𐴊𐴡𐴙𐴅𐴧𐴙𐴝𐴃 𐴱 𐴈𐴥𐴝𐴓𐴡𐴃 𐴱 𐴑𐴟𐴓𐴡𐴃 𐴌𐴟𐴇𐴝𐴙𐴚𐴒𐴙𐴝𐴌 𐴓𐴝𐴐𐴢 𐴄𐴝𐴓 𐴄𐴝𐴓 𐴉𐴡𐴣𐴏𐴠𐴌 𐴊𐴧𐴠 𐴁𐴤𐴝𐴐𐴠𐴌 𐴊𐴧𐴠 𐴀𐴥𐴠𐴕𐴃𐴟 𐴔𐴡𐴒𐴢 𐴁𐴝𐴒𐴞 𐴀𐴝𐴌 , 𐴘𐴟 𐴀𐴠𐴓 𐴀𐴠 𐴱 𐴘𐴠 𐴏𐴟𐴑 𐴈𐴥𐴝𐴍𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴌 𐴌𐴥𐴠𐴑𐴧𐴤𐴗𐴝 𐴲 𐴀𐴝𐴓𐴞 𐴉𐴝𐴌𐴝 𐴀𐴝𐴌 𐴔𐴡𐴚𐴕𐴞 𐴉𐴝𐴌𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴰 𐴵 𐴎𐴡𐴕 𐴓𐴡𐴃𐴞 𐴱 𐴀𐴡𐴒𐴤𐴏𐴄 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴊𐴟𐴘𐴧𐴥𐴝𐴕 𐴁𐴟𐴄 𐴓𐴡𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘𐴁𐴤𐴝𐴌 𐴏𐴠𐴐𐴃𐴝 𐴒𐴡𐴌𐴥𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴌𐴟𐴕 𐴓𐴡𐴘 𐴁𐴟𐴄𐴢 𐴄𐴤𐴞𐴑𐴤𐴞 𐴁𐴟𐴔 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴁𐴟𐴄 𐴋𐴟𐴉𐴥𐴞 𐴎𐴡𐴀𐴡𐴕𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕 𐴔𐴡𐴌𐴞 𐴒𐴞𐴘𐴥𐴡𐴘 𐴱 𐴐𐴤𐴟𐴊𐴠 𐴴 𐴎𐴡𐴕 𐴉𐴡𐴌𐴝𐴕𐴠 𐴁𐴝𐴏𐴞 𐴑𐴟𐴓𐴡𐴃 𐴀𐴝𐴀𐴝𐴘 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴁𐴠𐴐𐴤𐴞 𐴔𐴝𐴙𐴕𐴐𐴤𐴙𐴠 𐴏𐴞𐴕𐴥𐴠𐴊𐴠 / 𐴔𐴝𐴐𐴄𐴡𐴌 𐴀𐴥𐴟 𐴔𐴟𐴇𐴝𐴔𐴧𐴡𐴊 𐴏𐴡𐴓𐴞𐴔𐴡𐴌 𐴒𐴤𐴡𐴒𐴟𐴐𐴧𐴞 𐴵 𐴎𐴡𐴕 𐴀𐴝𐴌 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴡𐴌 𐴁𐴝𐴎𐴝𐴌𐴡𐴌 𐴀𐴠𐴕𐴝𐴔 𐴀𐴠𐴏𐴄𐴦𐴟𐴌𐴥𐴡𐴌 𐴒𐴞𐴌𐴥𐴡𐴏𐴢 / 𐴇𐴝𐴅𐴞 𐴇𐴥𐴝𐴏𐴡𐴕 𐴕𐴝𐴃𐴞 𐴉𐴟𐴃𐴞 𐴐𐴤𐴡𐴣𐴀𐴡 𐴰 𐴱 𐴎𐴡𐴕 𐴀𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴔𐴡𐴚𐴕𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘𐴁𐴤𐴡𐴓𐴧𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝 𐴈𐴝𐴣𐴏𐴝 𐴏𐴠𐴐𐴃𐴝 𐴒𐴡𐴌𐴥𐴠𐴌 𐴊𐴧𐴠 𐴱 𐴐𐴤𐴡𐴃 𐴐𐴤𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴎𐴞𐴀𐴞𐴕𐴡𐴌 𐴋𐴡𐴌𐴠 𐴊𐴤𐴝𐴘 𐴎𐴝𐴘𐴃𐴡 𐴏𐴝𐴀𐴝𐴌 