𐴔𐴡𐴚𐴋𐴤𐴟𐴃 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴁𐴤𐴡𐴓𐴧𐴝 𐴎𐴡𐴔𐴝 𐴀𐴥𐴡𐴘𐴧𐴠 𐴱 𐴁𐴝𐴚𐴓𐴝𐴊𐴠𐴐𐴤𐴠 𐴕𐴡 𐴒𐴡𐴏𐴥𐴠𐴌 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴃 𐴀𐴡𐴒𐴤𐴏𐴄 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴒𐴡𐴃𐴡 𐴌𐴝𐴙𐴃𐴧𐴝 𐴑𐴤𐴟𐴁 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴒𐴡𐴃𐴡 𐴴 𐴲 𐴒𐴤𐴡𐴕𐴄𐴤𐴝𐴌 𐴁𐴤𐴟𐴃𐴤𐴡𐴌𐴠 𐴰 𐴴 𐴎𐴡𐴕𐴡𐴌 𐴁𐴦𐴠𐴐𐴢 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴱 𐴔𐴟𐴀𐴟𐴔 𐴔𐴞𐴑𐴧𐴤𐴙𐴝 𐴀𐴝𐴌 𐴀𐴥𐴡 𐴁𐴦𐴠𐴐𐴢 𐴀𐴥𐴡𐴙𐴃𐴢 𐴉𐴝𐴌𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴒𐴟𐴣𐴍𐴝 𐴈𐴝𐴣𐴏𐴥𐴝 𐴈𐴝𐴣𐴏𐴥𐴞𐴌 𐴖𐴡𐴌𐴠 𐴱 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴱 𐴋𐴡𐴌𐴟𐴕 𐴱 𐴆𐴤𐴡𐴑 𐴔𐴞𐴎𐴦𐴝𐴙𐴓 𐴀𐴝𐴌 𐴀𐴥𐴡 𐴀𐴡𐴙𐴕𐴧𐴡 𐴀𐴥𐴝𐴣𐴃𐴞𐴘𐴝𐴌 𐴀𐴥𐴡𐴑𐴧𐴡𐴓 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴔𐴟𐴀𐴟𐴔 𐴔𐴞𐴑𐴧𐴤𐴙𐴝 𐴀𐴟𐴎𐴝𐴘 𐴀𐴝𐴘𐴧𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴡𐴌𐴠 𐴱 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴞 𐴏𐴟𐴑𐴤𐴠 𐴎𐴞𐴀𐴞𐴑𐴧𐴤𐴙𐴝 𐴊𐴠𐴙𐴑𐴧𐴤𐴙𐴠 𐴀𐴥𐴞𐴑𐴧𐴤𐴙𐴝 𐴕𐴦𐴠𐴓𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱 𐴎𐴝𐴕𐴡𐴌 𐴈𐴥𐴡𐴃𐴡𐴌𐴝𐴌 𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴝𐴘𐴁𐴝𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴠𐴁𐴤𐴡𐴓𐴧𐴝 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴉𐴡𐴏𐴥𐴞𐴔𐴥𐴠 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴄𐴝𐴓 𐴔𐴝𐴌𐴞 𐴎𐴡𐴔𐴝 𐴀𐴥𐴡𐴘 𐴃𐴤𐴝𐴙𐴑𐴧𐴤𐴙𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴟𐴄𐴢 𐴓𐴡𐴘 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴙𐴐𐴧𐴤𐴙𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴁𐴟𐴄 