𐴔𐴡𐴚𐴋𐴤𐴟 𐴵 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴒𐴟𐴓𐴞 𐴔𐴝𐴌𐴞 𐴌𐴟𐴇𐴝𐴙𐴚𐴒𐴙𐴝𐴀𐴠𐴑 𐴎𐴡𐴕 𐴒𐴤𐴝𐴙𐴓 𐴒𐴡𐴙𐴅𐴧𐴤𐴙𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴵 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 , 𐴊𐴦𐴟𐴛𐴅𐴧𐴙𐴝 𐴀𐴝𐴕𐴃𐴝𐴎𐴠 𐴰 𐴳 : 𐴲 𐴱 𐴁𐴝𐴎𐴠 𐴊𐴟𐴖𐴝𐴕 𐴀𐴠𐴑𐴧𐴤𐴝𐴕𐴡𐴌 𐴔𐴟𐴀𐴟𐴕𐴃𐴟 𐴐𐴤𐴝𐴕𐴃𐴞𐴌 𐴏𐴥𐴝𐴣𐴀𐴝𐴃𐴠 𐴁𐴡𐴀𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴔𐴡𐴌𐴡𐴊 𐴀𐴠𐴑 𐴎𐴡𐴕𐴡𐴌𐴥𐴠 , 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴏𐴝𐴀𐴝𐴘 𐴏𐴞𐴃𐴞 𐴒𐴟𐴓𐴞 𐴔𐴝𐴌𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴀𐴝𐴒𐴤𐴝𐴃 𐴒𐴡𐴙𐴅𐴧𐴤𐴙𐴠𐴊𐴠 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴡𐴌 𐴃𐴡𐴌𐴉𐴥𐴡𐴌 𐴃𐴧𐴟 𐴊𐴤𐴡𐴌𐴔𐴞𐴘𐴡 𐴒𐴡𐴃𐴝 𐴎𐴝𐴃𐴞𐴘𐴡 𐴒𐴡𐴃𐴝 𐴇𐴥𐴝𐴏𐴡𐴊 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴓𐴡𐴘 𐴈𐴡𐴙𐴅𐴧𐴙𐴝 𐴀𐴥𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴈𐴝𐴔 𐴀𐴥𐴡𐴑𐴧𐴡𐴓 𐴉𐴡𐴙𐴃𐴧𐴡 𐴊𐴞𐴕 𐴁𐴝𐴌𐴥𐴝𐴃 𐴀𐴝𐴏𐴥𐴠 , 𐴔𐴡𐴚𐴋𐴤𐴟𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴉𐴝𐴌𐴥𐴞𐴓𐴥𐴠 𐴁𐴤𐴟𐴏𐴞𐴊𐴤𐴡𐴚 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴁𐴝𐴌𐴞 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴀𐴝𐴙𐴓𐴊𐴠 𐴀𐴥𐴠𐴕𐴋𐴞𐴓𐴧𐴝 , 𐴔𐴡𐴚𐴋𐴤𐴟𐴌 𐴄𐴡𐴀𐴡𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌 𐴁𐴝𐴌𐴞 𐴘𐴥𐴡 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴁𐴤𐴡 