𐴁𐴝𐴚𐴓𐴝𐴊𐴠𐴐𐴤𐴡𐴌 𐴃𐴦𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃𐴠 𐴌𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴥𐴞𐴃𐴤𐴞𐴕 𐴀𐴝𐴁𐴧𐴝𐴌 𐴕𐴡 𐴒𐴡𐴏𐴥𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴀𐴠𐴑 𐴔𐴡𐴓𐴞𐴘𐴥𐴟𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴏𐴥𐴠𐴊𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴱 𐴁𐴡𐴌𐴔𐴥𐴝𐴃𐴧𐴟 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴵 𐴴 𐴁𐴡𐴏𐴥𐴡𐴌𐴅𐴧𐴙𐴝 𐴔𐴟𐴏𐴃𐴡𐴉𐴝 𐴑𐴡𐴔𐴝𐴓 𐴀𐴥𐴡 𐴀𐴝𐴏𐴥𐴠 𐴱 𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴔𐴡𐴚𐴋𐴤𐴟𐴃 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴱 𐴁𐴠𐴐𐴤𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴔𐴡𐴙𐴅𐴧𐴤𐴙𐴠𐴊𐴠 𐴄𐴝𐴓𐴡𐴃 𐴱 𐴔𐴟𐴏𐴃𐴡𐴉𐴝 𐴑𐴡𐴔𐴝𐴓 𐴀𐴥𐴡 𐴕𐴞𐴎𐴡𐴌 𐴒𐴤𐴡𐴌 𐴒𐴟𐴐𐴧𐴞 𐴓𐴡𐴘 𐴄𐴝𐴓𐴡𐴃 𐴀𐴝𐴐𐴧𐴤𐴞𐴓𐴊𐴠 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱𐴱

𐴎𐴠 𐴕𐴞𐴎𐴡𐴌 𐴏𐴟𐴑𐴤𐴠 𐴋𐴡𐴌𐴟𐴕𐴡𐴌 𐴁𐴟𐴔 𐴌𐴟𐴇𐴝𐴙𐴚𐴒𐴙𐴝𐴌 𐴄𐴝𐴓𐴡𐴌 𐴖𐴡𐴌𐴠 𐴑𐴠𐴀𐴠𐴕 𐴒𐴡𐴌𐴥𐴞 𐴉𐴡𐴙𐴅𐴧𐴤𐴙𐴠𐴊𐴠 𐴱 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕 𐴱 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴱 𐴁𐴠𐴍𐴝𐴀𐴝𐴙𐴕 𐴁𐴠𐴍𐴞𐴀𐴝𐴙𐴕 𐴱 𐴑𐴠𐴀𐴠𐴕 𐴒𐴡𐴌𐴥𐴞 𐴊𐴤𐴡𐴌𐴉𐴡𐴌𐴥𐴝𐴘 𐴊𐴤𐴡𐴌𐴉𐴡𐴌𐴥𐴝𐴘 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴱 𐴑𐴞𐴘𐴝𐴔𐴡𐴃𐴡𐴌 𐴕𐴡𐴔𐴟𐴕𐴝 𐴊𐴠𐴙𐴑𐴧𐴤𐴙𐴠 𐴱 𐴀𐴝𐴓𐴧𐴝𐴇𐴢 𐴃𐴝𐴀𐴝𐴓𐴝 𐴘𐴠 𐴇𐴥𐴝𐴘𐴝𐴃 𐴌𐴝𐴙𐴑𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴁𐴤𐴝𐴙𐴒𐴧𐴙𐴡 𐴘𐴠 𐴔𐴡𐴌𐴝𐴌 𐴄𐴝𐴓𐴡𐴃𐴧𐴤𐴟 𐴁𐴝𐴏𐴞 𐴱 𐴐𐴤𐴡𐴣𐴍𐴡 𐴔𐴞𐴑𐴧𐴤𐴙𐴝 𐴋𐴞𐴘𐴝 𐴀𐴟𐴒𐴧𐴤𐴗𐴝𐴃 𐴎𐴝𐴘 𐴓𐴟𐴖𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴇𐴥𐴝𐴓𐴡𐴃 𐴱 𐴘𐴥𐴝𐴀𐴝𐴕𐴃𐴟 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴇𐴥𐴝𐴣𐴏𐴟𐴌𐴞 𐴑𐴠𐴀𐴠𐴕 𐴒𐴡𐴌𐴥𐴞 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴙𐴐𐴧𐴤𐴙𐴠𐴊𐴠 𐴁𐴡𐴓𐴞 𐴱 𐴌𐴗𐴠𐴄𐴝 𐴈𐴥𐴡𐴁𐴡𐴌 𐴀𐴡𐴓𐴝 𐴌𐴥𐴠 𐴔𐴟𐴏𐴃𐴡𐴉𐴝 𐴑𐴡𐴔𐴝𐴓𐴠 𐴔𐴟𐴑 𐴎𐴟𐴁𐴝𐴕𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴥𐴠 𐴱𐴱

