𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘 𐴃𐴟𐴓𐴥𐴞 𐴀𐴝𐴕𐴥𐴡𐴕𐴥𐴡𐴌 𐴎𐴡𐴌𐴞𐴘𐴝 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴖𐴦𐴝𐴙𐴆𐴧𐴤𐴙𐴝 𐴔𐴡𐴌𐴠𐴌 , 𐴌𐴝𐴏𐴧𐴝𐴃 𐴔𐴝𐴒𐴠𐴌 𐴱𐴱

𐴀𐴝𐴌𐴑𐴝𐴕 , 𐴓𐴝𐴌𐴥𐴘𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴝𐴀𐴝𐴌𐴡𐴌 𐴉𐴝𐴌𐴝 𐴀𐴥𐴡𐴑𐴧𐴡𐴓𐴡𐴃𐴧𐴟 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴀𐴝𐴘 𐴀𐴞𐴐𐴑𐴟𐴓 𐴀𐴥𐴡𐴑𐴧𐴡𐴓𐴡𐴃 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴤𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 , 𐴈𐴥𐴝𐴕𐴝𐴌 𐴌𐴡𐴐𐴤𐴡𐴊 𐴉𐴥𐴟𐴌𐴝𐴘 𐴎𐴡𐴀𐴡𐴕𐴠 𐴖𐴦𐴝𐴙𐴆𐴧𐴤𐴙𐴝 𐴃𐴤𐴝𐴑𐴤𐴠𐴌 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴏𐴥𐴝𐴀𐴝𐴌𐴝 𐴓𐴡𐴘 𐴁𐴦𐴝𐴊𐴠 𐴐𐴤𐴟𐴌𐴟 𐴐𐴤𐴟𐴌𐴟𐴃 𐴊𐴝𐴕 𐴈𐴥𐴡𐴌𐴝𐴃 𐴊𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴡𐴓𐴠 𐴔𐴡𐴊𐴡𐴃 𐴒𐴡𐴙𐴅𐴧𐴤𐴞𐴀𐴞𐴓 , 𐴁𐴦𐴝𐴊𐴠 𐴁𐴝𐴀𐴝𐴌𐴃𐴧𐴟 𐴀𐴝𐴙𐴐𐴧𐴤𐴙𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡 𐴁𐴦𐴠𐴐𐴢 𐴀𐴥𐴡𐴘𐴧𐴠 𐴀𐴝𐴌 𐴄𐴡𐴀𐴡𐴕𐴡𐴌 𐴔𐴝𐴙𐴕𐴐𐴤𐴡𐴌 𐴕𐴞𐴎𐴡𐴌 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁𐴢 𐴀𐴥𐴡𐴀𐴡𐴕𐴠 𐴔𐴡𐴊𐴡𐴃 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 , 𐴀𐴥𐴠 𐴀𐴝𐴁𐴡𐴏𐴃𐴤𐴝𐴃 𐴈𐴥𐴝𐴕𐴝 𐴀𐴠𐴑 𐴀𐴡𐴑𐴃𐴤𐴡 𐴈𐴥𐴝𐴘 𐴀𐴝𐴌 𐴀𐴠𐴑 𐴀𐴡𐴑𐴃𐴤𐴡 𐴁𐴝𐴏𐴝𐴌 , 𐴀𐴠𐴈𐴥𐴡𐴕 𐴀𐴠𐴁𐴧𐴠𐴌𐴠 𐴁𐴠𐴒𐴧𐴤𐴞𐴕 𐴉𐴥𐴟𐴌𐴝𐴘 𐴎𐴡𐴀𐴡𐴕𐴠 , 𐴌𐴝𐴏𐴧𐴝𐴃 𐴕𐴦𐴠𐴓𐴞 𐴀𐴝𐴌 𐴒𐴤𐴡𐴌𐴠 𐴒𐴤𐴡𐴌𐴠 𐴎𐴝𐴘 𐴔𐴝𐴒𐴞 𐴈𐴥𐴝𐴀𐴝 𐴉𐴡𐴌𐴠𐴌 𐴁𐴡𐴓𐴞 , 