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴞𐴀𐴞𐴕 𐴓𐴡𐴘 𐴔𐴝𐴌𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴠𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴃𐴧𐴟 𐴊𐴦𐴟𐴣𐴌𐴞 𐴊𐴤𐴝𐴘 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴒𐴤𐴝𐴙𐴓 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱 𐴀𐴝𐴌 𐴔𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴟𐴀𐴟𐴕 𐴃𐴤𐴡 𐴉𐴥𐴟𐴌𐴥𐴝𐴘 𐴎𐴝𐴀𐴝𐴌 𐴒𐴤𐴡𐴘 𐴱 𐴒𐴤𐴝𐴙𐴓 𐴀𐴥𐴡𐴘 𐴇𐴥𐴝𐴃 𐴁𐴤𐴝𐴚𐴝 𐴄𐴤𐴠𐴚 𐴁𐴤𐴝𐴚𐴝 𐴒𐴦𐴝𐴌 𐴎𐴡𐴈𐴥𐴡𐴔 𐴀𐴥𐴡𐴑𐴧𐴡𐴓 𐴓𐴡𐴘 𐴉𐴡𐴌𐴝𐴕𐴠 𐴓𐴡𐴌𐴈𐴥𐴡𐴌𐴥𐴝𐴌 𐴊𐴧𐴠 𐴀𐴥𐴞𐴃𐴤𐴝𐴌𐴥𐴝 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴀𐴠𐴓𐴝𐴅 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘 𐴀𐴡𐴉𐴥𐴡𐴌𐴝𐴊 𐴒𐴡𐴌𐴥𐴠𐴌 𐴊𐴧𐴠 𐴘𐴥𐴝𐴀𐴝𐴕𐴡𐴃𐴧𐴤𐴟 𐴀𐴝𐴣𐴊𐴤𐴝 𐴁𐴡𐴕𐴞 𐴑𐴞𐴘𐴥𐴝 𐴃𐴤𐴝𐴙𐴑𐴧𐴤𐴙𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕 𐴔𐴡𐴚𐴋𐴤𐴟𐴃 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃 𐴓𐴡𐴘 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴡𐴙𐴃𐴧𐴡 𐴊𐴞𐴕 𐴁𐴠𐴈𐴡𐴏𐴦𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴌 𐴊𐴧𐴠 𐴘𐴥𐴝𐴀𐴝𐴕 𐴏𐴝𐴓𐴟 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴝𐴕𐴝𐴃 𐴀𐴝𐴏𐴥𐴠 𐴱 𐴎𐴝𐴕𐴞 𐴉𐴥𐴟𐴕𐴥𐴞 𐴏𐴝𐴀𐴝𐴘 𐴏𐴞𐴃𐴞 𐴅𐴞𐴕𐴞𐴁𐴝 𐴑𐴡𐴕𐴁𐴤𐴠𐴕 𐴐𐴤𐴠𐴕𐴡𐴌 𐴏𐴟𐴑𐴃𐴞 𐴕𐴡 𐴔𐴝𐴕𐴞 𐴁𐴠𐴌𐴟𐴊𐴧𐴤𐴞 𐴒𐴡𐴌𐴥𐴠𐴌 𐴊𐴧𐴠 𐴱 𐴔𐴡𐴒𐴢 𐴁𐴝𐴒𐴞 𐴌𐴥𐴠 𐴈𐴡𐴕𐴥𐴡 𐴑𐴞𐴘𐴥𐴠 𐴑𐴠𐴌𐴠𐴄𐴞 𐴏𐴥𐴝𐴙𐴎 𐴀𐴝𐴌 𐴕𐴞𐴕𐴊𐴝 𐴒𐴡𐴌𐴥𐴠𐴌 𐴊𐴧𐴠 𐴘𐴥𐴡 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 𐴱 𐴑𐴗𐴥𐴠 𐴑𐴝𐴙𐴚 𐴐𐴤𐴡𐴀𐴡𐴌𐴡𐴃 𐴓𐴝𐴌𐴥𐴝𐴘𐴌 𐴔𐴡𐴘𐴊𐴝𐴕 