𐴁𐴡𐴓𐴞 , 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴠𐴐𐴤𐴞 𐴏𐴞𐴕𐴃𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 , 𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴞𐴋𐴞𐴘𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴣𐴀𐴝𐴌𐴝 𐴎𐴝𐴃 𐴊𐴤𐴡𐴌𐴔𐴡 𐴉𐴡𐴌𐴥𐴡𐴑 𐴕𐴡 𐴒𐴡𐴌𐴥𐴞 , 𐴁𐴠𐴒𐴧𐴤𐴟𐴕 𐴓𐴡𐴘 𐴀𐴠𐴑 𐴁𐴡𐴌𐴝𐴁𐴡𐴌 𐴃𐴦𐴝𐴓𐴧𐴟𐴑 𐴒𐴡𐴌𐴥𐴞 𐴁𐴡𐴓𐴞 𐴈𐴡𐴘𐴓𐴥𐴠 𐴘𐴥𐴡 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴡𐴌 𐴇𐴥𐴝𐴑𐴞𐴑𐴡𐴃 𐴀𐴡𐴙𐴕𐴧𐴡 𐴋𐴦𐴡𐴙𐴓𐴧𐴝 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴘𐴠 𐴔𐴡𐴚𐴋𐴤𐴟𐴃 𐴊𐴤𐴡𐴔𐴑𐴞 𐴊𐴞𐴀𐴞 𐴁𐴡𐴓𐴝𐴎𐴟𐴌𐴞 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴝𐴘𐴁𐴡𐴓𐴧𐴥𐴝 𐴌𐴟𐴇𐴝𐴙𐴚𐴒𐴙𐴝𐴌𐴥𐴠 𐴎𐴡𐴔𐴝 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴃 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌 𐴁𐴝𐴀𐴝𐴌𐴃𐴧𐴟 𐴓𐴝𐴌𐴥𐴝𐴘𐴌 𐴋𐴡𐴌𐴡𐴃𐴧𐴤𐴟 𐴁𐴝𐴏𐴞 𐴁𐴤𐴡𐴓𐴧𐴝 , 𐴄𐴡𐴀𐴡𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴞 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴅𐴟𐴖𐴝𐴕 𐴉𐴟𐴖𐴝𐴙𐴕𐴊𐴤𐴡𐴌𐴠 , 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴓𐴡𐴘 𐴔𐴞𐴓𐴞 , 𐴔𐴠𐴓𐴠𐴄𐴠𐴌𐴞𐴃 𐴒𐴤𐴡𐴓𐴞𐴁𐴤𐴡𐴓𐴧𐴝 𐴁𐴡𐴓𐴝𐴎𐴟𐴌𐴞 𐴊𐴤𐴡𐴔𐴑𐴞 𐴊𐴞𐴀𐴞 𐴋𐴝𐴑𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 , 𐴕𐴡 𐴎𐴝𐴘𐴓𐴥𐴠 𐴒𐴤𐴡𐴌𐴒𐴟𐴐𐴧𐴞 𐴁𐴠𐴒𐴧𐴤𐴟𐴕 𐴁𐴝𐴣𐴊𐴤𐴞 