𐴔𐴡𐴚𐴋𐴤𐴟𐴃 𐴓𐴝𐴌𐴥𐴝𐴘𐴌 𐴔𐴝𐴎𐴤𐴠 𐴉𐴥𐴝𐴣𐴏𐴞 𐴃𐴤𐴝𐴑𐴧𐴞𐴤𐴀𐴞𐴓𐴊𐴠 𐴔𐴡𐴚𐴕𐴞 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴱 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴑𐴠𐴙𐴏𐴧𐴥𐴟 𐴐𐴤𐴡𐴇𐴞𐴊𐴢 𐴑𐴠𐴙𐴏𐴧𐴥𐴟 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 𐴔𐴡𐴚𐴋𐴤𐴟𐴃 𐴓𐴝𐴌𐴥𐴝𐴘𐴌 𐴔𐴝𐴎𐴤𐴠 𐴉𐴥𐴝𐴣𐴏𐴞 𐴃𐴤𐴝𐴑𐴧𐴤𐴞𐴀𐴞𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴱 𐴔𐴡𐴚𐴕𐴞 𐴉𐴝𐴌𐴝𐴌 𐴉𐴡𐴏𐴥𐴞𐴔 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴥𐴡 𐴀𐴝𐴐𐴧𐴤𐴞𐴓 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴥𐴟𐴔 𐴀𐴝𐴌 𐴓𐴝𐴌𐴥𐴝𐴘𐴌 𐴀𐴡𐴐𐴤𐴝𐴕𐴃𐴞 𐴱 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴠𐴌 𐴊𐴧𐴠 𐴀𐴝𐴁𐴡𐴏𐴃𐴤𐴝𐴃 𐴱 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴏𐴞𐴌𐴞 𐴉𐴥𐴝𐴍𐴥𐴞 𐴑𐴠𐴙𐴏𐴧𐴥𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌 𐴔𐴞𐴑𐴧𐴤𐴙𐴝 𐴀𐴝𐴌 𐴑𐴠𐴙𐴏𐴧𐴥𐴟 𐴄𐴡𐴀𐴡𐴕𐴡𐴌 𐴁𐴝𐴀𐴝𐴌 𐴔𐴞𐴑𐴧𐴤𐴙𐴝 𐴱 𐴕𐴦𐴠𐴓𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴑𐴠𐴙𐴏𐴧𐴥𐴟 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴈𐴡𐴊𐴦𐴟𐴕 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴒𐴤𐴝𐴙𐴓 𐴀𐴝𐴌 𐴀𐴝𐴒𐴤𐴝𐴃 𐴉𐴝𐴘𐴧𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴁𐴦𐴠𐴐𐴢 𐴁𐴤𐴝𐴒𐴢 𐴰 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴡𐴌 𐴉𐴟𐴖𐴝𐴙𐴕 𐴱 𐴀𐴠𐴈𐴥𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌𐴥𐴠 𐴀𐴠𐴓𐴝𐴅 𐴒𐴡𐴌𐴥𐴞𐴁𐴤𐴝𐴌 𐴈𐴡𐴕𐴥𐴡 𐴑𐴞𐴏𐴥𐴡𐴔𐴡𐴌 