𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴁𐴤𐴟𐴃𐴤𐴡𐴌𐴠 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴇𐴥𐴞𐴕𐴊𐴟 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴡𐴙𐴃𐴧𐴡 𐴊𐴞𐴕 𐴁𐴡𐴕 𐴒𐴡𐴌𐴥𐴝𐴃 𐴔𐴝𐴌𐴝𐴃 𐴀𐴝𐴏𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴁𐴡𐴕 𐴈𐴥𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴇𐴥𐴞𐴕𐴊𐴟 𐴀𐴥𐴡𐴑𐴧𐴡𐴓𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴡𐴙𐴃𐴧𐴡 𐴊𐴞𐴕 𐴓𐴝𐴒𐴝𐴃𐴝𐴌 𐴎𐴝𐴕𐴞 𐴉𐴥𐴟𐴕𐴞 𐴔𐴡𐴑𐴏𐴥𐴡𐴊 𐴓𐴡𐴘 𐴱 𐴁𐴡𐴕 𐴒𐴡𐴌𐴥𐴝 𐴀𐴝𐴌 𐴔𐴝𐴌𐴞 𐴉𐴥𐴠𐴓𐴥𐴝 𐴀𐴝𐴌 𐴀𐴡𐴙𐴕𐴧𐴡 𐴋𐴦𐴡𐴙𐴓𐴧𐴝 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴡𐴃𐴡 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑𐴡𐴃 𐴔𐴡𐴚𐴋𐴤𐴟𐴌 𐴑𐴝𐴛𐴝𐴚 𐴋𐴤𐴠𐴕 𐴌𐴞𐴓𐴥𐴞𐴉𐴢 𐴑𐴠𐴀𐴠𐴔𐴡𐴃𐴧𐴤𐴟 𐴇𐴥𐴞𐴕𐴊𐴟 𐴱 𐴋𐴡 𐴒𐴟𐴓𐴥𐴟 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌 𐴱 𐴀𐴥𐴞𐴃𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴎𐴝𐴘𐴁𐴝𐴌 𐴐𐴤𐴡𐴣𐴀𐴡𐴃 𐴉𐴡𐴣𐴃𐴤𐴡𐴃 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴌𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴘𐴥𐴡 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴀𐴝𐴏𐴥𐴠𐴊𐴠 𐴐𐴗𐴠 𐴎𐴤𐴝 𐴉𐴝𐴌𐴝𐴃 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴒𐴤𐴡𐴓𐴞 𐴓𐴝𐴌𐴥𐴝𐴘𐴃𐴧𐴟 𐴁𐴝𐴏𐴞 𐴐𐴗𐴠 𐴎𐴤𐴝 𐴉𐴝𐴌𐴝𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴠𐴌 𐴊𐴧𐴠 𐴱 𐴓𐴝𐴌𐴥𐴝𐴘 𐴁𐴝𐴏𐴝 𐴴 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴊𐴟𐴘 𐴎𐴡𐴕 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴀𐴝𐴌 𐴀𐴠𐴑 𐴎𐴡𐴕 𐴔𐴝𐴘𐴧𐴝𐴌𐴥𐴠 𐴘𐴥𐴡 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴤𐴙𐴠𐴊 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌 𐴄𐴡𐴀𐴡𐴕𐴡𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴁𐴝𐴌𐴥𐴝𐴃 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴑𐴡𐴁𐴎𐴝 𐴒𐴡𐴌𐴥𐴞𐴁𐴤𐴝𐴌 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴱 𐴔𐴡𐴚𐴋𐴤𐴟𐴌 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴃𐴡𐴌𐴝𐴃𐴡𐴌𐴞 𐴕𐴦𐴠𐴓𐴞 𐴎𐴝𐴘𐴁𐴡 𐴒𐴤𐴡𐴙𐴓𐴧𐴝 𐴱 𐴅𐴟𐴕 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 𐴀𐴠𐴓𐴝𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴖𐴡𐴌𐴠 𐴉𐴡𐴙𐴃𐴧𐴡 𐴊𐴞𐴕 𐴓𐴝𐴃𐴧𐴤𐴝𐴃 𐴀𐴝𐴃𐴡𐴚𐴁𐴝𐴊𐴞 𐴒𐴞𐴌𐴞 𐴒𐴡𐴌𐴥𐴝𐴃 𐴀𐴝𐴏𐴥𐴠 𐴱 𐴔𐴡𐴕𐴃𐴡𐴌 𐴄𐴡𐴀𐴡𐴕𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴡𐴃𐴧𐴟 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴕𐴦𐴠𐴓𐴞 𐴕𐴡 𐴉𐴝𐴌𐴥𐴞 𐴁𐴡𐴕 𐴈𐴥𐴝𐴘 𐴃𐴤𐴝𐴑𐴤𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴥𐴡𐴌𐴃𐴧𐴟 𐴎𐴝𐴕𐴝 𐴒𐴞𐴘𐴥𐴠 𐴱𐴱

Sources : MPV