𐴓𐴡𐴘 𐴎𐴝𐴘𐴧𐴥𐴟𐴔 𐴁𐴤𐴡𐴘 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴠𐴀𐴠𐴌 𐴁𐴡𐴓𐴞 , 𐴔𐴡𐴚𐴋𐴤𐴟𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴤𐴟𐴏𐴞𐴊𐴤𐴡𐴚𐴡𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴌𐴥𐴝𐴘𐴌 𐴋𐴡𐴌𐴠 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴞 𐴒𐴞𐴀𐴞𐴓 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴎𐴡𐴌 𐴉𐴝𐴌𐴝𐴃 𐴀𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴕𐴡 𐴊𐴠𐴀𐴠𐴌 𐴱𐴱

𐴒𐴡𐴃𐴡 𐴔𐴠 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴡𐴃 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴡𐴑𐴟𐴔 𐴓𐴡𐴘 𐴕𐴞𐴎𐴡𐴌 𐴉𐴝𐴌𐴝 , 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴑𐴝𐴌 / 𐴔𐴡𐴌𐴥𐴡𐴚 𐴕𐴥𐴝 , 𐴑𐴝𐴙𐴅𐴧𐴤𐴙𐴝 𐴂𐴥𐴝 , 𐴁𐴝𐴒𐴧𐴤𐴟𐴕𐴥𐴝 , 𐴓𐴥𐴝𐴖𐴥𐴝𐴋𐴤𐴝 𐴂𐴡𐴌𐴝𐴚𐴆𐴙𐴠 𐴒𐴤𐴗𐴝𐴚 , 𐴎𐴝𐴒𐴝 𐴀𐴞𐴀𐴞𐴕𐴡𐴃𐴧𐴤𐴟 𐴕𐴦𐴠𐴓𐴞 𐴒𐴞𐴀𐴞𐴓 𐴒𐴤𐴡𐴘𐴊𐴠 , 𐴓𐴝𐴌𐴥𐴝𐴘 𐴁𐴝𐴏𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴝𐴙𐴅𐴧𐴙𐴝 𐴃𐴤𐴡𐴀𐴡𐴃 𐴕𐴞𐴎𐴡𐴌 𐴔𐴟𐴓𐴥𐴝 𐴎𐴝𐴒𐴝𐴃 𐴉𐴝𐴌𐴝𐴃 𐴖𐴝𐴉𐴠𐴏𐴢 𐴀𐴝𐴘𐴁𐴤𐴝𐴌 𐴀𐴠𐴅𐴝𐴎𐴡𐴃 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴖𐴡𐴌𐴠 𐴈𐴟𐴀𐴥𐴝 𐴒𐴞𐴘𐴠𐴊𐴠 𐴉𐴝𐴌𐴝 𐴀𐴥𐴞𐴀𐴞𐴕𐴡𐴌 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴑𐴧𐴤𐴙𐴝 𐴀𐴠𐴑 𐴋𐴝𐴀𐴝𐴘 𐴀𐴟𐴙𐴑𐴧𐴤𐴙𐴝 𐴀𐴠𐴑 𐴋𐴝𐴀𐴝𐴘 , 𐴁𐴤𐴟𐴏𐴞𐴊𐴤𐴡𐴚 𐴀𐴠𐴓𐴝𐴑𐴝𐴌 𐴁𐴤𐴟𐴃𐴤𐴡𐴌𐴠 𐴏𐴥𐴝𐴀𐴝𐴌𐴝 𐴓𐴡𐴘 𐴃𐴤𐴝𐴑𐴤𐴝 𐴉𐴡𐴌𐴠𐴌 , 𐴈𐴡𐴕𐴥𐴡 𐴋𐴦𐴡𐴙𐴓𐴧𐴝 𐴃𐴤𐴝𐴑𐴤𐴞 