𐴀𐴠𐴈𐴥𐴡𐴕 𐴁𐴝𐴚𐴓𐴝𐴊𐴠𐴐𐴤𐴡𐴃 𐴕𐴟𐴖𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴈𐴡 𐴎𐴡𐴕 𐴀𐴝𐴙𐴐𐴧𐴤𐴙𐴠𐴊𐴠 𐴈𐴥𐴝𐴄𐴞 𐴁𐴤𐴝𐴉𐴠 𐴒𐴡𐴕𐴝 𐴕𐴥𐴝𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃 𐴒𐴡𐴌𐴥𐴠𐴊𐴠 𐴀𐴠𐴔 𐴀𐴠𐴏𐴢 𐴀𐴠𐴉𐴢 𐴃𐴡𐴕𐴎𐴞𐴔𐴠 𐴒𐴡𐴃𐴡 𐴑𐴠𐴙𐴏𐴧𐴥𐴟 𐴊𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴋𐴡𐴌𐴟𐴕 𐴁𐴟𐴔 𐴐𐴤𐴡𐴣𐴀𐴡 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌𐴡𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴀𐴝𐴒𐴤𐴝𐴃 𐴉𐴝𐴘𐴧𐴝 𐴴 𐴵 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴀𐴠𐴓𐴝𐴅 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴔𐴝𐴙𐴕𐴐𐴤𐴡𐴌 𐴁𐴤𐴟𐴃𐴤𐴡𐴌𐴠 𐴐𐴤𐴡𐴃𐴑𐴝𐴌𐴝 ٪ 𐴰 𐴴 𐴎𐴡𐴕 𐴓𐴡𐴃𐴞 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴝𐴌 𐴁𐴠𐴍𐴞𐴀𐴝𐴙𐴕 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱 𐴌𐴗𐴠𐴄𐴝𐴌𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴰 𐴴 𐴇𐴥𐴝𐴎𐴝𐴌 𐴀𐴥𐴡𐴘𐴃𐴠 𐴰 𐴵 𐴇𐴥𐴝𐴎𐴝𐴌 𐴓𐴡𐴃𐴞 𐴕𐴟𐴖𐴝 𐴌𐴞𐴉𐴟𐴎𐴞 𐴀𐴝𐴙𐴐𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴕𐴃𐴡𐴌 𐴈𐴥𐴝𐴄𐴞 𐴒𐴡𐴕𐴝 𐴎𐴝𐴕𐴞𐴁𐴤𐴡𐴓𐴧𐴝 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 𐴓𐴡𐴘 𐴎𐴟𐴑𐴝 𐴎𐴟𐴑 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 𐴏𐴥𐴡𐴀𐴞 𐴒𐴡𐴕𐴝 𐴎𐴝𐴕𐴞 𐴕𐴥𐴡 𐴉𐴝𐴌𐴠 𐴁𐴡𐴓𐴞 𐴘𐴥𐴡 𐴌𐴗𐴠𐴄𐴝 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

Sources : RFA burmese