𐴋𐴝𐴓𐴝𐴓𐴡𐴌 𐴔𐴡𐴊𐴡𐴃 𐴓𐴡𐴘 𐴕𐴟𐴖𐴝 𐴁𐴤𐴝𐴉𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘𐴧𐴠 𐴱𐴱

𐴁𐴡𐴌𐴔𐴥𐴝𐴌 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴃𐴧𐴟 𐴋𐴝𐴓𐴝𐴓𐴡𐴌 𐴏𐴥𐴝𐴀𐴝𐴌𐴝 𐴓𐴡𐴘 𐴁𐴡𐴌𐴔𐴥𐴝 – 𐴁𐴝𐴚𐴓𐴝𐴊𐴠𐴐𐴢 𐴁𐴡𐴖𐴋𐴝𐴌𐴡𐴌 𐴈𐴡𐴀𐴠𐴑 𐴎𐴝𐴒𐴝 𐴁𐴝𐴀𐴝𐴘 𐴕𐴝𐴉𐴢 𐴊𐴡𐴙𐴅𐴧𐴙𐴝 𐴉𐴝𐴌𐴥𐴝𐴘 𐴱 𐴁𐴡𐴀𐴡𐴃 𐴌𐴟𐴇𐴝𐴙𐴚𐴒𐴙𐴝 𐴕𐴟𐴖𐴝 𐴁𐴤𐴝𐴉𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴒𐴤𐴡𐴙𐴓𐴧𐴙𐴠 𐴱 𐴀𐴝𐴌 𐴀𐴥𐴞𐴃𐴤𐴝𐴌𐴥𐴝 𐴀𐴟𐴑𐴤𐴞𐴘𐴝𐴌 𐴁𐴞𐴁𐴤𐴞𐴕𐴧𐴡 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃 𐴒𐴤𐴡𐴓𐴞 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴒𐴡𐴃𐴡 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃 𐴁𐴡𐴌𐴔𐴥𐴝𐴌 𐴀𐴥𐴠𐴑𐴟𐴓𐴃𐴟 𐴄𐴠𐴑𐴕𐴝𐴉𐴢 𐴁𐴝𐴀𐴝𐴘 𐴱 𐴋𐴝𐴓𐴝𐴓𐴡𐴌 𐴔𐴡𐴊𐴡𐴃 𐴓𐴡𐴘 𐴊𐴟𐴘 𐴒𐴤𐴡𐴌𐴒𐴟𐴐𐴧𐴞𐴌 𐴀𐴝𐴣𐴐𐴄𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴁𐴠𐴑𐴝𐴕𐴟𐴕𐴞 𐴃𐴡𐴖𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘 𐴀𐴟𐴑𐴤𐴞𐴘𐴝 𐴑𐴟𐴃𐴤𐴟𐴉𐴝𐴓𐴡𐴚 𐴱 𐴑𐴠𐴀𐴠𐴔 𐴲 𐴀𐴥𐴞𐴏𐴄 𐴀𐴞 𐴁𐴡𐴓𐴡𐴑𐴡𐴃 𐴱 𐴀𐴥𐴞𐴃𐴝𐴌𐴥𐴝𐴌 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞𐴌 𐴈𐴝𐴣𐴏𐴥𐴠 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴐𐴤𐴡𐴀𐴡𐴘 𐴕𐴡 𐴉𐴝𐴌𐴥𐴞 𐴉𐴡𐴌𐴝𐴕 𐴁𐴝𐴏𐴝𐴘𐴁𐴤𐴝𐴌 𐴕𐴞𐴘𐴡𐴃𐴠 𐴱 𐴁𐴡𐴌𐴔𐴥𐴝𐴌𐴃𐴧𐴟 𐴁𐴝𐴚𐴓𐴝𐴊𐴠𐴐𐴤𐴡𐴃 𐴕𐴟𐴖𐴝 𐴁𐴤𐴝𐴉𐴠 𐴉𐴝𐴌𐴥𐴝𐴘𐴧𐴠𐴊𐴠 𐴀𐴥𐴞𐴃𐴤𐴝𐴌𐴥𐴝 𐴀𐴥𐴡𐴙𐴓𐴊𐴠 𐴱 𐴉𐴝𐴃𐴠𐴔𐴝 𐴁𐴝𐴉𐴢 𐴈𐴝𐴓𐴝 𐴔𐴞𐴛𐴝 𐴁𐴡𐴐𐴢 𐴰 𐴶 𐴁𐴡𐴏𐴥𐴡𐴌 , 𐴌𐴠𐴇𐴥𐴠𐴕𐴝 𐴁𐴝𐴉𐴢 𐴏𐴟𐴓𐴝𐴘𐴔𐴦𐴝𐴕 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴕𐴟𐴌 𐴏𐴥𐴝𐴊𐴞𐴘𐴝 𐴁𐴝𐴉𐴢 𐴑𐴡𐴌𐴞𐴔𐴟𐴓𐴧𐴝𐴇𐴢 𐴁𐴡𐴐𐴢 𐴸 𐴁𐴡𐴏𐴥𐴡𐴌 , 𐴔𐴟𐴐𐴃𐴦𐴝𐴑 