𐴕𐴥𐴡 𐴁𐴡𐴕𐴠𐴊𐴠 𐴌𐴥𐴠𐴑𐴧𐴤𐴗𐴝𐴃 𐴱 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴟𐴔𐴁𐴝𐴌𐴞 𐴒𐴡𐴌𐴥𐴡𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴃𐴡𐴌𐴝 𐴃𐴡𐴌𐴞 ( 𐴛𐴞𐴕𐴡𐴚 𐴔𐴡𐴇𐴝𐴔𐴥𐴞 ) 𐴋𐴝𐴀𐴝𐴘𐴧𐴠 𐴀𐴠𐴏𐴄𐴠𐴙𐴄𐴔𐴥𐴠𐴕 𐴕𐴦𐴠𐴓𐴝𐴘𐴧𐴠 𐴱 𐴀𐴠𐴕 𐴘𐴟 𐴅𐴞 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴊𐴠𐴐𐴤𐴡𐴙𐴃𐴧𐴝 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴘𐴥𐴡 𐴔𐴠𐴓𐴠𐴄𐴠𐴌𐴞 𐴘𐴠 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌𐴥𐴠 𐴕𐴞𐴕𐴊𐴝 𐴀𐴝𐴌 𐴑𐴠𐴌𐴠𐴄𐴞 𐴏𐴥𐴝𐴙𐴎 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴘𐴥𐴝𐴀𐴝𐴕𐴡𐴌 𐴁𐴡𐴊𐴡𐴓𐴝 𐴓𐴟𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴝𐴕 𐴕𐴝𐴔𐴝 𐴕𐴦𐴠𐴓𐴝𐴘𐴧𐴥𐴠 𐴱 𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴐𐴤𐴡𐴃 𐴐𐴤𐴡𐴃 𐴌𐴟𐴇𐴝𐴙𐴚𐴒𐴙𐴝 𐴔𐴝𐴌𐴞 𐴉𐴥𐴠𐴓𐴥𐴝𐴌 𐴊𐴧𐴠 𐴘𐴥𐴝𐴀𐴝𐴕𐴡𐴃 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓𐴠 𐴀𐴥𐴡𐴀𐴡𐴑 𐴘𐴝𐴃𐴤𐴡 𐴀𐴠𐴕𐴑𐴠𐴓𐴝𐴁𐴞 𐴉𐴝𐴄𐴞 𐴀𐴥𐴡𐴑𐴧𐴡𐴓𐴠 𐴀𐴥𐴡𐴀𐴡𐴑 𐴱 𐴁𐴠𐴒𐴧𐴤𐴟𐴕𐴠 𐴕𐴡 𐴎𐴝𐴕𐴥𐴠 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴁𐴤𐴠𐴐𐴢 𐴊𐴡𐴌𐴥𐴞 𐴃𐴤𐴝𐴙𐴑𐴧𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴐𐴗𐴠 𐴎𐴤𐴝𐴌 𐴒𐴤𐴟𐴕𐴥𐴝 𐴉𐴝𐴌𐴝𐴌 𐴀𐴥𐴝𐴣𐴎𐴞 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴒𐴤𐴡𐴌𐴒𐴟𐴐𐴧𐴞 𐴀𐴟𐴒𐴧𐴤𐴗𐴝𐴌 𐴉𐴟𐴖𐴝 𐴊𐴟𐴘 𐴎𐴡𐴕 𐴔𐴡𐴌𐴝 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃 𐴌𐴝𐴃𐴞𐴘𐴝 𐴀𐴥𐴝𐴣𐴎𐴞 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴗𐴠 𐴎𐴤𐴝 𐴉𐴝𐴌𐴝𐴌 𐴁𐴤𐴝𐴐𐴞 / 𐴀𐴥𐴟 𐴐𐴤𐴡𐴁𐴧𐴞𐴌 𐴀𐴥𐴝𐴇𐴔𐴡𐴊𐴡𐴌 𐴒𐴤𐴡𐴌𐴒𐴟𐴐𐴧𐴞𐴌 𐴁𐴤𐴟𐴃𐴤𐴡𐴌 