𐴔𐴡𐴚𐴋𐴤𐴟𐴃 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴡𐴙𐴃𐴧𐴡 𐴊𐴞𐴕 𐴋𐴡𐴌𐴟𐴕 𐴓𐴡𐴘 𐴇𐴥𐴝𐴔𐴓𐴝 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴃𐴢 𐴒𐴤𐴡𐴕𐴡 𐴔𐴞𐴑𐴧𐴤𐴙𐴝 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴃𐴤𐴝𐴑𐴤𐴠𐴊𐴠 𐴌𐴥𐴠𐴑𐴧𐴤𐴗𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴡𐴃𐴞 𐴈𐴥𐴡𐴃𐴞𐴑𐴝𐴌 𐴁𐴟𐴔 𐴀𐴥𐴡𐴑𐴧𐴡𐴓 𐴋𐴡𐴌𐴟𐴕 𐴓𐴡𐴘 𐴔𐴝𐴌𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴉𐴡𐴙𐴃𐴧𐴡 𐴊𐴞𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴔𐴡𐴌𐴝𐴃 𐴀𐴝𐴏𐴥𐴠 𐴀𐴝𐴌 𐴊𐴡𐴌𐴥𐴡 𐴔𐴡𐴌𐴥𐴡 𐴒𐴤𐴝𐴙𐴓 𐴀𐴥𐴟𐴀𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴉𐴡𐴙𐴃𐴧𐴡 𐴊𐴞𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴠𐴌 𐴊𐴧𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴀𐴡𐴌 𐴊𐴧𐴠 𐴀𐴥𐴞𐴀𐴞𐴕𐴡𐴌 𐴖𐴡𐴌𐴠 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴀𐴝𐴌 𐴊𐴠𐴐𐴢 𐴁𐴡𐴘𐴊𐴠𐴐𐴤𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴉𐴠𐴌𐴠𐴐𐴝𐴕𐴞𐴌𐴥 𐴁𐴝𐴁𐴡𐴃𐴠 𐴀𐴠𐴓𐴝𐴕 𐴕𐴝𐴔𐴝 𐴕𐴦𐴠𐴓𐴝𐴘𐴧𐴥𐴠𐴊𐴠 𐴀𐴥𐴞𐴀𐴞𐴕𐴡𐴃 𐴎𐴝𐴀𐴞𐴌 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴤𐴟𐴏𐴞𐴊𐴤𐴡𐴚 𐴑𐴡𐴁𐴎𐴝 𐴒𐴡𐴌𐴥𐴠𐴌 𐴊𐴧𐴠 𐴀𐴡𐴑𐴃𐴤𐴡𐴃 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴝𐴀𐴝𐴘 𐴋𐴝𐴀𐴝𐴘 𐴉𐴡𐴌𐴝𐴕 𐴁𐴝𐴏𐴝𐴘 𐴀𐴞𐴑𐴧𐴤𐴙𐴝 𐴀𐴟𐴙𐴑𐴧𐴤𐴙𐴝 𐴕𐴦𐴠𐴓𐴞 𐴊𐴤𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴣𐴀𐴡𐴃 