𐴉𐴝𐴌𐴥𐴞𐴓𐴥𐴠 𐴘𐴥𐴡 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴊𐴟𐴑𐴧𐴤𐴡𐴃 , 𐴀𐴠𐴑 𐴀𐴡𐴑𐴃𐴤𐴡 𐴈𐴥𐴝𐴘 𐴁𐴡𐴓𐴧𐴝 𐴉𐴝𐴘𐴓𐴠 𐴀𐴝𐴌 𐴀𐴠𐴑 𐴀𐴡𐴑𐴃𐴤𐴡 𐴕𐴡 𐴉𐴝𐴀𐴝𐴌 , 𐴀𐴠𐴑 𐴊𐴞𐴕 𐴈𐴥𐴝𐴘𐴁𐴡𐴓𐴧𐴝 𐴉𐴝𐴘𐴓𐴠 𐴀𐴝𐴌 𐴀𐴠𐴑 𐴊𐴞𐴕 𐴕𐴡 𐴉𐴝𐴀𐴝𐴌 , 𐴀𐴝𐴌 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴡𐴌𐴝 𐴏𐴡𐴌𐴝 𐴀𐴝𐴀𐴝 𐴎𐴝𐴀𐴝 𐴒𐴡𐴙𐴃𐴧𐴤𐴡 𐴕𐴡 𐴊𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 , 𐴔𐴡𐴏𐴞𐴁𐴡𐴃𐴡𐴌 𐴀𐴡𐴑𐴃𐴤𐴡𐴃 𐴏𐴥𐴞𐴌𐴥𐴝 𐴏𐴥𐴞𐴌𐴥𐴝 𐴀𐴥𐴡𐴘 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴀𐴠𐴑 𐴒𐴤𐴡𐴌𐴒𐴟𐴐𐴧𐴞𐴌 𐴁𐴤𐴟𐴃𐴤𐴡𐴌𐴠 𐴀𐴠𐴑 𐴎𐴡𐴕 𐴀𐴠𐴑 𐴔𐴞𐴑𐴧𐴤𐴙𐴝 𐴀𐴝𐴌 𐴀𐴠𐴑 𐴎𐴡𐴕 𐴀𐴝𐴌 𐴀𐴠𐴑 𐴔𐴞𐴑𐴧𐴤𐴙𐴝 𐴀𐴥𐴡𐴘 𐴒𐴞𐴘𐴥𐴡𐴘𐴊𐴠 𐴀𐴥𐴟𐴀𐴟𐴕 𐴊𐴡𐴓𐴝 𐴀𐴥𐴡𐴘 𐴕𐴡 𐴉𐴝𐴌𐴥𐴠𐴌 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴒𐴙𐴝𐴌 𐴒𐴡𐴌𐴟 𐴏𐴥𐴡𐴀𐴡𐴓 𐴋𐴝𐴣𐴈𐴝𐴃𐴞 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃 𐴓𐴝𐴌𐴥𐴝𐴘𐴌 𐴋𐴡𐴌𐴠 𐴉𐴝𐴌𐴝 𐴏𐴥𐴝𐴌𐴥𐴞 𐴒𐴞𐴘𐴥𐴠 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴒𐴤𐴡𐴌𐴡𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 / 𐴒𐴡𐴌𐴟 , 𐴔𐴟𐴙𐴐𐴢 ,𐴏𐴥𐴡𐴀𐴡𐴓 , 𐴑𐴟𐴌𐴥𐴝 𐴀𐴥𐴝𐴣𐴆 𐴀𐴥𐴡𐴑𐴧𐴡𐴓 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝 𐴒𐴡𐴙𐴕𐴧𐴝 𐴉𐴝𐴌𐴝𐴌 𐴔𐴝𐴍𐴥𐴡𐴃 𐴀𐴝𐴕𐴥𐴞 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 , 𐴉𐴥𐴞𐴃𐴞𐴕 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴀𐴥𐴠𐴕𐴃𐴟 𐴑𐴠𐴙𐴏𐴧𐴥𐴟 𐴑𐴝𐴀𐴞𐴚 𐴄𐴡𐴚 