𐴱 𐴁𐴝𐴚𐴓𐴝𐴊𐴠𐴐𐴤𐴡𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴑𐴟𐴓𐴡𐴃 𐴁𐴤𐴞𐴌𐴥𐴝𐴘𐴃𐴡 𐴕𐴡 𐴊𐴞𐴀𐴞 𐴱 𐴖𐴝𐴉𐴠𐴏𐴢 𐴒𐴡𐴌𐴥𐴞 𐴊𐴞𐴘𐴥𐴠 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴎𐴡𐴔𐴝 𐴀𐴥𐴡𐴘 𐴃𐴤𐴝𐴙𐴑𐴧𐴤𐴙𐴠 𐴱 𐴀𐴝𐴌 𐴈𐴡𐴊𐴦𐴟𐴕 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴈𐴡𐴕𐴥𐴡 𐴏𐴥𐴝𐴀𐴝𐴌𐴝 𐴏𐴥𐴝𐴌𐴥𐴝 𐴁𐴡𐴕 𐴈𐴥𐴝𐴘 𐴉𐴥𐴝𐴣𐴏𐴞 𐴃𐴤𐴝𐴑𐴤𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴓𐴝𐴌𐴥𐴝𐴘𐴃𐴧𐴟 𐴐𐴤𐴡𐴌𐴞 𐴃𐴤𐴝𐴑𐴤𐴞𐴁𐴤𐴡𐴓𐴧𐴝 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴋𐴝𐴀𐴝𐴘 𐴀𐴟𐴒𐴧𐴤𐴗𐴝𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌𐴥𐴠 𐴉𐴟𐴌𐴝 𐴉𐴟𐴌𐴞 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑 𐴓𐴡𐴃𐴞 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴐𐴤𐴡𐴀𐴡𐴌 𐴁𐴤𐴝𐴐𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴡𐴏𐴥𐴡𐴓𐴞 𐴒𐴤𐴞𐴕 𐴀𐴝𐴌 𐴕𐴞𐴉𐴥𐴡𐴌𐴡𐴃 𐴓𐴡𐴘 𐴱 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴐𐴤𐴡𐴣𐴍𐴡 𐴀𐴥𐴝𐴣𐴃𐴞𐴘𐴝𐴌 𐴀𐴝𐴌 𐴋𐴡𐴌𐴟𐴕 𐴓𐴡𐴘 𐴔𐴝𐴌𐴞 𐴁𐴠𐴐𐴤𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴈𐴥𐴝𐴏𐴢 𐴒𐴡𐴌𐴥𐴞 𐴵 𐴃𐴝𐴌𐴥𐴞𐴑 𐴒𐴡𐴃𐴡 𐴌𐴝𐴙𐴃 𐴶 𐴃𐴝𐴌𐴥𐴞𐴑𐴡𐴃 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴎𐴡𐴔𐴝 𐴀𐴥𐴡𐴘 𐴃𐴤𐴝𐴑𐴧𐴤𐴞𐴀𐴞𐴓 𐴊𐴠 𐴰 𐴰 𐴲 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴁𐴠𐴐𐴤𐴞 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴝𐴐𐴤𐴡𐴌 𐴄𐴝𐴓 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟- 𐴁𐴝𐴚𐴓𐴝𐴊𐴠𐴐𐴢 𐴁𐴡𐴖𐴋𐴝𐴌 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃 𐴱 𐴁𐴝𐴚𐴓𐴝𐴊𐴠𐴐𐴢 𐴉𐴝𐴌𐴥𐴝𐴘 𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴠𐴀𐴠𐴕 𐴔𐴝𐴌𐴝 𐴔𐴝𐴙𐴅𐴧𐴤𐴙𐴠 𐴊𐴧𐴠 𐴱 𐴈𐴡𐴊𐴦𐴟𐴕 𐴔𐴡𐴙𐴅𐴧𐴤𐴙𐴠 