𐴁𐴠𐴁𐴡𐴏𐴃𐴤𐴝 𐴀𐴥𐴡𐴘 𐴕𐴡 𐴉𐴝𐴌𐴥𐴡𐴕𐴠 𐴱 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴉𐴟𐴖𐴝𐴙𐴕𐴊𐴤𐴡𐴌 𐴎𐴝𐴕𐴡𐴌 𐴈𐴥𐴡𐴃𐴡𐴌𐴝𐴃 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴚𐴕𐴞 𐴉𐴝𐴌𐴝𐴌 𐴁𐴤𐴝𐴐𐴞𐴕𐴊𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌 𐴔𐴞𐴑𐴧𐴤𐴙𐴝 𐴒𐴤𐴙𐴡𐴓𐴧𐴙𐴠 𐴒𐴤𐴡𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴎𐴠 𐴎𐴞𐴀𐴞𐴑𐴧𐴤𐴙𐴝 𐴔𐴟𐴀𐴟𐴔 𐴊𐴞𐴘𐴥𐴠 𐴀𐴥𐴞𐴑𐴧𐴤𐴙𐴝 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴟𐴖𐴝𐴕𐴡𐴃 𐴐𐴤𐴞𐴚 𐴒𐴝𐴣𐴃 𐴑𐴟𐴣𐴌𐴥𐴞 𐴒𐴤𐴡𐴓𐴞 𐴔𐴝𐴓 𐴏𐴥𐴝𐴔𐴝𐴕 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴥𐴟𐴌𐴥𐴟 𐴔𐴥𐴝 𐴁𐴡𐴌 𐴁𐴝𐴎𐴝𐴌𐴡𐴃 𐴰 𐴰 𐴴 𐴏𐴝𐴙𐴌 𐴐𐴤𐴡𐴃𐴧𐴤𐴝𐴕𐴡𐴌 𐴖𐴡𐴌𐴠 𐴊𐴟𐴖𐴝𐴕 𐴀𐴝𐴏𐴥𐴠 𐴱 𐴁𐴡𐴌 𐴁𐴝𐴎𐴝𐴌𐴡𐴌 𐴘𐴥𐴝𐴀𐴝𐴕𐴡𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴀𐴝𐴏𐴥𐴠𐴊𐴠 𐴀𐴥𐴞𐴀𐴞𐴕 𐴁𐴠𐴒𐴧𐴤𐴞𐴕 𐴔𐴡𐴒𐴢 𐴉𐴝𐴌𐴝 𐴱 𐴎𐴤𐴡𐴌 𐴁𐴡𐴌𐴏𐴦𐴝𐴃 𐴐𐴤𐴟𐴌𐴟 𐴀𐴥𐴡𐴀𐴡𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴊𐴟𐴖𐴝𐴕𐴡𐴃 𐴐𐴤𐴞𐴚 𐴒𐴝𐴣𐴃𐴢 𐴊𐴞𐴘𐴝 𐴐𐴤𐴟𐴌𐴟 𐴀𐴥𐴡𐴘𐴧𐴠 𐴱 𐴁𐴡𐴌 𐴁𐴝𐴎𐴝𐴌𐴡𐴌 𐴊𐴟𐴖𐴝𐴕 𐴀𐴥𐴞𐴀𐴞𐴕 𐴁𐴠𐴒𐴧𐴤𐴞𐴕 𐴆𐴟𐴄𐴑𐴞 𐴔𐴝𐴓𐴡𐴌 𐴊𐴟𐴖𐴝𐴕 𐴀𐴝𐴌 𐴈𐴦𐴡𐴌𐴡𐴌 𐴊𐴟𐴖𐴝𐴕 𐴀𐴥𐴡𐴑𐴧𐴡𐴓 𐴱 𐴁𐴝𐴎𐴝𐴌 𐴘𐴥𐴝𐴀𐴝𐴕𐴡𐴃 𐴏𐴦𐴡𐴛𐴊𐴝𐴌 𐴀𐴥𐴡 𐴀𐴝𐴏𐴥𐴠 𐴱 𐴏𐴦𐴡𐴛𐴊𐴝𐴌 𐴃𐴤𐴝𐴑𐴤𐴞 𐴁𐴦𐴝𐴊𐴠 𐴘𐴥𐴡 𐴔𐴥𐴟𐴌𐴥𐴟 𐴔𐴥𐴝 𐴉𐴟𐴑 𐴌𐴥𐴠𐴑𐴧𐴤𐴗𐴝𐴱 𐴛𐴡𐴚 𐴁𐴝𐴚 𐴓𐴥𐴝 𐴉𐴝𐴌𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴊𐴟𐴖𐴝𐴕 𐴊𐴟𐴘 𐴘𐴥𐴝𐴕𐴡𐴃 𐴐𐴤𐴞𐴚 𐴒𐴝𐴣𐴃 𐴑𐴟𐴣𐴌𐴥𐴞 𐴒𐴤𐴡𐴙𐴓𐴧𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴥𐴞𐴀𐴞𐴕 𐴁𐴦𐴝𐴊𐴠 𐴒𐴤𐴡𐴍𐴞 𐴄𐴤𐴝𐴖𐴝𐴌𐴡𐴌 𐴋𐴤𐴝𐴑𐴤𐴠 𐴀𐴝𐴏𐴥𐴠𐴊𐴠 𐴈𐴥𐴝𐴘𐴁𐴤𐴝𐴌 𐴔𐴝𐴓𐴡𐴌 𐴊𐴟𐴖𐴝𐴕 