𐴃𐴧𐴟 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴉𐴟𐴖𐴝 𐴊𐴟𐴘 𐴎𐴡𐴕 𐴔𐴡𐴌𐴝 𐴉𐴝𐴀𐴝 𐴒𐴞𐴘𐴥𐴠𐴊 𐴎𐴝𐴕𐴝 𐴒𐴞𐴘𐴥𐴠 𐴱 𐴁𐴠𐴐𐴤𐴞 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴞𐴁𐴤𐴝 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴞 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴢 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘𐴁𐴤𐴡𐴓𐴧𐴝 𐴱 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴐𐴤𐴡𐴣𐴀𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴄𐴤𐴞𐴑𐴤𐴞 𐴄𐴤𐴞𐴑𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴱 𐴎𐴠 𐴎𐴞𐴀𐴞𐴑𐴧𐴤𐴙𐴠 𐴉𐴝𐴘𐴧𐴥𐴠 𐴀𐴥𐴞𐴑𐴧𐴤𐴙𐴝 𐴊𐴤𐴝𐴘 𐴒𐴞𐴘𐴥𐴡𐴘𐴊𐴠 𐴀𐴥𐴠𐴍𐴠 𐴀𐴥𐴝𐴣𐴎𐴞 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴞𐴁𐴤𐴝𐴃 𐴁𐴠𐴒𐴧𐴤𐴟𐴕𐴠 𐴹 𐴎𐴡𐴕 𐴀𐴝𐴐𐴧𐴤𐴞𐴓 𐴀𐴥𐴠𐴃𐴧𐴟 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴁𐴟𐴙𐴃 𐴁𐴝𐴌𐴠 𐴉𐴟𐴖𐴝 𐴊𐴟𐴘 𐴎𐴡𐴕𐴡𐴌 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴥𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴞 𐴉𐴝𐴌𐴝𐴃 𐴀𐴝𐴌 𐴀𐴝𐴓𐴞 𐴉𐴝𐴌𐴝𐴃 𐴓𐴝𐴌𐴥𐴝𐴘 𐴁𐴠𐴐𐴤𐴞 𐴏𐴡𐴓𐴠𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴉𐴥𐴝𐴣𐴏𐴞 𐴔𐴡𐴚𐴋𐴤𐴟𐴃 𐴉𐴡𐴘𐴝𐴎𐴒𐴞𐴘𐴥𐴡𐴘 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴃𐴤𐴝𐴑𐴤𐴠𐴊𐴠 𐴉𐴡𐴘𐴝𐴎𐴞 𐴉𐴝𐴌𐴝 𐴀𐴝𐴌 𐴀𐴝𐴓𐴞 𐴉𐴝𐴌𐴝𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴊𐴡𐴌𐴥𐴡 𐴔𐴡𐴌𐴥𐴡 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴱 𐴉𐴝𐴌𐴝𐴌 𐴁𐴤𐴟𐴃𐴤𐴡𐴌𐴠 𐴓𐴝𐴌𐴥𐴝𐴘 𐴕𐴡 𐴏𐴡𐴓𐴞𐴓𐴥𐴠 𐴘𐴥𐴡 