𐴔𐴡𐴚𐴋𐴤𐴟𐴃 𐴀𐴝𐴏𐴥𐴠𐴊𐴠 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝 𐴱𐴱

𐴀𐴝𐴌𐴑𐴝𐴕𐴡𐴃 𐴃𐴤𐴝𐴑𐴤𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴠𐴌 𐴊𐴧𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴱 𐴔𐴡𐴚𐴋𐴤𐴟𐴃 𐴀𐴝𐴏𐴥𐴠𐴊𐴠 𐴊𐴠𐴐𐴤𐴙𐴃𐴧𐴝 𐴁𐴠𐴈𐴡𐴏𐴥𐴟𐴌 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴱 𐴋𐴡𐴌𐴟𐴕 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴁𐴠𐴍𐴞𐴀𐴝𐴙𐴕 𐴀𐴝𐴌 𐴁𐴠𐴍𐴝𐴀𐴝𐴙𐴕 𐴱 𐴁𐴠𐴐𐴤𐴞 𐴔𐴡𐴌𐴠𐴌 𐴊𐴧𐴠 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴀𐴡𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴲 𐴃𐴝𐴌𐴥𐴞𐴑 𐴊𐴦𐴟𐴛𐴅𐴧𐴙𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴏𐴝𐴀𐴝𐴘 𐴏𐴞𐴃𐴞 𐴒𐴡𐴙𐴅𐴧𐴤𐴙𐴠𐴊𐴠 𐴋𐴡𐴌𐴟𐴕 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴱 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴐𐴤𐴡𐴣𐴀𐴡 𐴑𐴠𐴙𐴏𐴧𐴥𐴟 𐴔𐴡𐴌𐴡𐴊𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴑𐴠𐴙𐴏𐴧𐴥𐴟 𐴒𐴤𐴡𐴌 𐴁𐴤𐴝𐴚𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴞𐴀𐴞𐴕 𐴁𐴦𐴝𐴊𐴠 𐴘𐴥𐴡 𐴓𐴥𐴝 𐴏𐴝 𐴌𐴥𐴠𐴑𐴧𐴤𐴗𐴝𐴌 𐴁𐴤𐴝𐴐𐴞 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴡𐴌 𐴒𐴤𐴡𐴌𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴙𐴅𐴧𐴤𐴙𐴠𐴊𐴠 𐴁𐴟𐴔 𐴉𐴡𐴌𐴞 𐴉𐴥𐴟𐴍𐴥𐴡𐴕𐴠 𐴔𐴟𐴇𐴝𐴔𐴧𐴡𐴊 𐴘𐴟𐴕𐴟𐴏𐴡𐴌 𐴁𐴡𐴖𐴢 𐴊𐴡𐴌𐴥𐴡 𐴔𐴡𐴌𐴥𐴡 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴀𐴝𐴌 𐴒𐴤𐴡𐴌 𐴒𐴤𐴝𐴕 𐴀𐴥𐴡 𐴁𐴤𐴝𐴚𐴞 𐴒𐴞𐴘𐴥𐴡𐴘𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴚𐴋𐴤𐴟𐴃 𐴋𐴝𐴑𐴄𐴡𐴌 𐴈𐴥𐴝𐴕𐴝 𐴀𐴝𐴌 𐴊𐴝𐴁𐴝𐴘𐴌 𐴊𐴟𐴖𐴝𐴕 𐴕𐴡 𐴃𐴤𐴝𐴑𐴤𐴡𐴕𐴡𐴌 𐴏𐴥𐴡𐴁𐴡𐴁𐴠 𐴒𐴤𐴝𐴙𐴓 𐴀𐴥𐴡𐴘𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴀𐴠𐴓𐴝𐴅 𐴀𐴥𐴡 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 𐴱 𐴁𐴠𐴐𐴤𐴞 𐴔𐴡𐴐𐴑𐴞𐴓𐴡𐴃 𐴉𐴡𐴌𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴒𐴟𐴐𐴧𐴤𐴝 