𐴊𐴠 𐴒𐴡𐴕𐴞 𐴉𐴝𐴌𐴡𐴕 𐴀𐴥𐴟𐴊𐴧𐴝 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴁𐴟𐴄 𐴓𐴡𐴘 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴁𐴝𐴏𐴞 𐴉𐴝𐴙𐴅𐴧𐴤𐴙𐴠 𐴊𐴠 𐴁𐴠𐴐𐴤𐴞 𐴈𐴡𐴔 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴌𐴟𐴕 𐴓𐴡𐴘 𐴁𐴟𐴔 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴁𐴟𐴄 𐴋𐴟𐴉𐴥𐴞 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴘𐴥𐴡 𐴁𐴠𐴐𐴤𐴞 𐴀𐴝𐴏𐴥𐴠 𐴱 𐴕𐴝𐴉𐴢 𐴊𐴡𐴙𐴅𐴧𐴙𐴝𐴌 𐴀𐴝𐴒𐴝 𐴒𐴟𐴌𐴝 𐴌𐴟𐴇𐴝𐴙𐴚𐴒𐴙𐴝𐴌 𐴓𐴝𐴐𐴢 𐴁𐴤𐴝𐴐𐴠𐴌 𐴀𐴝𐴌 𐴑𐴟𐴓𐴡𐴌 𐴖𐴡𐴌𐴠 𐴔𐴝𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴀𐴥𐴠𐴕𐴋𐴞𐴓𐴧𐴝 𐴑𐴡𐴉𐴥𐴡𐴕 𐴊𐴡𐴉𐴥𐴡𐴕 𐴏𐴥𐴝𐴌𐴥𐴝 𐴃𐴤𐴝𐴑𐴤𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴐𐴤𐴝𐴘𐴒𐴡𐴌𐴡𐴃 𐴁𐴟𐴄 𐴋𐴟𐴉𐴥𐴞 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴱 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴔𐴡𐴗𐴃 , 𐴹 𐴎𐴡𐴕𐴡𐴌 𐴓𐴝𐴐𐴢 𐴃𐴟𐴖𐴝𐴘 𐴉𐴝𐴘𐴧𐴥𐴠 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴃 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴎𐴤𐴠 𐴏𐴡𐴓𐴠𐴌 𐴊𐴧𐴠 𐴓𐴝𐴌𐴥𐴝𐴘𐴃𐴧𐴟 𐴱 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴤𐴡𐴓𐴧𐴝 𐴊𐴤𐴝𐴘 𐴁𐴝𐴚𐴓𐴝𐴊𐴠𐴐𐴤𐴡𐴃 𐴀𐴝𐴘𐴧𐴥𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴝 𐴁𐴟𐴄 𐴀𐴠𐴑𐴧𐴤𐴝𐴕 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴓𐴡𐴒𐴢 𐴁𐴤𐴡𐴒𐴢 𐴲 𐴱 𐴁𐴝𐴎𐴠 𐴱 𐴄𐴠𐴑𐴕𐴝𐴉𐴢 𐴏𐴥𐴡𐴊𐴡𐴌 𐴘𐴟𐴕𐴞𐴘𐴡𐴕𐴡𐴌 𐴇𐴥𐴝𐴁𐴞𐴌 𐴏𐴥𐴡𐴌𐴥𐴝 𐴀𐴝𐴌 𐴌𐴝𐴎𐴝𐴌 𐴏𐴥𐴡𐴌𐴥𐴝 𐴀𐴠𐴓𐴝𐴑𐴝𐴌 𐴐𐴤𐴞𐴔𐴝𐴃 𐴋𐴟𐴉𐴥𐴞 𐴒𐴞𐴘𐴥𐴡𐴘 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴄𐴠𐴑𐴕𐴝𐴉𐴢 𐴐𐴤𐴝𐴘𐴒𐴡𐴌𐴡𐴃 𐴒𐴟𐴌𐴝 𐴉𐴟𐴖𐴝 𐴐𐴤𐴡𐴣𐴀𐴡 𐴹 𐴎𐴡𐴕𐴡𐴌 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴥𐴠 𐴱 