𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴝𐴏𐴥𐴞𐴊𐴤𐴡𐴚 𐴀𐴠𐴓𐴝𐴑𐴝𐴃 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴝𐴘 𐴊𐴞𐴀𐴞 𐴁𐴦𐴝𐴊𐴠 𐴈𐴥𐴝𐴕𐴝 𐴔𐴝𐴒𐴠𐴌 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴝𐴏𐴥𐴞𐴊𐴤𐴡𐴚 𐴐𐴤𐴡𐴀𐴡𐴌 𐴀𐴠𐴓𐴝𐴑𐴝𐴃 , 𐴛𐴡𐴚 𐴁𐴝𐴚 𐴒𐴞𐴌𐴥𐴞 𐴌𐴟𐴇𐴝𐴙𐴚𐴒𐴙𐴝
𐴉𐴝𐴌𐴝 𐴀𐴝𐴌 𐴀𐴥𐴝𐴕𐴥𐴡𐴑 𐴂𐴡𐴌𐴝𐴚 , 𐴉𐴝𐴌𐴝 𐴀𐴞𐴀𐴞𐴕𐴡𐴃𐴧𐴤𐴟 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴦𐴠𐴓𐴝𐴘 𐴊𐴞𐴀𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 , 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴡𐴓𐴡𐴌𐴥𐴠 𐴋𐴝𐴑𐴞 𐴀𐴝𐴕𐴥𐴞 𐴁𐴦𐴝𐴊𐴠 , 𐴀𐴥𐴞𐴃𐴝𐴌𐴝𐴌 𐴀𐴥𐴝𐴃𐴤𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴝𐴘 𐴊𐴞𐴘𐴥𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴈𐴟𐴀𐴝𐴁𐴤𐴝𐴌 𐴊𐴧𐴠 , 𐴀𐴥𐴞𐴃𐴤𐴝𐴌𐴝𐴌 𐴃𐴧𐴟 𐴎𐴠𐴀𐴠𐴕 𐴒𐴡𐴌𐴥𐴞 𐴉𐴝𐴌𐴠 𐴐𐴤𐴡𐴃𐴝 𐴐𐴤𐴡𐴃𐴞 𐴁𐴤𐴝𐴃𐴡𐴌 𐴔𐴟𐴏𐴝 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴥𐴝𐴣𐴎𐴡𐴙𐴕𐴧𐴝 𐴁𐴞𐴀𐴞𐴕𐴧𐴝 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴱𐴱

𐴕𐴦𐴠𐴓𐴝𐴘 𐴊𐴞𐴘𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴌𐴠𐴂𐴟𐴄 𐴔𐴡𐴎𐴞𐴕 , 𐴒𐴡𐴃𐴡 𐴊𐴟𐴘 𐴊𐴞𐴕 𐴀𐴥𐴡𐴘𐴃𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴀𐴝𐴣𐴀𐴝𐴌𐴝𐴌 𐴉𐴝𐴌𐴝𐴃 𐴀𐴝𐴙𐴐𐴧𐴤𐴙𐴠 𐴱 𐴃𐴡𐴀𐴡𐴘 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴀𐴡𐴌 𐴊𐴧𐴠
𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴊𐴟𐴖𐴝𐴌𐴝 𐴓𐴝𐴌𐴥𐴝𐴘 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴀𐴝𐴣𐴀𐴝𐴌𐴝 𐴋𐴡𐴌𐴝𐴘𐴌 𐴊𐴧𐴠 𐴱 𐴀𐴥𐴠𐴃𐴡𐴓𐴧𐴝 𐴉𐴝𐴌𐴝 𐴀𐴞𐴀𐴞𐴕𐴡𐴌𐴥𐴠 𐴀𐴝𐴣𐴀𐴝𐴌𐴝𐴌 𐴃𐴧𐴤𐴟 𐴒𐴤𐴝𐴣𐴄𐴞 𐴁𐴝𐴕𐴝 𐴉𐴡𐴌𐴠𐴌 𐴁𐴡𐴓𐴞 𐴈𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴝𐴘 𐴊𐴞𐴘𐴥𐴠 𐴱𐴱