𐴀𐴝𐴌 𐴊𐴟𐴐𐴔𐴡𐴕𐴞 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴝𐴌 𐴏𐴥𐴞𐴓𐴏𐴞𐴓𐴥𐴝𐴃 𐴱 𐴀𐴥𐴠𐴃𐴝𐴓𐴞𐴘𐴝 𐴱 𐴕𐴟𐴖𐴝 𐴉𐴝𐴌𐴝 𐴱 𐴓𐴥𐴝 𐴏𐴝 𐴌𐴥𐴠𐴑𐴧𐴤𐴗𐴝 𐴔𐴡𐴚𐴕𐴞 𐴉𐴝𐴌𐴝 𐴱 𐴐𐴤𐴞𐴑𐴊𐴝𐴌 𐴉𐴝𐴌𐴝 𐴱 𐴀𐴞𐴀𐴞𐴕𐴡𐴃 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴌𐴟𐴕 𐴇𐴥𐴝𐴔𐴓𐴝𐴃 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴔𐴡𐴌𐴡𐴊 𐴔𐴞𐴓𐴝𐴘 𐴰 𐴱 𐴎𐴡𐴕 𐴓𐴡𐴊𐴞 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊 𐴀𐴥𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴵 𐴲 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴌 𐴌𐴥𐴠𐴋 𐴑𐴡𐴌𐴡𐴏𐴢 𐴀𐴡𐴉𐴥𐴞𐴏𐴢 𐴁𐴤𐴝𐴚𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴒𐴡𐴃𐴡 𐴏𐴝𐴙𐴌 𐴊𐴞𐴕 𐴀𐴝𐴒𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴃 𐴀𐴝𐴏𐴥𐴠𐴊𐴠 𐴁𐴡𐴌𐴔𐴥𐴝 𐴌𐴥𐴠𐴋 𐴑𐴡𐴌𐴡𐴏𐴢 𐴀𐴡𐴉𐴥𐴞𐴏𐴡𐴌𐴥𐴠 𐴁𐴡𐴓𐴝𐴎𐴟𐴌𐴞 𐴁𐴤𐴝𐴚𐴞 𐴏𐴟𐴌𐴞 𐴒𐴤𐴡𐴓𐴞 𐴁𐴦𐴝𐴊𐴠 𐴱 𐴊𐴝𐴁𐴝𐴘 𐴀𐴡𐴐𐴤𐴟𐴊𐴢 𐴐𐴤𐴡𐴣𐴀𐴡 𐴎𐴡𐴌𐴟𐴌𐴞 𐴏𐴥𐴝𐴔𐴝𐴕 𐴀𐴥𐴟𐴊𐴧𐴝 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴱 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴀𐴦𐴝𐴓𐴡𐴔𐴞 𐴑𐴤𐴟𐴌𐴝𐴉𐴢 𐴂𐴡𐴌𐴟𐴒𐴠𐴌𐴝𐴔 𐴱 𐴊𐴠𐴐𐴢 𐴁𐴡𐴘𐴊𐴠𐴐𐴢 𐴓𐴡𐴘 𐴃𐴦𐴝𐴓𐴧𐴟𐴑 𐴌𐴝𐴑𐴤𐴠𐴊𐴠 𐴌𐴥𐴠𐴋 𐴑𐴡𐴌𐴡𐴏𐴢 𐴑𐴡𐴔𐴞𐴄𐴤𐴞𐴌 𐴀𐴡𐴉𐴥𐴞𐴏𐴡𐴌𐴥𐴠 𐴘𐴥𐴡 𐴁𐴤𐴝𐴚𐴞 𐴏𐴟𐴌𐴞 𐴁𐴡𐴌𐴁𐴝𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴡𐴚𐴋𐴤𐴟𐴃 𐴔𐴡𐴒𐴢 𐴑𐴡𐴗𐴔 𐴁𐴦𐴝𐴊𐴠 𐴀𐴝𐴏𐴥𐴠𐴊𐴠 𐴀𐴡𐴙𐴕𐴧𐴡 𐴑𐴡𐴗𐴔 𐴱 𐴌𐴟𐴇𐴝𐴙𐴚𐴒𐴙𐴝 𐴱 𐴑𐴤𐴟𐴀𐴟𐴛 𐴱 𐴇𐴥𐴞𐴕𐴊𐴟 𐴱 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴡𐴙𐴃𐴧𐴡 𐴊𐴞𐴕 𐴔𐴝𐴌𐴞 𐴉𐴥𐴠𐴓𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌 𐴃𐴟 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴓𐴝𐴔𐴁𐴝 𐴀𐴡𐴑𐴃𐴤𐴡 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴉𐴥𐴟𐴖𐴥𐴝𐴣𐴃𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴀𐴡𐴐𐴤𐴝𐴕𐴃𐴞 𐴁𐴝𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴑𐴡𐴗𐴔 