𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴂𐴥𐴠𐴕 𐴄𐴤𐴡 𐴂𐴡𐴌𐴝𐴚 𐴀𐴝𐴌 𐴛𐴡𐴚 𐴆𐴤𐴙𐴡𐴚 𐴉𐴝𐴌𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌𐴡𐴃𐴧𐴤𐴟 𐴑𐴤𐴟𐴌𐴝𐴉𐴢 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴏𐴥𐴝𐴔𐴝𐴕 𐴓𐴟𐴄 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴂𐴥𐴠𐴕 𐴄𐴤𐴡 𐴂𐴡𐴌𐴝𐴚 𐴀𐴝𐴌 𐴛𐴡𐴚 𐴆𐴤𐴙𐴚 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴱 𐴓𐴝𐴌𐴥𐴝𐴘 𐴀𐴥𐴡𐴘𐴁𐴡 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴇𐴥𐴡𐴑𐴟𐴔 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴉𐴝𐴌𐴝 𐴏𐴥𐴝𐴌𐴥𐴞 𐴕𐴦𐴠𐴓𐴞 𐴒𐴞𐴀𐴞𐴓 𐴒𐴤𐴡𐴘 𐴱 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴤𐴟𐴓𐴝 𐴉𐴥𐴝𐴄𐴑𐴞 𐴔𐴝𐴌𐴞 𐴕𐴦𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴑𐴡𐴓𐴡𐴌 𐴒𐴤𐴡𐴌𐴡𐴌 𐴀𐴠𐴏𐴃𐴠𐴔𐴝𐴓𐴡𐴌 𐴏𐴥𐴝𐴔𐴝𐴕 𐴐𐴤𐴡𐴣𐴀𐴡 𐴱 𐴊𐴡𐴓𐴝 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴑𐴤𐴟𐴌𐴝𐴉𐴡𐴌 𐴏𐴡𐴙𐴓 𐴊𐴤𐴝𐴕 𐴀𐴥𐴟𐴊𐴧𐴝 𐴓𐴟𐴄 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴕𐴃𐴡𐴌 𐴉𐴝𐴌𐴝𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴦𐴠𐴓𐴝𐴘 𐴊𐴞𐴀𐴞𐴁𐴝𐴌 𐴐𐴤𐴡𐴣𐴀𐴡𐴃 𐴱 𐴃𐴟𐴣𐴖𐴥𐴝𐴣𐴌𐴝𐴌 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴏𐴝𐴔𐴝𐴕 𐴏𐴡𐴙𐴓 𐴊𐴤𐴝𐴕 𐴁𐴠𐴒𐴧𐴤𐴞𐴕 𐴇𐴥𐴠𐴉𐴝𐴎𐴡𐴃 𐴃𐴤𐴝𐴑𐴤𐴞𐴁𐴡 𐴁𐴡𐴓𐴞 𐴖𐴝𐴊𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴀𐴠𐴕𐴋𐴞𐴓𐴧𐴝 𐴓𐴟𐴄 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴝𐴃 𐴀𐴝𐴌 𐴊𐴤𐴡𐴌𐴔𐴡𐴌𐴥𐴠 𐴔𐴟𐴓 𐴁𐴝𐴕𐴝𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴉𐴡𐴌𐴥𐴡𐴙𐴑𐴧𐴙𐴝 𐴔𐴦𐴝𐴔𐴠𐴓𐴝 𐴒𐴡𐴌𐴥𐴠𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴀𐴝𐴌 𐴀𐴠𐴑 𐴋𐴤𐴝𐴑𐴤𐴡𐴌𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞𐴌 𐴒𐴟𐴐𐴧𐴤𐴝 𐴁𐴠𐴒𐴧𐴤𐴞𐴕 𐴀𐴝𐴌 𐴊𐴟𐴐𐴔𐴡𐴕𐴞 𐴁𐴠𐴒𐴧𐴤𐴞𐴕 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴀𐴟𐴌𐴝𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴌𐴔𐴥𐴝𐴃 𐴳 𐴱 𐴖𐴥𐴝𐴕 𐴐𐴤𐴡𐴀𐴡𐴌𐴡𐴃 𐴉𐴝𐴕𐴥𐴞𐴁𐴝𐴕 𐴀𐴥𐴡𐴘𐴧𐴠 𐴉𐴡𐴕𐴎𐴝𐴙𐴐𐴢 𐴇𐴥𐴝𐴎𐴝𐴌 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴉𐴝𐴕𐴥𐴞𐴌 𐴋𐴡𐴌𐴡𐴃 𐴱𐴱