𐴀𐴠𐴑𐴧𐴤𐴝𐴕𐴡𐴃 𐴐𐴤𐴞𐴚 𐴒𐴝𐴣𐴃 𐴑𐴟𐴣𐴌𐴥𐴞 𐴒𐴤𐴡𐴓𐴞 𐴰 𐴱 𐴓𐴝𐴑 𐴄𐴞𐴛𐴝𐴌 𐴓𐴡𐴃𐴞 𐴔𐴝𐴓 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴈𐴝𐴖𐴧𐴝𐴌 𐴁𐴞𐴓𐴡𐴃𐴧𐴤𐴟 𐴲 𐴱 𐴁𐴡𐴏𐴥𐴡𐴌𐴡𐴌 𐴖𐴡𐴌𐴡𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴅𐴡𐴔𐴦𐴝𐴃𐴡𐴌 𐴔𐴝𐴙𐴕𐴐𐴤𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴏𐴞𐴇𐴟 𐴆𐴤𐴗𐴠𐴕 𐴉𐴝𐴌𐴝𐴌 𐴀𐴝𐴂𐴧𐴝𐴙𐴚 𐴱 𐴁𐴝𐴒𐴧𐴤𐴟𐴕𐴥𐴝 𐴱 𐴇𐴥𐴝𐴁𐴞 𐴉𐴝𐴌𐴝 𐴱 𐴈𐴡𐴓𐴞𐴎𐴝 𐴉𐴝𐴌𐴝 𐴱 𐴉𐴝𐴌𐴝 𐴀𐴞𐴀𐴞𐴕𐴡𐴃𐴧𐴤𐴟 𐴓𐴝𐴌𐴥𐴝𐴘𐴌 𐴋𐴡𐴌𐴡𐴃𐴧𐴤𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴱 𐴈𐴝𐴖𐴧𐴝𐴌 𐴁𐴞𐴓𐴡𐴃 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴈𐴝𐴖𐴧𐴝𐴌 𐴁𐴞𐴓𐴡𐴌 𐴎𐴝𐴃𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴊𐴧𐴝 𐴔𐴞𐴓𐴝𐴘 𐴱 𐴒𐴡𐴃𐴡 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴲 𐴱 𐴁𐴡𐴏𐴥𐴡𐴌𐴡𐴌 𐴖𐴡𐴌𐴠 𐴰 𐴰 𐴳 𐴎𐴡𐴕𐴡𐴌𐴃𐴧𐴤𐴟 𐴁𐴤𐴝𐴌𐴥𐴡 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴀𐴞𐴓 𐴒𐴤𐴡𐴘 𐴊𐴠

𐴀𐴥𐴞𐴃𐴤𐴝𐴌𐴥𐴝 𐴌𐴥𐴠 𐴱 𐴈𐴝𐴖𐴧𐴝𐴌 𐴁𐴞𐴓𐴡𐴌 𐴀𐴞𐴐𐴑𐴟𐴓 𐴀𐴠𐴑𐴧𐴤𐴝𐴕𐴡𐴃 𐴁𐴤𐴝𐴃 𐴉𐴝𐴕𐴥𐴞 𐴕𐴡 𐴊𐴞𐴀𐴞 𐴅𐴟𐴅𐴟𐴑𐴡𐴃 𐴌𐴝𐴙𐴑𐴧𐴤𐴙𐴠 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴥𐴝𐴌 𐴀𐴝𐴌 𐴀𐴡𐴔𐴝𐴙𐴕𐴐𐴤𐴡𐴃𐴤𐴝𐴕𐴝 𐴔𐴝𐴌𐴝 𐴊𐴤𐴡𐴌𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴝𐴓𐴡𐴑 𐴀𐴝𐴓𐴡𐴑 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴞𐴐𐴑𐴟𐴙𐴓𐴧𐴝 𐴉𐴟𐴖𐴝 𐴲 𐴎𐴡𐴕 𐴐𐴤𐴡𐴇𐴞𐴊 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴲 𐴓𐴡𐴔𐴁𐴤𐴡𐴌 𐴔𐴥𐴟𐴌𐴥𐴟 𐴔𐴥𐴝 𐴌𐴥𐴠𐴑𐴧𐴤𐴗𐴝𐴌 𐴒𐴤𐴡𐴍𐴞 𐴄𐴤𐴝𐴖𐴝𐴌𐴡𐴌 𐴋𐴤𐴝𐴑𐴤𐴠 