𐴂𐴡𐴌𐴡𐴏𐴃𐴞 ( 𐴎𐴝𐴃𐴞𐴘𐴡𐴃𐴝 ) 𐴏𐴥𐴝𐴌𐴕𐴝𐴔 𐴊𐴞𐴘𐴡𐴌𐴥𐴠 𐴈𐴥𐴟𐴊𐴢 𐴒𐴡𐴌𐴡𐴎𐴞 ( 𐴀𐴝𐴃𐴧𐴝 𐴐𐴤𐴝𐴃𐴧𐴡𐴌 ) 𐴓𐴝𐴌𐴥𐴝𐴘 𐴳 𐴲 𐴰 𐴲 𐴐𐴤𐴡𐴕 𐴕𐴡𐴖𐴡𐴔𐴁𐴡𐴌 𐴔𐴝𐴐𐴢 𐴓𐴡𐴃𐴞 𐴉𐴥𐴞𐴃𐴞𐴕 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴉𐴝𐴌𐴝 𐴀𐴝𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴡𐴌𐴥𐴠 𐴀𐴡𐴣𐴖𐴏𐴥𐴝 𐴊𐴞𐴀𐴞 𐴓𐴝𐴌𐴥𐴝𐴘 𐴒𐴡𐴌𐴥𐴠𐴌 𐴱 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴃𐴧𐴤𐴟 𐴄𐴞𐴛𐴝 𐴉𐴡𐴘𐴐𐴤𐴝 𐴈𐴝𐴌𐴥𐴞 𐴓𐴡𐴀𐴡𐴌 𐴀𐴝𐴌 𐴓𐴝𐴌𐴥𐴝𐴘𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴞𐴁𐴤𐴡𐴓𐴝 𐴕𐴟𐴖𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓 𐴊𐴡𐴓𐴝 𐴒𐴡𐴌𐴥𐴠𐴌 𐴱 𐴀𐴞𐴀𐴞𐴕𐴌 𐴎𐴡𐴌𐴞𐴘𐴝 𐴀𐴝𐴌𐴑𐴝𐴕𐴡𐴌 𐴔𐴝𐴕𐴥𐴟𐴙𐴐𐴢 𐴀𐴡𐴐𐴤𐴝𐴕𐴃𐴞𐴃 𐴈𐴥𐴝𐴏𐴢 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴃 𐴊𐴠 𐴘𐴥𐴝𐴀𐴝𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴡𐴐𐴤𐴝𐴕𐴃𐴞 𐴀𐴞𐴀𐴞𐴕 𐴁𐴦𐴝𐴊𐴠 𐴉𐴡𐴙𐴃𐴧𐴡 𐴊𐴞𐴕 𐴔𐴡𐴌𐴠𐴌 𐴀𐴝𐴌 𐴒𐴤𐴝𐴙𐴓 𐴀𐴥𐴡𐴀𐴡𐴌 𐴊𐴧𐴠 𐴀𐴞𐴀𐴞𐴕𐴡𐴃𐴧𐴟 𐴁𐴝𐴏𐴞 𐴁𐴤𐴡𐴓𐴧𐴝 𐴱 𐴀𐴡𐴙𐴕𐴧𐴡 𐴉𐴝𐴌𐴝 𐴀𐴝𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴎𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴓𐴝𐴌𐴥𐴝𐴘 𐴁𐴝𐴏𐴝 𐴑𐴠𐴀𐴠𐴔 𐴀𐴥𐴡𐴑𐴧𐴡𐴓𐴡𐴃 𐴒𐴤𐴡𐴓𐴞 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴄𐴞𐴛𐴝 𐴉𐴡𐴘𐴐𐴤𐴝 𐴑𐴤𐴟𐴌𐴝𐴉𐴢 𐴉𐴝𐴃𐴞 𐴈𐴝𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟 𐴵 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊𐴢 𐴳 𐴎𐴡𐴕 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴌 𐴵 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴀𐴝𐴂𐴧𐴝𐴙𐴚 𐴁𐴡𐴌 𐴑𐴞𐴌 𐴉𐴝𐴌𐴝𐴃 𐴀𐴝𐴏𐴥𐴠𐴊𐴠 𐴁𐴡𐴌 𐴉𐴡𐴀𐴡𐴙𐴌𐴡𐴌 𐴔𐴟𐴀𐴟𐴕𐴃𐴟 𐴱 𐴅𐴟𐴓𐴝𐴘 𐴔𐴝𐴐𐴡𐴌 𐴰 𐴳 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴀𐴝𐴕𐴃𐴝𐴎𐴠 𐴰 𐴱 : 𐴸 𐴔𐴞𐴓𐴥𐴡𐴄𐴡𐴃 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴃 𐴐𐴤𐴡𐴇𐴞𐴊𐴢 𐴀𐴥𐴡𐴘 𐴒𐴞𐴘𐴥𐴡𐴘 𐴀𐴝𐴌 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴠𐴑 𐴇𐴥𐴝𐴉𐴃𐴝𐴌 𐴁𐴤𐴟𐴃𐴤𐴡𐴌𐴠 𐴈𐴦𐴝𐴕 𐴘𐴟𐴕𐴟𐴏𐴡𐴃 𐴰 𐴰 𐴳 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 : 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴑𐴝𐴌 𐴱𐴱