𐴱 𐴀𐴠𐴕𐴋𐴞𐴓𐴧𐴝 𐴊𐴞𐴐𐴤𐴝 𐴀𐴥𐴝𐴌𐴥𐴝 𐴈𐴝𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴕𐴞𐴌𐴝𐴉𐴡𐴃𐴧𐴝 𐴀𐴝𐴌 𐴇𐴥𐴠𐴉𐴝𐴎𐴡𐴃𐴡𐴌 𐴑𐴤𐴞𐴘𐴝𐴓 𐴌𐴝𐴑𐴤𐴞𐴁𐴤𐴡𐴓𐴧𐴝 𐴱 𐴁𐴡𐴌𐴔𐴥𐴝𐴌 𐴂𐴝𐴂𐴓𐴥𐴞𐴑 𐴃𐴡𐴕𐴎𐴞𐴔 𐴀𐴥𐴡𐴑𐴧𐴡𐴓𐴠 𐴔𐴡𐴒𐴢 𐴁𐴝𐴒𐴞𐴌𐴥𐴠 𐴈𐴡𐴀𐴡𐴘 𐴁𐴦𐴝𐴊𐴠 𐴘𐴥𐴡 𐴱 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴏𐴥𐴞𐴘𐴝𐴏𐴞 𐴉𐴝𐴄𐴞 ( 𐴀𐴠 𐴀𐴠 𐴀𐴝𐴌 𐴘𐴟 𐴀𐴠𐴓 𐴀𐴠 ) 𐴘𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴑𐴡𐴗𐴕𐴏𐴞𐴌𐴥𐴠 𐴀𐴝𐴌 𐴁𐴡𐴌𐴔𐴥𐴝𐴌 𐴂𐴝𐴂𐴓𐴥𐴞𐴑 𐴃𐴡𐴕𐴎𐴞𐴔𐴡𐴌𐴥𐴠 𐴱 𐴃𐴟𐴣𐴖𐴥𐴝𐴣𐴌𐴥𐴝𐴌𐴥𐴠 𐴀𐴥𐴞𐴀𐴞𐴕𐴠 𐴑𐴞𐴘𐴥𐴠 𐴉𐴝𐴘𐴧𐴥𐴠 𐴈𐴡𐴀𐴡𐴘 𐴅𐴟𐴖𐴝𐴁𐴢 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴀𐴝𐴈𐴥𐴠𐴌𐴥𐴞 𐴇𐴥𐴝𐴉𐴃𐴝𐴃 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴱 𐴉𐴟𐴖𐴝𐴙𐴕 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴁𐴠𐴍𐴝𐴀𐴝𐴙𐴕 𐴔𐴞𐴓𐴝𐴘 𐴈𐴡𐴔𐴡𐴃 𐴵 𐴱 𐴎𐴡𐴕𐴡𐴌 𐴖𐴡𐴌𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴳 𐴎𐴡𐴕𐴡𐴌𐴖𐴡𐴌𐴠 𐴖𐴡𐴌𐴠 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴡𐴃 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴉𐴝𐴕𐴥𐴞𐴁𐴝𐴕 𐴀𐴝𐴌 𐴔𐴠𐴍𐴞 𐴁𐴤𐴝𐴚𐴠𐴌 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴱 𐴁𐴠𐴐𐴤𐴞 𐴎𐴤𐴡𐴌 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴉𐴝𐴕𐴥𐴞𐴁𐴝𐴕 𐴀𐴥𐴡𐴀𐴡𐴕𐴠 𐴌𐴞𐴉𐴟𐴎𐴞𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴉𐴝𐴕𐴥𐴞 