𐴄𐴡𐴀𐴡𐴕𐴡𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴖𐴡𐴌𐴠 𐴓𐴝𐴌𐴥𐴝𐴘 𐴁𐴝𐴏𐴝 𐴔𐴝𐴕𐴥𐴟𐴙𐴐𐴢 𐴃𐴤𐴝𐴑𐴤𐴠𐴊𐴠 𐴎𐴝𐴒𐴝𐴌 𐴋𐴤𐴝𐴑𐴤𐴠 𐴉𐴝𐴏𐴝𐴌𐴠 𐴏𐴦𐴡𐴛 𐴃𐴤𐴙𐴑𐴧𐴤𐴙𐴠𐴊𐴠 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴕𐴡 𐴊𐴠𐴑𐴤𐴠 𐴉𐴥𐴝𐴀𐴝𐴕 𐴒𐴡𐴌𐴥𐴞 𐴔𐴝𐴒𐴞𐴃𐴤𐴡 𐴕𐴦𐴠𐴓𐴝 𐴉𐴡𐴌𐴠 , 𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴊𐴠𐴑𐴤𐴞𐴓𐴥𐴠 𐴀𐴟𐴎𐴡𐴌 𐴊𐴞𐴀𐴞 𐴁𐴦𐴝𐴊𐴠 𐴎𐴞𐴛𐴥𐴡𐴃 𐴃𐴤𐴠𐴑𐴤𐴠 𐴀𐴥𐴞𐴛𐴡𐴃 𐴉𐴡𐴣𐴀𐴡𐴏𐴝𐴘 𐴊𐴠𐴀𐴠 , 𐴀𐴠𐴈𐴥𐴡𐴕 𐴊𐴞𐴕𐴡𐴃𐴧𐴤𐴟 𐴊𐴞𐴕𐴠 𐴇𐴥𐴝𐴓𐴡𐴃 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘 , 𐴈𐴥𐴝𐴏𐴢 𐴒𐴡𐴌𐴥𐴞 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕𐴊𐴤𐴡𐴌 𐴇𐴥𐴝𐴓𐴡𐴃 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 , 𐴀𐴝𐴌𐴑𐴝𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴀𐴡𐴕𐴡𐴌𐴥𐴝𐴌 𐴈𐴝𐴣𐴏𐴥𐴠 𐴊𐴟𐴀𐴝𐴌 𐴀𐴝𐴌𐴡𐴏𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴓𐴝𐴌𐴥𐴝𐴘 𐴁𐴠𐴐𐴤𐴞 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴀𐴝𐴌𐴑𐴝𐴕𐴡𐴃 𐴏𐴟𐴌𐴞 , 𐴁𐴟𐴌𐴝𐴘 , 𐴋𐴝𐴣𐴈𐴝𐴃𐴞 , 𐴎𐴠𐴂𐴢 𐴔𐴝𐴌𐴝 , 𐴀𐴞𐴀𐴞𐴕 𐴁𐴠𐴐𐴤𐴞 𐴁𐴝𐴌𐴥𐴞 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴌 𐴋𐴡𐴣𐴀𐴡𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘 𐴐𐴤𐴟𐴌𐴟 𐴒𐴡𐴌𐴥𐴡𐴕𐴠 , 𐴓𐴝𐴌𐴥𐴝𐴘 𐴁𐴠𐴐𐴤𐴞 𐴀𐴥𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴓𐴝𐴌𐴥𐴝𐴘 𐴁𐴝𐴏𐴝 𐴔𐴝𐴕𐴥𐴟𐴙𐴐𐴢 𐴌𐴞𐴉𐴟𐴎𐴞 𐴀𐴥𐴞𐴏𐴝𐴉𐴠 𐴁𐴠𐴐𐴤𐴞 