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴒𐴟𐴌𐴝 𐴉𐴟𐴖𐴝 𐴐𐴤𐴡𐴣𐴀𐴡 𐴸 𐴎𐴡𐴕 𐴔𐴝𐴘𐴧𐴝 𐴀𐴠𐴑 𐴎𐴡𐴕 𐴔𐴡𐴌𐴡𐴃 𐴱 𐴀𐴝𐴌 𐴊𐴟𐴘 𐴎𐴡𐴕 𐴎𐴞𐴛𐴝𐴃𐴝 𐴃𐴟𐴓𐴥𐴞 𐴉𐴝𐴌𐴝 𐴒𐴞𐴘𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴁𐴟𐴄 𐴋𐴟𐴉𐴥𐴝 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕𐴡𐴃 𐴀𐴝𐴕𐴃𐴝𐴎𐴠 𐴀𐴝𐴌 𐴀𐴥𐴡 𐴲 𐴲 𐴎𐴡𐴕𐴡𐴌 𐴓𐴝𐴐𐴢 𐴉𐴝𐴀𐴝 𐴕𐴥𐴡 𐴎𐴝𐴀𐴝 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴁𐴝𐴚𐴓𐴝𐴊𐴠𐴐𐴤𐴡𐴃 𐴃𐴦𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃𐴡𐴌 𐴏𐴥𐴡𐴊𐴡𐴌 𐴀𐴥𐴞𐴏𐴝𐴉𐴠 𐴋𐴝𐴑𐴄𐴡𐴌 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴡𐴌 𐴕𐴝𐴔 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌 𐴀𐴟𐴎𐴞𐴌 𐴐𐴠𐴙𐴑 𐴇𐴥𐴝𐴏𐴞𐴕𐴝 𐴘𐴠 𐴁𐴡𐴌 𐴀𐴟𐴎𐴞𐴌𐴞 𐴈𐴝𐴔𐴡𐴃𐴧𐴤𐴟 𐴃𐴞𐴘𐴝𐴒𐴢 𐴕𐴝𐴔𐴝 𐴊𐴡𐴀𐴡𐴕𐴡𐴌 𐴁𐴦𐴝𐴊𐴠 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴵 𐴃𐴝𐴌𐴥𐴞𐴑𐴡𐴃 𐴁𐴝𐴚𐴓𐴝𐴊𐴠𐴐𐴤𐴌 𐴔𐴠𐴓𐴠𐴄𐴠𐴌𐴞𐴌 𐴁𐴡𐴌𐴡 𐴀𐴥𐴡𐴑𐴧𐴡𐴓𐴠 𐴃𐴦𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃 𐴁𐴝𐴕𐴝𐴘𐴧𐴥𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴝𐴕 𐴒𐴡𐴌𐴥𐴠𐴌 𐴊𐴧𐴠 𐴐𐴤𐴡𐴣𐴀𐴡𐴃 𐴱 𐴇𐴥𐴡𐴌𐴃𐴝𐴓𐴞 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝𐴙𐴕𐴊𐴤𐴠 𐴃𐴦𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃𐴡𐴌 𐴏𐴥𐴡𐴊𐴡𐴌 𐴀𐴥𐴞𐴏𐴝𐴉𐴠 𐴋𐴝𐴑𐴄𐴡𐴌 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴡𐴌 𐴕𐴝𐴔 𐴈𐴡𐴘𐴧𐴥𐴠 𐴱 𐴎𐴞𐴁𐴤𐴝 𐴶 𐴰 𐴰 𐴲 𐴐𐴤𐴡𐴕𐴡𐴃 𐴐𐴤𐴝𐴕𐴃𐴞𐴌 𐴕𐴡𐴁𐴠𐴓 𐴁𐴡𐴐𐴧𐴤𐴞𐴐𐴢 𐴉𐴝𐴀𐴝𐴙𐴓 𐴱 𐴀𐴝𐴌 𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴘𐴥𐴡 𐴃𐴦𐴡𐴙𐴃𐴧𐴝 𐴇𐴥𐴡𐴑𐴟𐴔𐴡𐴃𐴡𐴌 𐴏𐴥𐴡𐴊𐴡𐴌 𐴁𐴡𐴕𐴞𐴁𐴤𐴡 𐴁𐴡𐴓𐴞 𐴀𐴠𐴌𐴝𐴊𐴝 𐴎𐴝𐴇𐴥𐴠𐴌 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 ( 𐴊𐴞 𐴋𐴠𐴓𐴥𐴞 𐴀𐴠𐴏𐴄𐴤𐴝𐴌𐴡𐴌 ) 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