𐴒𐴤𐴡𐴙𐴓𐴧𐴙𐴠 𐴒𐴤𐴡𐴘 𐴀𐴝𐴌 𐴉𐴝𐴀𐴝𐴌𐴡𐴌 𐴔𐴠𐴍𐴞 𐴁𐴤𐴝𐴚𐴞 𐴀𐴝𐴘𐴧𐴥𐴠𐴌 𐴱 𐴀𐴝𐴌 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴎𐴡𐴌𐴟𐴌𐴞 𐴀𐴝𐴁𐴡𐴏𐴃𐴤𐴝𐴃 𐴎𐴝𐴒𐴝 𐴓𐴝𐴌𐴞 𐴌𐴝𐴑𐴤𐴝 𐴉𐴡𐴙𐴅𐴧𐴤𐴙𐴠 𐴱 𐴁𐴡𐴓𐴞 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴙𐴑𐴧𐴙𐴝𐴁𐴡𐴃 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴁𐴡𐴕 𐴒𐴡𐴅𐴧𐴤𐴞𐴓𐴊𐴠 𐴓𐴝𐴌𐴥𐴝𐴘 𐴁𐴝𐴏𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴠𐴌𐴞 𐴊𐴞𐴀𐴞𐴁𐴝𐴌 𐴐𐴤𐴡𐴣𐴀𐴡𐴃 𐴱 𐴎𐴡𐴕 𐴉𐴞𐴏𐴥𐴠 𐴵 𐴱 𐴓𐴝𐴑 𐴄𐴞𐴛𐴝 𐴓𐴡𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝𐴌 𐴓𐴝𐴌𐴥𐴝𐴘𐴃𐴧𐴟 𐴁𐴝𐴏𐴞𐴁𐴤𐴡𐴓𐴧𐴝 𐴕𐴦𐴠𐴓𐴞 𐴀𐴝𐴙𐴑𐴧𐴙𐴝𐴁𐴡𐴃 𐴉𐴡𐴣𐴀𐴡𐴏𐴧𐴞𐴓 𐴒𐴤𐴡𐴘𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴉𐴟𐴓𐴞𐴐𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑 𐴓𐴡𐴃𐴞 𐴁𐴡𐴕 𐴒𐴡𐴌𐴥𐴝 𐴐𐴤𐴟𐴌𐴟 𐴒𐴡𐴌𐴥𐴞 𐴱 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑 𐴉𐴡𐴙𐴅𐴧𐴡𐴕𐴃𐴡 𐴰 𐴵 𐴲 𐴎𐴡𐴕 𐴓𐴡𐴃𐴞 𐴁𐴡𐴕 𐴒𐴡𐴌𐴥𐴞 𐴎𐴡𐴔𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴀𐴝𐴙𐴑𐴧𐴙𐴝𐴁𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌 𐴒𐴝𐴣𐴌𐴝𐴃𐴡𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴧𐴤𐴞𐴀𐴞𐴓 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴀𐴞𐴓 𐴱 𐴀𐴥𐴠 𐴓𐴝𐴌𐴥𐴝𐴘 𐴁𐴝𐴏𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴱 – 𐴸 𐴱 𐴃𐴝𐴌𐴥𐴞𐴑𐴡𐴃 