𐴁𐴝𐴉𐴢 𐴑𐴡𐴌𐴞𐴔𐴟𐴓𐴧𐴝𐴇𐴢 𐴁𐴡𐴐𐴢 𐴵 𐴁𐴡𐴏𐴥𐴡𐴌 , 𐴀𐴞𐴃𐴝𐴌𐴥𐴝 𐴀𐴟𐴑𐴤𐴞𐴘𐴝 𐴑𐴠𐴀𐴠𐴔 𐴀𐴞 𐴳 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑𐴡𐴃 𐴀𐴥𐴞𐴃𐴤𐴝𐴌𐴥𐴝𐴌 𐴀𐴠𐴒𐴠𐴕𐴝 𐴕𐴟𐴌 𐴕𐴝𐴇𐴦𐴝𐴌𐴡𐴌 𐴒𐴤𐴡𐴌𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴠𐴑𐴧𐴟𐴘 𐴑𐴠𐴀𐴠𐴔𐴡𐴌 𐴀𐴞 𐴁𐴡𐴓𐴡𐴑𐴡𐴃 𐴃𐴤𐴝𐴑𐴤𐴠𐴊𐴠 𐴀𐴝𐴏𐴔𐴝 𐴁𐴠𐴒𐴡𐴔𐴡𐴌 𐴒𐴤𐴡𐴌𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴠𐴊𐴠 𐴀𐴥𐴞𐴃𐴝𐴌𐴝 𐴀𐴥𐴡𐴙𐴓𐴊𐴠 𐴱 𐴕𐴠𐴏𐴦𐴝𐴌 𐴁𐴡𐴐𐴢 𐴰 𐴷 𐴁𐴡𐴏𐴥𐴡𐴌 , 𐴕𐴠𐴏𐴦𐴝𐴌𐴡𐴌 𐴁𐴡𐴖𐴢 𐴇𐴥𐴝𐴓𐴞𐴔𐴝 𐴈𐴝𐴃𐴤𐴟 𐴁𐴡𐴐𐴢 𐴰 𐴶 𐴁𐴡𐴏𐴥𐴡𐴌 , 𐴉𐴟𐴖𐴝 𐴀𐴠𐴕𐴦𐴝𐴔 𐴁𐴡𐴐𐴢 𐴰 𐴳 𐴁𐴡𐴏𐴥𐴡𐴌 , 𐴌𐴡𐴐𐴤𐴞𐴊 𐴁𐴡𐴐𐴢 𐴸 𐴱 𐴁𐴡𐴏𐴥𐴡𐴌 , 𐴱 𐴊𐴟𐴘 𐴒𐴤𐴡𐴌𐴒𐴟𐴐𐴧𐴤𐴞𐴌 𐴀𐴝𐴣𐴐𐴄𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴊𐴟𐴕𐴥𐴞 𐴋𐴝𐴀𐴝𐴘 𐴔𐴞𐴓𐴞 𐴳 𐴲 𐴰 𐴲 𐴕𐴡𐴖𐴡𐴔𐴁𐴡𐴌 𐴔𐴝𐴐𐴢 𐴀𐴥𐴡𐴃𐴠 𐴉𐴥𐴞𐴃𐴞𐴕 𐴕𐴟𐴖𐴝 𐴒𐴡𐴌𐴥𐴞 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴀𐴝𐴌 𐴀𐴡𐴃𐴧𐴞𐴏𐴝𐴌𐴡𐴌𐴃𐴧𐴤𐴟 𐴉𐴡𐴌𐴝𐴕 𐴁𐴝𐴏𐴝𐴘𐴁𐴤𐴡𐴓𐴧𐴝 𐴱 𐴉𐴡𐴌𐴝𐴕𐴡𐴌 𐴊𐴡𐴣𐴀𐴡𐴏𐴥𐴠 𐴔𐴟𐴌𐴝 𐴉𐴠𐴌𐴝 𐴉𐴥𐴝𐴍𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌𐴥𐴝𐴘𐴧𐴠𐴊𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴌 𐴐𐴤𐴡𐴀𐴡𐴌 𐴃𐴞𐴕𐴧𐴥𐴝𐴕𐴡𐴃 𐴉𐴝𐴕𐴥𐴞𐴁𐴝𐴕𐴡𐴌 𐴋𐴡𐴌 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕𐴌 𐴐𐴤𐴡𐴀𐴡𐴌 𐴱 𐴔𐴡𐴌𐴥𐴡𐴑 𐴀𐴥𐴟 𐴱 𐴆𐴙𐴡𐴑 𐴄𐴡 𐴱 𐴔𐴥𐴝𐴔 𐴁𐴡𐴌𐴥𐴝 𐴱 𐴎𐴝𐴒𐴝 𐴀𐴞𐴀𐴞𐴕𐴡𐴃 𐴓𐴝𐴒𐴝𐴃𐴝𐴌 𐴀𐴡𐴎𐴞𐴌𐴝𐴕𐴞 𐴎𐴤𐴡𐴌 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴓𐴥𐴠 𐴔𐴥𐴟 𐴌𐴥𐴟 𐴈𐴥𐴝𐴓 𐴀𐴝𐴌 𐴑𐴟𐴓𐴝 𐴋𐴠𐴕 𐴈𐴥𐴝𐴓𐴡𐴌 𐴉𐴝𐴕𐴥𐴞 𐴁𐴝𐴌𐴥𐴞 𐴎𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴐𐴤𐴡𐴀𐴡𐴌𐴡𐴌 𐴕𐴞𐴏𐴡 