𐴎𐴞𐴘𐴥𐴡𐴓𐴡𐴌 𐴔𐴞𐴘𐴝𐴊𐴢 𐴉𐴥𐴟𐴌𐴥𐴝𐴘 𐴁𐴦𐴝𐴊𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴓𐴝𐴒𐴝𐴃𐴝𐴌 𐴎𐴞𐴘𐴥𐴡𐴓𐴡𐴃 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱𐴱

𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴔𐴞𐴘𐴥𐴡𐴚 𐴔𐴞𐴘𐴥𐴝 𐴎𐴞𐴘𐴥𐴡𐴓𐴡𐴃𐴧𐴤𐴟 𐴔𐴞𐴘𐴝𐴊𐴢 𐴉𐴥𐴟𐴌𐴥𐴝𐴘 𐴀𐴝𐴎𐴝𐴊𐴢 𐴀𐴥𐴡𐴘𐴧𐴝 𐴰 𐴲 𐴱 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴇𐴙𐴚𐴒𐴙𐴝 𐴀𐴝𐴌 𐴔𐴡𐴒𐴧𐴤𐴗𐴥𐴠 𐴋𐴞𐴐𐴄𐴤𐴞𐴑𐴡𐴌 𐴏𐴡𐴘𐴥𐴝 𐴎𐴞𐴘𐴥𐴡𐴓𐴡𐴃𐴧𐴟 𐴔𐴞𐴘𐴝𐴊𐴢 𐴉𐴥𐴟𐴌𐴥𐴝𐴘 𐴀𐴝𐴎𐴝𐴊𐴢 𐴀𐴥𐴡𐴘𐴧𐴥𐴝 𐴰 𐴳 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴏𐴝𐴙𐴌𐴢 𐴱 𐴉𐴝𐴣𐴏𐴢 𐴱 𐴏𐴥𐴡 𐴔𐴝𐴐𐴢 𐴉𐴟𐴌𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴟𐴊𐴧𐴝 𐴱 𐴀𐴝𐴌𐴑𐴝𐴕𐴡𐴃 𐴁𐴠𐴐𐴤𐴞 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴏𐴥𐴡𐴁𐴡𐴁𐴢 𐴊𐴠𐴈𐴥𐴝𐴘 𐴕𐴞𐴎𐴡𐴌 𐴎𐴝𐴒𐴝𐴃 𐴉𐴡𐴣𐴀𐴡𐴏𐴝𐴘 𐴕𐴡 𐴊𐴞𐴀𐴞 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴓𐴝𐴃𐴧𐴤𐴝𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴞𐴘𐴥𐴡𐴚 𐴔𐴞𐴘𐴥𐴝 𐴎𐴞𐴘𐴥𐴡𐴓𐴡𐴃𐴧𐴤𐴟 𐴴 𐴲 𐴰 𐴲 𐴐𐴤𐴡𐴕 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴓𐴡𐴃𐴞 𐴱𐴀𐴠𐴑 𐴐𐴤𐴡𐴃 𐴎𐴡𐴕𐴡𐴌 𐴖𐴡𐴌𐴠 𐴓𐴡𐴃𐴞 𐴔𐴞𐴘𐴝𐴊𐴢 𐴉𐴥𐴟𐴌𐴥𐴝𐴘 𐴀𐴠𐴌𐴞 𐴊𐴞𐴀𐴞𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴱 𐴃𐴞𐴕 𐴓𐴡𐴔𐴁𐴤𐴡𐴌 𐴀𐴝𐴏𐴧𐴡𐴚𐴡𐴌 𐴏𐴥𐴡 𐴓𐴡𐴔𐴁𐴤𐴡𐴌 𐴑𐴝𐴔𐴌𐴥𐴝𐴃𐴢 𐴀𐴝𐴌 𐴏𐴝𐴙𐴌 𐴓𐴡𐴔𐴁𐴤𐴡𐴌 𐴀𐴝𐴏𐴧𐴡𐴚𐴡𐴌 𐴇𐴥𐴝𐴣𐴃𐴢 𐴓𐴡𐴔𐴁𐴤𐴡𐴌 𐴑𐴝𐴔𐴌𐴥𐴝𐴃𐴢 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴎𐴞𐴘𐴥𐴡𐴓𐴡𐴃 𐴃𐴤𐴝𐴑𐴤𐴝𐴌 𐴀𐴝𐴁𐴡𐴏𐴃𐴤𐴝𐴃 𐴱 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴁𐴡𐴌𐴝𐴁𐴡𐴌 𐴏𐴥𐴡𐴀𐴞𐴔𐴡𐴃𐴠 𐴕𐴡 𐴉𐴡𐴀𐴡𐴕𐴠 𐴱 𐴊𐴝𐴁𐴝𐴘 𐴀𐴡𐴐𐴤𐴟𐴃𐴢 𐴀𐴥𐴡 𐴄𐴝𐴙𐴔 𐴔𐴡𐴎𐴞𐴕 𐴕𐴡 𐴉𐴡𐴀𐴡𐴕𐴠 𐴀𐴝𐴌 𐴎𐴞𐴘𐴥𐴡𐴓𐴢 𐴈𐴥𐴝𐴕𐴥𐴝𐴌 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴥𐴟𐴔 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴱 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴃 𐴊𐴟𐴘 𐴎𐴡𐴕 𐴀𐴝𐴌 𐴅𐴟𐴕 𐴔𐴝𐴐𐴤𐴡𐴃 𐴊𐴟𐴘 𐴎𐴡𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴐𐴤𐴝𐴀𐴝𐴙𐴅𐴧𐴤𐴡 𐴔𐴡𐴊𐴡𐴊 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕 𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴠𐴐𐴢 𐴏𐴥𐴡𐴉𐴝𐴘 𐴕𐴝𐴔 𐴊𐴞𐴀𐴞 𐴅𐴠𐴕𐴟𐴏𐴥𐴝𐴙𐴋 𐴒𐴡𐴙𐴅𐴧𐴤𐴞𐴀𐴞𐴓𐴊𐴠 𐴀𐴥𐴠𐴕𐴃𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴱 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁𐴢 𐴀𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴀𐴝𐴌 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴤𐴡𐴌𐴡𐴌 𐴀𐴝𐴘 𐴋𐴞 𐴂𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴤𐴡𐴙𐴕𐴧𐴝 𐴀𐴝𐴌 𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴤𐴡𐴚𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴱 𐴏𐴡𐴓𐴝 𐴉𐴥𐴞𐴌𐴥𐴝 𐴀𐴝𐴌 𐴈𐴥𐴝𐴕𐴥𐴝 𐴉𐴞𐴕𐴝 𐴓𐴡𐴘 𐴊𐴟𐴑 𐴉𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴊𐴠𐴐𐴢 𐴀𐴝𐴌 𐴑𐴠𐴀𐴠𐴔 𐴃𐴞𐴘𐴝𐴒𐴢 𐴒𐴡𐴌𐴥𐴞 𐴃𐴤𐴝𐴘𐴓𐴠𐴕 𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴡𐴓𐴧𐴥𐴝 𐴕𐴦𐴠𐴙𐴓𐴧𐴥𐴙𐴠𐴊𐴠 𐴉𐴡𐴣𐴃𐴤𐴡𐴃 𐴱 𐴒𐴡𐴃𐴡 𐴁𐴡𐴏𐴥𐴡𐴌 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 𐴀𐴝𐴌 𐴔𐴡𐴒𐴧𐴤𐴗𐴥𐴠 𐴋𐴞𐴐𐴄𐴤𐴞𐴑𐴡𐴃 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RFAburmese