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴱 𐴁𐴝𐴎𐴠 𐴱 𐴔𐴥𐴟𐴌𐴥𐴟 𐴔𐴥𐴝 𐴑𐴝𐴛𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝𐴃 𐴃𐴤𐴝𐴑𐴤𐴠𐴊𐴠 𐴌𐴥𐴟𐴂𐴥𐴝 𐴁𐴠𐴋𐴤𐴝 𐴊𐴟𐴘𐴀𐴡𐴔 𐴁𐴡𐴏𐴥𐴡𐴌 𐴑𐴦𐴡𐴓𐴠𐴅𐴡𐴌 𐴉𐴟𐴖𐴝 𐴱 𐴀𐴝𐴕𐴏𐴝𐴌𐴟𐴓 𐴀𐴞𐴏𐴓𐴥𐴝𐴔 𐴁𐴝𐴉𐴢 𐴀𐴝𐴁𐴊𐴟𐴌 𐴌𐴡𐴇𐴥𐴞𐴔 𐴁𐴡𐴐𐴢 𐴱 𐴲 𐴁𐴡𐴏𐴥𐴡𐴌 , 𐴀𐴥𐴞𐴃𐴠 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴊𐴝𐴊𐴝𐴌 𐴒𐴤𐴡𐴌𐴡𐴃 𐴀𐴝𐴀𐴝𐴘 𐴃𐴤𐴝𐴑𐴤𐴠𐴊𐴠 𐴱 𐴉𐴟𐴖𐴝 𐴀𐴥𐴞𐴁𐴤𐴝𐴌𐴥𐴠 𐴁𐴡𐴌𐴔𐴥𐴝𐴌 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴱 𐴱 𐴁𐴝𐴎𐴠 𐴔𐴡𐴚𐴋𐴤𐴟𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴝𐴂𐴧𐴝𐴙𐴚 𐴀𐴝𐴓𐴞 𐴉𐴝𐴌𐴝𐴃 𐴃𐴤𐴝𐴑𐴤𐴠𐴊𐴠 𐴱 𐴀𐴞𐴏𐴔𐴝𐴀𐴞𐴓 𐴁𐴝𐴉𐴢 𐴀𐴞𐴁𐴌𐴝𐴇𐴦𐴞𐴔 𐴁𐴡𐴐𐴢 𐴸 𐴱 𐴁𐴡𐴏𐴥𐴡𐴌 𐴱 𐴎𐴞𐴁𐴤𐴝 𐴲 𐴱 𐴑𐴠𐴓𐴥𐴝𐴏𐴡𐴌 𐴀𐴠𐴔𐴃𐴦𐴝𐴕𐴡𐴃 𐴎𐴞𐴖𐴥𐴝 𐴁𐴠𐴋𐴤𐴝 𐴒𐴟𐴕𐴄𐴤𐴟 𐴓𐴡𐴘 𐴉𐴝𐴏𐴢 𐴀𐴥𐴡𐴘𐴧𐴠𐴊𐴠 𐴉𐴟𐴖𐴝 𐴱 𐴀𐴥𐴞𐴁𐴤𐴝𐴌𐴠 𐴔𐴡𐴚𐴕𐴞 𐴉𐴝𐴌𐴝𐴌 𐴀𐴥𐴠𐴋𐴤𐴝𐴑𐴤𐴡𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴓𐴝𐴃 𐴲 𐴱 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴱 𐴃𐴠𐴓 𐴀𐴝𐴁𐴞𐴁𐴡𐴃 𐴏𐴥𐴟𐴌𐴞𐴌 𐴇𐴥𐴝𐴔𐴓𐴝𐴃 𐴲 𐴎𐴡𐴕𐴡𐴌 𐴔𐴡𐴗𐴃 𐴱𐴱

𐴒𐴤𐴡𐴎𐴧𐴝𐴃 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴃 𐴱 𐴀𐴠𐴑𐴧𐴤𐴝𐴕 𐴋𐴝𐴑𐴄𐴡𐴌 𐴈𐴥𐴝𐴕𐴝𐴌 𐴒𐴤𐴞𐴌𐴝𐴌 𐴁𐴤𐴟𐴃𐴤𐴡𐴌𐴠 𐴄𐴝𐴔𐴁𐴟 𐴔𐴝𐴌𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴞𐴉𐴟𐴎𐴞 𐴴 𐴎𐴡𐴕 𐴐𐴤𐴡𐴣𐴀𐴡 𐴲 𐴱 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴃𐴠𐴓 𐴀𐴝𐴁𐴞𐴁𐴡𐴌 𐴀𐴝𐴃𐴌𐴝𐴉𐴡𐴃 𐴉𐴥𐴡𐴓𐴡𐴏𐴃𐴞𐴕𐴞 𐴀𐴠𐴑 𐴎𐴡𐴕𐴠 𐴏𐴥𐴟𐴌𐴞 𐴔𐴝𐴌𐴞 𐴲 𐴎𐴡𐴕 𐴀𐴞𐴏𐴌𐴦𐴝𐴙𐴓 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