𐴀𐴥𐴡𐴀𐴡𐴕𐴡𐴌 𐴏𐴥𐴡𐴁𐴡𐴁𐴠 , 𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴁𐴦𐴠𐴐𐴢 𐴁𐴤𐴝𐴑 𐴈𐴝𐴔 𐴏𐴥𐴝𐴌𐴥𐴝 𐴀𐴥𐴡𐴀𐴡𐴕𐴠 , 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑𐴧𐴤𐴡𐴃 𐴉𐴡𐴌𐴞 𐴎𐴡𐴀𐴡𐴕𐴠 𐴏𐴟𐴌𐴞 , 𐴋𐴝𐴣𐴈𐴝𐴃𐴞 , 𐴁𐴟𐴌𐴝𐴘 , 𐴎𐴠𐴂𐴢 𐴔𐴝𐴌𐴝 ,𐴀𐴞𐴀𐴞𐴕 𐴁𐴝𐴌𐴥𐴞 𐴒𐴞𐴘𐴥𐴡𐴘𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴓𐴝𐴌𐴥𐴝𐴘𐴌 𐴈𐴝𐴓𐴠 𐴀𐴝𐴌𐴑𐴝𐴕𐴡𐴌 𐴐𐴤𐴡𐴊𐴡𐴌 𐴀𐴥𐴡𐴑𐴧𐴡𐴓 𐴃𐴟𐴖𐴝𐴚𐴒𐴡𐴌 𐴀𐴥𐴡𐴑𐴧𐴡𐴓𐴠 , 𐴈𐴝𐴔 𐴃𐴤𐴞𐴘𐴝 𐴒𐴡𐴌𐴥𐴝𐴘 𐴁𐴡𐴕 𐴒𐴡𐴌𐴥𐴞 𐴓𐴝𐴌𐴥𐴝𐴘 𐴁𐴝𐴏𐴝 𐴀𐴥𐴞𐴏𐴝𐴉𐴠 𐴀𐴡𐴙𐴕𐴧𐴡 𐴀𐴡𐴙𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴃 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴀𐴥𐴠𐴃𐴡𐴓𐴧𐴝 𐴐𐴤𐴡𐴔𐴝𐴎𐴡𐴌 𐴔𐴝𐴕𐴥𐴟𐴙𐴐𐴢 𐴈𐴝𐴔 𐴏𐴥𐴝𐴌𐴥𐴝 𐴀𐴥𐴡𐴘 𐴒𐴞𐴘𐴥𐴡𐴘 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴅𐴟𐴖𐴝𐴕 𐴉𐴟𐴖𐴝𐴙𐴕𐴊𐴤𐴡𐴌𐴥𐴠 𐴁𐴡𐴓𐴝𐴎𐴟𐴌𐴞 𐴓𐴝𐴌𐴥𐴘𐴌 𐴉𐴥𐴡𐴗𐴏𐴢 𐴁𐴝𐴕𐴝𐴌 𐴊𐴧𐴠 𐴀𐴥𐴠𐴃𐴤𐴡𐴓𐴧𐴝 𐴉𐴝𐴌𐴝𐴃 𐴁𐴦𐴠𐴐𐴢 𐴁𐴤𐴝𐴑 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴝𐴏𐴥𐴠𐴊𐴠 𐴀𐴥𐴠𐴃𐴤𐴡𐴓𐴧𐴝 𐴀𐴥𐴝𐴓 𐴆𐴝𐴐𐴡𐴌 𐴈𐴝𐴔 𐴀𐴥𐴡 𐴕𐴥𐴝𐴘 , 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴝𐴌𐴑𐴝𐴕𐴡𐴃 𐴒𐴤𐴡𐴓𐴠𐴌𐴊𐴧𐴠 𐴔𐴝𐴓𐴡𐴃 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴄𐴠𐴑𐴏𐴥𐴡 𐴓𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴔𐴝𐴓𐴡𐴌 𐴊𐴝𐴔 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴁𐴝𐴌𐴥𐴝 𐴊𐴠 𐴘𐴥𐴝𐴀𐴝𐴕 , 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴏𐴠𐴇𐴥𐴠𐴃𐴡𐴌 𐴇𐴥𐴠𐴉𐴝𐴎𐴡𐴃 𐴒𐴡𐴌𐴥𐴝 𐴔𐴡𐴐𐴑𐴞𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠 ( 𐴀𐴠𐴔 𐴀𐴠𐴏𐴢 𐴀𐴠𐴉𐴢 ) 𐴱𐴱

𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃 𐴊𐴝𐴁𐴝𐴘𐴌 𐴔𐴟𐴃𐴦𐴝𐴓𐴧𐴠𐴑 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴃 𐴒𐴡𐴌𐴥𐴝 , 𐴁𐴤𐴟𐴏𐴞𐴊𐴤𐴡𐴚𐴡𐴃 ( 𐴀𐴠𐴔 𐴀𐴠𐴏𐴢 𐴀𐴠𐴉𐴢 ) 𐴃𐴡𐴕𐴎𐴞𐴔𐴡𐴌 𐴀𐴡𐴉𐴥𐴞𐴏𐴢 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴘𐴥𐴝𐴀𐴝𐴌 𐴁𐴦𐴝𐴊𐴠 , 𐴒𐴡𐴃𐴡 𐴅𐴟𐴕 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃 𐴓𐴡𐴃𐴞 𐴔𐴞𐴘𐴝𐴊 𐴊𐴞𐴘𐴝 𐴏𐴥𐴝𐴌𐴥𐴝 𐴁𐴡𐴕 𐴒𐴡𐴌𐴥𐴞 𐴊𐴞𐴘𐴥𐴠 𐴁𐴡𐴓𐴞 , 𐴐𐴤𐴞𐴔𐴝𐴌 𐴂𐴝𐴁𐴡𐴕𐴊𐴞 𐴏𐴥𐴝𐴌𐴥𐴝 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴡𐴌 𐴋𐴝𐴀𐴝𐴘𐴌 ( 𐴀𐴠𐴔 𐴀𐴠𐴏𐴢 𐴀𐴠𐴉𐴢 ) 𐴃𐴡𐴕𐴎𐴞𐴔𐴠 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴀𐴝𐴑𐴧𐴙𐴝𐴁𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴄𐴞𐴛𐴝 𐴓𐴡𐴀𐴡𐴌 𐴱𐴱

𐴀𐴝𐴌𐴑𐴝𐴕 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴀𐴝𐴙𐴑𐴧𐴙𐴝𐴁𐴡𐴃 𐴒𐴤𐴡𐴓𐴝 𐴕𐴦𐴠𐴓𐴝 𐴌𐴝𐴏𐴧𐴝 𐴁𐴡𐴕 𐴒𐴡𐴌𐴥𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴀𐴝𐴙𐴕𐴞 𐴃𐴡𐴖𐴌𐴠 𐴊𐴤𐴡𐴌𐴞 𐴊𐴤𐴡𐴌𐴞 𐴄𐴞𐴛𐴝 𐴓𐴡𐴀𐴡𐴌 𐴊𐴧𐴠 𐴎𐴝𐴕𐴝 𐴒𐴞𐴘𐴥𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴀𐴠𐴑𐴀𐴡𐴔 𐴇𐴥𐴝𐴉𐴃𐴝𐴃 𐴑𐴟𐴕 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝 , 𐴏𐴥𐴝𐴌𐴟𐴚 𐴎𐴤𐴟 𐴌𐴥𐴠𐴑𐴧𐴤𐴗𐴝 , 𐴔𐴥𐴟𐴌𐴥𐴟 𐴏𐴟 𐴒𐴞𐴌𐴥𐴞 𐴌𐴥𐴠𐴑𐴧𐴤𐴗𐴝 𐴀𐴝𐴌 𐴄𐴤𐴠𐴕 𐴁𐴝𐴚 𐴌𐴥𐴝𐴚 𐴌𐴥𐴠𐴑𐴧𐴤𐴗𐴝 , 𐴀𐴞𐴀𐴞𐴕𐴡𐴃𐴧𐴤𐴟 𐴰 𐴱 𐴎𐴡𐴕 𐴓𐴡𐴃𐴞 𐴔𐴝𐴕𐴥𐴟𐴙𐴐𐴢 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 , 𐴎𐴡𐴕 𐴉𐴞𐴏𐴥𐴠 𐴰 𐴳 𐴇𐴥𐴝𐴎𐴝𐴌 𐴀𐴥𐴡𐴘𐴃𐴠 𐴰 𐴵 𐴇𐴥𐴝𐴎𐴝𐴌 𐴓𐴡𐴃𐴞 𐴄𐴞𐴛𐴝 𐴊𐴞𐴀𐴞𐴓𐴥𐴠 𐴀𐴠𐴌𐴞 𐴊𐴞𐴘𐴟𐴔 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴀𐴝𐴙𐴑𐴧𐴙𐴝𐴁 𐴀𐴝𐴌 𐴂𐴟𐴕𐴧𐴥𐴝 𐴅𐴤𐴗𐴠𐴚𐴡𐴃 𐴀𐴥𐴝𐴓 𐴆𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴒𐴢 𐴁𐴝𐴒𐴞 𐴀𐴝𐴌 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴔𐴝𐴎𐴤𐴠 𐴑𐴤𐴟𐴁𐴢 𐴎𐴟𐴌𐴠 𐴐𐴤𐴟𐴌𐴠 𐴓𐴝𐴌𐴥𐴝𐴘 𐴏𐴡𐴓𐴡𐴕𐴡𐴌 𐴎𐴡𐴌𐴞𐴘𐴝 , 𐴀𐴝𐴙𐴑𐴧𐴙𐴝𐴁𐴢 𐴀𐴝𐴌 𐴂𐴟𐴕𐴧𐴥𐴝 𐴅𐴤𐴗𐴠𐴚 𐴀𐴠𐴓𐴝𐴑𐴝𐴌 𐴀𐴥𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴠 𐴊𐴤𐴝𐴕𐴡𐴌 𐴆𐴝𐴐𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴥𐴝𐴓 𐴏𐴡𐴀𐴡𐴘 𐴕𐴡 𐴉𐴝𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴙𐴑𐴧𐴙𐴝𐴁𐴢 𐴀𐴝𐴌 𐴂𐴟𐴕𐴧𐴥𐴝 𐴅𐴤𐴗𐴠𐴕 𐴀𐴠𐴓𐴝𐴑𐴝𐴌 𐴓𐴡𐴒𐴢 𐴁𐴤𐴡𐴒𐴢 𐴰 𐴳 𐴐𐴤𐴝𐴕 𐴓𐴡𐴃𐴞 𐴉𐴝𐴌𐴝𐴃𐴧𐴤𐴟 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓 , 𐴓𐴝𐴌𐴥𐴝𐴘𐴃𐴧𐴤𐴟 𐴁𐴝𐴏𐴞𐴁𐴤𐴡𐴓𐴧𐴝 𐴒𐴤𐴡𐴌 𐴁𐴝𐴌𐴞 𐴎𐴝𐴒𐴝 𐴎𐴡𐴁𐴞𐴕 𐴉𐴥𐴠𐴓𐴥𐴝𐴘 𐴀𐴡𐴙𐴕𐴧𐴡 𐴉𐴝𐴌𐴝𐴌 𐴀𐴥𐴞𐴑𐴧𐴙𐴝 𐴐𐴤𐴡𐴌𐴞 𐴒𐴞𐴘𐴥𐴠 𐴒𐴤𐴡𐴘 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴂𐴟𐴕𐴧𐴥𐴝 𐴅𐴤𐴗𐴠𐴚𐴡𐴌 𐴀𐴠𐴓𐴝𐴑𐴝𐴃 𐴓𐴝𐴑𐴤𐴡𐴌 𐴖𐴡𐴌𐴠 𐴀𐴠𐴑𐴤𐴝 𐴎𐴡𐴁𐴞𐴕 𐴀𐴝𐴏𐴥𐴠 , 𐴎𐴡𐴊𐴞 𐴀𐴠 𐴁𐴡𐴏𐴥𐴡𐴌 𐴀𐴥𐴝𐴓 