𐴕𐴞𐴏𐴡 𐴌𐴥𐴠𐴑𐴧𐴤𐴗𐴝 𐴀𐴝𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃 𐴱 𐴎𐴞𐴀𐴞𐴕 𐴊𐴟𐴕𐴥𐴞 𐴈𐴥𐴝𐴓𐴡𐴌 𐴈𐴝𐴣𐴏𐴝 𐴓𐴡𐴘 𐴀𐴝𐴏𐴥𐴠 𐴀𐴥𐴞𐴀𐴞𐴕𐴡𐴃 𐴉𐴝𐴕𐴥𐴞𐴌 𐴋𐴡𐴌 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴌𐴠𐴕𐴒𐴟𐴕 – 𐴀𐴝𐴙𐴑𐴧𐴙𐴝𐴁 𐴒𐴝𐴌𐴥𐴞𐴌 𐴌𐴝𐴏𐴧𐴝 𐴘𐴥𐴡 𐴁𐴠𐴐𐴤𐴞 𐴎𐴝𐴒𐴝𐴌𐴃𐴧𐴤𐴟 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘 𐴁𐴡𐴓𐴞 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱 𐴉𐴝𐴕𐴥𐴞 𐴁𐴦𐴠𐴐𐴢 𐴀𐴥𐴡𐴘𐴧𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴔𐴝𐴙𐴕𐴐𐴤𐴡𐴌𐴥𐴠 𐴓𐴝𐴌𐴞 𐴌𐴝𐴑𐴤𐴝 𐴒𐴞𐴘𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴑𐴝𐴛𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴡𐴌𐴟𐴕 𐴓𐴡𐴘 𐴔𐴝𐴙𐴅𐴧𐴤𐴙𐴠𐴊𐴠 𐴁𐴟𐴔 𐴒𐴤𐴡𐴌𐴡𐴃 𐴉𐴡𐴌𐴞 𐴉𐴥𐴟𐴍𐴥𐴞 𐴘𐴡𐴌𐴥𐴠 𐴱 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊𐴢 , 𐴶 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴃 𐴀𐴡𐴒𐴤𐴏𐴄 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑𐴡𐴃 𐴊𐴦𐴟𐴛𐴅𐴧𐴙𐴝 𐴀𐴝𐴕𐴃𐴝𐴎𐴠 𐴲 𐴁𐴝𐴎𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴂𐴥𐴠𐴕 𐴋𐴡 𐴂𐴡𐴌𐴝𐴚 𐴉𐴝𐴌𐴝𐴌𐴃𐴧𐴤𐴟 𐴱 𐴐𐴤𐴞𐴊𐴧𐴝𐴌 𐴉𐴝𐴌𐴝𐴌 𐴔𐴡𐴌𐴑𐴡𐴎𐴡𐴌 𐴔𐴡𐴏𐴥𐴡𐴙𐴃𐴡𐴌 𐴊𐴡𐴀𐴡𐴙𐴕 𐴋𐴤𐴝𐴑𐴤𐴡𐴌 𐴉𐴝𐴌𐴝𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝𐴌 𐴒𐴤𐴡𐴌𐴡𐴃 𐴱 𐴋𐴡𐴌𐴟𐴕 𐴓𐴡𐴘 𐴔𐴝𐴙𐴅𐴧𐴤𐴙𐴠𐴊𐴠 𐴀𐴡𐴃𐴞 𐴈𐴥𐴡𐴃𐴞𐴑𐴝𐴌 𐴁𐴟𐴔 𐴀𐴟𐴒𐴧𐴤𐴗𐴝 𐴉𐴡𐴌𐴞 𐴉𐴥𐴟𐴍𐴥𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴃𐴞𐴕 𐴎𐴡𐴕 𐴔𐴡𐴌𐴡𐴊 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴒𐴤𐴡𐴌𐴒𐴟𐴐𐴧𐴤𐴞𐴌 