𐴁𐴡𐴌𐴔𐴥𐴝𐴃 𐴀𐴥𐴠𐴌𐴝𐴖𐴡𐴋𐴧𐴞 𐴋𐴞𐴐𐴄𐴤𐴞𐴑 𐴱 𐴂𐴥𐴠𐴒𐴤𐴟 𐴋𐴞𐴐𐴄𐴤𐴞𐴑 𐴱 𐴑𐴠𐴀𐴞𐴚 𐴂𐴙𐴠𐴕𐴠 𐴱 𐴔𐴟𐴕 𐴂𐴙𐴠𐴕𐴠 𐴐𐴤𐴡𐴣𐴀𐴡 𐴳 𐴱 𐴖𐴥𐴝𐴕 𐴐𐴤𐴡𐴀𐴡𐴌𐴡𐴃 𐴱 𐴎𐴤𐴡𐴌 𐴁𐴠𐴐𐴤𐴞 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴉𐴝𐴕𐴥𐴞𐴁𐴝𐴕 𐴀𐴟𐴍𐴥𐴡𐴕𐴠 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴔𐴝𐴕𐴥𐴟𐴙𐴐𐴢 𐴱 𐴉𐴝𐴕𐴥𐴞𐴌 𐴋𐴡𐴌𐴡𐴌𐴃𐴧𐴟 𐴁𐴝𐴏𐴝𐴘 𐴌𐴝𐴑𐴤𐴝 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴱 𐴔𐴟𐴀𐴟𐴏𐴥𐴡𐴔𐴡𐴌 𐴈𐴥𐴡𐴁𐴡𐴌 𐴈𐴟𐴀𐴝 𐴀𐴡𐴉𐴥𐴞𐴏𐴡𐴌𐴃𐴧𐴟 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴥𐴟𐴌𐴥𐴟 𐴔𐴥𐴝 𐴑𐴝𐴛𐴠𐴚 𐴋𐴤𐴠𐴕 𐴒𐴤𐴗𐴝𐴚𐴡𐴌 𐴏𐴞𐴃𐴤𐴞𐴓𐴧𐴝 𐴉𐴝𐴌𐴝𐴃 𐴔𐴡𐴒𐴢 𐴁𐴝𐴒𐴞𐴌 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴡𐴕𐴠 𐴳 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴇𐴞𐴊𐴢 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟𐴌 𐴔𐴥𐴟𐴌𐴥𐴟 𐴔𐴥𐴝 𐴑𐴝𐴛𐴠𐴕 𐴋𐴤𐴠𐴕 𐴒𐴤𐴗𐴝𐴚𐴡𐴌 𐴏𐴞𐴃𐴤𐴞𐴓𐴧𐴝 𐴉𐴝𐴌𐴝𐴃 𐴱 𐴴 𐴲 𐴰 𐴲 𐴐𐴤𐴡𐴕 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴸 𐴲 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴊𐴦𐴟𐴛𐴅𐴧𐴤𐴙𐴝 𐴀𐴠𐴑 𐴁𐴝𐴎𐴠 𐴱 𐴀𐴝𐴃𐴡𐴚𐴁𐴝𐴊𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴙𐴅𐴧𐴤𐴙𐴠𐴊𐴠 𐴋𐴡𐴣𐴀𐴡𐴌 𐴀𐴥𐴝𐴣𐴃𐴞𐴘𐴝𐴌 𐴉𐴡𐴌𐴞 𐴉𐴥𐴟𐴍𐴡𐴕𐴡𐴌 𐴎𐴡𐴌𐴞𐴘𐴝 ( 𐴀𐴠 𐴎𐴠 𐴅𐴞 ) 𐴑𐴟𐴔𐴂𐴝𐴕𐴞𐴌 𐴏𐴦𐴡𐴙𐴌𐴅𐴧𐴙𐴝 𐴱 𐴀𐴥𐴟 𐴔𐴡𐴚 𐴆𐴙𐴡𐴌 𐴉𐴟𐴖𐴝 𐴀𐴥𐴟 𐴀𐴝𐴕𐴏𐴝𐴌𐴟𐴓 𐴇𐴥𐴡𐴑 ( 𐴋𐴝𐴑 𐴕𐴝𐴔 ) 𐴓𐴝𐴓𐴥𐴟 𐴱 𐴁𐴡𐴐𐴢 𐴵 𐴳 𐴁𐴡𐴏𐴥𐴡𐴌 𐴐𐴤𐴡𐴣𐴀𐴡 𐴳 𐴎𐴡𐴕 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴱 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴒𐴤𐴡𐴎𐴧𐴝𐴃 𐴀𐴞𐴐𐴑𐴟𐴓𐴡𐴌 𐴖𐴡𐴌𐴠 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴰 𐴳 𐴎𐴡𐴕 𐴓𐴡𐴃𐴞 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴱𐴱

𐴒𐴤𐴡𐴎𐴧𐴝𐴃 𐴀𐴞𐴏𐴌𐴦𐴝𐴙𐴓𐴡𐴌 𐴉𐴥𐴡𐴗𐴏𐴠 𐴀𐴞𐴐𐴑𐴟𐴓 𐴀𐴠𐴑𐴧𐴤𐴝𐴕𐴡𐴃 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴷 𐴲 𐴃𐴝𐴌𐴥𐴞𐴑𐴤𐴡𐴃 𐴱 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴰 𐴳 𐴎𐴡𐴕 𐴓𐴡𐴃𐴞 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊𐴢 𐴀𐴥𐴡𐴘𐴧𐴠 𐴀𐴝𐴌 𐴰 𐴰 𐴱 𐴎𐴡𐴕 𐴓𐴡𐴃𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴱 𐴉𐴥𐴡𐴓𐴡𐴏𐴃𐴞𐴕𐴞 𐴏𐴠𐴇𐴥𐴠𐴃𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱 𐴀𐴝𐴌 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴵 𐴱 𐴎𐴡𐴕 𐴁𐴠𐴍𐴀𐴝𐴙𐴕 𐴀𐴝𐴌 𐴸 𐴎𐴡𐴕 𐴉𐴟𐴖𐴝𐴙𐴕 𐴀𐴝𐴏𐴥𐴠𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴥𐴠 𐴱𐴱