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞𐴓𐴥𐴠 , 𐴏𐴥𐴝𐴔𐴧𐴡𐴌 𐴁𐴡𐴏𐴥𐴡𐴌 𐴑𐴞 𐴈𐴥𐴝𐴘 𐴊𐴞𐴕 𐴈𐴝𐴍𐴝𐴘𐴁𐴤𐴡 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴏𐴞𐴕𐴃𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴏𐴟𐴔𐴥𐴝𐴓𐴞𐴘𐴥𐴝𐴌 𐴌𐴝𐴎𐴊𐴤𐴝𐴕𐴃𐴞 𐴒𐴝𐴌𐴥𐴞 𐴁𐴟𐴔 𐴉𐴥𐴟𐴍𐴥𐴞 𐴵 𐴎𐴡𐴕𐴡𐴌 𐴔𐴡𐴗𐴃 𐴰 𐴲 𐴎𐴡𐴕 𐴒𐴤𐴝𐴙𐴓 𐴱𐴱

𐴏𐴟𐴔𐴥𐴝𐴓𐴞𐴘𐴥𐴝 𐴊𐴠𐴐𐴤𐴡𐴌 𐴌𐴝𐴎𐴊𐴤𐴝𐴕𐴞 𐴔𐴟𐴒𐴝 𐴊𐴞𐴐𐴤𐴟𐴃 , 𐴈𐴥𐴝𐴘𐴁𐴝𐴌 𐴔𐴝𐴓𐴡𐴌 𐴊𐴟𐴖𐴝𐴕 𐴀𐴠𐴑𐴧𐴤𐴝𐴕𐴡𐴌 𐴁𐴝𐴀𐴝𐴌 𐴑𐴤𐴟𐴓𐴠 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴴 𐴱 𐴃𐴝𐴌𐴥𐴞𐴑𐴡𐴃 𐴌𐴝𐴃𐴞𐴘𐴝 𐴒𐴝𐴌𐴥𐴞 𐴁𐴟𐴔 𐴀𐴟𐴒𐴧𐴤𐴗𐴝 𐴉𐴥𐴟𐴍𐴞𐴘𐴡𐴌𐴥𐴠 𐴵 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴀𐴥𐴡𐴊𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴰 𐴲 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴒𐴤𐴡𐴎𐴧𐴝 𐴏𐴠𐴙𐴉𐴢 𐴎𐴟𐴕 𐴀𐴝𐴌 𐴀𐴡𐴙𐴕𐴧𐴡 𐴎𐴝𐴒𐴝 𐴔𐴞𐴓𐴝𐴘 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴔𐴓𐴝𐴃 𐴰 𐴶 𐴎𐴡𐴕𐴡𐴌 𐴁𐴦𐴠𐴐𐴢 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴱𐴱

𐴊𐴡𐴀𐴡𐴙𐴕 𐴀𐴝𐴌 𐴔𐴝𐴎𐴤𐴡𐴌 𐴒𐴤𐴡𐴎𐴧𐴝𐴌 𐴏𐴠𐴙𐴉𐴢 𐴎𐴟𐴕 𐴐𐴤𐴡𐴣𐴀𐴡 𐴀𐴝𐴌𐴀𐴥𐴡 𐴀𐴡𐴙𐴕𐴧𐴡 𐴎𐴝𐴒𐴝 𐴀𐴥𐴡𐴑𐴧𐴡𐴓𐴡𐴃 , 𐴔𐴡𐴚𐴒𐴡𐴓 𐴁𐴝𐴌𐴠 𐴒𐴡𐴃𐴡 𐴌𐴝𐴙𐴃𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴀𐴞𐴏𐴌𐴦𐴝𐴙𐴓𐴡𐴌 𐴇𐴥𐴝𐴁𐴝𐴀𐴞 𐴇𐴥𐴝𐴔𐴓𐴝𐴌 𐴎𐴡𐴌𐴞𐴘𐴝 , 𐴰 𐴶 𐴎𐴡𐴕𐴡𐴌 𐴁𐴦𐴠𐴐𐴢 𐴉𐴥𐴡𐴓𐴡𐴏𐴃𐴞𐴕𐴞 𐴐𐴤𐴡𐴇𐴞𐴊 𐴀𐴥𐴡𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