𐴞𐴌 𐴈𐴡𐴃𐴤𐴝 𐴀𐴞𐴀𐴞𐴕𐴠 𐴱 𐴔𐴟𐴏𐴥𐴡𐴓𐴔𐴝𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴏𐴞𐴕𐴃𐴝 𐴀𐴝𐴌 𐴀𐴡𐴐𐴤𐴝𐴕𐴃𐴞𐴃𐴢 𐴉𐴥𐴠𐴓𐴥𐴝𐴘 𐴊𐴞𐴘𐴧𐴥𐴠 𐴁𐴡𐴓𐴞 𐴱 𐴀𐴝𐴙𐴑𐴧𐴙𐴝𐴁𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : ABN news