𐴒𐴤𐴡𐴎𐴧𐴝𐴌 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴑𐴝𐴌 𐴀𐴡𐴉𐴥𐴞𐴏𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴱 𐴒𐴡𐴃𐴡 𐴀𐴠𐴑 𐴇𐴥𐴝𐴉𐴃𐴝𐴃𐴢 𐴐𐴤𐴟𐴊𐴠 𐴒𐴤𐴡𐴎𐴧𐴝𐴌 𐴈𐴦𐴝𐴕 𐴘𐴟𐴕𐴟𐴏𐴡𐴃 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 𐴰 𐴰 𐴳 𐴎𐴡𐴕 𐴓𐴡𐴃𐴞 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴊𐴠𐴐𐴤𐴡𐴙𐴃𐴧𐴝 𐴇𐴥𐴠𐴉𐴝𐴎𐴡𐴃𐴑𐴝𐴌 𐴀𐴡𐴉𐴥𐴞𐴏𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴈𐴡𐴃𐴤𐴝 𐴈𐴡𐴀𐴡𐴙𐴕𐴧𐴝 𐴔𐴟𐴇𐴝𐴔𐴧𐴡𐴊𐴢 𐴁𐴝𐴏𐴠𐴓𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴰 𐴰 𐴳 𐴓𐴝𐴐𐴢 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴒𐴦𐴝𐴌 𐴇𐴥𐴞𐴏𐴧𐴝 𐴀𐴥𐴡𐴑𐴧𐴡𐴓 𐴏𐴥𐴞𐴌𐴞 𐴏𐴥𐴞𐴌𐴞 𐴁𐴠𐴒𐴧𐴤𐴗𐴝 𐴁𐴞𐴓𐴝𐴘 𐴒𐴞𐴘𐴥𐴡𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴓𐴝𐴐𐴢 𐴀𐴥𐴡 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴤𐴡𐴎𐴧𐴝𐴃 𐴏𐴠𐴇𐴥𐴠𐴃𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱𐴱

𐴏𐴡𐴁𐴤𐴡𐴑 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴱 ( 𐴘𐴟 𐴀𐴠𐴕 𐴀𐴝𐴌 𐴋𐴝𐴁𐴓𐴙𐴟 𐴀𐴠 ) 𐴃𐴡𐴕𐴎𐴞𐴔𐴡𐴌 𐴃𐴡𐴌𐴉𐴥𐴡𐴌 𐴃𐴧𐴟 𐴕𐴦𐴠𐴓𐴝𐴘𐴧𐴥𐴠𐴊𐴠 𐴌𐴠𐴂𐴟𐴄 𐴔𐴡𐴎𐴞𐴕 𐴳 𐴲 𐴰 𐴲 𐴐𐴤𐴡𐴕 𐴀𐴡𐴑𐴃𐴟𐴁𐴡𐴌 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴱 𐴐𐴝𐴓𐴞𐴆 𐴇𐴥𐴝𐴎𐴝𐴌 𐴇𐴠𐴂𐴝𐴄𐴝𐴘𐴄𐴤𐴞𐴏𐴢 ( 𐴈𐴡𐴙𐴓𐴧𐴝𐴌 ) 𐴁𐴞𐴘𐴝𐴌𐴝𐴙𐴔𐴧𐴝 𐴉𐴝𐴀𐴝 𐴒𐴞𐴘𐴥𐴠 𐴱 𐴌𐴠𐴂𐴟𐴄 𐴘𐴥𐴝𐴀𐴝𐴕𐴡𐴃 𐴀𐴝𐴌 𐴀𐴥𐴡 𐴈𐴡𐴘𐴧𐴥𐴠𐴊𐴠 𐴱 𐴒𐴤𐴡𐴎𐴧𐴝𐴌 𐴁𐴞𐴁𐴤𐴞𐴕𐴧𐴡 𐴀𐴠𐴓𐴝𐴑𐴝𐴃 𐴀𐴠𐴑 𐴇𐴥𐴝𐴉𐴃𐴝𐴌 𐴁𐴤𐴟𐴃𐴤𐴡𐴌𐴠 𐴰 𐴰 𐴸 – 𐴰 𐴰 𐴰 𐴱 𐴓𐴡𐴃𐴞 𐴁𐴞𐴘𐴝𐴌𐴝𐴙𐴔𐴧𐴝 𐴉𐴝𐴀𐴝 𐴎𐴝𐴀𐴝 𐴱 𐴀𐴝𐴌 𐴊𐴞𐴕 𐴊𐴞𐴕 𐴁𐴝𐴌𐴥𐴝𐴃 𐴀𐴝𐴏𐴥𐴠 𐴎𐴞𐴘𐴥𐴝𐴕 𐴉𐴟𐴌𐴝 𐴊𐴟𐴕𐴞𐴘𐴝𐴘𐴃𐴧𐴤𐴟 𐴁𐴤𐴝𐴉𐴝 𐴉𐴡𐴌𐴠𐴊𐴠 𐴔𐴦𐴝𐴔𐴠𐴓𐴝 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