𐴶 𐴎𐴡𐴕 𐴁𐴠𐴐𐴤𐴞 𐴀𐴝𐴒𐴤𐴝𐴃 𐴉𐴝𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕 𐴁𐴦𐴝𐴊𐴠 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴳 : 𐴹 𐴁𐴝𐴎𐴠 𐴱 𐴓𐴥𐴝𐴏𐴝 𐴉𐴝𐴌𐴝𐴌 𐴉𐴡𐴏𐴥𐴞𐴔𐴠 𐴀𐴝𐴏𐴥𐴠𐴊𐴠 𐴀𐴞𐴏𐴝 𐴉𐴡𐴀𐴡𐴙𐴌𐴡𐴃 𐴁𐴡𐴌𐴑𐴤𐴞 𐴓𐴡𐴘 𐴔𐴝𐴏𐴢 𐴏𐴝𐴀𐴝𐴌 𐴊𐴧𐴠 𐴉𐴟𐴖𐴝𐴙𐴕 𐴳 𐴎𐴡𐴕𐴡𐴌𐴥𐴠 𐴱 𐴐𐴗𐴠 𐴎𐴤𐴝 𐴉𐴝𐴌𐴝𐴃 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴷 – 𐴸 𐴉𐴥𐴡𐴙𐴌 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 𐴱 𐴔𐴡𐴕𐴃𐴡𐴌 𐴁𐴤𐴝𐴙𐴒𐴧𐴡 𐴁𐴤𐴝𐴓𐴝 𐴀𐴥𐴡𐴀𐴡𐴕𐴠 𐴀𐴥𐴞𐴃𐴝𐴌𐴝𐴌 𐴒𐴦𐴝𐴃 𐴕𐴡 𐴉𐴡𐴌𐴞 𐴱 𐴓𐴥𐴝 𐴏𐴝 𐴉𐴝𐴌𐴝𐴌 𐴁𐴤𐴟𐴃𐴤𐴡𐴌𐴠 𐴏𐴝𐴀𐴝𐴌 𐴊𐴟𐴖𐴝𐴕𐴡𐴃 𐴁𐴡𐴙𐴐𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌 𐴉𐴞𐴍𐴥𐴡𐴃 𐴉𐴡𐴌𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴞𐴁𐴤𐴝 𐴀𐴥𐴡𐴙𐴓𐴊𐴠 𐴱 𐴓𐴥𐴝 𐴏𐴝 𐴌𐴥𐴠𐴑𐴧𐴤𐴗𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴱 𐴀𐴥𐴟 𐴉𐴝𐴌𐴟𐴑 𐴀𐴝𐴓𐴡𐴔𐴡𐴌 𐴐𐴤𐴡𐴣𐴍𐴡 𐴁𐴤𐴝𐴘 𐴱 𐴐𐴡𐴁𐴞 𐴀𐴝𐴓𐴡𐴔 𐴁𐴡𐴐𐴢 𐴴 𐴳 𐴁𐴡𐴏𐴥𐴡𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴏𐴥𐴡𐴙𐴃𐴡𐴃 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞𐴁𐴤𐴡𐴓𐴧𐴝 𐴎𐴝𐴀𐴝𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴥𐴞𐴃𐴞𐴕 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴔𐴡𐴚𐴕𐴞 𐴉𐴝𐴌𐴝𐴌 𐴅𐴟𐴔𐴥𐴝 𐴔𐴡𐴏𐴥𐴡𐴙𐴃𐴡𐴃 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴲 𐴱 𐴁𐴝𐴎𐴠 𐴅𐴟𐴔𐴥𐴝𐴌 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴘𐴧𐴥𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴡𐴚𐴕𐴞 