𐴕𐴡 𐴊𐴞𐴀𐴞𐴓𐴥𐴠 𐴃𐴟𐴣𐴖𐴥𐴝𐴣𐴌𐴥𐴝𐴌 𐴓𐴧𐴥𐴝 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴥𐴡𐴘𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴞𐴘𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌𐴑𐴝𐴕𐴡𐴃 𐴀𐴝𐴒𐴠 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴉𐴡𐴌𐴥𐴡𐴙𐴑𐴧𐴙𐴝 𐴏𐴥𐴡𐴓𐴧𐴟𐴑 𐴒𐴡𐴌𐴥𐴞 𐴀𐴝𐴘𐴧𐴥𐴠𐴌 𐴱 𐴀𐴝𐴌 𐴁𐴡𐴓𐴝𐴎𐴟𐴌𐴞 𐴒𐴡𐴗𐴌 𐴈𐴝𐴔 𐴒𐴡𐴌𐴥𐴝𐴁𐴤𐴝𐴌 𐴀𐴝𐴌 𐴕𐴞𐴎𐴠 𐴈𐴥𐴝𐴘𐴁𐴡𐴓𐴧𐴝 𐴕𐴥𐴝𐴘𐴊𐴠 𐴀𐴥𐴠𐴍𐴠 𐴈𐴥𐴝𐴕𐴝 𐴊𐴞𐴘𐴝 𐴁𐴝𐴌 𐴱 𐴀𐴠𐴕𐴋𐴞𐴓𐴧𐴝 𐴊𐴤𐴡𐴔𐴑𐴞 𐴀𐴥𐴡𐴑𐴧𐴡𐴓 𐴊𐴡𐴀𐴡𐴕𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴋𐴡𐴣𐴀𐴡𐴌 𐴔𐴡𐴏𐴞𐴁𐴡𐴃𐴡𐴃 𐴉𐴥𐴝𐴣𐴏𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴉𐴝𐴌𐴝𐴃𐴧𐴤𐴟 𐴃𐴤𐴡 𐴕𐴦𐴠𐴓𐴝𐴘 𐴊𐴞𐴘𐴥𐴠 𐴔𐴡𐴕𐴃𐴡𐴌 𐴀𐴠𐴊𐴤𐴟𐴒𐴧𐴟𐴕 𐴔𐴝𐴕𐴥𐴟𐴙𐴐𐴢 𐴈𐴡𐴕 𐴎𐴝𐴒𐴝𐴃 𐴎𐴝𐴘 𐴃𐴤𐴝𐴑𐴤𐴞𐴁𐴤𐴡 𐴱 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴁𐴡𐴕𐴊𐴡𐴁𐴡𐴏𐴢 𐴒𐴡𐴌𐴥𐴞 𐴕𐴥𐴡 𐴊𐴠𐴀𐴠𐴊𐴠 𐴘𐴥𐴝𐴀𐴝𐴕𐴡𐴌 𐴏𐴥𐴡𐴁𐴡𐴁𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴝𐴣𐴀𐴝𐴌𐴝 𐴈𐴡𐴍𐴥𐴠 𐴎𐴝𐴘𐴧𐴟𐴔 𐴈𐴡𐴍𐴥𐴠 𐴃𐴤𐴝𐴙𐴑𐴧𐴟𐴔 𐴈𐴡𐴀𐴡𐴘 𐴉𐴟𐴏𐴥𐴝𐴌 𐴒𐴡𐴙𐴅𐴧𐴤𐴙𐴠 𐴁𐴤𐴝𐴌 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘 𐴁𐴝𐴏𐴝 𐴑𐴠𐴀𐴠𐴔𐴡𐴃 𐴎𐴝𐴘 𐴃𐴤𐴝𐴑𐴤𐴡 𐴒𐴤𐴡𐴘 𐴁𐴡𐴓𐴞 𐴈𐴡𐴀𐴡𐴘 𐴅𐴟𐴖𐴝𐴁 𐴊𐴞𐴘𐴥𐴠 𐴱 𐴘𐴥𐴝𐴀𐴝𐴌 𐴁𐴦𐴝𐴊𐴠 𐴎𐴠𐴍𐴥𐴠 𐴎𐴝𐴘 𐴃𐴤𐴝𐴑𐴤𐴞𐴁𐴤𐴝 𐴘𐴥𐴝𐴀𐴝𐴕𐴃𐴟 𐴉𐴡𐴙𐴃𐴧𐴡 𐴊𐴞𐴕 𐴀𐴥𐴝𐴣𐴎𐴡𐴙𐴕𐴧𐴝 𐴁𐴞𐴀𐴞𐴕𐴧𐴝 𐴊𐴟𐴘 𐴀𐴡𐴑𐴃𐴤𐴡 𐴰 𐴰 𐴷 𐴎𐴡𐴕 𐴔𐴝𐴙𐴕𐴐𐴤𐴡𐴌 𐴈𐴥𐴝𐴕𐴝 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞𐴃 𐴉𐴡𐴣𐴀𐴡𐴏𐴝𐴘 𐴊𐴞𐴘𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

Sources : MPV