𐴔𐴡𐴕𐴃𐴡𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝𐴌 𐴐𐴤𐴞𐴔𐴝𐴃 𐴎𐴝𐴒𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝𐴌 𐴁𐴝𐴀𐴝𐴌𐴃𐴧𐴟 𐴃𐴤𐴝𐴑𐴤𐴞 𐴔𐴝𐴌𐴠𐴌 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴦𐴠𐴓𐴞 𐴎𐴡𐴀𐴡 𐴒𐴤𐴡𐴘 𐴈𐴡𐴘𐴓𐴥𐴠 𐴘𐴥𐴡 𐴔𐴡𐴕𐴃𐴡𐴌 𐴕𐴦𐴠𐴓𐴞𐴁𐴤𐴝𐴌 𐴌𐴝𐴏𐴃𐴝 𐴕𐴥𐴝𐴘 𐴱 𐴊𐴟𐴕𐴥𐴞 𐴋𐴝𐴀𐴝𐴘𐴧𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴐𐴤𐴣𐴍𐴡 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴓𐴡𐴘 𐴎𐴤𐴡𐴌 𐴉𐴡𐴌𐴠 𐴉𐴥𐴝𐴀𐴝𐴕 𐴔𐴝𐴌𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴕𐴦𐴠𐴓𐴞𐴓𐴥𐴠 𐴎𐴤𐴝𐴑 𐴎𐴤𐴝𐴑 𐴔𐴡𐴌𐴞 𐴎𐴝𐴘𐴁𐴡 𐴒𐴤𐴡𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴇𐴥𐴝𐴓𐴡𐴃 𐴀𐴥𐴡𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴁𐴞𐴌𐴞𐴄𐴠𐴕𐴡𐴃 𐴔𐴟𐴏𐴥𐴡𐴓𐴔𐴝𐴕𐴡𐴌 𐴁𐴠𐴌𐴟𐴊𐴧𐴤𐴠 𐴉𐴥𐴡𐴏𐴦𐴝𐴊𐴢 𐴱𐴱

𐴁𐴞𐴌𐴞𐴄𐴠𐴕𐴡𐴃 𐴔𐴟𐴏𐴥𐴡𐴓𐴔𐴝𐴕𐴡𐴌 𐴁𐴠𐴌𐴟𐴊𐴧𐴤𐴠 𐴉𐴥𐴞𐴃𐴞𐴕 𐴀𐴟𐴙𐴄𐴧𐴤𐴙𐴠𐴊𐴠 𐴉𐴥𐴡𐴏𐴦𐴝𐴊𐴡𐴌𐴥𐴠 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴊𐴡𐴔𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴁𐴤𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴱 𐴒𐴟𐴣𐴍𐴝 𐴊𐴠𐴐𐴤𐴡𐴃 𐴏𐴥𐴞𐴘𐴝𐴏𐴞 𐴉𐴝𐴕𐴥𐴝 𐴓𐴡𐴘𐴁𐴡𐴓𐴧𐴥𐴝 𐴊𐴡𐴌𐴈𐴥𐴝𐴏𐴢 𐴊𐴠𐴀𐴠𐴊𐴠 𐴀𐴡𐴉𐴥𐴞𐴏𐴢 𐴀𐴥𐴡𐴑𐴧𐴡𐴓𐴡𐴃 𐴀𐴝𐴌 𐴏𐴥𐴞𐴘𐴝𐴏𐴞 𐴉𐴝𐴕𐴥𐴝 𐴓𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴊𐴡𐴃 𐴒𐴡𐴌𐴥𐴡𐴙𐴕𐴧𐴝 𐴀𐴟𐴑𐴞𐴓 𐴀𐴥𐴡𐴑𐴧𐴡𐴓𐴡𐴌 𐴀𐴡𐴉𐴥𐴞𐴏𐴢 𐴀𐴥𐴡𐴑𐴧𐴡𐴓𐴡𐴃 𐴇𐴥𐴝𐴔𐴓𐴝 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴌𐴥𐴝𐴙𐴄 𐴖𐴥𐴞𐴕 𐴒𐴟𐴌𐴥𐴟𐴉𐴠 𐴊𐴤𐴡𐴔𐴑𐴞 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