𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴤𐴡𐴌𐴥𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴇𐴥𐴝𐴔𐴊𐴤𐴡𐴌𐴊𐴞𐴌 𐴔𐴟𐴃𐴦𐴝𐴓𐴧𐴠𐴑 𐴏𐴥𐴡𐴚𐴑𐴡𐴄𐴡𐴌𐴥𐴠 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴃𐴧𐴟 𐴒𐴤𐴡𐴓𐴞 𐴇𐴥𐴡𐴓 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴱𐴱

𐴀𐴝𐴌𐴑𐴝𐴕𐴡𐴃 𐴎𐴠𐴃𐴤𐴡 𐴀𐴠𐴃𐴤𐴡 𐴈𐴥𐴡𐴌𐴝𐴁𐴢 𐴀𐴥𐴟𐴀𐴥𐴝𐴃 𐴀𐴝𐴏𐴥𐴠𐴊𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴇𐴥𐴝𐴔𐴊𐴤𐴡𐴌𐴊𐴞𐴌 𐴔𐴟𐴃𐴦𐴝𐴓𐴧𐴠𐴑 𐴏𐴥𐴡𐴚𐴑𐴡𐴄𐴡𐴌𐴥𐴠 𐴱 𐴁𐴠𐴐𐴤𐴞 𐴈𐴥𐴝𐴌𐴥𐴝 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴃𐴧𐴟 𐴒𐴤𐴡𐴓𐴞 𐴇𐴥𐴡𐴓 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴱 𐴓𐴡𐴕𐴋𐴤𐴡𐴕𐴡𐴃 𐴃𐴤𐴝𐴑𐴤𐴠𐴊𐴠 𐴁𐴡𐴌𐴡𐴑 𐴃𐴡𐴕𐴎𐴞𐴔𐴠 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴀𐴝𐴌𐴎 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴔𐴝𐴎𐴤𐴠 𐴏𐴡𐴓𐴠𐴌 𐴊𐴧𐴠 𐴉𐴥𐴡𐴏𐴦𐴝𐴊𐴡𐴌 𐴀𐴝𐴒𐴤𐴝𐴃 𐴱 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴁𐴝𐴉𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴉𐴡𐴌𐴠𐴌 𐴱 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 𐴁𐴡𐴊𐴧𐴝𐴐𐴢 𐴒𐴡𐴌𐴥𐴝 𐴉𐴡𐴌𐴠𐴌 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴀𐴝𐴌𐴑𐴝𐴕 𐴁𐴤𐴝𐴐𐴞 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴥𐴡𐴀𐴡𐴌𐴊𐴧𐴠 𐴎𐴟𐴓𐴥𐴟𐴔 𐴁𐴡𐴕 𐴒𐴡𐴌𐴥𐴞 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴤𐴡𐴓𐴧𐴝 𐴔𐴡𐴊𐴡𐴃 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴃𐴡𐴌𐴝 𐴃𐴡𐴌𐴞 𐴉𐴡𐴣𐴀𐴡𐴏𐴝𐴘 𐴁𐴤𐴝𐴌 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕 𐴎𐴡𐴌𐴟𐴌𐴞 𐴀𐴥𐴡𐴘𐴧𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠 𐴱 𐴒𐴡𐴃𐴡 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴀𐴝𐴃𐴡𐴚𐴁𐴝𐴊𐴞 𐴀𐴥𐴡𐴑𐴧𐴡𐴓𐴡𐴌 𐴎𐴟𐴓𐴥𐴟𐴔𐴡𐴃𐴧𐴤𐴟𐴕 𐴁𐴝𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴱 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴁𐴡𐴓𐴧𐴥𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴝𐴀𐴝𐴙𐴕 𐴱 𐴁𐴠𐴍𐴞𐴀𐴝𐴙𐴕 𐴱 𐴉𐴟𐴖𐴝𐴙𐴕 𐴔𐴞𐴓𐴝𐴘 𐴰 𐴰 𐴲 𐴎𐴡𐴕 𐴓𐴡𐴃𐴞 𐴄𐴝𐴓𐴡𐴃 𐴔𐴝𐴌𐴞𐴉𐴥𐴠𐴓𐴥𐴝𐴘𐴧𐴠 𐴱𐴱