𐴱 𐴒𐴝𐴣𐴌𐴝𐴃𐴡𐴌 𐴃𐴤𐴟 𐴀𐴠𐴌𐴞 𐴊𐴞𐴀𐴞𐴁𐴝𐴌 𐴐𐴤𐴡𐴣𐴀𐴡𐴃 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴔𐴟𐴁𐴦𐴝𐴙𐴓 𐴉𐴥𐴟𐴕 𐴱 𐴉𐴡𐴄𐴤𐴟 ( 𐴀𐴝𐴘 𐴋𐴞 𐴑𐴝𐴀𐴝𐴋 ) 𐴱 𐴉𐴡𐴘𐴊𐴝𐴀𐴞𐴐𐴞 𐴏𐴥𐴝𐴓𐴄𐴞𐴑𐴡𐴄 𐴱 𐴒𐴤𐴡𐴌 𐴏𐴠𐴌𐴥𐴝𐴚 𐴐𐴤𐴡𐴣𐴀𐴡 𐴎𐴡𐴌𐴟𐴌𐴞 𐴈𐴝𐴁𐴡𐴏𐴢 𐴉𐴡𐴕𐴧𐴝 𐴁𐴠𐴒𐴧𐴤𐴞𐴕 𐴓𐴡𐴘 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 𐴱 𐴋𐴝𐴓𐴝𐴓 𐴓𐴝𐴒𐴝𐴘 𐴊𐴞𐴀𐴞 𐴎𐴡𐴕 𐴉𐴞𐴏𐴥𐴠 𐴵 𐴱 𐴓𐴝𐴑 𐴀𐴥𐴞𐴏𐴝𐴉𐴠 𐴄𐴞𐴛𐴝 𐴓𐴡𐴘𐴧𐴥𐴠 𐴱 𐴕𐴡 𐴊𐴞𐴀𐴞𐴓𐴥𐴠 𐴀𐴡𐴙𐴕𐴧𐴡 𐴈𐴡𐴏𐴥𐴟𐴌𐴞 𐴀𐴠𐴑𐴧𐴤𐴝𐴕 𐴁𐴝𐴎𐴤𐴝𐴘 𐴊𐴞𐴀𐴞 𐴔𐴦𐴡𐴊𐴧𐴞𐴔𐴝 𐴑𐴤𐴟𐴓𐴞 𐴎𐴞𐴘𐴥𐴡𐴓𐴡𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴊𐴞𐴘𐴥𐴠 𐴀𐴝𐴌 𐴋𐴝𐴓𐴝𐴓 𐴔𐴡𐴗𐴚 𐴏𐴥𐴟 𐴱 𐴔𐴡𐴗𐴚 𐴁𐴤𐴝 𐴘𐴠 𐴱 𐴊𐴞𐴀𐴞 𐴕𐴡 𐴉𐴝𐴌𐴥𐴠𐴊𐴠 𐴀𐴥𐴞𐴃𐴤𐴝𐴌 𐴁𐴡𐴖 𐴀𐴝𐴌 𐴎𐴤𐴞𐴘𐴝𐴙𐴕𐴊𐴤𐴡𐴌𐴠 𐴔𐴠𐴓𐴠𐴄𐴠𐴌𐴞𐴌 𐴉𐴥𐴟𐴣𐴖𐴥𐴝𐴣𐴃𐴞 𐴌𐴝𐴙𐴃𐴧𐴝 𐴒𐴤𐴟𐴔 𐴎𐴝𐴘𐴁𐴡𐴓𐴧𐴥𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴓𐴝𐴌𐴥𐴝𐴘 𐴁𐴝𐴏𐴝 𐴔𐴝𐴙𐴕𐴐𐴤𐴡𐴌𐴓𐴧𐴝 𐴊𐴞𐴉𐴠𐴍𐴥𐴝𐴌 𐴊𐴧𐴠 𐴊𐴝𐴁𐴝𐴘 𐴀𐴝𐴌 𐴈𐴥𐴝𐴕𐴝 𐴔𐴠𐴓𐴠𐴄𐴠𐴌𐴞 𐴘𐴠 𐴎𐴡𐴁𐴊𐴤𐴡 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴓𐴝𐴌𐴥𐴝𐴘 𐴁𐴝𐴏𐴝 𐴔𐴝𐴙𐴕𐴐𐴤𐴡𐴌 𐴓𐴧𐴝 𐴊𐴞𐴉𐴠𐴍𐴥𐴝𐴌𐴊𐴧𐴠 𐴊𐴝𐴁𐴝𐴘 𐴀𐴝𐴌 𐴈𐴥𐴝𐴕𐴝𐴌 𐴔𐴝𐴓 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴡𐴌 𐴃𐴡𐴓𐴧𐴗𐴝 𐴉𐴟𐴓𐴞𐴐𐴢 𐴀𐴝𐴌 𐴁𐴠𐴀𐴝𐴙𐴕𐴞 𐴔𐴝𐴓 𐴎𐴡𐴁𐴊𐴤𐴡 𐴒𐴡𐴌𐴥𐴡𐴙𐴕𐴧𐴝 𐴉𐴟𐴓𐴞𐴐𐴤𐴠 𐴱 𐴁𐴠𐴀𐴝𐴙𐴕𐴞 𐴏𐴞𐴏𐴢 𐴁𐴡𐴓𐴞 𐴈𐴡𐴀𐴡𐴘 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴑𐴡𐴃 𐴱 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑𐴡𐴌 𐴆𐴤𐴙𐴡𐴚 𐴏𐴝𐴘𐴝 