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴃 𐴀𐴝𐴙𐴕𐴧𐴥𐴙𐴠 𐴊𐴠 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 , 𐴀𐴝𐴌 𐴑𐴠𐴙𐴏𐴧𐴥𐴟 𐴒𐴡𐴌𐴟 𐴏𐴥𐴡𐴀𐴡𐴓 𐴔𐴠𐴓𐴠𐴄𐴠𐴌𐴞 𐴘𐴠 𐴒𐴝𐴣𐴌𐴝𐴘𐴧𐴥𐴠𐴊𐴠 𐴔𐴝𐴀𐴝𐴙𐴕 𐴁𐴟𐴔 𐴉𐴥𐴟𐴍𐴝𐴘 𐴁𐴡𐴌𐴁𐴝𐴊 𐴒𐴡𐴌𐴥𐴡𐴕𐴡𐴃 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴁𐴡𐴓𐴞 𐴘𐴥𐴡 𐴉𐴝𐴌𐴝𐴌 𐴔𐴝𐴙𐴕𐴐𐴤𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴀𐴠𐴑 𐴎𐴡𐴕 𐴒𐴤𐴝𐴙𐴓 𐴀𐴥𐴡𐴘𐴧𐴠 𐴱𐴱

𐴀𐴝𐴌𐴑𐴝𐴕 , 𐴔𐴡𐴚𐴋𐴤𐴟 𐴇𐴥𐴡𐴌𐴞𐴃𐴟𐴓𐴝 𐴉𐴝𐴌𐴝𐴃𐴧𐴤𐴟 𐴒𐴤𐴡𐴌 𐴁𐴝𐴌𐴞 𐴏𐴥𐴝𐴌𐴥𐴞 𐴕𐴡𐴘𐴧𐴝 𐴉𐴝𐴌𐴝𐴃 𐴀𐴝𐴀𐴝𐴘 𐴃𐴤𐴝𐴑𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌 𐴃𐴟 , 𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃 , 𐴀𐴝𐴕𐴃𐴝𐴎𐴠 𐴰 𐴲 : 𐴱 𐴔𐴠𐴓𐴥𐴡𐴄𐴡𐴃 𐴔𐴝𐴎𐴤𐴠 𐴕𐴡𐴘𐴧𐴝 𐴉𐴝𐴌𐴝𐴌 𐴔𐴡𐴏𐴥𐴡𐴙𐴃𐴤𐴡𐴃 𐴕𐴟𐴖𐴥𐴝𐴏𐴢 𐴉𐴡𐴌𐴥𐴞 𐴁𐴤𐴡𐴓𐴧𐴝 𐴎𐴝𐴀𐴝𐴌 𐴊𐴧𐴠 / 𐴔𐴟𐴇𐴝𐴔𐴧𐴡𐴊 𐴏𐴦𐴝𐴁𐴠𐴌 𐴁𐴡𐴐𐴢 𐴱 𐴲 𐴁𐴡𐴏𐴥𐴡𐴌 ,𐴀𐴞𐴁𐴤𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴙𐴅𐴧𐴤𐴙𐴠𐴊𐴠 𐴒𐴟𐴓𐴞𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴀𐴥𐴞𐴁𐴤𐴝𐴌𐴥𐴠 𐴀𐴠𐴓𐴝𐴅 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴁𐴝𐴚𐴓𐴝𐴊𐴠𐴐𐴢 𐴉𐴝𐴌 𐴒𐴡𐴌𐴥𐴝𐴘𐴁𐴤𐴝𐴌 𐴑𐴟𐴐𐴤𐴞𐴐𐴢 𐴒𐴡𐴌𐴥𐴝 𐴎𐴝𐴀𐴝𐴌 𐴁𐴡𐴓𐴞 𐴘𐴥𐴡 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴥𐴠 𐴱𐴱