𐴘𐴥𐴝𐴀𐴝𐴌 𐴀𐴝𐴒𐴠 𐴔𐴠 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃 𐴁𐴤𐴟𐴏𐴞𐴊𐴤𐴡𐴚𐴡𐴃 𐴀𐴥𐴡𐴘𐴧𐴠𐴊𐴠 𐴀𐴝𐴃𐴡𐴚𐴁𐴝𐴊𐴞 𐴇𐴥𐴝𐴔𐴓𐴝𐴃 𐴔𐴝𐴎𐴤𐴠 𐴘𐴥𐴡 𐴱 𐴊𐴟𐴘 𐴎𐴝𐴒𐴝 𐴔𐴞𐴓𐴝𐴘 𐴰 𐴰 𐴵 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴤𐴝𐴑 𐴎𐴤𐴝𐴑 𐴔𐴝𐴌𐴠𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌 𐴎𐴞𐴔𐴧𐴝𐴊𐴝𐴌 𐴱 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴔𐴟𐴑 𐴅𐴟𐴁𐴝𐴕𐴞 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌𐴑𐴝𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝 𐴀𐴝𐴌 𐴁𐴞𐴉𐴡𐴊𐴡𐴃 𐴀𐴥𐴡𐴀𐴡𐴕𐴡𐴌 𐴖𐴡𐴌𐴠 𐴊𐴠𐴐𐴢 𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓 𐴀𐴝𐴣𐴊𐴤𐴝 𐴁𐴡𐴕𐴞 𐴃𐴤𐴝𐴑𐴤𐴞 𐴕𐴡 𐴉𐴝𐴌𐴞𐴁𐴤𐴡 𐴱𐴱

𐴀𐴝𐴌 𐴏𐴥𐴡𐴚𐴑𐴡𐴄 𐴘𐴝𐴀𐴝𐴕 𐴀𐴝𐴃𐴤𐴞𐴑𐴧𐴤𐴙𐴝 𐴀𐴥𐴡𐴘𐴧𐴠𐴊𐴠 𐴕𐴡𐴀𐴡 𐴱 𐴎𐴝𐴕𐴝𐴞 𐴉𐴥𐴟𐴕𐴞 𐴔𐴡𐴑𐴏𐴥𐴡𐴊 𐴓𐴡𐴘 𐴂𐴡𐴌𐴟𐴒𐴠𐴌𐴝𐴔𐴡𐴌 𐴀𐴝𐴕𐴋𐴤𐴝𐴌𐴠 𐴀𐴥𐴡𐴘𐴧𐴠𐴊𐴠 𐴱 𐴀𐴞𐴀𐴞𐴕𐴡𐴌𐴥𐴠 𐴁𐴡𐴕 𐴒𐴡𐴌𐴥𐴝𐴁𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴌𐴝𐴉𐴡𐴃𐴧𐴝 𐴊𐴞𐴘𐴝 𐴀𐴝𐴌 𐴏𐴥𐴡𐴣𐴀𐴡𐴓𐴝 𐴀𐴝𐴌 𐴎𐴡𐴌𐴟𐴌𐴞 𐴔𐴡𐴊𐴡𐴃 𐴓𐴝𐴒𐴠𐴌 𐴀𐴥𐴞𐴃𐴤𐴝𐴌𐴥𐴝𐴌 𐴈𐴝𐴣𐴏𐴥𐴠 𐴔𐴡𐴊𐴡𐴃 𐴉𐴡𐴣𐴀𐴡𐴏𐴝 𐴁𐴠𐴐𐴤𐴞 𐴊𐴡𐴌𐴈𐴝𐴌 𐴀𐴥𐴡𐴘𐴧𐴠 𐴱 𐴀𐴞𐴀𐴞𐴕𐴡𐴌𐴥𐴠 𐴌𐴟𐴑𐴤𐴠𐴌 𐴊𐴧𐴠 𐴀𐴝𐴌 𐴁𐴝𐴊𐴤𐴝 𐴊𐴠𐴀𐴠𐴌 𐴊𐴧𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴊𐴠𐴐𐴢 𐴁𐴡𐴘𐴊𐴠𐴐𐴤𐴡𐴃𐴧𐴟 𐴔𐴞𐴓𐴞 𐴉𐴡𐴖𐴌𐴥𐴞 𐴃𐴡𐴖𐴌𐴠 𐴏𐴥𐴝𐴎𐴝 𐴊𐴡𐴀𐴞𐴁𐴝𐴌 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕 𐴁𐴠𐴐𐴤𐴞 𐴎𐴡𐴌𐴟𐴌𐴞 𐴁𐴡𐴓𐴞 𐴁𐴡𐴌𐴡𐴑 𐴃𐴡𐴕𐴎𐴞𐴔𐴡𐴌 𐴀𐴥𐴟𐴑𐴧𐴝𐴄𐴝 𐴄𐴤𐴟𐴕 𐴑𐴞𐴚𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

Sources : AEN