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴌 𐴀𐴥𐴟𐴄𐴟 𐴉𐴝𐴌𐴝𐴃 𐴒𐴤𐴡𐴓𐴞 𐴎𐴡𐴁𐴊𐴤𐴡 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴞𐴌𐴝𐴕𐴡𐴌 𐴌𐴝𐴎𐴊𐴤𐴝𐴕𐴞 𐴃𐴠𐴇𐴠𐴌𐴝𐴕𐴡𐴃 𐴇𐴝𐴔𐴦𐴝𐴏𐴡𐴌 𐴕𐴠𐴃𐴝 𐴐𐴤𐴡𐴇𐴞𐴊𐴢 𐴱𐴱

𐴉𐴥𐴡𐴓𐴡𐴏𐴞𐴃𐴞𐴕𐴡𐴌 𐴓𐴝𐴌𐴥𐴝𐴘𐴁𐴝𐴏𐴢 𐴃𐴡𐴕𐴎𐴞𐴔 𐴇𐴝𐴔𐴦𐴝𐴏𐴡𐴌 𐴏𐴥𐴞𐴘𐴝𐴏𐴞 𐴕𐴠𐴃𐴝 𐴀𐴞𐴏𐴔𐴝𐴀𐴞𐴓 𐴇𐴝𐴕𐴥𐴞𐴘𐴧𐴝 𐴱 𐴀𐴞𐴌𐴝𐴕𐴡𐴌 𐴏𐴥𐴡𐴊𐴡𐴌 𐴔𐴡𐴏𐴀𐴦𐴟𐴊𐴢 𐴂𐴠𐴎𐴡𐴐𐴢 𐴑𐴞𐴘𐴝𐴕𐴡𐴌 𐴏𐴥𐴡𐴊𐴝𐴌𐴡𐴃𐴞 𐴎𐴞𐴔𐴧𐴝𐴊𐴝𐴌𐴞𐴌 𐴐𐴤𐴡𐴉𐴡𐴃 𐴒𐴡𐴌𐴥𐴝𐴌 𐴌𐴡𐴏𐴥𐴡𐴔 𐴀𐴝𐴊𐴝𐴘 𐴒𐴡𐴌𐴥𐴞𐴁𐴤𐴡𐴊𐴠 𐴔𐴡𐴅𐴓𐴥𐴞𐴏𐴡𐴃 𐴇𐴥𐴝𐴎𐴞𐴌 𐴀𐴥𐴡𐴘𐴁𐴡𐴓𐴧𐴝 𐴒𐴞𐴘𐴥𐴠𐴊𐴠 𐴲 𐴶 𐴁𐴡𐴏𐴥𐴡𐴌𐴅𐴧𐴙𐴝 𐴉𐴥𐴡𐴓𐴡𐴏𐴃𐴞𐴕𐴞 𐴏𐴥𐴞𐴘𐴝𐴏𐴞 𐴕𐴠𐴃𐴝 𐴀𐴞𐴏𐴔𐴝𐴀𐴞𐴓 𐴇𐴝𐴕𐴥𐴞𐴘𐴧𐴝 𐴱 𐴀𐴞𐴌𐴝𐴕𐴞 𐴏𐴥𐴡𐴊𐴡𐴌 𐴔𐴡𐴏𐴀𐴦𐴟𐴊 𐴂𐴠𐴎𐴡𐴐𐴢 𐴑𐴞𐴘𐴝𐴕 𐴀𐴝𐴌 𐴀𐴝𐴘𐴡𐴃𐴟𐴓𐴧𐴝𐴇 𐴀𐴝𐴓𐴞 𐴈𐴦𐴝𐴔𐴕𐴝𐴘 𐴓𐴡𐴘 𐴔𐴟𐴓𐴦𐴡𐴃 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴃𐴤𐴝𐴑𐴤𐴞𐴁𐴝𐴌 𐴎𐴝𐴒𐴝𐴃 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴡𐴑𐴃𐴤𐴡𐴃 𐴱 𐴏𐴞𐴑𐴙𐴟𐴌𐴞𐴄𐴞 𐴒𐴝𐴀𐴝𐴋 𐴐𐴤𐴡𐴣𐴀𐴡 𐴊𐴟𐴕𐴥𐴞 𐴎𐴡𐴕𐴡𐴌 𐴖𐴡𐴌𐴠 𐴀𐴝𐴃𐴡𐴚𐴁𐴝𐴊𐴞 𐴇𐴥𐴝𐴔𐴓𐴝 𐴀𐴥𐴡𐴘𐴧𐴠 𐴱 𐴎𐴠 𐴇𐴥𐴝𐴔𐴓𐴝𐴃 𐴀𐴞𐴏𐴔𐴝𐴀𐴞𐴓 𐴇𐴝𐴕𐴥𐴞𐴘𐴧𐴝 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴱 𐴀𐴝𐴌 𐴷 𐴲 𐴃𐴝𐴌𐴥𐴞𐴑 𐴔𐴟𐴇𐴝𐴌𐴧𐴡𐴔 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴑𐴡𐴃𐴤𐴡𐴌𐴡𐴌 𐴌𐴝𐴎𐴊𐴤𐴝𐴕𐴞 𐴊𐴟𐴇𐴥𐴝𐴃 𐴱 𐴀𐴞𐴔𐴝𐴔 𐴔𐴟𐴇𐴝𐴔𐴧𐴡𐴊 𐴁𐴤𐴞𐴕 𐴀𐴝𐴁𐴊𐴟𐴓 𐴖𐴡𐴇𐴦𐴝𐴁𐴢 𐴔𐴡𐴏𐴥𐴡𐴘𐴃𐴡𐴃 𐴅𐴟𐴔𐴥𐴝𐴌 𐴕𐴟𐴖𐴥𐴝𐴏𐴡𐴌 𐴁𐴦𐴝𐴊𐴠 𐴅𐴡𐴕𐴝𐴎𐴝 𐴉𐴡𐴌𐴥𐴞 𐴱 𐴑𐴡𐴃𐴤𐴡𐴌𐴡𐴌 𐴓𐴟𐴏𐴞𐴓 𐴐𐴤𐴡𐴀𐴡𐴌𐴡 𐴈𐴡𐴁𐴡𐴌𐴡𐴏𐴃𐴤𐴝𐴕𐴡𐴃 𐴊𐴡𐴉𐴥𐴡𐴕 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