𐴊𐴡𐴀𐴡𐴙𐴕 𐴑𐴟𐴀𐴟𐴌𐴞𐴘𐴥𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝𐴌 𐴓𐴧𐴝 𐴵 𐴱 𐴇𐴥𐴝𐴎𐴝𐴌 𐴔𐴠𐴄𐴞𐴌𐴥𐴑 𐴄𐴡𐴕 𐴏𐴡𐴙𐴓 𐴊𐴝𐴕 𐴒𐴡𐴙𐴅𐴧𐴤𐴙𐴠 ( 𐴋𐴝𐴁𐴓𐴙𐴟 𐴀𐴠𐴉𐴢 𐴂𐴞 ) 𐴌𐴥𐴠 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑 𐴴 𐴲 𐴰 𐴲 𐴔𐴡𐴚𐴒𐴡𐴓 𐴁𐴝𐴌𐴠 , 𐴌𐴟𐴇𐴝𐴙𐴚𐴒𐴙𐴝𐴌 𐴅𐴝𐴕 𐴁𐴝𐴏𐴝 𐴔𐴡𐴊𐴡𐴃 𐴀𐴥𐴞𐴏𐴝𐴉𐴠 , 𐴁𐴝𐴚𐴓𐴝𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴔𐴡𐴊𐴤𐴟𐴌 𐴏𐴥𐴡𐴌𐴝 𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 ( 𐴋𐴝𐴁𐴓𐴙𐴟 𐴀𐴝𐴉𐴢 𐴂𐴞 ) 𐴕𐴝𐴔𐴡𐴌 𐴃𐴡𐴕𐴎𐴞𐴔𐴡𐴌 𐴀𐴡𐴉𐴥𐴞𐴏𐴡𐴃 , 𐴊𐴡𐴀𐴡𐴙𐴕 𐴑𐴟𐴀𐴟𐴌𐴞𐴘𐴝 𐴘𐴠 𐴵 𐴱 𐴇𐴥𐴝𐴎𐴝𐴌 𐴄𐴡𐴕 𐴔𐴠𐴄𐴞𐴌𐴥𐴞𐴑 𐴄𐴡𐴕 𐴏𐴡𐴙𐴓𐴡𐴌 𐴊𐴝𐴕 𐴕𐴝𐴔𐴥𐴝 𐴒𐴡𐴏𐴥𐴝𐴘 𐴊𐴞𐴘𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴁𐴡𐴘𐴊𐴠𐴐𐴤𐴡𐴌 𐴈𐴥𐴡𐴁𐴡𐴌

𐴀𐴟𐴔𐴦𐴝𐴕𐴡𐴃 𐴔𐴡𐴏𐴥𐴡𐴙𐴃𐴤𐴡𐴌 𐴋𐴤𐴝𐴑𐴤𐴠 𐴀𐴝𐴃𐴡𐴚𐴁𐴝𐴊𐴞 𐴇𐴥𐴝𐴔𐴓𐴝𐴃 𐴴 𐴎𐴡𐴕𐴡𐴌 𐴔𐴡𐴗𐴃 𐴀𐴝𐴌 𐴁𐴡𐴀𐴡𐴃 𐴎𐴡𐴕 𐴒𐴤𐴝𐴙𐴓 𐴱𐴱

𐴀𐴝𐴌𐴡𐴁 𐴕𐴞𐴘𐴥𐴟𐴎 𐴈𐴥𐴡𐴁𐴡𐴌𐴞 𐴈𐴝𐴁𐴡𐴏𐴡𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴀𐴟𐴔𐴦𐴝𐴕𐴡𐴌 𐴌𐴝𐴎𐴊𐴤𐴝𐴕𐴞 𐴔𐴡𐴏𐴑𐴤𐴡𐴃𐴤𐴡𐴃 𐴀𐴠𐴑 𐴔𐴡𐴏𐴥𐴡𐴙𐴃𐴡𐴌 𐴋𐴤𐴝𐴑𐴤𐴠 𐴀𐴝𐴃𐴡𐴚𐴁𐴝𐴊𐴞 𐴇𐴥𐴝𐴔𐴓𐴝𐴃 𐴴 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴔𐴡𐴌𐴞 𐴒𐴞𐴘𐴥𐴡𐴘 𐴀𐴝𐴌 𐴁𐴡𐴀𐴡𐴃 𐴔𐴝𐴕𐴥𐴟𐴙𐴐𐴢 𐴒𐴤𐴝𐴙𐴓 𐴀𐴥𐴡𐴘𐴧𐴠𐴊𐴠

𐴎𐴝𐴕𐴝 𐴒𐴞𐴘𐴥𐴠 , 𐴀𐴝𐴌 𐴏𐴦𐴟𐴌𐴡𐴃𐴇𐴥𐴝𐴓𐴡 𐴌𐴥𐴠 𐴄𐴤𐴞𐴑 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴟𐴓𐴠 𐴇𐴥𐴠𐴉𐴝𐴎𐴡𐴃𐴞 𐴈𐴝𐴔 𐴀𐴥𐴡𐴑𐴧𐴡𐴓 𐴒𐴡𐴌𐴥𐴝 𐴒𐴞𐴘𐴥𐴠 𐴁𐴡𐴓𐴞 𐴉𐴟𐴓𐴞𐴐𐴡𐴌 𐴎𐴞𐴔𐴧𐴝𐴊𐴝𐴌𐴠 𐴈𐴡𐴘𐴧𐴥𐴠 𐴊𐴠 𐴎𐴝𐴕𐴝 𐴒𐴞𐴘𐴥𐴠 , 𐴒𐴤𐴡𐴄𐴡𐴕𐴝𐴌 𐴏𐴥𐴡𐴁𐴡𐴁 𐴑𐴞 , 𐴎𐴝𐴕𐴞𐴁𐴤𐴡𐴓𐴧𐴝 𐴀𐴞𐴕𐴑𐴟𐴖𐴝𐴌𐴞 𐴏𐴡𐴓𐴠𐴌 𐴀𐴝𐴌 𐴒𐴡𐴁𐴤𐴝 𐴀𐴥𐴡𐴑𐴧𐴡𐴓 𐴎𐴡𐴔𐴝 𐴒𐴡𐴌𐴥𐴝 𐴎𐴝𐴀𐴝𐴌 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴥𐴠 𐴱𐴱