𐴉𐴝𐴌𐴝𐴌 𐴉𐴡𐴏𐴥𐴞𐴔𐴠 𐴁𐴡𐴖𐴋𐴝𐴌𐴡𐴌 𐴈𐴝𐴣𐴏𐴝𐴃 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴱 𐴀𐴠𐴑 𐴔𐴞𐴎𐴧𐴞𐴕 𐴉𐴡𐴙𐴅𐴧𐴡𐴕𐴃𐴡 𐴒𐴟𐴓𐴞 𐴔𐴝𐴙𐴅𐴧𐴤𐴙𐴠 𐴱 𐴀𐴝𐴃𐴌𐴝𐴉𐴡𐴌 𐴔𐴝𐴙𐴕𐴐𐴤𐴙𐴠 𐴒𐴟𐴓𐴞𐴌 𐴀𐴝𐴁𐴝𐴏𐴢 𐴉𐴥𐴟𐴕𐴥𐴞 𐴀𐴞𐴑𐴧𐴤𐴙𐴝 𐴀𐴟𐴙𐴑𐴧𐴤𐴙𐴝 𐴐𐴤𐴡𐴌𐴞 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴱 𐴔𐴡𐴏𐴥𐴡𐴙𐴃𐴡𐴌 𐴋𐴤𐴝𐴑𐴤𐴠 𐴃𐴤𐴝𐴑𐴤𐴠𐴊𐴠 𐴵 𐴱 𐴁𐴡𐴏𐴥𐴡𐴌𐴅𐴙𐴝 𐴉𐴟𐴖𐴝 𐴀𐴠𐴑 𐴎𐴡𐴕𐴡𐴌 𐴄𐴤𐴠𐴚𐴡𐴌 𐴃𐴤𐴟𐴌𐴡𐴃 𐴒𐴟𐴓𐴞 𐴉𐴡𐴌𐴞 𐴁𐴠𐴐𐴤𐴞 𐴀𐴝𐴒𐴤𐴝𐴃 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴌 𐴉𐴡𐴏𐴥𐴞𐴔 𐴈𐴝𐴣𐴏𐴥𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴃 𐴇𐴝𐴔𐴦𐴝𐴏𐴡𐴌 𐴀𐴠𐴑 𐴎𐴡𐴕𐴑𐴡𐴔𐴦𐴝𐴕𐴋𐴝𐴌 𐴐𐴤𐴡𐴣𐴀𐴡 𐴹 𐴎𐴡𐴕 𐴐𐴤𐴡𐴇𐴞𐴊 𐴱𐴱

𐴌𐴗𐴠𐴄𐴝𐴌 𐴀𐴠𐴅𐴤𐴠𐴕𐴏𐴞𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴱 𐴒𐴤𐴡𐴎𐴧𐴝𐴌 𐴉𐴡𐴏𐴥𐴞𐴔 𐴈𐴝𐴣𐴏𐴝𐴃 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴱 𐴀𐴞𐴏𐴌𐴦𐴝𐴙𐴓𐴡𐴌 𐴀𐴠𐴑 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴇𐴝𐴔𐴦𐴝𐴏𐴢 𐴃𐴡𐴕𐴎𐴞𐴔𐴡𐴌 𐴃𐴟𐴓 𐴑𐴡𐴌𐴡𐴔 𐴁𐴠𐴌𐴠𐴒𐴤𐴠𐴋𐴡𐴌 𐴀𐴠𐴑 𐴎𐴡𐴕 𐴑𐴡𐴔𐴦𐴝𐴕𐴋𐴝𐴌 𐴐𐴤𐴡𐴣𐴀𐴡 𐴏𐴝𐴙𐴌 𐴎𐴡𐴕 𐴓𐴝𐴌𐴥𐴝𐴘𐴁𐴝𐴏𐴢 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴱 𐴀𐴝𐴌 𐴀𐴠𐴑 𐴇𐴥𐴝𐴔𐴓𐴝𐴃 𐴀𐴝𐴌 𐴀𐴥𐴡 𐴏𐴝𐴙𐴌 𐴎𐴡𐴕 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴱 𐴒𐴤𐴡𐴎𐴧𐴝𐴌 𐴏𐴠𐴇𐴥𐴠𐴃𐴡𐴌 𐴋𐴞𐴂𐴦𐴝𐴌𐴔𐴥𐴠𐴕𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴱 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴒𐴤𐴡𐴎𐴧𐴝𐴃 𐴈𐴡𐴔𐴡𐴃 𐴱 𐴳 𐴎𐴡𐴕 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